ភ្នំពេញៈរដ្ឋមន្រ្តីក្រសួងការងារ លោក អ៊ិត សំហេង បានចុះកិច្ចព្រមព្រៀង ជាមួយសមភាគីកូរ៉េខាងត្បូង ដើម្បីបង្កើតគេហទំព័រស្វែងរកការងារតាមអនឡាញ សម្រាប់ពលរដ្ឋកម្ពុជា ក្នុងអំឡុងដំណើរទស្សនកិច្ចរយៈពេល ៥ ថ្ងៃទៅប្រទេសកូរ៉េខាងត្បូង ក្នុងអំឡុងចូលឆ្នាំខ្មែរ។
កិច្ចព្រមព្រៀងដែលមានទឹកប្រាក់ ៣,១ លានដុល្លារ រវាងរដ្ឋមន្រ្តីទាំងពីរ ដែលមានសុពលភាពរហូតដល់ឆ្នាំ ២០២១ ជាមួយនឹងថវិកាពីប្រទេសកូរ៉េ។ គោលបំណងនៃកិច្ចព្រមព្រៀងនេះ គឺដើម្បីបង្កើតទិន្នន័យការងារតាមអនឡាញជាសាធារណៈក្នុងប្រទេសកម្ពុជា ដើម្បីផ្គូរផ្គងអ្នកស្វែងរកការងារ ជាមួយនឹងការងារ ដែលនិយោជកកំពុងត្រូវការ។ នេះបើយោងតាមក្រសួងការងារ។
អ្នកនាំពាក្យក្រសួងការងារ លោក ហេង សួរ បានសង្កត់ធ្ងន់ថា កិច្ចព្រមព្រៀងនេះ មិនពាក់ព័ន្ធនឹងពលករចំណាកស្រុកទេ ប៉ុន្តែ«គឺដើម្បីពង្រឹងសេវាស្វែងរកការងារជាសាធារណៈ សម្រាប់ទីភ្នាក់ងារជាតិមុខរបរនិងការងារ»។
រដ្ឋាភិបាលទាំងពីរ នឹងធ្វើការសិក្សា ទៅលើប្រព័ន្ធសេវាការងារសាធារណៈ របស់ប្រទេសទាំងពីរជាមុនសិន នៅមុនពេលការចាប់ផ្តើមគម្រោងនេះ នាឆ្នាំក្រោយ ដែលនឹងពាក់ព័ន្ធនឹងការបង្កើតនិងការដំឡើងបច្ចេកវិទ្យានិងសូហ្វវែរ (software) ដើម្បីបង្កើតប្រព័ន្ធផ្គូរផ្គងការងារ។
លោក អ៊ិត សំហេង បានថ្លែងថា ជំហានទី ៣ ក្នុងឆ្នាំ ២០២១ នឹងផ្តោតទៅលើការតាមដានបច្ចេកទេស និងការវាយតម្លៃ។
គម្រោងនេះ នឹងដឹកនាំដោយទីភ្នាក់ងារជាតិមុខរបរ និងការងារ ដែលត្រូវបានបង្កើតឡើងក្នុងឆ្នាំ ២០០៩ ដែលដើរតួជាច្រកចេញចូលតែមួយ សម្រាប់ក្រុមហ៊ុននានា ដែលស្វែងរកកម្មករនិយោជិត។
ក្នុងអំឡុងដំណើរទស្សនកិច្ចនេះ លោក អ៊ិត សំហេង ក៏បានប្រារព្ធនិងអបអរពិធីចូលឆ្នាំខ្មែរ ជាមួយពលករកម្ពុជារាប់រយនាក់ ដែលកំពុងរស់នៅប្រទេសកូរ៉េខាងត្បូងផងដេរ ហើយលោកបានក្រើនរំលឹកពួកគេ ឲ្យគោរពតាមច្បាប់អន្តោប្រវេសន៍ និងត្រឡប់មកប្រទេសកម្ពុជាវិញ បន្ទាប់ពីចប់កិច្ចសន្យាការងាររបស់ខ្លួន៕PS