ភ្នំពេញៈ ប្រទេសកម្ពុជា និងប្រទេសបាបាដុស បានភ្ជាប់ទំនាក់ទំនងការទូតជាមួយគ្នា ដើម្បីជំរុញការយោគយល់គ្នាទៅវិញទៅមក និងពង្រឹងចំណងមិត្តភាព និងកិច្ចសហប្រត្តិការរវាងប្រជាជនទាំង ២។ នេះបើយោងតាមសេចក្ដីថ្លែងការណ៍រួមដែលផ្សព្វផ្សាយដោយក្រសួងការបរទេសនិងសហប្រតិបត្តិការអន្តរជាតិកាលពីថ្ងៃពុធម្សិលមិញ។
សេចក្ដីថ្លែងការណ៍រួមដែលចុះថ្ងៃទី ១១ ខែវិច្ឆិកាឆ្នាំ ២០១៩ ត្រូវបានចុះហត្ថលេខាដោយលោក កែ សុវណ្ណ និងលោកស្រី ហេនរីតា អេលីហ្សាបែត ថូមសិន ឯកអគ្គរាជទូត វិសាមញ្ញ និងពេញសមត្ថភាពដែលតំណាងអចិន្រៃ្តយ៍ប្រចាំនៅអង្គការសហប្រជាតិ តំណាងប្រទេសទាំង ២។
សេចក្ដីថ្លែងការណ៍សរសេរថា ការបង្កើតទំនាក់ទំនងការទូតនេះធ្វើឡើង «ដោយឈរលើគោលការណ៍ និងគោរពបំណងនៃធម្មនុញ្ញអង្គការសហប្រជាជាតិ និងច្បាប់អន្តរជាតិ ជាពិសេសក្នុងគោលបំណងគោរព និងពង្រឹងសន្តិសុខ និងសន្តិភាព អន្តរជាតិ សមភាពរវាងរដ្ឋ និងរដ្ឋ អធិបតេយ្យភាពជាតិ ឯករាជភាព សន្ធិសញ្ញាអន្តរជាតិ បូរណភាពទឹកដី និងការមិនជ្រៀតជ្រែកកិច្ចការផ្ទៃក្នុងរវាងរដ្ឋ និងរដ្ឋ»។
ការបង្កើតទំនាក់ទំនងការទូតថ្នាក់ឯកអគ្គរាជទូតនេះក៏ធ្វើឡើង ដោយអនុលោមទៅតាមបទប្បញ្ញត្តិនៃអនុសញ្ញាទីក្រុងវីយែនស្ដីពីទំនាក់ទំនងការទូតចុះថ្ងៃទី ១៨ ខែ មេសា ឆ្នាំ ១៩៦១។ ការបង្កើតទំនាក់ទំនងការទូតនេះ គឺមានសុពលភាពគិតចាប់ពីថ្ងៃទី ១១ ខែវិច្ឆិកា តទៅ។
លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជាថ្លែងថា ទំនាក់ទំនងការទូតជាមួយប្រទេសជាកោះមួយនៅតំបន់ការីប៊ីននេះធ្វើឲ្យរដ្ឋទាំង ២ អាចគាំទ្រគ្នាទៅវិញទៅមកនៅលើបញ្ហាអន្តរជាតិនានា។
លោកបានថ្លែងថា៖ «វាជាការពង្រីកនូវទំនាក់ទំនងរវាងប្រទេសកម្ពុជា និងប្រទេសផ្សេងៗទៀត បើទោះបីជាប្រទេស បាបាដុស ជាកោះតូចមួយក៏ដោយ។ នៅក្នុងទំនាក់ទំនងអន្តរជាតិបើយើងមានមិត្តកាន់តែច្រើន វាកាន់តែល្អ។ នេះវាស្របទៅនឹងគោលការណ៍រាជរដ្ឋាភិបាលដែលពង្រីកមិត្តខាងក្រៅពង្រឹងខាងក្នុងផ្អែកលើស្មារតីឯករាជ្យជាតិ»។
លោក គិន ភា បន្តថា បើទោះបីជាការមានទំនាក់ទំនងការទូតជាមួយប្រទេសណាក៏ដោយ ក៏ទំនាក់ទំនងនេះធ្វើឲ្យប្រទេសទាំង ២ អាចជួយគាំទ្រគ្នាទៅវិញទៅមកទៅលើបញ្ហាតំបន់ និងបញ្ហាអន្តរជាតិ។ វាជាការប្រសើរដែលកម្ពុជាបង្កើតមិត្តជាជាងបង្កើតសត្រូវ ហើយការបង្កើតចំណងការទូតកាន់តែច្រើននេះគឺជានិន្នាការដែលប្រទេសនៅលើពិភពលោកកំពុងធ្វើ។
លោក កុយ គួង អ្នកនាំពាក្យក្រសួងការបរទេស និងសហប្រតិបត្តិការអន្តរជាតិមិនអាចទាក់ទងសុំការបញ្ជាក់បន្ថែមបានទេកាលពីម្សិលមិញ៕