The Phnom Penh Post Search

Search form




Logo of Phnom Penh Post newspaper Phnom Penh Post - កម្ពុជា​​ ផ្លាស់ប្តូរ​ឯកអគ្គរាជទូត​ចំនួន​ ១៣




កម្ពុជា​​ ផ្លាស់ប្តូរ​ឯកអគ្គរាជទូត​ចំនួន​ ១៣

Content image - Phnom Penh Post
លោក ឡុង វិសាលោ ត្រូវ​បាន​​តែងតាំង​​ជា​ឯកអគ្គរាជទូត​ប្រចាំ​ប្រទេស​ថៃ​។ ហេង ជីវ័ន

កម្ពុជា​​ ផ្លាស់ប្តូរ​ឯកអគ្គរាជទូត​ចំនួន​ ១៣

ភ្នំពេញៈ រដ្ឋាភិបាល​បាន​បញ្ចប់​តំណែង​​ និង​តែងតាំង​ឯកអគ្គរាជទូត​​ចំនួន​ ១៣ រូប​ជា​ការ​តែងតាំង ​និង​ជា​ការ​ផ្លាស់ប្តូរ​ដែល​អ្នក​នាំពាក្យ​ក្រសួង​ការបរទេស​បាន​ពន្យល់​​ថា​តែងតែ​ធ្វើ​ឡើង​ជា​ធម្មតា​នៅ​ពេល​ចប់​អាណត្តិ​ក្នុង​រយៈពេល​ ៣ ​ឆ្នាំ​ម្តង​។

តាម​ព្រះរាជក្រឹត្យ​ចេញ​ថ្ងៃ​ទី ២៣ ធ្នូ​ដោយ​ព្រះមហាក្សត្រ​ នរោត្តម សីហមុនី ដែល​ធ្វើ​ឡើង​​ទៅ​តាម​សំណើ​របស់​លោក​នាយក​រដ្ឋមន្ត្រី ហ៊ុន សែន បាន​បញ្ចប់​តំណែង​​ឯកអគ្គរាជទូត​​ចំនួន​ ៦ ​រូប​ពី​ប្រទេស​ឥណ្ឌូនេស៊ី ឡាវ សិង្ហបុរី អាល្លឺម៉ង់ កូរ៉េ​ និង​ប្រទេស​ពីរ​ផ្សេង​ទៀត​ហើយ​តែងតាំង​ឯកអគ្គរាជទូត​ថ្មី​ចំនួន​ ៧ ​រូប​​ប្រចាំ​ប្រទេស​​​ផ្សេងៗ​ដូច​ជា​លោក ងួន សុខវ៉េង ប្រធាន​នាយកដ្ឋាន​អាស៊ី​​ទី​មួយ​ នៃ​ក្រសួង​ការបរទេស​ជា​ឯកអគ្គរាជទូត​ប្រចាំ​ប្រទេស​ឥណ្ឌូនេស៊ី​ ទូច សុផារ័ត្ន ប្រធាន​សហប្រតិបត្តិការ​​នៃ​ក្រសួង​​ការបរទេស​ជា​ឯកអគ្គរាជទូត​ប្រចាំ​ប្រទេស​អាល្លឺម៉ង់ ស្លូវេនី ប៉ូឡូញ ស្លូវ៉ាគី ... សឹង រដ្ឋចវី រដ្ឋលេខាធិការ​​ក្រសួង​ការបរទេស​តែងតាំង​ជា​​ឯកអគ្គរាជទូត​ប្រចាំ​ប្រទេស​​អង់គ្លេស ដាណឺម៉ាក ​ហ្វាំងឡង់ ន័រវេស ស៊ិន ប៊ុនធឿន ប្រធាន​នាយកដ្ឋាន​មជ្ឈិមបូព៌ា​អាហ្វ្រិក​​នៃ​ក្រសួង​ការបរទេស​តែងតាំង​ជា​ឯកអគ្គរាជទូត​​ប្រចាំ​សាធារណរដ្ឋ​ប្រជាធិបតេយ្យ​កូរ៉េ ចេង ម៉ានិត ប្រធាន​នាយកដ្ឋាន​សហប្រតិបត្តិការ​អន្តរជាតិ​​នៃ​ក្រសួង​​ការបរទេស​តែងតាំង​ជា​ឯកអគ្គរាជទូត​ប្រចាំ​ប្រទេស​ឡាវ​ និង​រដ្ឋលេខាធិការ​​ក្រសួង​ការបរទេស​ លោក ឡុង វិសាលោ ត្រូវ​បាន​​តែងតាំង​​ជា​ឯកអគ្គរាជទូត​ប្រចាំ​ប្រទេស​ថៃ​។

ឯកអគ្គរាជទូត​ដែល​ត្រូវ​​បាន​​ដក​ចេញ​ពី​តំណែង​រួមមាន ណង សកល ត្រូវ​បាន​ដក​ចេញ​ពី​ប្រទេស​ឥណ្ឌូនេស៊ី​ ហឿស សេរីធន់ ដក​ចេញ​ពី​ប្រទេស​ឡាវ អ៊ាត សុភា ដក​ចេញ​ពី​ប្រទេស​ថៃ ចេត ណារេន ដក​ចេញ​ពី​ប្រទេស​សិង្ហបុរី​ ថៃ ជន ត្រូវ​បាន​ដក​ចេញ​ពី​ប្រទេស​អាល្លឺម៉ង់ មាស គីមហេង ត្រូវ​បាន​ដក​ចេញ​ពី​ប្រទេស​អង់គ្លេស និង ឱប ស៊ីសៅដា ដក​ចេញ​ពី​សាធារណៈ​រដ្ឋ​កូរ៉េ​។

អ្នក​នាំពាក្យ​ក្រសួង​ការបរទេស​លោក ជុំ សុន្ទរី បាន​ប្រាប់​ ភ្នំពេញ​ ប៉ុស្តិ៍​ កាលពី​ម្សិលមិញ​ថា ​ការ​ផ្លាស់ប្តូរ​ឯកអគ្គរាជទូត​ទាំងអស់​មិន​ពាក់ព័ន្ធ​នឹង​ភាព​មិន​ប្រក្រតី​ណា​មួយ​នៅក្នុង​តំណែង​របស់​ពួកគេ​ទេ​។ ​«​នេះ​ជា​ការ​ផ្លាស់ប្តូរ​ឆ្លាស់​វេន​ទៅ​តាម​គោលការណ៍​អាណត្តិ​ ៣ ​ឆ្នាំ​​»​។ «​​ការ​ផ្លាស់ប្តូរ​ឯកអគ្គរាជទូត​គឺជា​រឿង​ធម្មតា​ដែល​ពិភពលោក​ទាំង​មូល​​តែងតែ​ធ្វើ​​»។

លោកស្រី សឹង រដ្ឋចវី រដ្ឋលេខាធិការ​​ក្រសួង​ការបរទេស​ដែល​ត្រូវ​បាន​តែងតាំង​​ជា​ឯកអគ្គរាជទូត​​ប្រចាំ​ប្រទេស​អង់គ្លេស​បាន​ប្រាប់​ភ្នំពេញ​ប៉ុស្តិ៍​កាលពី​ម្សិលមិញ​ថា​លោកស្រី​​​មាន​ការ​រំភើប​​ណាស់​ចំពោះ​ការងារ​ថ្មី​របស់​លោកស្រី​ជា​ឯកអគ្គរាជទូត​។ ​«​​ខ្ញុំ​នឹង​​ព្យាយាម​បំពេញ​កាតព្វកិច្ច​របស់​ខ្ញុំ​ឲ្យ​ជោគជ័យ​​ហើយ​ជាពិសេស​នៅ​​ពេល​​​ប្រទេស​អង់គ្លេស​​ទើប​ប្រកាស​​ចាកចេញ​ពី​សហភាព​អឺរ៉ុប​ដូច្នេះ​មាន​បញ្ហា​ប្រឈម​និង​មាន​ឱកាស​ផង​ដែរ​សម្រាប់​កម្ពុជា​របស់​យើង​»៕ PS

អត្ថបទគួរចាប់អារម្មណ៍