ភ្នំពេញៈ កម្ពុជាគ្រោងនឹងបើកស្ថានឯកអគ្គរាជទូតរបស់ខ្លួននៅក្នុងប្រទេសចំនួន ២ ទៀតនៅឆ្នាំ ២០១៩ ខាងមុខគឺនៅសាធារណរដ្ឋតួកគី និងនៅប្រទេសប៊ុលហ្គារី ដើម្បីពង្រឹងកិច្ចសហប្រតិបត្តិការជាមួយប្រទេសទាំងនោះ។ នេះបើយោងតាមសេចក្តីប្រកាសព័ត៌មានរបស់ក្រសួងការបរទេសកាលពីថ្ងៃសុក្រ។
នៅក្នុងការជំរុញកិច្ចសហប្រតិបត្តិការ និងភាពជាដៃគូរវាងប្រទេសទាំង ២ លោក ប្រាក់ សុខុន រដ្ឋមន្ត្រីក្រសួងការបរទេសកម្ពុជានឹងដឹកនាំគណៈប្រតិភូទៅបំពេញទស្សនកិច្ចផ្លូវការនៅប្រទេសតួកគីចាប់ពីថ្ងៃទី ១ ដល់ថ្ងៃទី ៣ ខែតុលានេះហើយក្នុងអំឡុងពេលបំពេញទស្សនកិច្ចនេះនឹងពិភាក្សាអំពីគម្រោងបើកស្ថានទូតថ្មីនេះ។
សេចក្តីប្រកាសព័ត៌មាននោះបានលើកឡើងថា៖ «លោករដ្ឋមន្ត្រីនឹងពិភាក្សាអំពីបញ្ហាផ្សេងៗដែលជាការព្រួយបារម្ភ និងយកចិត្តទុកដាក់រួមក្នុងបរិបទនៃកិច្ចសហប្រតិបត្តិការទ្វេភាគី តំបន់ និងអន្តរជាតិព្រមទាំងផ្តោតលើកិច្ចខិតខំប្រឹងប្រែងនានាដើម្បីពង្រឹងបន្ថែមទៀតនូវទំនុកចិត្តផ្នែកនយោបាយ និងស្វែងរកសក្តានុពលថ្មីៗក្នុងការជំរុញផលប្រយោជន៍ទៅវិញទៅមករបស់ប្រទេសទាំង ២»។
លើសពីនេះទៀតភាគីទាំង ២ ក៏នឹងចុះហត្ថលេខាលើអនុស្សរណៈនៃការយោគយល់គ្នាស្តីពីកិច្ចសហប្រតិបត្តិការរវាងវិទ្យាស្ថានជាតិការទូត និងទំនាក់ទំនងអន្តរជាតិនៃក្រសួងការបរទេស និងសហប្រតិបត្តិការអន្តរជាតិនៃព្រះរាជាណាចក្រកម្ពុជា និងបណ្ឌិត្យសភាការទូតនៃក្រសួងការបរទេសនៃសាធារណរដ្ឋតួកគីផងដែរ។
ទន្ទឹមនឹងនេះផងដែរកម្ពុជាក៏គ្រោងនឹងបើកស្ថានឯកអគ្គរាជទូតរបស់ខ្លួនមួយទៀតនៅប្រទេសប៊ុលហ្គារីឡើងវិញផងដែរនៅឆ្នាំ ២០១៩ ខាងមុខបន្ទាប់ពីវាត្រូវបានបិទជាបណ្តោះអាសន្នដោយសារតែស្ថានភាពនយោបាយតានតឹងនៅក្នុងប្រទេសនោះកាលពីពេលកន្លងមក។
សេចក្តីប្រកាសនេះត្រូវបានធ្វើឡើងបន្ទាប់ពីលោកនាយករដ្ឋមន្ត្រី ហ៊ុន សែន បានជួបជាមួយនាយករដ្ឋមន្ត្រីប្រទេសប៊ុលហ្គារីលោក Boyko Borrissov កាលពីថ្ងៃសុក្រនៅទីក្រុងញូវយ៉ក។ យ៉ាងណាក្តីការបើកស្ថានឯកអគ្គរាជទូតកម្ពុជានៅក្នុងប្រទេសទាំង ២ នេះមិនទាន់ត្រូវបានកំណត់ពេលជាក់លាក់ទេ។
លោក គាត សុផាន អ្នកនាំពាក្យក្រសួងការបរទេសមិនអាចទាក់ទងដើម្បីសុំការបំភ្លឺបន្ថែមលើបញ្ហានេះបានទេកាលពីម្សិលមិញ៕ NS