ទំនាក់ទំនងជាច្រើនរវាងប្រទេសថៃ និងកម្ពុជា កាន់តែមានភាពរឹងមាំ ដោយសារតែមានកិច្ចខិតខំប្រឹងប្រែងជាច្រើនក្នុងរយៈពេលប៉ុន្មានទសវត្សរ៍កន្លងមកនេះ ពីសំណាក់រាជរដ្ឋាភិបាល និងថ្នាក់ដឹកនាំនៃប្រទេសទាំង ២។ ការពង្រឹងចំណងមិត្តភាពដ៏កក់ក្តៅបែបនេះបានរួមចំណែកដល់ទំនាក់ទំនងរវាងប្រជាជន និងប្រជាជនដ៏គួរឲ្យកត់សម្គាល់ ជាចំណងមិត្តភាពដែលកាន់តែមានភាពស្និទ្ធស្នាល ដែលបានផ្តល់អត្ថប្រយោជន៍ដល់ប្រទេសទាំង ២។
ឆ្នាំនេះ គឺជាខួបលើកទី ៧០ ការបង្កើតទំនាក់ទំនងការទូតរវាងកម្ពុជា-ថៃ ហើយវាជាព្រឹត្តិការណ៍ដ៏សំខាន់មួយដែលបានបង្ហាញអំពីចំណងមិត្តភាពដ៏កក់ក្តៅរវាងប្រទេសជិតខាងទាំង ២ នេះ។
ឯកឧត្តម Panyarak Poolthup ឯកអគ្គរាជទូតវិសាមញ្ញ និងពេញសមត្ថភាពនៃព្រះរាជាណាចក្រថៃឡង់ដ៍ប្រចាំកម្ពុជា បានបង្ហាញនូវជំនឿចិត្តយ៉ាងមុតមាំថា ប្រទេសទាំង ២ មានអ្វីៗជាច្រើនដែលត្រូវចែករំលែក ខណៈប្រទេសទាំង ២ កំពុងបន្តភាពរីកចម្រើន។
ភាពរឹងមាំនៃទំនាក់ទំនងទ្វេភាគីនេះ គឺត្រូវបានផ្សារភ្ជាប់តាមរយៈប្រវត្តិសាស្ត្ររាប់សតវត្សរ៍កន្លងមកហើយ ដោយសារប្រទេសទាំង ២ មានវប្បធម៌ និងសាសនាស្រដៀងគ្នា ដែលធ្វើឲ្យចំណងមិត្តភាពរវាងប្រទេសជិតខាងទាំង ២ នៅតែមានភាពរឹងមាំ ទោះបីមានបញ្ហាប្រឈមមួយចំនួនកាលពីអតីតកាលក្តី។ មន្ត្រីការទូតជាន់ខ្ពស់របស់ថៃប្រចាំកម្ពុជារូបនេះបានថ្លែងថា ពួកគេនឹងខិតខំប្រឹងប្រែង និងពង្រីកទំនាក់ទំនងទ្វេភាគីច្រើនឆ្នាំទៅមុខបន្តទៀត។
«បច្ចុប្បន្នយើងកំពុងរីករាយនឹងទំនាក់ទំនងទ្វេភាគីដ៏រឹងមាំបំផុតនេះ ដោយសារទំនាក់ទំនងជិតស្និទ្ធរវាងមេដឹកនាំនៃប្រទេសទាំង ២។ ឆន្ទៈនយោបាយតែងតែមាននៅទីនេះជានិច្ច ដើម្បីដោះស្រាយបញ្ហាដែលអាចកើតឡើង»។
ឯកឧត្តម Panyarak មានប្រសាសន៍ថា៖ «សុខុមាលភាពរបស់ប្រជាជនបានក្លាយជាអាទិភាពរបស់រាជរដ្ឋាភិបាលទាំង ២ ហើយការរក្សាការសន្ទនាបើកចំហនៅគ្រប់កម្រិត គឺជាកត្តាគន្លឹះដែលអាចឲ្យយើងដោះស្រាយបញ្ហាជាមួយគ្នា ដើម្បីផលប្រយោជន៍រួម ហើយដោយសារតែយើងមានបន្ទាត់ព្រំដែនវែងជាមួយគ្នា យើងដឹងថា យើងត្រូវរស់នៅ និងរីកចម្រើនជាមួយគ្នា»។
ឯកឧត្តមបានសង្កត់ធ្ងន់ថា ទីក្រុងបាងកកមានទំនាក់ទំនងដ៏រឹងមាំជាមួយប្រទេសជិតខាង។
«ប្រទេសថៃ បានយកចិត្តទុកដាក់ខ្ពស់ចំពោះប្រទេសជិតខាងរបស់យើង។ នេះជាមូលដ្ឋានគ្រឹះដ៏សំខាន់នៃគោលនយោបាយការបរទេសរបស់ប្រទេសថៃ ទោះបីរាជរដ្ឋាភិបាលផ្លាស់ប្តូរ ប៉ុន្តែគោលនយោបាយនេះនឹងមិនផ្លាស់ប្តូរទេ»។
លទ្ធផលដ៏គួរឲ្យកត់សម្គាល់បានបង្ហាញតាមរយៈ តួលេខនៃទំហំ ពាណិជ្ជកម្មរវាងកម្ពុជា-ថៃ ក្នុងឆមាសទី១ ឆ្នាំ ២០២០ ស្ថិតក្នុងរង្វង់ទឹកប្រាក់ ៤ ពាន់លានដុល្លារសហរដ្ឋអាមេរិក ដោយរួមបញ្ចូលទាំងពាណិជ្ជកម្មតាមព្រំដែនកម្ពុជា-ថៃ ខណៈភ្ញៀវទេសចរថៃប្រមាណ ៤០០ ០០០ នាក់ បានមកទស្សនាប្រទេសកម្ពុជា ក្នុងឆ្នាំ ២០១៩។
ភាពរឹងមាំនៃទំនាក់ទំនងនេះក៏ត្រូវបានឆ្លុះបញ្ចាំងផងដែរ ដោយប្រជាជនកម្ពុជាជិត ៩០០ ០០០ នាក់បានទៅទស្សនាប្រទេសថៃ កាលពីឆ្នាំមុន ហើយមុនពេលជំងឺកូវីដរាតត្បាតឡើង មានជើងហោះហើរជាង ២០ ជើងក្នុង ១ ថ្ងៃ ដែលភ្ជាប់ទីក្រុងបាងកកមកទីក្រុងភ្នំពេញ ខេត្តសៀមរាប និងខេត្តព្រះសីហនុ។ មានពលករកម្ពុជាប្រមាណ ១ លាននាក់កំពុងធ្វើការនៅប្រទេសថៃ ហើយក្នុង ១ ឆ្នាំៗពួកគេបានផ្ញើប្រាក់យ៉ាងច្រើនមកក្រុមគ្រួសាររបស់ពួកគេ។
ការផ្លាស់ប្តូរនៃទំនាក់ទំនងទ្វេភាគីនេះបាននាំមកនូវកំណើន និងការគាំទ្រដល់សេដ្ឋកិច្ចនៃប្រទេសទាំង ២ ដែលធ្វើឲ្យប្រសើរឡើងនូវសុខុមាលភាពរបស់ប្រជាពលរដ្ឋនៅតាមព្រំដែននៃប្រទេសទាំង ២។
ប៉ុន្តែលើសពីតួលេខដ៏គួរឲ្យចាប់អារម្មណ៍ទាំងនេះ នៅមានទិដ្ឋភាពផ្សេងទៀតនៃទំនាក់ទំនងដែលអាចសំខាន់ជាងនេះទៅទៀត ពីព្រោះវាជាមូលដ្ឋានគ្រឹះដ៏រឹងមាំសម្រាប់ការចែករំលែកប្រកបដោយចីរភាព និងអនាគតរវាងកម្ពុជា និងថៃ។
«ប្រជាជនថៃ និងកម្ពុជាតែងតែមានទំនាក់ទំនងជិតស្និទ្ធគ្នា។ យោងតាមទីតាំងភូមិសាស្ត្រយើងមានខ្សែបន្ទាត់ព្រំដែនប្រវែង ៨០០ គីឡូម៉ែត្រ។
«យើងក៏មានទំនាក់ទំនងរវាងគ្រួសារ និងគ្រួសារ តាមរយៈអាពាហ៍ពិពាហ៍ឆ្លងព្រំដែន។ មុនពេលរាតត្បាតឡើងនៃជំងឺកូវីដ ១៩ អាជីវករអ្នកជំនួញ កម្មករ ទេសចរ និងនិស្សិតតែងតែធ្វើដំណើរទៅវិញទៅមករវាងប្រទេសទាំង ២»។
ឯកឧត្តម Panyarak មានប្រសាសន៍ថា៖ «ដោយមានវប្បធម៌ និងសាសនាស្រដៀងគ្នា បានធ្វើឲ្យប្រជាជនថៃ និងកម្ពុជាមានចំណាប់អារម្មណ៍ ចំណង់ចំណូលចិត្តស្រដៀងគ្នា»។
ចំពោះគម្រោងកិច្ចសហប្រតិបត្តិការអភិវឌ្ឍន៍ រាជរដ្ឋាភិបាលទាំង ២ បានប្តេជ្ញាអនុវត្តគោលនយោបាយប្រកាន់យកប្រជាជនជាស្នូល ហើយពួកគេកំពុងសម្លឹងទៅដល់ការជំរុញកិច្ចសហប្រតិបត្តិការទ្វេភាគីផ្សេងទៀត ដើម្បីសម្រេចឲ្យបាននូវសមិទ្ធផលកាន់តែច្រើន។
ទីភ្នាក់ងារសហប្រតិបត្តិការអន្តរជាតិថៃ (TICA) បានដើរតួនាទីដ៏សកម្ម និងសំខាន់ជាយូរមកហើយ ក្នុងការផ្សារភ្ជាប់ស្ថាប័នពាក់ព័ន្ធនានារបស់ភាគីទាំងពីរ ដោយផ្តល់ការសហការខាងវិស័យអភិវឌ្ឍធនធានមនុស្ស និងការផ្លាស់ប្តូរចំណេះដឹង។
គម្រោងកិច្ចសហប្រតិបត្តិការអភិវឌ្ឍន៍កម្ពុជា-ថៃ ដើម្បីជួយមន្ទីរពេទ្យនៅខេត្តកោះកុង និងឧត្តរមានជ័យ ស្ថិតក្នុងគំនិតផ្តួចផ្តើមមួយក្នុងចំណោមគម្រោងជាច្រើនទៀតប៉ុណ្ណោះ។
និស្សិត និងមន្ត្រីជាន់ខ្ពស់កម្ពុជាមួយចំនួនក៏ទទួលបានអាហារូបករណ៍ទៅសិក្សា និងការបណ្តុះបណ្តាលនៅប្រទេសថៃ ជារៀងរាល់ឆ្នាំផងដែរ។
ទន្ទឹមនឹងនេះដែរ គម្រោងជាច្រើនដែលត្រូវបានផ្តួចផ្តើមឡើងក្រោមគម្រោងព្រះរាជឧបត្ថម្ភរបស់ព្រះអង្គម្ទាស់ក្សត្រី Maha Chakri Sirindhorn បានផ្តល់ផលប្រយោជន៍ដល់ប្រជាជននៅមូលដ្ឋានជាច្រើនដែលធ្វើឲ្យជីវភាពរស់នៅរបស់ពួកគាត់ប្រសើរជាងមុនសម្រាប់ប្រជាពលរដ្ឋក្រីក្រ។
គម្រោងរបស់ព្រះអង្គម្ទាស់ក្សត្រី គឺមានគោលបំណងលើកកម្ពស់សុខភាពសាធារណៈនៅខេត្តមណ្ឌលគិរី និងរតនគិរី ហើយស្ថាប័នបណ្តុះបណ្តាលវិជ្ជាជីវៈនៅខេត្តកំពង់ធំ និងកំពង់ស្ពឺ បានផ្តល់លទ្ធផលជាក់ស្តែង និងគឺជាគំរូដ៏ល្អបំផុតមួយ។
ដើម្បីអបអរខួបលើកទី៧០ ការបង្កើតទំនាក់ទំនងការទូតរវាងកម្ពុជា-ថៃ ស្ថានទូតព្រះរាជាណាចក្រថៃឡង់ដ៍ប្រចាំព្រះរាជាណាចក្រកម្ពុជា មុនពេលផ្ទុះជំងឺកូវីដ ១៩ បានរៀបចំកម្មវិធីជាបន្តបន្ទាប់កាលពីដើមឆ្នាំនេះដើម្បីរំឭកដល់ចំណងមិត្តភាពទ្វេភាគីរយៈពេលយូរអង្វែងនៃប្រទេសទាំងពីរ។
ដោយបានចាប់ផ្តើមជាមួយនឹងការរៀបចំកម្មវិធីប្រគំតន្ត្រី jazz ដែលប្រគំដោយវង់តន្ត្រី Thailand Philharmonic Orchestra កាលពីខែកុម្ភៈ ដែលព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា បានយាងជាព្រះរាជាធិបតីដ៏ខ្ពង់ខ្ពស់បំផុតនៅក្នុងពិធីនោះ។
កម្មវិធីមួយទៀត គឺការប្រកួតរូបថតមិត្តភាពក្រោមប្រធានបទ «ចំណងមិត្តភាព ៧០ ឆ្នាំ ក្នុងកែវភ្នែកខ្ញុំ» ដែលត្រូវបានបង្កើតឡើង ដើម្បីផ្តល់ឱកាសដល់ប្រជាជនថៃ និងកម្ពុជាមកពីគ្រប់មជ្ឈដ្ឋានឲ្យបញ្ចេញទស្សនៈរបស់ពួកគេ អំពីទំនាក់ទំនងបច្ចុប្បន្នជាពិសេសនៅកម្រិតប្រជាជន និងប្រជាជន។
អតីតនិស្សិតសិក្សានៅប្រទេសថៃ ឈ្មោះហេង សុធារ័ត្ន អាយុ ២២ ឆ្នាំមកពីស្រុកកំពង់លាវ ខេត្តព្រៃវែង ដែលទទួលបានជយលាភីកិត្តិយសក្នុងការប្រកួតប្រជែងរូបថតបានលើកឡើងថា ទោះបីជាមានបញ្ហាកាលពីអតីតកាលក៏ដោយ ប៉ុន្តែ «នៅពេលដែលយើងបើកចិត្តចំពោះគ្នា នោះយើងនឹងស្គាល់គ្នា និងស្វែងយល់ពីគ្នាកាន់តែច្បាស់»។
ទន្ទឹមនឹងនេះដែរ លោក Vithitphol Sriwaraluck អាយុ ៤០ ឆ្នាំ ជាអ្នកដឹកនាំសិល្បៈនៅទូរទស្សន៍ប៉ុស្តិ៍លេខ ៥ ដែលទទួលបានជយលាភីលេខ ១ និងបានរស់នៅក្នុងប្រទេសកម្ពុជា អស់រយៈពេលជាង ៥ ឆ្នាំមកហើយនោះបានថ្លែងថា៖ «ប្រជាជនកម្ពុជាមានទឹកចិត្តទូលាយ និងកក់ក្តៅចំពោះជនបរទេស។ មិត្តភក្តិរបស់ខ្ញុំដែលជាជនជាតិខ្មែរបានចាត់ទុកខ្ញុំដូចជាសមាជិកគ្រួសារម្នាក់»។
ស្របពេលដែលទំនាក់ទំនងទ្វេភាគីមានភាពជិតស្និទ្ធនៅគ្រប់កម្រិតនោះ ប្រទេសទាំងពីរកំពុងបន្តរិះរកមធ្យោបាយផ្សេងទៀត ដើម្បីធានាថា ចំណងមិត្តភាពទាំងនេះរឹតតែរឹងមាំជាងមុន។
ការពង្រឹងការតភ្ជាប់ត្រូវបានចាត់ទុកជាអាទិភាពចម្បង។ ការតភ្ជាប់ទំនាក់ទំនងអាចមានទាំងផ្នែករូបវន្ត ដូចជាហេដ្ឋារចនាសម្ព័ន្ធដែលភ្ជាប់ប្រទេសទាំងពីរ និងផ្នែកអរូបវន្តដូចជាការយល់អំពីគ្នារវាងប្រជាជនថៃ និងប្រជាជនកម្ពុជា។
លោកឯកអគ្គរាជទូតបានសង្កត់ធ្ងន់ថា៖ «ការរួមផ្សំរវាងផ្នែកទាំងពីរ គឺរូបវន្ត និងអរូបវន្ត រវាងប្រទេសទាំងពីរ គឺជាឆ្អឹងខ្នងដ៏រឹងមាំនៃទំនាក់ទំនងទ្វេភាគី ដើម្បីធានាថាប្រទេសជិតខាងទាំងពីរនឹងរីកចម្រើនជាមួយគ្នាច្រើនឆ្នាំទៅមុខទៀត»៕