.jpg)
លោក ហ៊ុន សែន ក្នុងកិច្ចប្រជុំទន្លេមេគង្គនៅសៀមរាប។ រូបថត សហការី
សៀមរាបៈ អ្នកនាំពាក្យគណបក្សកាន់អំណាចកាលពីម្សិលមិញបានថ្លែងថា រដ្ឋាភិបាលកំពុងសម្លឹងមើល ចង់បង្កើតសេចក្តីព្រាងច្បាប់ស្តីពីព័ត៌មានក្លែងក្លាយ ខណៈប្រទេសម៉ាឡេស៊ីបានអនុម័តច្បាប់ស្រដៀងគ្នាហើយការធ្វើសេចក្តីព្រាងច្បាប់នេះកើតមានឡើងបន្ទាប់ពីមានការបង្ក្រាបមួយក្នុងចំណោមការបង្ក្រាបដ៏អាក្រក់បំផុតទៅលើប្រព័ន្ធផ្សព្វផ្សាយ និងសង្គមស៊ីវិលក្នុងប្រទេសកម្ពុជា។
ការប្រកាសដែលធ្វើឡើងដោយអ្នកនាំពាក្យរបស់គណបក្សប្រជាជនកម្ពុជាលោក សុខ ឥសាន នេះគឺធ្វើឡើងបន្ទាប់ពីកិច្ចជំនួបរវាងនាយករដ្ឋមន្ត្រី ហ៊ុន សែន និងនាយករដ្ឋមន្ត្រីវៀតណាម លោក Nguyen Xuan Phuc ក្នុងទីក្រុងសៀមរាបនៅក្រៅកិច្ចប្រជុំកំពូលគណៈកម្មាធិការទន្លេមេគង្គកាលពីថ្ងៃពុធ។
ជំនួយការផ្ទាល់របស់លោក ហ៊ុន សែន លោក អ៊ាង សុផល្លែត បានប្រាប់ប្រព័ន្ធផ្សព្វផ្សាយថាលោក Phuc បានផ្តល់ជាយោបល់ថា ការដោះដូរព័ត៌មានរវាងប្រទេសទាំង ២ គឺត្រូវការដើម្បីទប់ស្កាត់មិនឲ្យមានព័ត៌មានក្លែងក្លាយ ដែលអាចបង្កការយល់ខុសរវាងប្រទេសទាំង ២។ លោក សុផល្លែត បន្តថា៖ «វាសំដៅទៅប្រព័ន្ធផ្សព្វផ្សាយមួយចំនួនដែលប្រើប្រាស់ព័ត៌មានខុស ឬព័ត៌មានក្លែងក្លាយ»។ «សម្តេចបានយល់ស្រប»។
ទោះយ៉ាងណាក្តីលោក សុខ ឥសាន បានថ្លែងថាការឯកភាពរបស់នាយករដ្ឋមន្ត្រីកម្ពុជាជាមួយនឹងការលើកឡើងរបស់នាយករដ្ឋមន្ត្រីវៀតណាមនោះ មានន័យថាក្រុមការងារបច្ចេកទេសមួយនឹងពិនិត្យមើលលើការបង្កើតសេចក្តីព្រាងច្បាប់ស្តីពីព័ត៌មានមិនពិត។
លោកបានថ្លែងថា៖ «ដើម្បីទប់ស្កាត់បញ្ហានេះ ដំបូងត្រូវធ្វើច្បាប់ ដើម្បីការពារមិនឲ្យប្រជាពលរដ្ឋនិយាយខុស ហើយទី ២ វាជាផ្នែកអេឡិចត្រូនិក និងបច្ចេកទេសដើម្បីការពារមិនឲ្យវាកើតឡើង»។
ការប្រកាសបង្កើតសេចក្តីព្រាងច្បាប់នេះបានធ្វើឡើង ខណៈសភាម៉ាឡេស៊ីបានជំរុញឲ្យមានការបង្កើតច្បាប់ស្តីពីព័ត៌មានក្លែងក្លាយដែលមានលក្ខណៈចម្រូងចម្រាសដែលត្រូវបានរិះគន់យ៉ាងទូលំទូលាយចំពោះវិធានការដាក់ទោសទណ្ឌធ្ងន់ធ្ងរគឺដាក់ពន្ធនាគាររហូតដល់ ៦ ឆ្នាំ និងនិយមន័យស្រពេចស្រពិលអំពីអ្វីទៅដែលត្រូវបានចាត់ទុកថាជាព័ត៌មានក្លែងក្លាយ។
សេចក្តីព្រាងច្បាប់នេះត្រូវបានរំពឹងថានឹងទទួលបានការអនុម័តពីព្រឹទ្ធសភានាពេលខាងមុខឆាប់ៗ និងត្រូវបានឃើញដោយក្រុមសកម្មជនសិទ្ធិមនុស្សថាជាវិធីមួយសម្រាប់នាយករដ្ឋមន្ត្រី Najib Razak ដែលពោរពេញដោយអំពើពុករលួយ បំបិទសំឡេងអ្នករិះគន់ពីមុនពេលការបោះឆ្នោតជាតិនាខែសីហាខាងមុខ។
ស្រដៀងគ្នានេះដែរកម្ពុជាត្រូវបានឃើញថា មានការបង្ក្រាបមួយក្នុងចំណោមការបង្ក្រាបធ្ងន់ធ្ងរទៅលើប្រព័ន្ធផ្សព្វផ្សាយ និងសង្គមស៊ីវិលព្រមទាំងគណបក្សប្រឆាំង។
កាសែតឌឹខេមបូឌាដេលីដែលជាកាសែតឯករាជ្យមួយត្រូវបានបិទពាក់ព័ន្ធនឹងករណីបំណុលពន្ធ ៦,៣ លានដុល្លារ ហើយស្ថានីយវិទ្យុជាង ១០ ដទៃៗទៀតត្រូវបានបិទក្នុងនោះរួមមានវិទ្យុអាស៊ីសេរីផងដែរ។
លោក សុខ ឥសាន ថ្លែងថា៖ «ប្រទេសមួយដែលជាសមាជិកអាស៊ានធ្វើច្បាប់សម្រាប់អ្នកដែលផ្សព្វផ្សាយព័ត៌មានញុះញង់ និងព័ត៌មានក្លែងក្លាយដើម្បីបង្កចលាចលក្នុងសង្គមនឹងប្រឈមមុខនឹងការពិន័យចំនួន ១០ ម៉ឺនដុល្លារ ហើយភ្នំពេញប៉ុស្តិ៍ប្រហែលជាដឹង»។
ខណៈវាមិនច្បាស់ភ្លាមៗថាតើព័ត៌មានក្លែងក្លាយអ្វីដែលលោក Nguyen Xuan Phuc កំពុងសំដៅទៅ លោក ឥសាន បានថ្លែងថាអ្នកវិភាគម្នាក់ដែលមាននិន្នាការនយោបាយបានសរសេរអំពីកិច្ចប្រជុំសម្ងាត់ និងបិទទ្វារ មានន័យថា វាជាព័ត៌មានក្លែងក្លាយ។
លោក ឥសាន ប្រហែលជាកំពុងសំដៅទៅអត្ថបទមួយរបស់កាសែត Asia Times ដែលចុះផ្សាយនៅលើគេហទំព័រ កាលពីខែមីនា ដែលបានស្រង់ប្រភពរដ្ឋាភិបាលដែលមិនបញ្ចេញឈ្មោះ ដោយចោទប្រកាន់ថា សមាជិកអ្នកនយោបាយជាន់ខ្ពស់វៀតណាម ២ នាក់បានសម្តែងការមិនពេញចិត្ត «នៅពីក្រោយទ្វារបិទ» ចំពោះការបង្ក្រាបរបស់លោក ហ៊ុន សែន ទៅលើគណបក្សប្រឆាំង។
អត្ថបទនេះបន្តថា ការផ្លាស់ប្តូរភូមិសាស្ត្រនយោបាយ និងសេដ្ឋកិច្ចរបស់កម្ពុជាទៅរកចិនកំពុងបង្កឲ្យមានការប្រេះឆារវាងប្រទេសជិតខាងទាំង ២ ។
អ្នកនាំពាក្យក្រសួងយុត្តិធម៌លោក ជិន ម៉ាលីន បានថ្លែងថាលោកមិនបានដឹងអំពីកិច្ចខិតខំប្រឹងប្រែងធ្វើសេចក្តីព្រាងច្បាប់ស្តីពីព័ត៌មានក្លែងក្លាយនេះទេ ប៉ុន្តែលោកថាក្រសួងមហាផ្ទៃបានបញ្ចប់សេចក្តីព្រាងច្បាប់ស្តីពីឧក្រិដ្ឋកម្មតាមប្រព័ន្ធអ៊ីនធឺណិត។
អ្នកតស៊ូមតិដើម្បីសិទ្ធិមនុស្សលោកស្រី ចក់ សុភាព បានថ្លែងថាប្រទេសកម្ពុជាកំពុងឃើញមានការធ្វើទុកបុកម្នេញមួយចំនួនទៅលើការនិយាយស្តីតាមអនឡាញនាឆ្នាំកន្លងមក ខណៈលោកស្រីយល់ស្របថាកិច្ចខិតខំប្រឹងប្រែងត្រឹមត្រូវមួយដែលធ្វើឡើងដើម្បីដោះស្រាយបញ្ហាព័ត៌មានក្លែងក្លាយ ប៉ុន្តែនោះមិនមែនតែងតែជាករណីកើតឡើងនោះទេ។
លោកស្រីបន្តថា៖ «ទោះយ៉ាងណាក្តីពាក្យ «ព័ត៌មានក្លែងក្លាយ» នៅអាមេរិក កម្ពុជា និងកន្លែងដទៃៗ ជាញឹកញាប់ត្រូវបានប្រើដោយអ្នកនយោបាយ ជាពិសេសដើម្បីបំបិទការរិះគន់ចំពោះការធ្វើខុសរបស់ពួកគេ»។
លោក Ed Legaspi នាយកប្រតិបត្តិនៅអង្គការ Southeast Asian Press Alliance បានថ្លែងថាកម្ពុជាធ្វើតាមគំរូរបស់ម៉ាឡេស៊ីដោយធ្វើសេចក្តីព្រាងច្បាប់មួយដែលមានលក្ខណៈស្រពេចស្រពិល និងប៉ះពាល់ទៅលើមនុស្សជាច្រើន ហើយវាកាន់តែជាការរឹតបន្តឹងបន្ថែមទៀតទៅលើប្រព័ន្ធផ្សព្វផ្សាយដែលមានសេរីភាពតូចចង្អៀតរួចទៅហើយ។
លោកបន្តថា៖ «ឥឡូវនេះយើងនៅតែចាត់ទុកថា សារព័ត៌មានកម្ពុជាគឺមានសេរីភាពជាងប្រទេសម៉ាឡេស៊ី ប៉ុន្តែច្បាប់ស្តីពីព័ត៌មានក្លែងក្លាយនឹងរុញប្រទេសនេះចូលទៅក្នុងចំណាត់ថ្នាក់ប្រទេសដែលត្រូវបានស្គាល់ថាគ្រប់គ្រងប្រព័ន្ធផ្សព្វផ្សាយ»៕ PS
