ភ្នំពេញៈ កម្ពុជាបានបញ្ចប់ការបោះបង្គោលព្រំដែនក្នុងខេត្តរតនគិរី និងមណ្ឌលគិរីនៅលើទីតាំងដែលបានព្រមព្រៀងដោយសមភាគីវៀតណាម ប៉ុន្តែបានទុកកន្លែងដែលមានជម្លោះនៅដដែល ដោយមិនទាន់ប៉ះពាល់ ខណៈការបោះបង្គោលរួមដំណើរការបាន ៨៤ ភាគរយ។ នេះបើយោងតាមមន្ត្រីគណៈកម្មាធិការព្រំដែន។
លោកស្រី កុយ ពិសី អនុប្រធានគណៈកម្មាធិការព្រំដែនបានសរសេរនៅលើហ្វេសប៊ុករបស់លោកស្រីដោយសម្ដែងការសាទរចំពោះលទ្ធផលនៃការបោះបង្គោលនៅតំបន់ដែលបានឯកភាពគ្នានេះ។
លោកស្រីថា៖ «យើងមានបេសកកម្មការពារអ្នក ទោះជាមានឧបសគ្គយ៉ាងណាក៏ត្រូវតែខិតខំសម្រេចឲ្យបាន។ សូមអបអរសាទរចំពោះលទ្ធផលបញ្ចប់ទាំងស្រុងនៃការបោះបង្គោលព្រំដែនកម្ពុជា-វៀតណាម នៅខេត្តមណ្ឌលគិរី និងខេត្តរតនគិរីនៅតំបន់ដែលឯកភាព»។
លោក វ៉ា គឹមហុង ប្រធានគណៈកម្មាធិការព្រំដែនបានប្រាប់ភ្នំពេញប៉ុស្តិ៍កាលពីថ្ងៃអាទិត្យម្សិលមិញថា ៨៤ ភាគរយនៃការបោះបង្គោលព្រំដែនជាមួយវៀតណាមត្រូវបានបញ្ចប់ ខណៈនៅសល់ ១៦ ភាគរយទៀតកំពុងនៅរង់ចាំជំនួយពីប្រទេសបារាំងនៅឡើយ។
លោកបានថ្លែងថា៖ «លោកជំទាវ កុយ ពិសី និយាយក្នុងហ្វេសប៊ុករបស់គាត់ គាត់និយាយច្បាស់ណាស់គឺយើងបោះបានរួចរាល់នៅក្នុងខេត្ត ២ ខេត្តមណ្ឌលគិរី ហើយនិងខេត្តរតនគិរីរួចរាល់ទាំងស្រុងនៅតំបន់ដែលភាគីទាំង ២ ឯកភាពគ្នា។ នៅតំបន់ដែលភាគីទាំង ២ ឯកភាពគ្នា អ្នកអត្ថាធិប្បាយខ្លះអត់ដឹងអីទេ ដូច អ៊ុំ សំអាន ថានៅដាក់ដាំ ដាក់ហ៊ូត មិនទាន់មានអីផង មានតែកាត់ដីឲ្យគេ។ យើងមានទាន់ឯកភាពឯណា? លោកស្រី កុយ ពិសី និយាយថា នៅតំបន់ដែលភាគីទាំង ២ ឯកភាពគ្នា» ។
កាលពីខែវិច្ឆិកាឆ្នាំ ២០១៦ លោកនាយករដ្ឋមន្ត្រី ហ៊ុន សែន និងសមភាគីវៀតណាមបានឯកភាពគ្នាស្នើសុំការជួយពីប្រទេសបារាំងឲ្យផ្តល់ក្រុមអ្នកជំនាញបច្ចេកទេសដើម្បីជួយបំប្លែងផែនទីដែលមានស្រាប់ពីខ្នាត ១/១០០ ០០០ ទៅជាខ្នាត ១/៥០ ០០០ ដែលមានលម្អិតជាងនេះ។
លោក វ៉ា គឹមហុង បានថ្លែងថាបារាំងជិតយល់ព្រមជាមួយសំណើសុំការជួយហើយ ប៉ុន្តែនៅរង់ចាំភាគីទាំង ២ ឯកភាពគ្នាជាមុនសិន។
លោកថា៖ «នៅមានមួយគរគោកទៀតដែលយើងទុកឲ្យបារាំងជួយតែខ្ញុំមិនលម្អិតទេ។ នៅសល់ ១៦ ភាគរយ យើងឯកភាពគ្នាមាន ៨៤ ភាគរយ។ ១៦ ភាគរយយើងសុំឲ្យបារាំងជួយហើយ»។
លោកបានបញ្ជាក់ថា៖ «ជិតព្រមហើយ ប៉ុន្តែត្រូវធ្វើបែបបទបច្ចេកទេសខាងក្រោមឲ្យវាត្រូវគ្នា ព្រោះយើងមិនត្រូវគ្នាអាហ្នឹង។ អ៊ីចឹងយើងធ្វើនេះមិនមែនកាត់ដីឲ្យគេដូចអាពួកនោះនិយាយទេណា។ នៅចំណុចមិនត្រូវគ្នាក៏យើងមិនធ្វើដែរ មិនចេះតែឲ្យធ្វើទេ»។
លោក អ៊ុំ សំអាន អតីតតំណាងរាស្ត្រមកពីអតីតគណបក្សសង្គ្រោះជាតិដែលទើបដោះលែងពីពន្ធនាគារមិនអាចសុំអត្ថាធិប្បាយបានទេកាលពីម្សិលមិញ។
លោក សុខ ទូច ប្រធានរាជបណ្ឌិត្យសភាកម្ពុជាដែលបានចុះសិក្សាការបោះបង្គោលព្រំដែនបានថ្លែងកាលពីសប្ដាហ៍មុនថា ការបោះបង្គោលព្រំដែននៅមានបញ្ហាមិនចុះសម្រុងគ្នារវាងភាគីកម្ពុជា និងវៀតណាមនៅចន្លោះបង្គោល ៥៥ ដល់ ៦០ គឺត្រង់ចំណុចដាក់ដាំ និងដាក់ហ៊ូតដែលកម្ពុជាហៅថា តំបន់ អូរហ៊ុច និងនៅកន្លែងវៀតណាមជីកស្រះក្នុងឃុំប៉ក់ញ៉ៃ ស្រុកអូរយ៉ាដាវ ខេត្តរតនគិរី។
លោក សុខ ទូច បានឲ្យដឹងថា ព្រំដែនកម្ពុជា-វៀតណាមមាន ៣១៤ បង្គោលលើចម្ងាយ ១ ២៧០ គីឡូម៉ែត្រ។
លោក រម៉ាស់ ឆ្វាត់ តំណាងសហគមន៍ឡំក្នុងឃុំប៉ក់ញ៉ៃ ស្រុកអូរយ៉ាដាវ ខេត្តរតនគិរី បានប្រាប់កាលពីម្សិលមិញថាមិនឃើញមានការបោះបង្គោលព្រំដែននៅក្នុងឃុំប៉ក់ញ៉ៃដែលមានភាពចម្រូងចម្រាសពីរឿងវៀតណាមជីកស្រះនោះទេ ប៉ុន្តែខាងភាគីវៀតណាមនៅបន្តប្រើប្រាស់ស្រះទាំងនោះដើម្បីស្រោចស្រពដំណាំកាហ្វេ និងម្រេចរបស់ពួកគេ។
លោកបានបញ្ជាក់ថា៖ «យួនដាំម្រេច ដាំកាហ្វេ។ បង្គោលព្រំដែនខ្ញុំអត់ឃើញថា គេដាំនៅកន្លែងណាៗ ខ្ញុំអត់ដឹងដែរ អត់ឃើញមានដាំបង្គោលទេ។ កន្លែងនេះតាំងពីដំបូង គេដាំកាហ្វេ និងម្រេច»។
លោកបន្តថាវៀតណាមបានជីកស្រះចំនួន ៩ ប៉ុន្តែបានលុបចោលវិញចំនួន ១៕ PS