.jpg)
ជំនួបរវាងលោក អ៊ិត សំហេង និងលោកស្រី Heaeun CHOI កាលពីម្សិលមិញ។ ហុង មិនា
ភ្នំពេញៈ កម្ពុជា និងសាធារណរដ្ឋកូរ៉េបានសហការគ្នាបង្កើតច្បាប់ស្តីពីសុវត្ថិភាព និងសុខភាពការងារដើម្បីលើកកម្ពស់បញ្ហាសុវត្ថិភាពដល់កម្មករនិយោជិតកម្ពុជានៅតាមរោងចក្រ សហគ្រាស ឱ្យកាន់តែប្រសើរបន្ថែមទៀត ហើយការសិក្សានេះគ្រោងចំណាយទឹកប្រាក់ជាង ២៧ ម៉ឺនដុល្លារ ដោយរំពឹងថានឹងលេចរូបរាងនៅឆ្នាំ ២០២៣ ខាងមុខ។
ការប្រកាសពីគម្រោងនៃការសិក្សាបង្កើតច្បាប់មួយនេះបានធ្វើឡើងកាលពីម្សិលមិញនាទីស្តីការក្រសួងការងារក្នុងជំនួបរវាងលោក អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ និងលោកស្រី Heaeun CHOI អគ្គនាយិការងនៃអគ្គនាយកដ្ឋានអភិវឌ្ឍន៍កិច្ចសហប្រតិបត្តិការក្រសួងការងារនៃសាធារណរដ្ឋកូរ៉េដែលដឹកនាំក្រុមការងារបច្ចេកទេសរបស់ខ្លួនមកទស្សនកិច្ចនៅកម្ពុជា។
នៅក្នុងជំនួបនោះ លោក អ៊ិត សំហេង បានជំរុញភាគីកូរ៉េឲ្យជួយពន្លឿនការអនុវត្តគម្រោងសិក្សាស្រាវជ្រាវ និងរៀបចំច្បាប់នេះឲ្យរួចរាល់ក្នុងឆ្នាំ ២០២៣ ខាងមុខនេះដើម្បីកាត់បន្ថយនូវគ្រោះថ្នាក់ការងារ ជំងឺវិជ្ជាជីវៈរបស់កម្មករនិយោជិតនៅកន្លែងធ្វើការ។ លោកបន្តថា ច្បាប់ស្តីពីសុវត្ថិភាព និងសុខភាពការងារបានប្រើប្រាស់នៅតំបន់អាស៊ានរួចមកហើយ លើកលែងតែប្រទេសកម្ពុជា និងប្រទេសឡាវប៉ុណ្ណោះដែលមិនទាន់មានច្បាប់នេះ។
លោកបញ្ជាក់ថា៖ «សព្វថ្ងៃនេះ យើងមានច្បាប់មានប្រកាស យើងមានសារាចរដែលនិយាយពីសុវត្ថិភាព និងសុខភាពការងារគឺវាមានភាពទូលំទូលាយ។
ប៉ុន្តែបើយើងយករឿងសុវត្ថិភាពទាំងអស់ដាក់បញ្ចូលទៅក្នុងច្បាប់តែមួយ អ៊ីចឹងយើងត្រូវរៀបចំឲ្យមានដែលសំខាន់គឺការពារគ្រោះថ្នាក់ការងារ និងជំងឺហ្នឹងនៅកន្លែងការងារ»។
តាមលោក អ៊ិត សំហេង គម្រោងលើការរៀបចំច្បាប់នេះគឺមានរយៈពេល ៣ ឆ្នាំ (២០២១-២០២៣) ដែលត្រូវប្រើថវិកាសរុបចំនួន ២៧៧ ៨៦៣ ដុល្លារអាមេរិកដោយមានការគាំទ្រផ្នែកបច្ចេកទេស និងហិរញ្ញវត្ថុពីទីភ្នាក់ងារសុខភាព និងសុវត្ថិភាពការងារនៃប្រទេសកូរ៉េ (Korea Occupational Safety & Health Agency KOSHA)។
លោកស្រី Heaeun CHOI អគ្គនាយករងនៃអគ្គនាយកដ្ឋានអភិវឌ្ឍន៍កិច្ចសហប្រតិបត្តិការក្រសួងការងារនៃសាធារណរដ្ឋកូរ៉េបានលើកឡើងនៅក្នុងជំនួបនោះថា រដ្ឋាភិបាលនៃសាធារណរដ្ឋកូរ៉េ បាននិងកំពុងតែរៀបចំច្បាប់ គតិយុត្ត និងចុះសិក្សាស្រាវជ្រាវបន្ថែមទៀតដើម្បីធានាថាក្រោយពីច្បាប់នេះត្រូវបានដាក់ឲ្យអនុវត្ដគឺទទួលការគាំទ្រពីគ្រប់ភាគីពាក់ព័ន្ធ និងផ្ដល់ផលប្រយោជន៍ដល់កម្មករនិយោជិតកាន់តែប្រសើរ។
លោកស្រីបញ្ជាក់ថា៖ «ភាគីកូរ៉េបានថ្លែងអំណរគុណចំពោះរាជរដ្ឋាភិបាលកម្ពុជា និងក្រសួងការងារដែលបានផ្តល់នូវកិច្ចសហប្រតិបត្តិការល្អហើយភាគីកូរ៉េនឹងបន្តគាំទ្រដល់ការលើកកម្ពស់សុវត្ថិភាព និងសុខភាពការងាររបស់កម្មករនិយោជិត នៅតាមរោងចក្រ សហគ្រាសឲ្យរឹតតែទទួលបានភាពល្អប្រសើរបន្ថែមទៀត»។
លោក ឡេង តុង ប្រធាននាយកដ្ឋានពេទ្យការងារនៃក្រសួងការងារ និងបណ្តុះបណ្តាលវិជ្ជាជីវៈបានផ្តល់បទសម្ភាស ក្រោយបញ្ចប់ជំនួបនោះថា កម្ពុជាបានស្នើសាធារណរដ្ឋកូរ៉េឲ្យជួយលើបង្កើតច្បាប់ស្តីពីសុវត្ថិភាព និងសុខភាពការងាររយៈពេល ២ ឆ្នាំមកហើយ។
លោកបន្តថា គណៈប្រតិភូនៃទីភ្នាក់ងារសុខភាព សុវត្ថិភាពការងារកូរ៉េ (KOSHA) នៃសាធារណរដ្ឋកូរ៉េបានសន្យាថា នឹងបន្តជួយកម្ពុជាក្នុងការលើកកម្ពស់បញ្ហាសុវត្ថិភាព និងសុខភាពការងារដល់កម្មករនិយោជិតនៅតាមរោងចក្រសហគ្រាសឱ្យកាន់តែប្រសើរ ហើយក៏ដើម្បីបង្ហាញនូវការគាំទ្រដល់គម្រោងរៀបចំច្បាប់ស្តីពីសុវត្ថិភាព និងសុខភាពការងារសម្រាប់ប្រទេស កម្ពុជា ផងដែរ។
លោក ឡេង តុង បានបញ្ជាក់ថា៖ «(ភាគីកូរ៉េ) ចុះមកនេះ គឺមកស្វែងយល់លម្អិតថាតើប្រទេសកម្ពុជា ត្រូវការអ្វី ព្រោះមិនអាចលើកច្បាប់កូរ៉េទាំងស្រុងហើយមកត្រូវនឹងបរិបទនៅក្នុងស្រុកខ្មែរទេ។ ធ្វើម៉េចឲ្យរៀបចំច្បាប់នេះឲ្យត្រូវតាមបរិបទប្រទេសកម្ពុជា។
គាត់មកសិក្សាស្វែងយល់គាត់មកជួបទាំងតំណាងនិយោជក តំណាងរដ្ឋាភិបាល និងតំណាងសហជីព និងអង្គការអន្តរជាតិខាងការងារ»។
បើតាមក្រសួងការងារ ការរៀបចំច្បាប់ស្តីពីសុវត្ថិភាព និងសុខភាពការងារបានកំណត់នៅក្នុងកម្មវិធីទី ១ នៃផែនការយុទ្ធសាស្ត្រអភិវឌ្ឍន៍វិស័យការងារ និងបណ្តុះបណ្តាលវិជ្ជាជីវៈ ដំណាក់កាលទី ២ ឆ្នាំ ២០១៩-២០២៣ របស់ក្រសួងការងារ និងបណ្តុះបណ្តាលវិជ្ជាជីវៈ។ បន្ថែមពីនេះ គម្រោងតាក់តែងច្បាប់នេះក៏នឹងរួមចំណែកដល់គោលនយោបាយរបស់រាជរដ្ឋាភិបាល ជាពិសេសការយកចិត្តទុកដាក់លើសុខុមាលភាព និងសុវត្ថិភាពការងារនៅប្រទេសកម្ពុជា។
លោក ប៉ាវ ស៊ីណា ប្រធានសម្ព័ន្ធសហជីពចលនាកម្មករបានចាត់ទុកថា គម្រោងនេះគឺជារឿងល្អដែលកម្ពុជាបានសហការជាមួយកូរ៉េក្នុងការចូលរួមគាំទ្រដល់សុវត្ថិភាពការងារ និងសុខភាពរបស់កម្មករខ្មែរ ប៉ុន្តែអ្វីដែលលោកចង់ឃើញបំផុតនោះគឺការអនុវត្តច្បាប់ប្រកបដោយប្រសិទ្ធភាព។
លោកបញ្ជាក់ថា៖ «អ្វីដែលខ្ញុំមើលឃើញគឺច្បាប់ស្តីពីការងារយើងលិខិតបទដ្ឋានគត្តិយុត្តផ្សេងៗរបស់យើងគឺមានច្រើនណាស់ (ការពារ) មិនជាអន់ទេ។ ប៉ុន្តែអ្វីដែលសំខាន់គឺខ្វះនូវយន្តការអនុវត្ត ហើយសំខាន់ជាងនេះទៀតគឺខ្វះការប្តេជ្ញាចិត្តក្នុងការអនុវត្ត ជាពិសេសការដាក់សម្ពាធទៅក្រុមហ៊ុនណាដែលមិនគោរពច្បាប់បានចែង»៕
