ភ្នំពេញៈ ប្រព័ន្ធផ្សព្វផ្សាយក្នុងស្រុក និងជប៉ុន បានរាយការណ៍ថា កម្ពុជា និង ជប៉ុន និងបង្កើនទំនាក់ទំនងរបស់ខ្លួនទៅជា «ភាពជាដៃគូជាយុទ្ធសាស្រ្ត» ក្នុងអំឡុងកិច្ចពិភាក្សាទ្វេភាគីរវាងលោកនាយករដ្ឋមន្រ្តី ហ៊ុន សែន និងលោក ស៊ិនហ្សូ អាបេ នាយករដ្ឋមន្រ្តី ជប៉ុន កាលពីថ្ងៃអាទិត្យ។
មេដឹកនាំទាំងពីរបានជួបពិភាក្សាគ្នានៅអមនឹងកិច្ចប្រជុំកំពូល រំឭកខួបអាស៊ាន និង ជប៉ុន នៅទីក្រុង តូក្យូ ដែលអបអរសាទរទំនាក់ទំនងការទូតគម្រប់ខួប ៤០ ឆ្នាំ។
ទីភ្នាក់ងារព័ត៌មានរដ្ឋ AKP បានរាយការណ៍ថា ជប៉ុន ក៏បានប្រកាសថា ខ្លួននឹងបញ្ជូនអ្នកជំនាញបោះឆ្នោតមកកម្ពុជា សម្រាប់ «ទស្សនកិច្ចសិក្សា» ដើម្បីជួយធ្វើកំណែទម្រង់ការបោះឆ្នោត។
យោងតាម AKP បានឲ្យដឹងថា លោក ហ៊ុន សែន បានថ្លែងថា៖ «ដំណើរទស្សនកិច្ចរបស់ឯកឧត្តម ស៊ិនហ្សូ អាបេ មកកាន់កម្ពុជាកាលពីខែ វិច្ឆិកា ឆ្នាំមុន និងដំណើរទស្សនកិច្ច របស់ខ្ញុំនៅ ជប៉ុន ឆ្នាំនេះ គឺជាជំហានវិជ្ជមានដើម្បីពង្រីកទំនាក់ទំនង រវាងប្រទេសទាំងពីរ ទៅជាទំនាក់ទំនងយុទ្ធសាស្រ្ត»។
អនុស្សរណៈ នៃការយោគយល់គ្នារវាងក្រសួងការពារជាតិរបស់ប្រទេសទាំងពីរ ក៏ត្រូវបានចុះហត្ថលេខា ហើយយោងតាមសារព័ត៌មាន Japan Times បានឲ្យដឹងថា លោក អាបេ បានសន្យាផ្តល់ប្រាក់កម្ចីថ្មីចំនួន ជាង ១៣៤ លានដុល្លារសម្រាប់គម្រោងហេដ្ឋារចនាសម្ព័ន្ធនៅកម្ពុជា។
សារព័ត៌មាននេះ បានរាយការណ៍ទៀតថា គម្រោងទាំងនេះ រាប់បញ្ចូលគម្រោងលើកកម្ពស់ស្ថិរភាពថាមពលជុំវិញភ្នំពេញ កែលម្អប្រព័ន្ធធារាសាស្រ្តនិងកសាងផ្លូវ ហាយវេ ដែលតភ្ជាប់ភ្នំពេញទៅប្រទេស ថៃ។
លោក កុយ គួង អ្នកនាំពាក្យក្រសួង ការបរទេសមិនអាចទាក់ទងសុំការអត្ថាធិប្បាយបានទេកាលពីម្សិលមិញ៕ TK
