ភ្នំពេញៈ លោកឧបនាយករដ្ឋមន្ត្រី យឹម ឆៃលី ប្រធានក្រុមប្រឹក្សាស្តារអភិវឌ្ឍន៍វិស័យកសិកម្ម និងជនបទបានចុះហត្ថលេខាលើកិច្ចព្រមព្រៀងក្នុងការបន្តភាពជាដៃគូលើបញ្ហាស្បៀងអាហាររយៈពេល ៤ ឆ្នាំគឺពីឆ្នាំ ២០២០ ដល់ឆ្នាំ ២០២៣ ជាមួយនឹងលោកស្រី គ្លែរ អែននី កូនិន (Claire Anne Conan) នាយិកាប្រចាំប្រទេសកម្ពុជានៃកម្មវិធីស្បៀងអាហារពិភពលោក (WFP) ពីម្សិលមិញ។
លោក យឹម ឆៃលី បានថ្លែងក្នុងពិធីចុះហត្ថលេខានេះថា កម្មវិធីស្បៀងអាហារពិភពលោក (WFP) តែងតែសហការយ៉ាងល្អ និងជួយដល់រាជរដ្ឋាភិបាល និងប្រជាជនកម្ពុជាតាំងពីប្រទេសកម្ពុជាមានសង្គ្រាមរហូតដល់ប្រទេសមានសន្តិភាពពេញលេញ និងការអភិវឌ្ឍគ្រប់វិស័យដូចសព្វថ្ងៃនេះ។
លោកថ្លែងថា៖ «ក្នុងរយៈពេល ៤១ ឆ្នាំនេះ កម្មវិធីស្បៀងអាហារពិភពលោកបានជួយឱ្យជនភៀសខ្លួននៅតាមបណ្តោយព្រំដែនកម្ពុជា-ថៃបានវិលត្រឡប់មកជួបជុំគ្រួសារជួយកសាង និងស្តារហេដ្ឋារចនាសម្ព័ន្ធនៅជនបទជួយឱ្យកុមារបានចូលសាលារៀន ជួយកាត់បន្ថយភាពអត់ឃ្លាន និងបញ្ហាកង្វះអាហារូបត្ថម្ភ និងជំងឺផ្សេងៗ»។ លើសពីនេះ កម្មវិធីស្បៀងអាហារពិភពលោកបានជួយលើកកម្ពស់ជីវភាពប្រជាជន និងជួយឆ្លើយតបទៅនឹងគ្រោះមហន្តរាយធម្មជាតិ ដូចជាទឹកជំនន់ និងគ្រោះរាំងស្ងួតជាដើម ដើម្បីការពារសុវត្ថិភាព និងអាយុជីវិតរបស់ប្រជាជន។
លោក ឆៃលី លើកឡើងថា បច្ចុប្បន្ននេះវត្តមានរបស់កម្មវិធីស្បៀងអាហារពិភពលោក រឹតតែមានសារៈសំខាន់ក្នុងការចូលរួមចំណែកដល់ការអភិវឌ្ឍ និងការភិវឌ្ឍថ្មីៗក្នុងតំបន់ និងពិភពលោកតាមរយៈការជួយរៀបចំគោលនយោបាយ យុទ្ធសាស្ត្រ ការពង្រឹងសមត្ថភាពស្ថាប័ន និងមន្ត្រីទាំងនៅថ្នាក់ជាតិ និងថ្នាក់ក្រោមជាតិ ការសម្របសម្រួល ការតស៊ូមតិ ការសិក្សាស្រាវជ្រាវ និងការគ្រប់គ្រងព័ត៌មាន និងចំណេះដឹង និងការកសាងមូលធនមនុស្ស។
ជាមួយគ្នានោះដែរ លោកស្រី គ្លែរ អែននី កូនិន បានលើកឡើងផងដែរថា កម្មវិធីស្បៀងអាហារពិភពលោកធ្វើការផ្គត់ផ្គង់ស្បៀង ដោយសារតែ [យើង] គិតថា ស្បៀងនឹងនាំមកនូវសន្តិភាពដែលនេះគឺជាចំណុចសំខាន់សម្រាប់ WFP ក្នុងការជួយដល់កម្ពុជា ក៏ដូចជាជួយទៅដល់ជនភៀសខ្លួននៅតាមព្រំដែនខ្មែរ-ថៃជាដើម។
លោកស្រីមានប្រសាសន៍ថា៖ «កាលពីពេលថ្មីៗនេះ WFP បានប្រារព្ធនូវទិវាស្បៀងពិភពលោកដែលយើងបានធ្វើឡើងនៅក្នុងប្រទេសកម្ពុជា ហើយដូចឯកឧត្តមជ្រាបហើយ យើងធ្វើការប្រយុទ្ធប្រឆាំងនឹងភាពអត់ឃ្លាន ដែលធ្វើឱ្យខ្វះនូវអាហារូបត្ថម្ភ ហើយជាពិសេសនៅក្នុងសម័យកូវីដនេះផងដែរ យើងឃើញមានប្រជាជនជាច្រើនរងគ្រោះដោយភាពអត់ឃ្លាន»។
លើសពីនេះ តួនាទីរបស់ WFP គឺចូលរួមទូទាំងពិភពលោក ជាពិសេសប្រទេសកម្ពុជាដើម្បីប្រយុទ្ធប្រឆាំងជាមួយនឹងភាពអត់ឃ្លាន និងកង្វះអាហារូបត្ថម្ភ ហើយ WFP នឹងជួយធ្វើការអន្តរាគមន៍ទៅដល់ការធ្វើយ៉ាងណាឱ្យបានប្រសើរឡើងនូវសន្តិសុខស្បៀង និងអាហារូបត្ថម្ភ។
លោកស្រី គ្លែរ អែននី កូនិន បានលើកឡើងថា៖ «សហប្រតិបត្តិការគ្នានេះ គឺជារឿងសំខាន់ណាស់ សម្រាប់ឆ្លើយតបនឹងបញ្ហាសន្តិសុខស្បៀង និងអាហារូបត្ថម្ភនេះ ហើយនៅក្នុងកិច្ចព្រមព្រៀងរបស់យើងរយៈពេល ៤ ឆ្នាំនេះដែលជាកិច្ចព្រមព្រៀងប្រចាំប្រទេស គឺបានផ្តោតទៅលើចំណុចផ្សេងៗជាច្រើន ហើយនៅក្នុងនោះយើងផ្តោតសំខាន់ទៅលើភាពជាដៃគូរវាង WFP ជាមួយនឹងស្ថាប័នពាក់ព័ន្ធរបស់រាជរដ្ឋាភិបាលហើយចំណុចសំខាន់គឺយើងផ្តោតលើការកសាងសមត្ថភាពរបស់ថ្នាក់ជាតិ និងថ្នាក់ក្រោមជាតិ ដើម្បីឆ្លើយតបនឹងការដោះស្រាយនូវកង្វះស្បៀង និងអាហារូបត្ថម្ភ»។
កិច្ចព្រមព្រៀងនៃភាពជាដៃគូរវាងក្រុមប្រឹក្សាស្តារអភិវឌ្ឍន៍វិស័យកសិកម្ម និងជនបទ និង WFP ផ្តោតសំខាន់លើ ៤ ចំណុចគឺ៖ ការរៀបចំ និងអនុវត្តយុទ្ធសាស្ត្រជាតិស្តីពីសន្តិសុខស្បៀង និងអាហារូបត្ថម្ភលើកទី ២ (២០២០-២០២៣) ការពង្រឹងការសម្របសម្រួលពហុវិស័យទាំងថ្នាក់ជាតិ និងថ្នាក់ក្រោមជាតិដើម្បីធ្វើផែនការសុខដុមនីយកម្មវិស័យស្បៀង និងអាហារូបត្ថម្ភ។ ការបញ្ជ្រាបការងារសន្តិសុខស្បៀង និងអាហារូបត្ថម្ភទៅក្នុងដំណើរការរៀបចំផែនការរបស់ក្រសួងស្ថាប័នពាក់ព័ន្ធរដ្ឋបាលថ្នាក់ក្រោមជាតិ ពិសេសផែនការអភិវឌ្ឍន៍ឃុំ-សង្កាត់។
លើសពីនេះមានការសម្រួលដល់ការគ្រប់គ្រងព័ត៌មាន និងចំណេះដឹង ការតស៊ូមតិ ការតាមដានត្រួតពិនិត្យ និងការធ្វើរបាយការណ៍លើវិស័យសន្តិសុខស្បៀង និងអាហារូបត្ថម្ភ៕