The Phnom Penh Post Search

Search form




Logo of Phnom Penh Post newspaper Phnom Penh Post - កម្ពុជា ត្រៀម​ខ្លួនរួចរាល់​ក្នុងការ​ទទួលជន​ភៀសខ្លួនបន្ថែម

កម្ពុជា ត្រៀម​ខ្លួនរួចរាល់​ក្នុងការ​ទទួលជន​ភៀសខ្លួនបន្ថែម

Content image - Phnom Penh Post
ជនភៀសខ្លួន​នៅ​អូស្ត្រាលី​តវ៉ា​ប្រឆាំង​នឹង​ការ​ប៉ុនប៉ង​បញ្ជូន​ពួកគេ​មក​កម្ពុជា​កន្លងមក​។ រូបថត សហការី

កម្ពុជា ត្រៀម​ខ្លួនរួចរាល់​ក្នុងការ​ទទួលជន​ភៀសខ្លួនបន្ថែម

ភ្នំពេញៈ កម្ពុជា​បាន«ត្រៀម​ខ្លួន​រួច​រាល់​ហើយសម្រាប់​ទទួល​យក​ជនភៀស​ខ្លួន​បន្ថែម​ទៀត​»។ នេះ​បើ​តាម​លោក ស្រ៊ី ថាមរង្គ រដ្ឋ​មន្រ្តី​អម​នាយក​រដ្ឋ​មន្រ្តី​ ហ៊ុន សែន ​ដែល​បានថ្លែង​នៅថ្ងៃ​ពុធ​បន្ទាប់​ពី​កិច្ច​ជំនួប​រវាងលោកនាយករដ្ឋមន្ត្រី​និង​រដ្ឋមន្រ្តី​អន្តោ​ប្រវេសន៍​អូស្រ្តាលី​លោក Peter Dutton ​នៅ​រាជ​ធានីភ្នំ​ពេញ។

កិច្ច​ពិភាក្សា​នេះ​ធ្វើឡើង​តែ​ប៉ុន្មាន​ថ្ងៃ​ប៉ុណ្ណោះ បន្ទាប់​ពី​ជនភៀស​ខ្លួន​ជនជាតិភាគ​តិច​រ៉ូហ៊ីង​យ៉ា​ម្នាក់​ដែល​បានមក​ដល់​កម្ពុជា​ក្រោមកិច្ច​ព្រមព្រៀងផ្តល់​ការ​តាំង​លំនៅ​រវាង​កម្ពុជា​និង​អូស្រ្តាលី​ និយាយ​ថា​ គាត់​ចង់​ត្រឡប់​ទៅ​ប្រទេស​មីយ៉ាន់ម៉ា​វិញ​ និង​​បន្ទាប់​ពី​មាន​ប្រព័ន្ធផ្សព្វផ្សាយ​និយាយ​ថា កិច្ច​ព្រម​ព្រៀង​ផ្តល់​ការ​តាំង​លំនៅ​សម្រាប់​ជន​ភៀស​ខ្លួន​ដែល​មាន​លក្ខណៈ​ចម្រូង​ចម្រាសនេះ​​កំពុង​មាន​បញ្ហា​។

លោក ស្រ៊ី ថាមរង្គ ​បាន​ថ្លែង​ថា​៖ «​យើងត្រៀម​ខ្លួន​ទទួល​យក​ជន​ភៀស​ខ្លួន​បន្ថែម​ទៀត​យើង​នឹង​បញ្ជូនមន្រ្តីមួយ​ក្រុម​ពី​ក្រសួង​មហា​ផ្ទៃ​ទៅ​សម្ភាសន៍​ពួក​គេ​»។

«​ទាំង​លោក​នាយករដ្ឋមន្រ្តី​ និង​លោក Dutton ចង់​ឲ្យ​មាន​ជន​ភៀស​ខ្លួន​​មក​បន្ថែមទៀត​ដោយ​ផ្អែកលើ​គោល​ការណ៍​ស្ម័គ្រចិត្ត​»។ ​

លោក Dutton បាន​បដិសេធ​ដោយមិន​អត្ថាធិប្បាយ​ពី​កិច្ចប្រជុំ​នេះ​កាល​ពីថ្ងៃ​ពុធ​ ដោយ​គ្រាន់​តែ​ថ្លែង​ថា លោក​គ្រោង«​ធ្វើ​សេចក្តី​ថ្លែង​ការណ៍​ជាវិជ្ជ​មាន​មួយ​នៅ​ពេលព្រឹក»។

​ជា​ថ្នូរនឹង​ជំនួយ ២៨ លានដុល្លារ​ និង ១០,៨ លាន​ដុល្លារ​បន្ថែម​ទៀត​សម្រាប់​ការ​ចំណាយ​លើការតាំង​លំនៅ​ កម្ពុជា​កាល​​ពីខែ​កញ្ញា​ឆ្នាំ​មុន​បាន​ព្រមព្រៀង​ទទួល​យក​ជន​ភៀស​ខ្លួនដែល​ឃុំ​​នៅ​ក្នុង​ជំរំឃុំ​ខ្លួន​គ្រប់គ្រង​ដោយ​អូស្រ្តាលី​នៅ​លើ​កោះ ​ណូរុ។ ​ ​

ទោះ​បីយ៉ាង​ណា​ក្តី ​មានតែ​ជនភៀស​ខ្លួន ៤ នាក់​ក្នុង​ចំណោម ៦៧៧ នាក់​ប៉ុណ្ណោះ​ ដែល​ក្នុង​នោះ​មានជន​ជាតិ​អ៊ឺរ៉ង់៣នាក់ និងជនជាតិ​​រ៉ូហ៊ីង​យ៉ា​ម្នាក់ ​បានយល់​ព្រម​មក​កម្ពុជា។

អ្នក​នាំ​ពាក្យ​ក្រសួង​មហា​ផ្ទៃ លោក ខៀវ សុភ័គ​ និង​លោក កែម សារិន ប្រធាន​នាយកដ្ឋាន​ជន​ភៀស​ខ្លួន​មិន​អាច​ទាក់​ទង​សុំ​អត្ថា​ធិប្បាយ​បាន​ទេ ប៉ុន្តែ​លោក សារិន បាន​ថ្លែង​កាល​ពីថ្ងៃ​ចន្ទ​ថា ​ខណៈ​ដែលកិច្ច​ព្រម​ព្រៀង​ក្នុង​ទម្រង់​បច្ចុប្បន្ន​មាន​សុពលភាព​រយៈពេល ៤ ឆ្នាំ​ «​ប្រសិនបើមាន​បញ្ហា​ណា​មួយ​ ភាគី​នី​មួយ​ៗ​អាច​ជម្រាប​ភាគី​ម្ខាង​ទៀត​អំពី​ការ​ផ្លាស់​ប្តូរ​ ឬ​ការ​បញ្ឈប់វិញ »៕

អត្ថបទគួរចាប់អារម្មណ៍