ភ្នំពេញៈ ប៉ុន្មានថ្ងៃមុនពេលការមកដល់នៃជនជាតិខ្មែរ ៣០ នាក់ទៀតដែលនឹងត្រូវនិរទេសមកពីសហរដ្ឋអាមេរិក រដ្ឋាភិបាលកម្ពុជាបានបង្ហាញអំពីការខ្វះខាតច្រើន ដើម្បីគាំទ្រអ្នកដែលត្រូវបាននិរទេសទាំងនេះ ខណៈពួកគេជាច្រើនជួបការលំបាកក្នុងការសម្របខ្លួនចូលមករួមរស់នៅក្នុងសង្គមកម្ពុជា។
សហរដ្ឋអាមេរិកនឹងបញ្ជូនជនជាតិកម្ពុជា ៣០ នាក់ទៀតមកប្រទេសកម្ពុជា ហើយពួកគេត្រូវបានរំពឹងថា នឹងមកដល់ប្រទេសកម្ពុជានៅថ្ងៃទី ២២ ខែសីហា នេះក្រោមអនុស្សរណៈនៃការយោគយល់គ្នាស្តីពីកិច្ចព្រមព្រៀងមាតុភូមិនិវត្តន៍ដែលចុះហត្ថលេខាដោយប្រទេសទាំង ២ កាលពីឆ្នាំ ២០០២។
លោក ម៉ៅ ចាន់ដារ៉ា អគ្គនាយកនៃអគ្គនាយកដ្ឋានអត្តសញ្ញាណកម្មបានប្រាប់ភ្នំពេញប៉ុស្តិ៍ថា៖ «យើងពិតជាខ្វះខាតអ្វីៗជាច្រើនដើម្បីគាំទ្រពួកគេ។ យើងបានធ្វើសំណើសុំជំនួយទៅសហរដ្ឋអាមេរិក ហើយពួកគេមិនទាន់ឆ្លើយតបនៅឡើយ»។
លោកបន្តថា៖ «ពួកគេ (អ្នកដែលត្រូវបានបញ្ជូនមកវិញ) មិនយល់អំពីភាសា និងវប្បធម៌របស់យើង ពួកគេកើតនៅអាមេរិក ហើយអ្នកខ្លះបានទៅអាមេរិក កាលពេលពួកគេនៅជាកុមារតូចមិនទាន់ដឹងអ្វី ហើយពួកគេមិនមានសាច់ញាតិនៅទីនេះ។ ដូច្នេះពួកគេមានការលំបាកក្នុងការចូលក្នុងសង្គម»។
ពួកគេជាច្រើនបានចាកចេញពីប្រទេសកម្ពុជាកាលនៅជាកុមារភាពក្នុងអំឡុងសង្គ្រាម។
លោកបន្តថា៖ «យោងទៅតាមហេតុផលមនុស្សធម៌ យើងអាណិតពួកគេ ប៉ុន្តែវាជាកិច្ចព្រមព្រៀងរវាងប្រទេសទាំង ២ ហើយយើងត្រូវអនុវត្តវា»។
កិច្ចព្រមព្រៀងនិរទេសកាលពីពេលថ្មីៗត្រូវបានចុះហត្ថលេខាក្នុងអំឡុងកិច្ចប្រជុំមួយរវាងលោក សុខ ផល អគ្គនាយកនៃអគ្គនាយកដ្ឋានអន្តោប្រវេសន៍ និងលោក Jospeh Galoski សេនានុពន្ធផ្នែកអន្តោប្រវេសន៍ និងគយរបស់អាមេរិកដែលប្រចាំការនៅប្រទេសកម្ពុជា។
លោក ចាន់ដារ៉ា ក៏បានថ្លែងផងដែរថាចំនួននៃអ្នកដែលត្រូវនិរទេសថ្មីៗបំផុតនេះពីអាមេរិកគឺជាកិច្ចព្រមព្រៀងមួយដែលចុះហត្ថលេខាពីមុនការបោះឆ្នោតជាតិ។ កាលពីដើមខែមេសាជនជាតិកម្ពុជាចំនួន ៤៣ នាក់ត្រូវបាននិរទេសមកពីប្រទេសអាមេរិក។
លោក ចាន់ដារ៉ា មិនបានបង្ហាញថា តើនឹងមានជនជាតិកម្ពុជាចំនួនប៉ុន្មាននាក់ទៀតនឹងត្រូវនិរទេសមកទៀតនាឆ្នាំនេះនោះទេ។ «យើងមិនដឹងថា តើមានចំនួនប៉ុន្មានទេ?។ នៅពេលជនជាតិកម្ពុជា ៣០ នាក់នោះមកដល់ពួកគេនឹងដាក់ករណីថ្មីមកទៀត»។ ប៉ុន្តែលោកថ្លែងថា ករណី ២ នៃអ្នកដែលត្រូវនិរទេសទាំងនោះដែលមានបញ្ហាសុខភាពត្រូវបានច្រានចោលដោយរដ្ឋាភិបាលកម្ពុជា។
នៅពេលមកដល់អ្នកទាំងនោះនឹងត្រូវបញ្ជូនទៅអង្គការ Khmer Vulnerability Aid ដែលជួយពួកគេក្នុងការចូលក្នុងសង្គមឡើងវិញ បង្រៀនវប្បធម៌ខ្មែរ និងជួយរកគ្រួសារឲ្យពួកគេ។
លោកបានថ្លែងថា៖ «រហូតមកដល់បច្ចុប្បន្ននេះជនជាតិកម្ពុជាចំនួន ៦៩៧ នាក់ហើយត្រូវបាននិរទេសមកពីអាមេរិក ហើយជាមួយនឹងចំនួន ៣០ នាក់បន្ថែមទៀតចំនួននេះនឹងលើស ៧០០ នាក់ដែលត្រូវបាននិរទេសរហូតមកដល់ពេលនេះ»។
លោក យិន ចាន់ធូ ជនជាតិកម្ពុជាអាយុ ៤៨ ឆ្នាំដែលត្រូវបាននិរទេសពីអាមេរិកមកកម្ពុជាកាលពីខែឧសភាបានចាប់មុខរបរជាគ្រូបង្រៀនភាសាអង់គ្លេស និងបានឲ្យដឹងថា កំណត់ហេតុព្រហ្មទណ្ឌរបស់លោកគឺនៅមាននៅអាមេរិកនៅឡើយ។
លោកបញ្ជាក់ថា៖ «អ្នកអាចសម្របសម្រួល ប៉ុន្តែអ្នកមិនអាចចូលក្នុងវប្បធម៌នេះទាំងស្រុងទេ ហើយយើងមិនមាននរណាម្នាក់អាចជួយបានទេ។ ប្រព័ន្ធវេជ្ជសាស្ត្រមិនល្អនៅទីនេះ ហើយសុខភាពរបស់ខ្ញុំគឺជាក្តីបារម្ភចម្បង។ យើងមិនមានការជួយផ្នែកវេជ្ជសាស្ត្រទេនៅទីនេះ»។
លោកបានថ្លែងបន្តថា៖ «យើងឯកាណាស់ បែកបាក់ពីគ្រួសាររបស់យើង។ មនុស្សមួយចំនួនមានបញ្ហាផ្លូវចិត្ត។ ខ្ញុំមានកូន ៣ នាក់នៅអាមេរិក»។
អ្នកនាំពាក្យស្ថានទូតអាមេរិកប្រចាំកម្ពុជា លោក Arend Zwartjes បានឆ្លើយតាមអ៊ីមែលកាលពីថ្ងៃម្សិលមិញថា៖ «យើងបន្តធ្វើការជាមួយរាជរដ្ឋាភិបាលកម្ពុជាក្នុងការទទួលយកការវិលត្រលប់របស់ជនជាតិខ្លួនដែលមិនមានសិទ្ធិបន្តរស់នៅអាមេរិក»។
លោក Arend បានបន្តថាស្ថានទូតអាមេរិកផ្ដល់ជំនួយដល់អង្គការមិនមែនរដ្ឋាភិបាលក្នុងស្រុកមួយដើម្បីជួយអ្នកវិលត្រឡប់ទាំងនេះចូលទៅរួមរស់ក្នុងសង្គមកម្ពុជាវិញ៕ PS