.jpg)
លោកនាយករដ្ឋមន្ត្រី ហ៊ុន សែន និង លោកស្រី អ៊ុងសាន ស៊ូជី ទីប្រឹក្សារដ្ឋនៃសាធារណរដ្ឋសហភាពមីយ៉ាន់ម៉ា នៅក្នុងជំនួបនៅឯវិមានសនិ្ដភាព កាលពីម្សិលមិញ។ AFP
ភ្នំពេញៈ លោកស្រី អ៊ុងសាន ស៊ូជី ទីប្រឹក្សារដ្ឋ និងជារដ្ឋមន្ត្រីការបរទេស នៃសាធារណរដ្ឋសហភាពមីយ៉ាន់ម៉ា និងលោកនាយករដ្ឋមន្ត្រី ហ៊ុន សែន បានឯកភាពទៅនឹងអ្វីដែលបានពិភាក្សាគ្នា កាលពីម្សិលមិញក្នុងការពង្រឹង និងពង្រីកទំនាក់ទំនងទ្វេភាគី ឱ្យកាន់តែរីកចម្រើនខ្លាំងឡើង លើវិស័យវប្បធម៌ សាសនា អប់រំ និងសេដ្ឋកិច្ច និងបានឲ្យរដ្ឋមន្ត្រីនៃប្រទេសទាំង ២ ធ្វើការងារទាំងនោះ។
នេះបើតាមលោក អ៊ាង សុផល្លែត ជំនួយការផ្ទាល់របស់លោក ហ៊ុន សែន ដែលបានថ្លែងទៅកាន់អ្នកសារព័ត៌មានបន្ទាប់ពីជំនួបទ្វេភាគី រវាងលោក ហ៊ុន សែន និងលោកស្រី អ៊ុងសាន ស៊ូជី នៅវិមានសន្តិភាព។
លោកស្រី អ៊ុងសាន ស៊ូជី បានមកបំពេញទស្សនកិច្ចនៅប្រទេសកម្ពុជារយៈពេល ៣ ថ្ងៃ ដោយចាប់ផ្តើមពីថ្ងៃទី ២៩ ខែ មេសា ដល់ថ្ងៃទី ១ ខែ ឧសភា ដើម្បីពង្រឹងនិងពង្រីកកិច្ចសហប្រតិបត្តិការរវាងប្រទេសទាំង ២។
លោកស្រី អ៊ុងសាន ស៊ូជី បានលើកឡើងថា នេះជាលើកទី១ ហើយដែលលោកស្រីបានមកបំពេញទស្សនកិច្ចផ្លូវការនៅកម្ពុជា ដើម្បីមកជួបចរចា ជាមួយលោក ហ៊ុន សែន ក្នុងការពង្រឹង និងពង្រីកទំនាក់ទំនងទ្វេភាគី ឱ្យកាន់តែរីកចម្រើនខ្លាំងឡើង និងសកម្មថែមទៀត លើវិស័យវប្បធម៌ សាសនា អប់រំ និងសេដ្ឋកិច្ច។
នេះបើតាមការអះអាងរបស់លោក អ៊ាង សុផល្លែត លោក សុផល្លែត បានថ្លែងថា ជាការឆ្លើយតប លោក ហ៊ុន សែន បានស្វាគមន៍នូវអ្វីដែលលោកស្រីបានលើកឡើងទាក់ទងនឹងសហប្រតិបត្តិការរវាងប្រទេសទាំង ២។
លោក ហ៊ុន សែន បញ្ជាក់ថា នៅឆ្នាំ ២០២០ គឺជាខួបលើកទី៦៥ ឆ្នាំ នៃទំនាក់ទំនងរវាងប្រទេសទាំង ២ ហើយកម្ពុជា-មីយ៉ាន់ម៉ា គួររៀបចំពិធីនេះឱ្យអធិកអធម និងពង្រឹងវិស័យទេសចរណ៍ រវាងប្រទេសទាំង ២ ជាពិសេសខេត្តសៀមរាប និងខេត្តបាហ្គាន របស់មីយ៉ាន់ម៉ា ដែលសម្បូរទៅដោយប្រាសាទដែលជាសម្បត្តិបេតិកភណ្ឌពិភពលោក។
លោក សុផល្លែត បន្តថា លោក ហ៊ុន សែន ក៏បានថ្លែងអំណរគុណដល់ប្រទេសមីយ៉ាន់ម៉ា ដែលបានអនុញ្ញាតឲ្យកម្ពុជាកសាងវិហារព្រះពុទ្ធសាសនានៅទីនោះ និងបានបណ្តុះបណ្តាលព្រះសង្ឃចំនួន ៩៤ អង្គ ដែលបានរៀនចប់ ហើយ ៤ អង្គទៀតកំពុងបន្តការសិក្សា។
បើតាមលោក សុផល្លែត លោក ហ៊ុន សែន ក៏បានស្នើដល់មីយ៉ាន់ម៉ា ឲ្យធ្វើយ៉ាងណា ជំរុញការអនុវត្តកិច្ចព្រមព្រៀងទាក់ទងវិស័យអប់រំ ដែលបានចុះហត្ថលេខាជាមួយគ្នារួចហើយ។
លោកបញ្ជាក់ថា៖ «លើសពីនោះទៅទៀត ក៏សូមឲ្យមានការផ្លាស់ប្ដូរ ទំនាក់ទំនងរវាងនិស្សិតកម្ពុជា និងនិស្សិតមីយ៉ាន់ម៉ាទៅវិញទៅមក ដែលមានការគាំទ្រពី រដ្ឋាភិបាលប្រទេសទាំង ២។ ក្នុងឱកាសនេះ សម្តេចតេជោ ក៏បានផ្តល់អាហារូបករណ៍ចំនួន ១០ ទៅដល់ប្រទេស មីយ៉ាន់ម៉ា ផងដែរ ដើម្បីមាននិស្សិតមីយ៉ាន់ម៉ាមកសិក្សានៅកម្ពុជា សម្រាប់ឆ្នាំ ២០១៩-២០២០។ រៀបចំធ្វើឱ្យមានការបញ្ជូនសិស្សទៅរៀននៅមីយ៉ាន់ម៉ា និងបញ្ជូនសិស្សទៅរៀននៅកម្ពុជាដោយមានការគាំទ្រពីរដ្ឋាភិបាលទាំង ២»។
បើតាមលោក សុផល្លែត ក្រៅពីនេះ លោក ហ៊ុន សែន ក៏បានស្នើសុំឲ្យលោកស្រី អ៊ុង សានស៊ូជី ត្រួតពិនិត្យលើបញ្ហាពន្ធត្រួតគ្នា និងវិស័យផ្សេងទៀតដែលប្រទេសទាំង ២ មានសក្តានុពលធ្វើឲ្យមានការរីកចម្រើន ជាពិសេសពង្រីកទំហំពាណិជ្ជកម្ម ពី ១០ លានដុល្លារ ឲ្យកាន់តែច្រើនជាងមុន។
លោក មាស នី អ្នកវិភាគនយោបាយ បានថ្លែងថា បើមើលគូភាគីខាងមីយ៉ាន់ម៉ា ឃើញថា នេះគឺជាដំណើរទស្សនកិច្ចការទូតជាធម្មតា (Protocol) នៅពេលអ្នកដឹកនាំណាមួយឡើងកាន់អំណាច គឺត្រូវតែមានការបំពេញទស្សនកិច្ចទៅតាមប្រទេសនានា ដែលអាចធ្វើទៅបាន។ លោកបន្តថា គូភាគីនេះមិនអាចលើកយករឿងប្រជាធិបតេយ្យ និងសិទ្ធិមនុស្សមកជជែកគ្នាបានទេ ដោយសារតែប្រទេសទាំង ២ នេះកំពុងតែជាប់នៅក្នុងការរិះគន់ពីអន្តរជាតិ។
លោកបញ្ជាក់ថា៖ «អ្វីដែលគូភាគីទាំង ២ នឹងផ្តោតគឺផ្តោតទៅលើខាងវិស័យការពង្រឹងនូវទំនាក់ទំនងផ្នែកសេដ្ឋកិច្ច និងពាណិជ្ជកម្ម។ បើយើងនិយាយអំពីទំនាក់ទំនងពាណិជ្ជកម្មរវាងភូមា ហើយនិងកម្ពុជាហ្នឹង គឺជាប្រទេសមួយដែលមានស្ថានភាពស្រដៀងគ្នា ដែលហាក់ដូចជាមិនទាន់មានឥទ្ធិពលសេដ្ឋកិច្ចអីធំធេងក្នុងការបញ្ជូននូវផលិតផលអីឱ្យគ្នាទៅវិញទៅមក។ ការជួបនេះគឺភាគច្រើនគឺការរឹតចំណងការទូតទេ»។
កាលពីម្សិលមិញ ក្រៅពីជួបជាមួយលោក ហ៊ុន សែន លោកស្រី អ៊ុងសាន ស៊ូជី ក៏បានចូលជួបសំណេះសំណាល លោក សាយ ឈុំ ប្រធានព្រឹទ្ធសភា និងលោក ហេង សំរិន ប្រធានរដ្ឋសភាផងដែរ។ តាមគម្រោងលោកស្រីនឹងចាកចេញពីរាជធានីភ្នំពេញទៅកាន់ខេត្តសៀមរាបនៅព្រឹកនេះ ដើម្បីទស្សនាប្រាសាទអង្គរវត្តមុននឹងបញ្ចប់ដំណើរទស្សនកិច្ចនៅកម្ពុជា៕
