The Phnom Penh Post Search

Search form




Logo of Phnom Penh Post newspaper Phnom Penh Post - កម្ពុជា-រុស្ស៊ី ពិនិត្យ​លទ្ធភាព​ចុះ​កិច្ច​ព្រម​ព្រៀង​ធ្វើ​បត្យាប័ន

កម្ពុជា-រុស្ស៊ី ពិនិត្យ​លទ្ធភាព​ចុះ​កិច្ច​ព្រម​ព្រៀង​ធ្វើ​បត្យាប័ន

សេដ្ឋី​រុស្ស៊ី Sergei Polonsky ពេល​សមត្ថកិច្ច​ចាប់​ខ្លួន​ក្នុង ឆ្នាំ​២០១៣។
សេដ្ឋី​រុស្ស៊ី Sergei Polonsky ពេល​សមត្ថកិច្ច​ចាប់​ខ្លួន​ក្នុង ឆ្នាំ​២០១៣។ រូប STRINGER

កម្ពុជា-រុស្ស៊ី ពិនិត្យ​លទ្ធភាព​ចុះ​កិច្ច​ព្រម​ព្រៀង​ធ្វើ​បត្យាប័ន

ភ្នំពេញៈ ប្រទេស​កម្ពុជា​និង​ប្រទេស​រុស្ស៊ី អាច​នឹង​ចុះ​កិច្ច​ព្រម​ព្រៀង​ស្តីពី​បត្យាប័ន​ដែល​នឹង​អាច​ត្រួស​ត្រាយ​ផ្លូវ​សម្រាប់​ការ​និរទេស​សេដ្ឋី​រុស្ស៊ី Sergei Polonsky ដែល​កំពុង​រត់​គេច​ខ្លួន ទៅ​ប្រទេស​កំណើត​របស់​ខ្លួន​វិញ ដើម្បី​ប្រឈម​នឹង​បទ​ល្មើស​ឧក្រិដ្ឋ។

រដ្ឋ​មន្ត្រី​ការ​បរទេស​រុស្ស៊ី​លោក Sergei Lavrov បាន​ថ្លែង​ថា កិច្ច​ព្រម​ព្រៀង​មួយ​រវាង​ប្រទេស​ទាំងពីរ​គឺ​កំពុង​ស្ថិត​នៅ​កម្រិត​ជិត​រួចរាល់ បន្ទាប់​ពី​កិច្ច​ប្រជុំ​មួយ​នៅ​ទីក្រុង Moscow កាលពី​ម្សិល​មិញ​ជាមួយ​សមភាគី​កម្ពុជា ឧប​នាយក​រដ្ឋ​មន្ដ្រី ហោ ណាំហុង។ នេះ​បើ​យោង​តាម​ប្រព័ន្ធ​ផ្សព្វ​ផ្សាយ​របស់​ប្រទេស​រុស្ស៊ី។

លោក​បន្ត​ថា៖ «ឥឡូវ​នេះ យើង​កំពុង​ពង្រឹង​ក្របខ័ណ្ឌ​ច្បាប់​រវាង​រុស្ស៊ី​និង​ព្រះ​រាជា​ណាចក្រ​កម្ពុជា​ពាក់ព័ន្ធ​នឹង​អន្តរកម្ម​រវាង​ស្ថាប័ន​អនុវត្ត​ច្បាប់»។

ដោយ​អត្ថាធិប្បាយ​ជាក់​លាក់ អំពី​លទ្ធភាព​នៃ​ការ​ធ្វើ​បត្យាប័ន​លោក Polonsky កាល​ម្សិលមិញ រដ្ឋ​មន្ត្រី​ការ​បរទេស​រុស្ស៊ី លោក Lavrov បាន​មាន​ប្រសាសន៍​ថា កិច្ច​ប្រជុំ​ចុង​ក្រោយ​រវាង​អ្នក​ជំនាញ​នឹង​កើត​មាន​ឡើង​នា​ខែ​នេះ មុន​នីតិវិធី​ដែល​នឹង​អាច​ដាក់​ចេញ​សម្រាប់​ភាគី​ទាំង​ពីរ​ចុះ​ហត្ថលេខា។

ប៉ុន្តែ​នៅ​ក្នុង​ការ​ឆ្លើយ​តប​ទៅ​នឹង​អ្នក​កាសែត​រុស្ស៊ី លោក ហោ ណាំហុង បាន​ថ្លែង​ថា កម្ពុជា​កំពុង​តែ «ស្វែង​យល់​អំពី​លទ្ធភាព​នៃ​ការ​ចុះ​កិច្ច​ព្រម​ព្រៀង​នេះ»។

បើ​តាម​ការ​បក​ប្រែ​ជា​ភាសា​រុស្ស៊ី​ពី​ការ​អត្ថាធិប្បាយ​នេះ លោក​បាន​ថ្លែង​ថា៖ «អាជ្ញាធរ​កំពុង​ពិនិត្យ​មើល។ យើង​នឹង​គិត​ដោយ​យក​ចិត្ត​ទុក​ដាក់​ពាក់ព័ន្ធ​នឹង​សំណើ​របស់​សហព័ន្ធ​រុស្ស៊ី ចំពោះ​ការ​ធ្វើ​បត្យាប័ន​ពលរដ្ឋ​នេះ។ នៅ​ពេល​ខ្ញុំ​ត្រឡប់​ទៅ​កម្ពុជា ខ្ញុំ​នឹង​ពិភាក្សា​រឿង​នេះ​ជាមួយ​រដ្ឋាភិបាល សហការី​ខ្ញុំ និង​នាយក​រដ្ឋ​មន្ត្រី​កម្ពុជា។ យើង​នឹង​ពិភាក្សា​អំពី​លទ្ធភាព​នៃ​ការ​ដោះស្រាយ​បញ្ហា​នេះ»។

រុស្ស៊ី បាន​ស្វែង​រក​ការ​ធ្វើ​បត្យាប័ន​រយៈ​ពេល​ជាច្រើន​ឆ្នាំ​មក​ហើយ ចំពោះ​លោក Polonsky ដែល​ធ្លាប់​ត្រូវ​បាន​គេ​រាយការណ៍​ថា ជា​ជន​ម្នាក់​ក្នុង​ចំណោម​មនុស្ស​ដែល​មាន​បំផុត​នៅ​ក្នុង​ប្រទេស​រស្ស៊ី និង​ដែល​ជា​មនុស្ស​ត្រូវ​គេ​ប៉ង​ចាប់​ខ្លួន​ពីបទ​ក្លែង​បន្លំ​និង​កិបកេង​ដ៏​ធំ​នៅ​ប្រទេស​រុស្ស៊ី។

ក្នុង ខែ​មេសា តុលាការ​កំពូល​បាន​សម្រេច​ថា ប្រទេស​កម្ពុជា​នឹង​មិន​ធ្វើ​បត្យាប័ន​សេដ្ឋី​រូប​នេះ​ទេ ដោយ​សារ​ការ​ខ្វះ​សន្ធិសញ្ញា​ផ្លូវ​ការ​ជាមួយ​ប្រទេស​រុស្ស៊ី។

លោក Polonsky មិន​អាច​ទាក់​ទង​សុំ​អត្ថាធិប្បាយ​ដោយ​ផ្ទាល់​បាន​ទេ កាល​ម្សិល​មិញ។ លោក Kaspars Cekotins ជា​មេធាវី​ម្នាក់ ក្នុង​ចំណោម​មេធាវី​របស់​គាត់​ថ្លែង​ថា គាត់​កំពុង​ស្ថិត​នៅ​ក្នុង​ដំណើរ​ស្ទូច​ត្រី​លេង​ឆ្ងាយ​ពី​ឆ្នេរ​សមុទ្រ។

ប៉ុន្តែ​លោក បែន សុន​សម័យ ដែល​ជា​មេធាវី​កម្ពុជា​របស់​គាត់ អះអាង​ថា បើ​ទោះ​ជា​មាន​ការ​ចុះ​សន្ធិ​សញ្ញា​បត្យាប័ន​ក៏​ដោយ ក៏​ការ​ធ្វើ​បត្យាប័ន​គាត់​ទៅ​មិន​រួច​ទេ។ លោក​ថា៖ «ពី​មុន​ករណី​ផ្សេង វា​មិន​អាច​ទៅ​រួច​ទេ។ វា​យឺត​ពេល​ហើយ។ ស្នើ​សុំ​ម្តង​មិន​ជោគ​ជ័យ មិន​អាច​ស្នើ​សុំ​ជា​លើក​ទី​ពីរ​បាន​ទេ...ករណី​នេះ​មិន​អាច​អនុវត្ត​បាន​ទេ»។

លោក Ilya Rosenfeld អ្នក​នាំ​ពាក្យ​របស់​លោក Polonsky ក្នុង​ប្រទេស​រុស្ស៊ី បាន​បដិសេធ​ធ្វើ​អត្ថាធិប្បាយ​រឿង​នេះ។

នាយ​ការិយាល័យ​នគរបាល​អន្តរជាតិ​កម្ពុជា លោក លឹម សុខារស្មី បាន​ថ្លែង​ថា លោក​មិន​ទាន់​ទទួល​បាន​សំណើ​ថ្មីៗ​ណា​មួយ​ស្តីពី​ការ​សុំ​ធ្វើ​បត្យាប័ន​សេដ្ឋី​រុស្ស៊ី​លោក Polonsky ទេ។

មាន​ការ​យល់​ឃើញ​ថា ប្រទេស​រុស្ស៊ី​នឹង​ធ្វើ​សំណើ​ម្តង​ទៀត ប្រសិន​បើ​កិច្ច​ព្រម​ព្រៀង​នេះ ត្រូវ​បាន​ចុះ​ហត្ថលេខា។

ការ​ប្រកាស​អំពី​លទ្ធភាព​នៃ​ការ​ចុះ​ហត្ថលេខា​លើ​សន្ធិសញ្ញា​បត្យាប័ន​នេះ​ធ្វើ​ឡើង​ប៉ុន្មាន​ថ្ងៃ បន្ទាប់ពី ភ្នំពេញ ប៉ុស្តិ៍ បង្ហាញ​ថា Oleg Tikhanov ដែល​ជា​ជន​ជាតិ​រុស្ស៊ី​រត់​គេច​ខ្លួន​ម្នាក់​ទៀត កំពុង​រស់​នៅ​ក្នុង ខេត្ត​ព្រះ​សីហនុ ក៏​អាច​ត្រូវ​ចាប់​ខ្លួន​ដោយ​នគរបាល​អន្តរជាតិ​កម្ពុជា​ដែរ ផ្អែក​លើ​សំណើ​របស់​រុស្ស៊ី។ គាត់​ប្រឈម​នឹង​បទ​ចោទ​ប្រកាន់​ធ្ងន់ធ្ងរ​រួម​មាន «ការ​កាន់​កាប់​ជាតិ​ផ្ទុះ​ខុស​ច្បាប់» ដែល​ជាប់​ទាក់​ទង​នឹង​ឧក្រិដ្ឋកម្ម​រៀបចំ​ទុក​ជា​មុន។

ការិយាល័យ​នគរបាល​អន្តរជាតិ​កម្ពុជា​បាន​ទទួល​ស្គាល់​ថា ជនជាតិ​រុស្ស៊ី​រូប​នេះ «ជា​មនុស្ស​ដ៏​គ្រោះថ្នាក់​ខ្លាំង​ម្នាក់» ហើយ​ក៏​កំពុង​ធ្វើ​ការ​ស៊ើប​អង្កេត។

បុគ្គលិក​របស់ Tikhanov ជា​ម្ចាស់​បារ៍ សណ្ឋាគារ និង​សាលា​មត្តេយ្យ ត្រូវ​គេ​ជឿ​ថា បាន​ពាក់ព័ន្ធ​ក្នុង​ជម្លោះ​មួយ​កាល​ពី​ខែ​មុន នៅ​ខេត្ត​ព្រះសីហនុ ដែល​ធ្វើ​ឲ្យ​បុរស​ម្នាក់​ដេក​ពេទ្យ ដោយ​សារ​ការ​ចាក់៕

អត្ថបទគួរចាប់អារម្មណ៍