ភ្នំពេញៈ ក្រៅពីបានឯកភាពគ្នា ចុះហត្ថលេខាលើឯកសារចំនួន ៥ ភាគីកម្ពុជា និងវៀតណាម បានប្តេជ្ញាបន្តថែរក្សា ការពារ និងអភិវឌ្ឍទំនាក់ទំនងទ្វេភាគីឲ្យកាន់តែប្រសើរទៅតាមស្មារតី «ភាពជាអ្នកជិតខាង មិត្តភាពជាប្រពៃណី កិច្ចសហប្រតិបត្តិការគ្រប់ជ្រុងជ្រោយ និងស្ថិរភាពយូរអង្វែង»។
នេះបើយោងតាមសេចក្តីថ្លែងការណ៍រួមរវាងកម្ពុជា-វៀតណាម ដែលចេញផ្សាយដោយក្រសួងការបរទេស និងសហប្រតិបត្តិការអន្តរជាតិកាលពីម្សិលមិញ។
សេចក្តីថ្លែងការណ៍រួមបានឲ្យដឹងថាក្នុងដំណើរទស្សនកិច្ចផ្លូវរដ្ឋ នៅប្រទេស កម្ពុជា រយៈពេល ២ ថ្ងៃគឺចាប់ពីថ្ងៃ ទី ២៥ ដល់ថ្ងៃ ទី ២៦ ខែកុម្ភៈ ឆ្នាំ ២០១៩ លោក ង្វៀង ហ្វ៊ូជុង អគ្គលេខាធិការនៃគណៈកម្មាធិការមជ្ឈិមបក្សកុម្មុយនីស្ត និងជាប្រធានរដ្ឋនៃសាធារណរដ្ឋសង្គមនិយមវៀតណាម បានចូលគាល់ព្រះករុណា ព្រះបាទសម្តេចព្រះបរមនាថ នរោត្តម សីហមុនី ចូលជួបលោក សាយ ឈុំ ប្រធានព្រឹទ្ធសភា លោក ហេង សំរិន ប្រធានរដ្ឋសភា និងលោកនាយករដ្ឋមន្ត្រី ហ៊ុន សែន។
សេចក្តីថ្លែងការណ៍រួមបញ្ជាក់ថា លោក ង្វៀង ហ្វ៊ូជុង និងលោក ហ៊ុន សែន បានអញ្ជើញជាអធិបតីក្នុងពិធីចុះហត្ថលេខាលើឯកសារ ចំនួន ៥ ដែលក្នុងនោះរួមមានទី១- សេចក្ដីបន្ថែមស្តីពីការកែប្រែ មាត្រា ៦ និងមាត្រា ១៧ នៃកិច្ចព្រមព្រៀងរវាងកម្ពុជា-វៀតណាម ស្តីពីការដឹកជញ្ជូនផ្លូវទឹក ទី២- ពិធីសារស្តីពីវិសោធនកម្មលើពិធីសារសម្រាប់អនុវត្តកិច្ចព្រមព្រៀងរវាងកម្ពុជា-វៀតណាម ស្តីពីការដឹកជញ្ជូនផ្លូវគោក ទី៣- អនុស្សរណៈនៃការយោគយល់គ្នា ស្តីពីការផ្តល់ហិរញ្ញប្បទានឥតសំណងចំនួន ២៥ លានដុល្លារ សម្រាប់ការអនុវត្តគម្រោងសាងសង់អគាររដ្ឋបាល របស់រដ្ឋសភា ទី៤- ការចុះហត្ថលេខា លើកិច្ចសម្របសម្រួលជំរុញពាណិជ្ជកម្មទ្វេភាគីរវាងកម្ពុជា-វៀតណាម និងទី៥- ការចុះហត្ថលេខា លើអនុស្សរណៈនៃការយោគយល់គ្នា ស្តីពីកិច្ចសហប្រតិបត្តិការទេសចរណ៍ សម្រាប់ឆ្នាំ ២០១៩-២០២១ រវាងក្រសួងទេសចរណ៍ប្រទេសទាំង ២។
សេចក្តីថ្លែងការណ៍បានបញ្ជាក់ដូច្នេះថា៖ «ថ្នាក់ដឹកនាំនៃប្រទេសទាំង ២ បានធ្វើសេចក្តីរាយការណ៍ អំពីការអភិវឌ្ឍថ្មីៗរបស់ ប្រទេសរៀងខ្លួន និងបានផ្លាស់ប្តូរទស្សនៈគ្នាយ៉ាងស៊ីជម្រៅ លើកិច្ចសហប្រតិបត្តិការទ្វេភាគីក៏ដូចជាបញ្ហាតំបន់ និងពិភពលោកដែលមានផលប្រយោជន៍ទៅវិញទៅមក»។
ភាគីទាំង ២ បានសម្តែងនូវក្តីសោមនស្សរីករាយ ចំពោះការរីកចម្រើនល្អឥតខ្ចោះនៃចំណង មិត្តភាព និងកិច្ចសហប្រតិបត្តិការគ្រប់ជ្រុងជ្រោយ រវាងប្រទេសកម្ពុជា និងវៀតណាម ក្នុងរយៈពេលប៉ុន្មានឆ្នាំកន្លងទៅនេះដែលបានរួមចំណែកក្នុងការធានាសន្តិភាព ស្ថិរភាព ហើយថា ភាគីទាំង ២ បានឯកភាពគ្នាថា ការពារ ថែរក្សា និងការអភិឌ្ឍទំនាក់ទំនង ទ្វេភាគីតាមស្មារតី «ភាពជាអ្នកជិតខាងល្អ មិត្តភាពជាប្រពៃណី កិច្ចសហប្រតិបត្តិការគ្រប់ជ្រុងជ្រោយ ស្ថិរភាពយូរអង្វែង» ដោយឈរលើគោលការណ៍ នៃការឯកភាពក្នុងសេចក្តីថ្លែងការណ៍រួមកម្ពុជាវៀតណាមលើកមុន។
ភាគីទាំង ២ ក៏បានឯកភាពគ្នា ពង្រឹង និងពង្រីកទំនាក់ទំនង នយោបាយឲ្យកាន់តែស៊ីជម្រៅ លើកកម្ពស់ ប្រសិទ្ធភាពនៃយន្តការកិច្ចសហប្រតិបត្តិការទ្វេភាគី ពង្រឹងការគាំទ្រគ្នាទៅវិញទៅមក រវាងបណ្តាស្ថាប័នថ្នាក់ជាតិ និងអាជ្ញាធរមូលដ្ឋាននៃប្រទេសទាំង ២ និងលើកកម្ពស់ប្រសិទ្ធភាពនៃកិច្ចសហប្រតិបត្តិការ សេដ្ឋកិច្ច វប្បធម៌ អប់រំ សុខាភិបាលវិទ្យាសាស្ត្រ និងបច្ចេកទេស។
សេចក្តីថ្លែងការណ៍បញ្ជាក់ទៀតថា៖ «ភាគីទាំង ២ សង្កត់ធ្ងន់អំពីសារៈសំខាន់ និងការឯកភាពគ្នា ដើម្បីពង្រឹងកិច្ចសហប្រតិបត្តិការ ផ្នែកការពារជាតិ និងសន្តិសុខ ដោយប្រកាន់ខ្ជាប់នូវគោលការណ៍ មិនអនុញ្ញាតឲ្យកម្លាំងនយោបាយ ឬកម្លាំងយោធាណាមួយប្រើប្រាស់ទឹកដីរបស់ប្រទេសខ្លួនដើម្បីគំរាមកំហែងដល់សន្តិសុខជាតិនៃប្រទេសមួយទៀត និងដោះស្រាយបញ្ហានានាដែលកើតមានរវាងប្រទេសទាំង ២ ដោយសន្តិវិធី»។
ទន្ទឹមនឹងនេះដែរ ក្នុងជំនួបពិភាក្សាការងារកាលពីព្រឹកម្សិលមិញលោកហ៊ុន សែន បានសម្ដែងការអបអរសាទរ ចំពោះមុខលោក ង្វៀង ហ៊្វូជុង ប្រមុខរដ្ឋវៀតណាមដែលប្រទេសវៀតណាមបាននិងកំពុងរៀបចំកិច្ចប្រជុំកំពូលលើកទី ២ ឲ្យមេដឹកនាំកំពូលពិភពលោក គឺលោក ដូណាល់ ត្រាំ ប្រធានាធិបតីសហរដ្ឋអាមេរិក និងមេដឹកនាំកូរ៉េខាងជើងលោក គីម ជុងអ៊ុន។ នេះបើយោងតាមទំព័រហ្វេសប៊ុកផ្លូវការរបស់លោកនាយករដ្ឋមន្ត្រី ដែលបានបង្ហោះ កាលពីព្រឹកម្សិលមិញ។
កិច្ចប្រជុំកំពូលលើកទី២រវាង លោក ដូណាល់ ត្រាំ លោក គីម ជុងអ៊ុន នឹងចាប់ផ្តើមនៅថ្ងៃទី ២៧-២៨ ខែកុម្ភៈ ឆ្នាំ ២០១៩ នេះនៅប្រទេស វៀតណាម ខណៈដែលជំនួបលើកទី១ កាលពីឆ្នាំមុនធ្វើឡើងនៅប្រទេស សិង្ហបុរី។
នៅក្នុងជំនួបរវាង លោក ង្វៀង ហ៊្វូជុង ប្រធានរដ្ឋនៃសាធារណរដ្ឋសង្គមនិយមវៀតណាមជាមួយនឹងលោក ហេង សំរិន ប្រធានរដ្ឋសភាកាលពីព្រឹកម្សិលមិញនេះដែរ លោក ហេង សំរិន ក៏បានថ្លែងកោតសរសើរ និងអបអរសាទរចំពោះប្រទេស វៀតណាម ដែលបានធ្វើជាម្ចាស់ផ្ទះរៀបចំកិច្ចប្រជុំកំពូលរវាងលោក ដូណាល់ ត្រាំ និងលោក គីម ជុងអ៊ុន។
បើយោងតាមហ្វេសប៊ុករបស់លោក ហេង សំរិន បានបញ្ជាក់ដូច្នេះថា៖ «បច្ចុប្បន្នប្រទេស វៀតណាម កំពុងដើរតួរនាទីយ៉ាងសំខាន់ តាមរយៈកិច្ចសហប្រតិបត្តិការជិតស្និទ្ធទាំងក្នុងតំបន់ និងសកលលោក ហើយកិត្យានុភាព របស់មិត្តវៀតណាម កាន់តែលេចធ្លោលើឆាកអន្តរជាតិ»។
ជាមួយគ្នានេះដែរ នៅក្នុងជំនួបរវាង លោក ង្វៀង ហ៊្វូជុង ជាមួយនឹងលោក សាយ ឈុំ ប្រធានព្រឹទ្ធសភា កាលពីម្សិលមិញនេះដែរលោក សាយ ឈុំ បានជំរុញឲ្យរាជរដ្ឋាភិបាលកម្ពុជា-វៀតណាម ចរចាបញ្ចប់លើបញ្ហាព្រំដែន ដើម្បីឈានទៅសម្រេចបោះបង្គោលព្រំដែន រវាងប្រទេសទាំង ២ ឲ្យបានឆាប់ចប់។
បើយោងតាមសារព័ត៌មានក្នុងស្រុកមួយបានស្រង់សម្តីលោកសាយ ឈុំ មកចុះផ្សាយដូច្នេះថា៖ «លើកទឹកចិត្តដល់រដ្ឋាភិបាលនៃប្រទេសទាំង ២ ក្នុងការចរចាបញ្ចប់លើបញ្ហាព្រំដែន ដើម្បីឈានទៅសម្រេចនៃការបោះបង្គោល និងការងារខណ្ឌសីមារវាងប្រទេសទាំង ២ ឲ្យបានគ្រប់សព្វកាន់តែឆាប់ និងល្អប្រសើរ ក្នុងនោះដើម្បីកសាងព្រំដែនកម្ពុជា-វៀតណាម ជាព្រំដែនសន្តិភាព មិត្តភាព សហប្រតិបត្តិការ និងការអភិវឌ្ឍ»។
លោក សុខ ឥសាន អ្នកនាំពាក្យគណបក្សប្រជាជនបានថ្លែងថា កម្ពុជា-វៀតណាម គឺជាទំនាក់ទំនងធម្មតា ហើយការមកទស្សនកិច្ចផ្លូវការនេះ គឺជាផ្នែកមួយដែលប្រមុខរដ្ឋ ឬប្រមុខរដ្ឋាភិបាល ដែលទើបតែឡើងកាន់តំណែងដើរសម្តែងការគួរសម ហើយវាក៏ជួយពង្រឹង និងពង្រីកទំនាក់ទំនង និងកិច្ចសហប្រតិបត្តិការ និងជំរុញការដោះដូរពាណិជ្ជកម្មរវាងប្រទេសទាំង ២ ផងដែរ។
លោកបញ្ជាក់ថា៖ «ទំនាក់ទំនងរវាងកម្ពុជា និងវៀតណាម ប្រៀបដូចជាបបូរមាត់ ហើយនឹងធ្មេញ ហើយវាអត់បែកគ្នាកើតទេមិនមែនដូចពួកប្រឆាំងចេះតែនិយាយ បង្កអរិភាពរហូតដល់ប្រកាន់ពូជសាសន៍រវាងប្រទេសជិតខាង ហើយនេះមិនមែនរកមិត្តទេតែបែរជារកសត្រូវជាការល្អ យើងត្រូវរកសម្ព័ន្ធភាព មិត្តភាព សាមគ្គីភាព និងកិច្ចសហប្រតិបត្តិការទៅវិញទៅមកដើម្បីវិបុលភាព»៕