ភ្នំពេញៈ កម្ពុជា និងអូស្ត្រាលីបានប្ដេជ្ញាគាំទ្រគ្នាទៅវិញទៅមកនៅក្នុងក្របខ័ណ្ឌតំបន់ និងអន្តរជាតិ ហើយអូស្ត្រាលីនឹងបន្តសហការ និងជួយដល់ការអភិវឌ្ឍនៅកម្ពុជាលើវិស័យជាច្រើនទៀត។ នេះបើតាមលទ្ធផលនៃកិច្ចប្រជុំថ្នាក់ឧត្តមមន្ត្រីកម្ពុជា-អូស្ត្រាលីលើកទី២ កាលពីថ្ងៃទី ២៨ មករា ប្រព្រឹត្តទៅតាមប្រព័ន្ធវីដេអូ។
បើតាមសេចក្ដីប្រកាសព័ត៌មានរបស់ក្រសួងការបរទេស និងសហប្រតិបត្តិការអន្តរជាតិ កិច្ចប្រជុំនេះដឹកនាំដោយលោកស្រី សឿង រដ្ឋចាវី រដ្ឋលេខាធិការក្រសួងការបរទេស និងសហប្រតិបតិ្តការអន្តរជាតិកម្ពុជា និងលោក ចាស្ទីន ហេហ៊ើស អនុរដ្ឋលេខាធិការក្រសួងការបរទេស និងពាណិជ្ជកម្មអូស្ត្រាលី។
ក្រសួងការបរទេសសរសេរថា៖ «ភាគីទាំង ២ ក៏បានបង្ហាញនូវបំណងប្រាថ្នារួមដើម្បីពង្រឹង និងពង្រីកកិច្ចសហប្រតិបត្តិការ និងការគាំទ្រគ្នាទៅវិញទៅមកក្នុងក្របខ័ណ្ឌតំបន់ និងអន្តរជាតិ រួមទាំងអាស៊ាន កិច្ចប្រជុំអាស៊ីអឺរ៉ុប អង្គការសហប្រជាជាតិ និងកិច្ចសហប្រតិបត្តិការអនុតំបន់មេគង្គ ដើម្បីចូលរួមចំណែករក្សាសន្ដិភាព សន្ដិសុខ និងការអភិវឌ្ឍដែលប្រកបដោយចីរភាព»។
ភាគីទាំង ២ បានកោតសរសើរថ្នាក់ដឹកនាំនៃប្រទេសនីមួយៗដែលបានដាក់ចេញវិធានការទប់ស្កាត់ និងគ្រប់គ្រងការរីករាលដាលនៃជំងឺកូវីដ១៩ នៅក្នុងប្រទេសទាំង ២ ប្រកបដោយជោគជ័យ ព្រមទាំងសម្របសម្រួលដល់ការធ្វើដំណើរនៃពលរដ្ឋរបស់ប្រទេសទាំង ២។
កម្ពុជាក៏បានថ្លែងអំណរគុណដល់អូស្ត្រាលីដែលផ្ដល់ជំនួយឥតសំណង ២៨ លានដុល្លារ សម្រាប់គាំទ្រដល់ការចាក់វ៉ាក់សាំងដែលទទួលស្គាល់ដោយអង្គការសុខភាពពិភពលោក។
ពាក់ព័ន្ធនឹងកិច្ចសហប្រតិបត្តិការក្នុងវិស័យសន្តិសុខ និងការពារជាតិ ភាគីទាំង ២ ឯកភាពជំរុញកិច្ចសហប្រតិបត្តិការក្នុងការគ្រប់គ្រងព្រំដែន ការប្រយុទ្ធប្រឆាំងឧក្រិដ្ឋកម្មឆ្លងដែន រួមមាន ការជួញដូរមនុស្ស ការរត់ពន្ធគ្រឿងញៀន ការលាងលុយកខ្វក់ ការប្រយុទ្ធប្រឆាំងអំពើភេរវកម្ម និងសន្ដិសុខលម្ហសមុទ្រ តាមរយៈកម្មវិធីបណ្ដុះបណ្ដាលសម្រាប់នាយទាហាន និងមន្ត្រីអនុវត្តច្បាប់។
សេចក្ដីប្រកាសព័ត៌មានសរសេរថា៖ «ភាគីអូស្ដ្រាលីស្វាគមន៍ប្រសាសន៍របស់សម្ដេចតេជោនាយករដ្ឋមន្ត្រីនៃព្រះរាជាណាចក្រកម្ពុជាថា កម្ពុជាប្រកាន់ខ្ជាប់នូវនយោបាយអព្យាក្រឹតអចិន្រៃ្តយ៍ និងមិនចូលបក្សសម្ព័ន្ធ និងមិនអនុញ្ញាតឱ្យមានមូលដ្ឋានទ័ពបរទេសនៅលើទឹកដីកម្ពុជាឡើយ»។
ភាគីអូស្ដ្រាលីបញ្ជាក់ជាថ្មីអំពីការប្ដេជ្ញាចិត្តរបស់អូស្ដ្រាលីបន្ដជួយដល់កម្ពុជា ជាពិសេសក្នុងវិស័យអាទិភាពដូចជា អប់រំ ហេដ្ឋារចនាសម្ព័ន្ធដែលមានគុណភាពខ្ពស់ ពាណិជ្ជកម្ម កសិកម្ម សុខាភិបាល និងបោសសម្អាតមីន។
កម្ពុជាអរគុណអូស្ដ្រាលីដែលបានផ្ដល់ជំនួយដ៏មានតម្លៃ និងគាំទ្រវិស័យនានាដែលបានចូលរួមចំណែកដល់ការអភិវឌ្ឍសេដ្ឋកិច្ចសង្គមកម្ពុជា។ អូស្ត្រាលីក៏បានបញ្ជាក់ពីការបង្កើនចំនួនអាហារូបករណ៍ដល់កម្ពុជានៅឆ្នាំ ២០២២។
សេចក្ដីប្រកាសព័ត៌មានក៏បានបញ្ជាក់ដែរថា៖ «កិច្ចប្រជុំបានធ្វើការផ្លាស់ប្ដូរយោបល់លើកិច្ចសហប្រតិបត្តិការផ្នែកសិទ្ធិមនុស្ស និងលទ្ធិប្រជាធិបតេយ្យនៅកម្ពុជា និងបានឯកភាពបន្ដសហការគ្នាយ៉ាងជិតស្និទ្ធក្នុងស្មារតីស្ថាបនា»។
អូស្ត្រាលីក៏នឹងគាំទ្រកម្ពុជាក្នុងការធ្វើជាម្ចាស់ផ្ទះរៀបចំកិច្ចប្រជុំកំពូលអាស៊ីអឺរ៉ុបលើកទី ១៣ នៅឆ្នាំ ២០២១ នេះការធ្វើជាប្រធានអាស៊ានរបស់កម្ពុជា នៅឆ្នាំ ២០២២។ កម្ពុជាស្វាគមន៍គំនិតផ្ដួចផ្ដើមរបស់រដ្ឋាភិបាលអូស្ដ្រាលីស្ដីពីកម្មវិធីមេគង្គ-អូស្ដ្រាលី ដែលឆ្លុះបញ្ចាំងអំពីការប្ដេជ្ញាចិត្តរបស់រដ្ឋាភិបាលអូស្ដ្រាលីដើម្បីលើកកម្ពស់ការអភិវឌ្ឍប្រកបដោយចីរភាពនៅក្នុងតំបន់មេគង្គ។
លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជាថ្លែងថា ទំនាក់ទំនងរវាងប្រទេសអូស្ត្រាលីជាមួយនឹងព្រះរាជាណាចក្រកម្ពុជាហាក់ដូចជាប្រសើរឡើងគួរឱ្យចាប់អារម្មណ៍នៅក្នុងរយៈពេលចុងក្រោយនេះ ជាពិសេសឥរិយាបថប្រយ័ត្នប្រយែងក្នុងការធ្វើសេចក្ដីថ្លែងការណ៍ណាមួយអំពីជំហររបស់ខ្លួនមកលើកម្ពុជា។ ប្រទេសទាំង ២ ក៏បង្ហាញឥរិយាបថមួយមានលក្ខណៈស្ថាបនា និងមានភាពវិជ្ជមាន។
លោក គិន ភា ថ្លែងថា៖ «តិច ឬច្រើន អូស្ត្រាលីសម្ដែងកង្វល់របស់ខ្លួនជុំវិញវឌ្ឍនភាពក៏ដូចជាដំណើរការលទ្ធិប្រជាធិបតេយ្យ និងសិទ្ធិមនុស្សនៅកម្ពុជា ប៉ុន្តែទម្រង់នៃការសម្ដែងកង្វល់ ឬចូលរួមស្ថាបនាដំណើរការប្រជាធិបតេយ្យ និងសិទ្ធិមនុស្សនៅកម្ពុជាគឺធ្វើឡើងដោយប្រយ័ត្នប្រយែង គោរពនូវក្របខ័ណ្ឌអ្នកការទូតបរទេសក្នុងរដ្ឋម្ចាស់ផ្ទះ។ វាជាទម្រង់មួយដែលគេមិនអាចវាយតម្លៃបានថាជាការជ្រៀតជ្រែកផ្ទៃក្នុងរបស់កម្ពុជា»។
លោកបានថ្លែងថា ប្រទេសអូស្ត្រាលីមានឥរិយាបថមួយខុសពីប្រទេសមួយចំនួនដែលមានឥរិយាបថហាក់ដូចជាបង្គាប់បញ្ជា ឬជ្រៀតជ្រែកផ្ទៃក្នុងរបស់កម្ពុជា ប៉ុន្តែមានឥរិយាបថបែបស្ថាបនា។ ឥរិយាបថបែបស្ថាបនានេះគឺជាអ្វីដែលរដ្ឋាភិបាលងាយនឹងទទួលយក៕