.jpg)
ច្រកព្រំដែនបាវិតនៅក្នុងខេត្តស្វាយរៀងកាលពីពេលកន្លងមក។ ហេង ជីវ័ន
ភ្នំពេញៈ កម្ពុជាផ្អាកជាបណ្ដោះអាសន្ននូវការធ្វើដំណើរចេញ-ចូលរបស់ពលរដ្ឋកម្ពុជា និងពលរដ្ឋវៀតណាមចូលទឹកដីប្រទេសទាំង ២ តាមគ្រប់ច្រកល្ហកចាប់ពីម៉ោង ២៣ និង ៥៩ នាទីយប់ថ្ងៃសុក្រនេះ បន្ទាប់ពីវៀតណាមបានបិទព្រំដែនរបស់ខ្លួនជាឯកតោភាគីកាលពីថ្ងៃទី ១៨ ខែមីនា ដោយសំអាងទៅលើការភ័យខ្លាចការរីករាលដាលសកលនៃជំងឺកូវីដ ១៩។
លោកនាយករដ្ឋមន្ត្រី ហ៊ុន សែន បានដាក់ចេញការសម្រេចនេះតាមរយៈសំណេររបស់លោកនៅលើទំព័រហ្វេសប៊ុកក៏ដូចជាសារជាសំឡេង ហើយក្រសួងការបរទេសក៏បានសរសេរលិខិតផ្លូវការប្រាប់ទៅស្ថានទូតវៀតណាមអំពីសេចក្តីសម្រេចនេះកាលពីថ្ងៃព្រហស្បតិ៍ម្សិលមិញ។
ការសម្រេចផ្អាកការធ្វើដំណើរបណ្ដោះអាសន្ននេះធ្វើឡើង បន្ទាប់ពីវៀតណាមបានសម្រេចបិទព្រំដែនរបស់ខ្លួនជាឯកតោភាគីដោយមិនឲ្យពលរដ្ឋកម្ពុជាចូលទៅប្រទេសវៀតណាមចាប់តាំងពីថ្ងៃទី ១៨ ខែមីនា។
យោងតាមលិខិតរបស់ស្ថានទូតខ្មែរប្រចាំប្រទេសវៀតណាមដែលផ្ញើជូនក្រសួងការបរទេសកាលពីថ្ងៃទី ១៨ ខែមីនា បានបញ្ជាក់ថា វៀតណាមបានសម្រេចផ្អាកផ្ដល់ទិដ្ឋាការបណ្ដោះអាសន្នដល់បរទេសទាំងអស់ចូលវៀតណាមរយៈពេល ៣០ ថ្ងៃចាប់ពីថ្ងៃទី ១៨ ខែមីនា។ រាល់ជនបរទេសទាំងអស់ដែលចូលវៀតណាមត្រូវដាក់ឲ្យនៅដាច់ដោយឡែកទ្រង់ទ្រាយធំតាមទីតាំងដែលបានគ្រោងទុក និងអនុវត្តចំពោះអ្នកដំណើរមកពីសហរដ្ឋអាមេរិក អឺរ៉ុប និងអាស៊ាន។
បើទោះបីជាវៀតណាមបានបិទព្រំដែនជាមួយកម្ពុជាក៏ដោយ ក៏លោក ហ៊ុន សែន ថ្លែងថានៅថ្ងៃទី ១៨ ខែមីនានោះមានពលរដ្ឋវៀតណាមប្រមាណ ៣០០ នាក់បានចូលមកក្នុងទឹកដីកម្ពុជា។ ប៉ុន្តែដោយការអាណិតដល់ពលរដ្ឋវៀតណាមដែលចូលមកកម្ពុជា កម្ពុជាទុកពេល ៤៨ ម៉ោងឲ្យពួកគេចាកចេញទៅវិញដើម្បីចៀសវាងក្លាយជាជនខុសច្បាប់។
លោក ហ៊ុន សែន ថ្លែងថា៖ «នេះជាបញ្ហាយើងមិនមែនជាការសងសឹក ឬឆ្លើយតបទាំងគំរោះគំរើយទេ។ ក៏ប៉ុន្តែយើងមានហេតុផល ដើម្បីបញ្ជាក់ឲ្យគាត់បានដឹងឲ្យប្រជាជនវៀតណាមបានដឹងថា រឿងហេតុដែលមិនបានចូលកម្ពុជា គឺយើងអាណិតពួកគាត់ទៅវិញទេ ព្រោះពួកគាត់ត្រឡប់ទៅវិញត្រូវនៅដាច់ដោយឡែក ១៤ ថ្ងៃហើយស្ថានភាពនេះជាស្ថានភាពដែលមិនគួរគប្បីទេនៅក្នុងរយៈពេលនេះ»។
លោកនាយករដ្ឋមន្ត្រីក៏បានប្រាប់ឲ្យអាជ្ញាធរកម្ពុជា នៅតាមព្រំដែនជាប់ជាមួយវៀតណាមឲ្យទាក់ទងភាគីវៀតណាម ដើម្បីសុំឲ្យវៀតណាមអនុញ្ញាតឲ្យពលរដ្ឋកម្ពុជាដែលនៅទីនោះបានត្រឡប់មកកម្ពុជាវិញ។ អាជ្ញាធរតាមទល់ដែនត្រូវដោះស្រាយបញ្ហានេះដោយភាពទន់ភ្លន់។ លោកបញ្ជាក់ថា ការបិទព្រំដែននេះសម្រាប់តែការធ្វើដំណើររបស់ប្រជាពលរដ្ឋប៉ុណ្ណោះចំណែកការចរាចរទំនិញ និងកិច្ចសហការក្នុងការដោះស្រាយបញ្ហាបន្ទាន់ផ្សេងៗនៅតែធ្វើឡើងជាធម្មតា។
ក្រសួងការបរទេសក៏បានសរសេរលិខិតជូនស្ថានទូតវៀតណាមផងដែរដោយបញ្ជាក់ថា កម្ពុជាស្នើឲ្យអាជ្ញាធរវៀតណាមជូនដំណឹងដល់ពលរដ្ឋវៀតណាម កុំឲ្យធ្វើដំណើរមកកម្ពុជាតាមគ្រប់ផ្លូវគោក ផ្លូវទឹក និងផ្លូវអាកាស ក្នុងអំឡុងពេលសុពលភាពនៃការរឹតត្បិតការធ្វើដំណើររបស់វៀតណាម។
ក្រសួងការបរទេសសរសេរថា៖ «ការធ្វើដំណើរចូលប្រទេស កម្ពុជា ដោយពលរដ្ឋវៀតណាម និងការធ្វើដំណើរចូលប្រទេសវៀតណាមដោយពលរដ្ឋកម្ពុជាតាមផ្លូវគោក ផ្លូវទឹក និងផ្លូវអាកាសទាំងអស់នឹងត្រូវផ្អាកជាបណ្ដោះអាសន្នចាប់ពីម៉ោង ២៣:៥៩ យប់ថ្ងៃទី ២០ ខែ មីនា ឆ្នាំ ២០២០។ វិធានការនេះមានគោលបំណងបញ្ចៀសនូវការលំបាកចំពោះពលរដ្ឋវៀតណាមក៏ដូចជាពលរដ្ឋកម្ពុជាដែលតម្រូវបង្ខាំងខ្លួននៅដាច់ដោយឡែកពីគេ ក្រោយពីបានធ្វើដំណើរពីប្រទេសកម្ពុជាចូលទៅវៀតណាម»។
ទោះយ៉ាងណាវិធានការនេះត្រូវបានលើកលែងចំពោះពលរដ្ឋទាំង ២ ភាគីដែលកាន់លិខិតឆ្លងដែនការទូត និងផ្លូវការ។ ក្រសួងក៏ស្នើឲ្យវៀតណាម សម្រួលការដឹកទំនិញឆ្លងព្រំដែនដោយគ្មានការរាំងស្ទះ និងសម្រួលការធ្វើមាតុភូមិនិវត្តន៍ពលរដ្ឋកម្ពុជាទាំងអស់ដែលកំពុងត្រូវបានដាក់ឲ្យនៅដាច់ដោយឡែកនៅវៀតណាម ប្រសិនបើមាន។
ស្រដៀងគ្នានេះដែររដ្ឋមន្ត្រីក្រសួងមហាផ្ទៃលោក ស ខេង បានណែនាំឲ្យអាជ្ញាធរជាប់ព្រំដែនកម្ពុជា-វៀតណាមផ្អាកនូវការធ្វើដំណើរចេញ-ចូលប្រទេសទាំង ២ ជាបណ្តោះអាសន្ន ដោយសារករណីឆ្លងជំងឺកូវីដ ១៩ មានការកើនឡើងយ៉ាងគំហុក និងខណៈពេលដែលរដ្ឋាភិបាលវៀតណាមបានដាក់កម្រិតលើការធ្វើដំណើរ។ លិខិតរបស់លោកក៏មានខ្លឹមសារដូចលិខិតរបស់ក្រសួងការបរទេសផងដែរ។
នៅចំណុចចុងក្រោយលោក ស ខេង សរសេរថា៖ «អាជ្ញាធរខេត្តជាប់ព្រំដែនជាមួយសាធារណរដ្ឋសង្គមនិយមវៀតណាមត្រូវធ្វើការជម្រាបជូនភាគីវៀតណាមអំពីវិធានការខាងលើនេះ និងស្នើសុំការយោគយល់ ហើយត្រូវបន្តពង្រឹងកិច្ចសហប្រតិបត្តិការ និងការប្រឹងប្រែងរួមគ្នាក្នុងការបញ្ឈប់ការឆ្លងរីករាលដាលនៃជំងឺកូវីដ ១៩ នេះ»។
លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជាយល់ឃើញថា ជាការពិតការព្រួយបារម្ភអំពីកូវីដ ១៩ ជាកង្វល់រួម ប៉ុន្តែការសម្រេចចិត្តរបស់វៀតណាមហាក់ដូចជាមិនបានផ្ដល់អ្វីជាតម្លៃនៃមិត្តភាព និងកិច្ចសហប្រតិបត្តិការក្នុងនាមអ្នកជិតខាង។ លោកថា លោក ហ៊ុន សែន បានឆ្លើយតបយ៉ាងទន់ភ្លន់ តែច្បាស់លាស់។
លោកថ្លែងថា៖ «ការឆ្លើយតប បើយើងពិនិត្យឲ្យមែនទែនមិនសមាមាត្រផង។ លោកគិតដល់តម្លៃនៃកិច្ចសហប្រតិបត្តិការក្នុងនាមប្រទេសភូមិផងរបងជាមួយលោកគិតអំពីទំនាក់ទំនងរវាងប្រទេសទាំង ២ លោកគិតអំពីតម្លៃខាងផ្នែកមនុស្សធម៌។ ខ្ញុំយល់ថា ប្រតិកម្មរបស់លោកមានភាពទន់ភ្លន់ តែច្បាស់លាស់ដោយជំហរមនុស្សធម៌ការទូត និងភាពចាស់វស្សាខាងនយោបាយការបរទេស»៕
