.jpg)
ទិដ្ឋភាពក្នុងផ្សាររុងក្លឿនៃប្រទេសថៃក្បែរព្រំដែនកម្ពុជា-ថៃពីឆ្នាំ ២០១៩។ ហេង ជីវ័ន
បន្ទាយមានជ័យៈ អភិបាលខេត្តបន្ទាយមានជ័យលោក អ៊ុំ រាត្រី កាលពីថ្ងៃទី ៩ មីនា បានដឹកនាំប្រតិភូកម្ពុជាជួបប្រជុំពិភាក្សាការងារជាមួយភាគីថៃ ដើម្បីរកដំណោះស្រាយបញ្ហាបន្ទាន់ជូនអាជីវករខ្មែរឱ្យបានចូលទៅលក់ដូរនៅផ្សាររ៉ុងក្លឿឡើងវិញ ខណៈអ្នកឃ្លាំមើលតាមព្រំដែនស្នើឱ្យប្រទេសទាំង ២ ពិចារណាឱ្យបានលឿនបំផុតដើម្បីបើកច្រកព្រំដែន ដោយគោរពតាមគោលការណ៍សុខភាព។
លោក អ៊ុំ រាត្រី សរសេរនៅលើទំព័រហ្វេសប៊ុករបស់លោកកាលពីថ្ងៃទី ៩ មីនា ថា៖ «ខ្ញុំបាទបានដឹកនាំប្រតិភូខេត្តជួបប្រជុំពិភាក្សាការងាររកដំណោះស្រាយបញ្ហាបន្ទាន់ ជូនបងប្អូនអាជីវករលក់ដូរផ្សាររ៉ុងក្លឿជាមួយលោកអភិបាលខេត្តស្រះកែវ ប្រទេសថៃ នៅទីស្នាក់ការគយថៃ ច្រកទ្វារអន្តរជាតិប៉ោយប៉ែតខ្លងឡឹក»។
លោកបន្តថា កិច្ចប្រជុំ ពិភាក្សា លើការអនុវត្តរួមឡើងវិញ ចំពោះបងប្អូនអាជីវករខ្មែរចូលទៅលក់ដូរ នៅផ្សាររ៉ុងក្លឿដែលកន្លងមកខេត្តទាំង ២ បានខិតខំសម្របសម្រួលឱ្យបងប្អូនអាចចូលទៅលក់ដូរ ដោយគោរពតាមគោលការណ៍លើកមុនតាមវិធានសុខាភិបាលក្នុងបរិបទកូវីដ ១៩។
ទោះយ៉ាងណាលោក អ៊ុំ រាត្រី អះអាងថា ជាលទ្ធផលចំពោះការសម្រេចបើកផ្សាររ៉ុងក្លឿនេះមិនទាន់ដាក់ឱ្យអនុវត្តឡើងវិញនោះទេ ព្រោះកិច្ចប្រជុំនៅត្រូវការពេលវេលានៃការពិភាក្សារកដំណោះស្រាយបន្ថែមទៀត។
កាលពីខែធ្នូ ឆ្នាំ ២០២០ កម្ពុជា និងថៃបានជួបពិភាក្សាគ្នាម្តងរួចមកហើយ ជុំវិញបញ្ហានៃការបើកច្រកព្រំដែនបន្ថែម និងអនុញ្ញាតឱ្យពលករកម្ពុជាអាចចូលទៅធ្វើការ និងប្រកបអាជីវកម្មលើទឹកដីថៃវិញរួមទាំងការបើកផ្សាររ៉ុងក្លឿនេះផង។ ប៉ុន្តែជាលទ្ធផល ភាគីទាំង ២ បានឯកភាពគ្នាយកបញ្ហាទាំងនេះ ទៅសិក្សាផ្នែកវេជ្ជសាស្ត្របន្ថែមទៀតក្នុងការការពារការរីករាលដាលជំងឺកូវីដ ១៩។
លោក ឌិន ពុទ្ធី ប្រធានសមាគម ពង្រឹងសេដ្ឋកិច្ចក្រៅប្រព័ន្ធជំរុញឱ្យភាគីទាំង ២ ពិភាក្សាគ្នាដើម្បីឈានទៅរកលទ្ធភាពក្នុងការបើកច្រកព្រំដែន និងបើកឱ្យអាជីវករចូលទៅប្រកបរបរដូចធម្មតាវិញឱ្យបានឆាប់រហ័ស។ លោកជំរុញយ៉ាងដូច្នេះ ក៏ព្រោះតែជិតរយៈពេល ១ ឆ្នាំហើយ ដែលភាគីថៃបានប្រកាសបិទព្រំដែនជាមួយកម្ពុជា ខណៈការនាំចូលទំនិញគ្រប់បែបយ៉ាងពីប្រទេសថៃ នៅតែអាចចូលមកកម្ពុជាដោយទូលាយ ផ្ទុយឆ្ងាយពីទំនិញដែលកម្ពុជានាំចេញទៅប្រទេសនេះ។
លោកថា៖ «យើងឃើញថា កន្លងមកមិនមានការបើកអ្វីឡើងវិញនោះទេភាគីថៃនៅតែមកបានទាំងឡាន។ ចំណែកខ្មែរយើងទាំងអាជីវករ កម្មករទាំងអស់នៅច្រកប៉ោយប៉ែតនេះ គឺបិទឈឹងតែម្តង។ ភាពខុសគ្នារវាងកម្ពុជា និងថៃនេះ គឺមិនស្មើគ្នាសោះ ហើយបើភាគីខាងថៃមិនព្រមបើកទេ ហេតុអ្វីយើង មិនបិទមិនឱ្យថៃចូលដែរមក»។
តាមលោក ឌិន ពុទ្ធី ចាប់តាំងពីប្រទេសថៃ បានបិទព្រំដែនរបស់គេមក បានធ្វើឱ្យអាជីវករ និងពលរដ្ឋខ្មែរនៅតាមព្រំដែនជួបការលំបាក ដោយសារចំណូលរបស់ពួកគេត្រូវបានបាត់បង់ទាំងស្រុង។ រីឯ ពលរដ្ឋខ្មែរដែលប្រថុយប្រថានឆ្លងដែនទៅប្រទេសថៃត្រូវចំណាយថវិកាទ្វេដង និងប្រឈមនឹងគ្រោះថ្នាក់ផងដែរ។
រដ្ឋាភិបាលថៃបានប្រកាសបិទព្រំដែនជាមួយកម្ពុជាកាលពីខែមីនាឆ្នាំមុន ហើយក្រោយពីមានកិច្ចចរចា ភាគីទាំង ២ ក៏បានឯកភាពឱ្យមានការដោះដូរទំនិញរវាងប្រទេសទាំង ២ នៅតាមច្រកទ្វារព្រំដែន អន្តរជាតិមួយចំនួន ខណៈប្រទេសថៃរឹតបន្តឹងសុវត្ថិភាព ដើម្បីការពារការរាលដាលជំងឺកូវីដ ១៩៕
វីដេអូ៖
