.jpg)
កម្ពុជា-វៀតណាមប្រជុំពីការផ្លាស់ប្តូរលិខិតូបករណ៍សច្ចាប័នពីថ្ងៃទី ២២ ធ្នូ។រូប ក្រសួងការបរទេស
ភ្នំពេញៈ រដ្ឋមន្ត្រីការបរទេសកម្ពុជាលោក ប្រាក់ សុខុន និងសមភាគីវៀតណាម លោក ផាម ប៊ិញមិញ បានដឹកនាំកិច្ចប្រជុំលើកទី១៨ នៃគណៈកម្មការចម្រុះកម្ពុជា-វៀតណាមតាមប្រព័ន្ធវីដេអូកាលពីថ្ងៃទី ២២ ធ្នូ ដោយផ្ដោតលើកិច្ចសហប្រតិបត្តិការទ្វេភាគីលើវិស័យសេដ្ឋកិច្ច វប្បធម៌ វិទ្យាសាស្ត្រ និងបច្ចេកវិទ្យា។ ភាគីទាំង ២ ក៏បានប្ដេជ្ញាធ្វើការរួមគ្នាលើវិស័យផ្សេងៗទៀតដូចជា ការគ្រប់គ្រងការជួញដូរឈើហុប និងសត្វព្រៃខុសច្បាប់។
សេចក្ដីប្រកាសព័ត៌មានរបស់ក្រសួងការបរទេស និងសហប្រតិបត្តិការអន្តរជាតិលើកឡើងថា ចំពោះកិច្ចសហប្រតិបត្តិការលើវិស័យកសិកម្ម រុក្ខាប្រមាញ់ និងនេសាទ ភាគីទាំង ២ បានបញ្ជាក់ជាថ្មីនូវការប្ដេជ្ញាចិត្តដ៏មោះមុត និងកិច្ចខិតខំប្រឹងប្រែងរួមក្នុងការគ្រប់គ្រងសកម្មភាពកេងប្រវ័ញ្ចខុសច្បាប់នានា ការដឹកជញ្ជូន និងការជួញដូរឈើហុប និងសត្វព្រៃខុសច្បាប់ឆ្លងដែន។
សេចក្ដីប្រកាសព័ត៌មានបានបន្តថា៖ «ភាគីទាំង ២ ក៏បានឯកភាពធ្វើការសម្របសម្រួលយ៉ាងជិតស្និទ្ធក្នុងការពង្រឹងកិច្ចសហប្រតិបត្តិការលើផ្នែកអនាម័យសត្វ និងរុក្ខជាតិ ជលផល កៅស៊ូ ផ្លែឈើ ផលិតផលសាច់គោ សាច់ជ្រូក និងប្រព័ន្ធធារាសាស្ត្រ»។
រដ្ឋមន្ត្រីការបរទេសទាំង ២ រូបបានអបអរសាទរចំពោះកិច្ចសហប្រតិបត្តិការដ៏មានប្រសិទ្ធភាព និងការជួយគាំទ្រគ្នាទៅវិញទៅមកក្នុងការការពារ និងប្រយុទ្ធប្រឆាំងនឹងជំងឺរាតត្បាតកូវីដ ១៩ ស្របពេលដែលកំពុងខិតខំរក្សាលំហូរពាណិជ្ជកម្មនៃទំនិញឆ្លងកាត់ព្រំដែន និងការវិនិយោគ។
ចំពោះកិច្ចសហប្រតិបត្តិការពាណិជ្ជកម្ម រដ្ឋមន្ត្រីទាំង ២ ក៏បានសម្តែងការពេញចិត្ត ចំពោះការវិវឌ្ឍដ៏ល្អនៃកិច្ចសហប្រតិបត្តិការនេះដោយទំហំពាណិជ្ជកម្មមានចំនួន ៥,២៧ ពាន់ពាន់លានដុល្លារអាមេរិក ក្នុងឆ្នាំ ២០១៩។ ទំហំពាណិជ្ជកម្មនេះមានលើសពី ៥ ពាន់លានដុល្លារ ដែលគ្រោងថានឹងមាននៅឆ្នាំ ២០២០។ ប្រទេសទាំង ២ នឹងជួយសម្រួលដល់សកម្មភាពនាំចូល និងនាំចេញរវាងប្រទេសទាំង ២។
ប្រទេសទាំង ២ បានបញ្ជាក់ជាថ្មីនូវការប្តេជ្ញាចិត្តធ្វើការរួមគ្នាដើម្បីអនុវត្តឱ្យបានជោគជ័យនូវគម្រោងនានាផ្នែកបរិស្ថាន ធនធានទឹក និងឧតុនិយម។ ការបង្កើនកិច្ចសហប្រតិបត្តិការក្នុងការប្រើប្រាស់ ការគ្រប់គ្រង និងអភិវឌ្ឍធនធានទឹកទន្លេមេគង្គ ប្រកបដោយប្រសិទ្ធភាព និងនិរន្តរភាព ការជំរុញការការពារ និងអភិរក្សបរិស្ថាន សកម្មភាពពាក់ព័ន្ធអាកាសធាតុ កំណើនបៃតង និងការគ្រប់គ្រងដីធ្លី ក៏ត្រូវបានឯកភាពគ្នាផងដែរ។
ក្រៅពីនេះគណៈកម្មការចម្រុះក៏បានពិភាក្សាពីកិច្ចសហប្រតិបត្តិការផ្នែកការថែទាំសុខភាព រួមមានការធ្វើចត្តាឡីស័កនៅតាមព្រំដែនដូចដែលភាគីទាំង ២ មានកិច្ចព្រមព្រៀងតាំងពីឆ្នាំ ២០០៦ ការសហការគ្នាក្នុងការឆ្លើយតប និងទប់ស្កាត់ទាន់ពេលវេលាចំពោះការរីករាលដាលនៃជំងឺកូវីដ ១៩ និងការផ្ទុះឡើងមេរោគដទៃទៀត។
ចំពោះបញ្ហាព្រំដែន ភាគីទាំង ២ បានបញ្ជាក់ជាថ្មីនូវការប្តេជ្ញាចិត្តក្នុងការគោរព និងអនុវត្តឱ្យបានពេញលេញនូវបណ្តាសន្ធិសញ្ញា និងកិច្ចព្រមព្រៀងស្តីពីព្រំដែន ដែលបានចុះហត្ថលេខារវាងប្រទេសទាំង ២។
សេចក្ដីប្រកាសព័ត៌មានបានបញ្ជាក់ថា៖ «ភាគីទាំង ២ ក៏បានលើកទឹកចិត្តដល់គណៈកម្មការចម្រុះខណ្ឌសីមា និងការបោះបង្គោលព្រំដែនគោករវាងប្រទេសទាំង ២ ឱ្យធ្វើការយ៉ាងជិតស្និទ្ធ និងពិភាក្សាយ៉ាងសកម្មដើម្បីស្វែងរកដំណោះស្រាយដែលអាចទទួលយកបានទាំងសងខាង ដោយអនុលោមតាមច្បាប់អន្តរជាតិ ចំពោះព្រំដែនគោកចំនួន ១៦ ភាគរយទៀត ដែលពុំទាន់បានខណ្ឌសីមានៅឡើយ»។
លោក ប្រាក់ សុខុន និងលោក ផាម ប៊ិញមិញ ក៏បានផ្លាស់ប្តូរលិខិតូបករណ៍នៃការផ្ដល់សច្ចាប័នលើសន្ធិសញ្ញាបំពេញបន្ថែមលើសន្ធិសញ្ញាកំណត់ព្រំដែនរដ្ឋឆ្នាំ ១៩៨៥ និងសន្ធិសញ្ញាបំពេញបន្ថែមឆ្នាំ ២០០៥ និងពិធីសារខណ្ឌសីមា និងបោះបង្គោលព្រំដែនគោករវាងប្រទេសទាំង ២៕
