បន្ទាយមានជ័យៈ មជ្ឈមណ្ឌលសកម្មភាពកំចាត់មីនកម្ពុជា និងថៃបានពិភាក្សាគ្នាកាលពីម្សិលម្ង៉ៃស្ដីពីការកំណត់ទីតាំងត្រូវដោះមីន និងយុទ្ធភណ្ឌមិនទាន់ផ្ទុះតាមព្រំដែនដើម្បីគាំទ្រដល់ការអភិវឌ្ឍ និងការរស់នៅរបស់ពលរដ្ឋនៃប្រទេសទាំង ២។ នេះបើតាមលោក ហេង រតនា អគ្គនាយកមជ្ឈមណ្ឌលសកម្មភាពកំចាត់មីនកម្ពុជា (CMAC) ពីម្សិលមិញ។
លោក ហេង រតនា បានថ្លែងថា (CMAC) និងមជ្ឈមណ្ឌលសកម្មភាពកំចាត់មីនថៃ (TMAC) ដែលមានលោក Sittipol Nimnuan ជាអគ្គនាយកបានឯកភាពគ្នាជាជំហានៗក្នុងការបោសសម្អាតមីនលើទឹកដីរៀងៗខ្លួនដោយមានការចូលរួមពីគណៈកម្មាធិការព្រំដែនទូទៅកម្ពុជា-ថៃ (GBC) ហើយបានសន្យាពិភាក្សាគ្នាក្រោយៗទៀត ដើម្បីអនុវត្តការងាររាជរដ្ឋាភិបាលនៃប្រទេសទាំង ២ បានកំណត់ឲ្យមានប្រសិទ្ធភាព។
លោកបានបញ្ជាក់ថាក្នុងជំនួបនេះ CMAC និង TMAC បានយកចិត្តទុកដាក់ពង្រឹងកិច្ចសហប្រតិបត្តិការបោសសម្អាតមីនជាពិសេសនៅតាមព្រំដែនកម្ពុជា-ថៃ ដោយអនុលោមតាមស្មារតីកិច្ចប្រជុំ និងការសម្រេចរបស់ (GBC)។
លោក រតនា បានបញ្ជាក់ថា៖ «យើងបានជ្រើសរើសតំបន់តាមបណ្ដោយព្រំដែនជាជំហានទី ១ ហើយយើងនឹងធ្វើការជាមួយថៃក្នុងពេលតែមួយ ប៉ុន្ដែទីតាំងខុសគ្នាគឺថៃធ្វើនៅទឹកដីថៃ កម្ពុជាធ្វើនៅកម្ពុជាគឺចម្ងាយ ៣ គីឡូម៉ែត្រពីព្រំដែននីមួយៗ។ ចំណែកកម្ពុជាយើងបានកំណត់ទីតាំងនៅខេត្តបន្ទាយមានជ័យ ឧត្តរមានជ័យ និងខេត្តព្រះវិហារក្រោយមកយើងបន្តពិនិត្យបន្ថែម រួចប្រជុំម្ដងទៀតដើម្បីប្រតិបត្តិការតែម្ដង»។
ក្រៅពីចូលរួមកិច្ចប្រជុំនោះលោក ហេង រតនា និងគណៈប្រតិភូ CMAC បានជួបជាមួយលោក Hans Brattskar ឯកអគ្គរដ្ឋទូតតំណាងអចិន្រៃ្តយ៍ប្រទេសន័រវែសប្រចាំនៅអង្គការសហប្រជាជាតិអមដំណើរដោយលោកស្រីឯកអគ្គរដ្ឋទូតន័រវែស ប្រចាំទីក្រុងបាងកកទទួលបន្ទុកកុងស៊ុលកម្ពុជាបានរួមគ្នាធ្វើទស្សនកិច្ចនៅមន្ទីរពេទ្យអារញ្ញប្រាថេត ប្រទេសថៃព្រមទាំងស្វែងយល់ពីការធ្វើជើងសិប្បនិមិ្មតក្នុងមន្ទីរពេទ្យផងដែរ។
បន្ទាប់ពីបញ្ចប់ទស្សនកិច្ចនោះលោកឯកអគ្គរដ្ឋទូតន័រវែសប្រចាំនៅទីក្រុងហ្សឺណែវ ប្រទេសស្វ៊ីស និងគណៈប្រតិភូបានធ្វើដំណើរចូលទឹកដីកម្ពុជា ទស្សនាចម្ការមីនក្នុងស្រុកម៉ាឡៃ ខេត្តបន្ទាយមានជ័យ និងបន្តធ្វើទស្សនកិច្ចនៅសារមន្ទីរសន្តិភាព CMAC នៅខេត្តសៀមរាបពីម្សិលមិញ។
គួរបញ្ជាក់ថាការបោសសម្អាតមីនតាមព្រំដែនកម្ពុជា-ថៃ រាជរដ្ឋាភិបាលនៃប្រទេសទាំង ២ បានប្រគល់ភារកិច្ចឲ្យអង្គភាព CMAC និង TMAC អនុវត្តជាសេនាធិការជូន GBC ។ អង្គភាពទាំង ២ នឹងបន្តអនុវត្តឲ្យបានល្អដើម្បីសម្រេចឲ្យបាននូវការងារដែលរដ្ឋាភិបាលនៃប្រទេសទាំង ២ ប្រគល់ជូន។
តាមអនុសញ្ញាអូតាវ៉ា ថៃគ្រោងនឹងសម្រេចឲ្យបាននូវការបោសសម្អាតមីនឲ្យអស់នៅឆ្នាំ ២០២៣ ខណៈកម្ពុជាកំណត់ឲ្យដោះគ្រាប់មីនប្រឆាំងមនុស្សឲ្យអស់នៅឆ្នាំ ២០២៥ ។
ករណីដាច់ដោយឡែកមួយទៀតកាលពីថ្ងៃទី ១២ ធ្នូពលរដ្ឋម្នាក់បានប្រទះឃើញគ្រាប់មីនតោន ១ គ្រាប់ ខណៈកំពុងភ្ជួរដីដោយផ្លែផាលត្រាក់ទ័រ បានឆ្កឹះបំប៉ើងមីនចេញពីដីនៅភូមិអូរស្ងួត ឃុំតាសាញ់ ស្រុកសំឡូត ខេត្តបាត់ដំបង ហើយបានរាយការណ៍ជូនមន្ត្រីនគរបាល ហើយសមត្ថកិច្ចឃុំតាសាញ់បានយកមករក្សាទុកនៅអធិការដ្ឋាននគរបាលស្រុកសំឡូត រង់ចាំ CMAC យកទៅកម្ទេចចោល ៕