ភ្នំពេញៈ មន្ត្រីនៃក្រសួងការងារ និងបណ្តុះបណ្តាលវិជ្ជាជីវៈបានអះអាងថា កម្ពុជា និងសិង្ហបុរីបានប្តេជ្ញាបន្តកិច្ចសហការគ្នាឱ្យកាន់តែរឹងមាំថែមទៀត ក្នុងការពង្រីកលើវិស័យការងារ និងបណ្តុះបណ្តាលធនធានមនុស្សរបស់កម្ពុជាជាពិសេសនៅក្នុងបរិបទនៃជំងឺកូវីដ ១៩។
លោក ង៉ុយ រិទ្ធ អនុរដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈបានថ្លែងពីម្សិលមិញថា ក្រោយជំនួបមុនពេលជម្រាបលារវាងលោក ម៉ាយឃើល តាន (Michael Tan) ឯកអគ្គរដ្ឋទូតសិង្ហបុរីប្រចាំកម្ពុជា ដែលទើបផុតអាណត្តិ និងលោក អ៊ិត សំហេង រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈនៅទីស្តីការក្រសួងការងារភាគីទាំង ២ បានបង្ហាញពីសមិទ្ធផលនៃកិច្ចសហប្រតិបត្តិការគ្នាយ៉ាងល្អនាពេលកន្លងមករហូតពេលនេះ ជាពិសេសលើវិស័យការងារ និងបណ្តុះបណ្តាលវិជ្ជាជីវៈតែម្តង។
លោកថា៖ «ភាគីទាំង ២ បានសម្តែងមោទនភាពខ្ពស់ចំពោះកិច្ចសហប្រតិបត្តិការដែលប្រទេសទាំង ២ បានបង្កើតឡើងលើវិស័យការងារ និងបណ្តុះបណ្តាលវិជ្ជាជីវៈដែលជារួមតាំងពីមានការឯកភាពគ្នាបញ្ជូនកម្លាំងពលកម្មពីកម្ពុជាទៅធ្វើការនៅទីនោះ យើងឃើញថាពលករកម្ពុជាដែលធ្វើការនៅទីនោះមានចំនួន ១ ១០០ នាក់ហើយ ដែលបច្ចុប្បន្ននេះពលករកំពុងបម្រើការនៅទីនោះមាន ៨១៨ នាក់»។
លោក ង៉ុយ រិទ្ធ ឱ្យដឹងទៀតថា កន្លងមកកម្ពុជាក៏បានបញ្ជូនគ្រូ និងសិស្សានុសិស្សទៅចុះកម្មសិក្សានៅសិង្ហបុរីដើម្បីស្វែងយល់ពីជំនាញផ្សេងៗផងដែរ។ ក្រៅពីនេះកម្ពុជា និងសិង្ហបុរីបានសហការគ្នាលើផ្នែកសុវត្ថិភាព និងសុខភាពរបស់កម្មករនៅកន្លែងធ្វើការ ដោយក្រសួងការងារទទួលបាននូវបទពិសោធពីសិង្ហបុរីដើម្បីដោះស្រាយជូនដល់កម្មករនិយោជិត។
ក្នុងជំនួបនេះ លោក អ៊ិត សំហេង ក៏បានលើកឡើងពីវឌ្ឍនភាពនៃទំនាក់ទំនងការទូត និងវិស័យនានារវាងកម្ពុជា និងសិង្ហបុរីក្នុងអាណត្តិលោក ម៉ាយឃើល តាន ដែលបានរួមចំណែកអភិវឌ្ឍកម្ពុជា។
ជាមួយគ្នានេះលោករដ្ឋមន្ត្រីបានស្នើដល់ភាគីសិង្ហបុរីឱ្យបន្តសហការលើវិស័យបណ្ដុះបណ្ដាលជំនាញបច្ចេកទេស និងវិជ្ជាជីវៈ (TVET) ដែលជាគន្លឹះដ៏សំខាន់ក្នុងការអភិវឌ្ឍប្រទេស ពិសេសគឺកម្ពុជាត្រូវការធនធានមនុស្សប្រកបដោយគុណវុឌ្ឍិដែលកន្លងមកសិង្ហបុរីក៏បានដើរតួច្រើនក្នុងការជំរុញការងារនេះដែរ។
លោក អ៊ិត សំហេង បញ្ជាក់ថា៖ «កម្ពុជាចង់បន្តកិច្ចសហប្រតិបត្តិការជាមួយសិង្ហបុរីតទៅមុខទៀត ហើយសង្ឃឹមថា សិង្ហបុរីនឹងនៅតែចែករំលែកបទពិសោធដល់កម្ពុជាបន្ថែមទៀត»។
ក្នុងឱកាសនោះដែរ អគ្គរដ្ឋទូតសិង្ហបុរីក៏បានលើកឡើងដែរពីកិច្ចខិតខំរបស់រដ្ឋាភិបាល និងស្ថានទូតសិង្ហបុរីប្រចាំកម្ពុជាក្នុងការចូលរួមបណ្ដុះបណ្ដាលបច្ចេកទេស និងវិជ្ជាជីវៈដល់សិក្ខាកាមកម្ពុជាដោយលោកបានកត់សម្គាល់ថា សិក្ខាកាមកម្ពុជាចូលចិត្តសិក្សានៅកន្លែងការងារផ្ទាល់ដែលជាចំណុចពិសេសមួយក្នុងការអភិវឌ្ឍសមត្ថភាពឱ្យកាន់តែល្អ។
ទាក់ទងនឹងការស្នើរបស់ភាគីកម្ពុជា លោក ម៉ាយឃើល តាន បានឆ្លើយតបថា លោកនឹងយកសំណើនេះដាក់ជូនដល់រដ្ឋាភិបាលសិង្ហបុរីដើម្បីពិចារណា និងបន្តកិច្ចសហប្រតិបត្តិការគ្នាឱ្យកាន់តែប្រសើរ៕