.jpg)
លោក ស ខេង ក្នុងជំនួបជាមួយរដ្ឋមន្ត្រីសន្តិសុខ ឡាវ លោកវិល័យ ឡាខាំហ្វង សប្តាហ៍មុន។ រូបថត ក្រសួងមហាផ្ទៃ
ភ្នំពេញៈ រដ្ឋមន្ដ្រីក្រសួងមហាផ្ទៃកម្ពុជា និងរដ្ឋមន្ដ្រីក្រសួងសន្តិសុខសាធារណៈឡាវក្នុងដំណើរទស្សនកិច្ចរយៈពេល ៣ ថ្ងៃនាដើមខែមីនាបានចុះហត្ថលេខាលើកំណត់ហេតុស្ដីពីកិច្ចសហប្រតិបត្ដិការសម្រាប់ឆ្នាំ ២០២០ និងបានឯកភាពយកចិត្ដទុកដាក់បន្តអនុវត្ដកិច្ចការសំខាន់ៗជាមួយគ្នាលើទំនាក់ទំនងតាមព្រំដែន ដោយបន្តសហការទប់ស្កាត់ និងបង្ក្រាបបទល្មើសគ្រឿងញៀនឆ្លងដែន និងបង្ក្រាបការលួចឆ្លងដែនខុសច្បាប់ជាដើម។
ការចុះហត្ថលេខានេះធ្វើឡើងតាមរយៈដំណើរទស្សនកិច្ចការងាររយៈពេល ៣ ថ្ងៃរបស់លោកឧបនាយករដ្ឋមន្ត្រី ស ខេង និងជារដ្ឋមន្ដ្រីក្រសួងមហាផ្ទៃកាលពីថ្ងៃទី ៤-៦ ខែមីនានេះនៅរដ្ឋធានីវៀងចន្ទន៍នៃសាធារណរដ្ឋប្រជាមានិតឡាវជាមួយលោក វិល័យ ឡាខាំហ្វង រដ្ឋមន្ដ្រីក្រសួង សន្ដិសុខសាធារណៈនៃសាធារណរដ្ឋប្រជាមានិតឡាវ ដើម្បីចូលរួមធ្វើជាសហប្រធានដឹកនាំកិច្ចប្រជុំពិនិត្យវាយតម្លៃលទ្ធផល ការអនុវត្ដកំណត់ហេតុស្ដីពីកិច្ចសហប្រតិបត្ដិការឆ្នាំ ២០២០។
តាមសេចក្ដីប្រកាសព័ត៌មានរបស់ក្រសួងមហាផ្ទៃកាលពីថ្ងៃទី ៦ មីនា ស្ដីពីលទ្ធផលនៃដំណើរទស្សនកិច្ចនេះបានបញ្ជាក់ថា ក្រសួងទាំង ២ បានវាយតម្លៃខ្ពស់ចំពោះលទ្ធផលល្អប្រសើរដែលសម្រេចបានតាមរយៈការអនុវត្ដកំណត់ហេតុស្ដីពីកិច្ចសហប្រតិបត្ដិការឆ្នាំ ២០១៩ រវាងក្រសួងទាំង ២។ ក្នុងនោះមានការផ្លាស់ប្ដូរទស្សនកិច្ចប្រតិភូអាជ្ញាធរខេត្ដជាប់ព្រំដែន និងប្រតិភូនៃបណ្ដាអង្គភាពពាក់ព័ន្ធនៅថ្នាក់ក្រសួង។ ការបណ្ដុះបណ្ដាល ធនធានមនុស្ស និងកិច្ចសហការបង្ក្រាបបទល្មើសគ្រប់ប្រភេទនៅតាមតំបន់ព្រំដែនជាពិសេសបទល្មើសគ្រឿងញៀន។
សេចក្ដីប្រកាសព័ត៌មានដដែលឱ្យដឹងថា៖ «ភាគីទាំង ២ បានវាយតម្លៃខ្ពស់ចំពោះកិច្ចសហការជិតស្និទ្ធរវាងអាជ្ញាធរខេត្ដ និងកងកម្លាំងមានសមត្ថកិច្ចនៃបណ្ដាខេត្ដជាប់ព្រំដែនរបស់ប្រទេសទាំង ២ ក្នុងការថែរក្សាបរិយាកាសសន្តិសុខតាមខ្សែបន្ទាត់ព្រំដែនបានយ៉ាងល្អប្រសើរ រួមចំណែកបង្កលក្ខខណ្ឌអំណោយផលដល់ការប្រកបជីវភាពរស់នៅរបស់ប្រជាពលរដ្ឋក៏ដូចជាបម្រើដល់ការអភិវឌ្ឍសង្គមជាតិ និងផលប្រយោជន៍ទៅវិញទៅមករបស់ប្រជាជននៃប្រទេសទាំង ២ កម្ពុជា-ឡាវ»។
ក្រសួងមហាផ្ទៃបញ្ជាក់ថា ភាគីទាំង ២ បានចុះហត្ថលេខាលើកំណត់ហេតុស្តីពីកិច្ចសហប្រតិបត្ដិការសម្រាប់ឆ្នាំ ២០២០ និងបានឯកភាពយកចិត្តទុកដាក់បន្តអនុវត្តកិច្ចការសំខាន់ៗមួយចំនួន រួមមានបន្តជំរុញឲ្យអាជ្ញាធរខេត្តសហការបង្កលក្ខណៈងាយស្រួលដល់ការចេញ-ចូលឆ្លងកាត់ព្រំដែនរបស់ប្រជាពលរដ្ឋ និងការផ្លាស់ប្តូរពាណិជ្ជកម្មទៅវិញទៅមក ដើម្បីបម្រើដល់សេចក្តីត្រូវការនៃការអភិវឌ្ឍ និងការរីកចម្រើននៃជីវភាពរបស់ប្រជាពលរដ្ឋ ដែលរស់នៅតំបន់ព្រំដែន។ ព្រមទាំងសហការដោះស្រាយបញ្ហា ឬបាតុភាពផ្សេងៗជូនប្រជាពលរដ្ឋបានទាន់ពេលវេលាដោយសន្តិវិធី និងមានការយោគយល់។
ក្រសួងបន្ថែមថា ភាគីទាំង ២ បន្តសហការចាត់វិធានការម៉ឺងម៉ាត់ទប់ស្កាត់ និងបង្ក្រាបបទល្មើសគ្រឿងញៀនឆ្លងកាត់ព្រំដែននៃប្រទេសទាំង ២ ព្រមទាំងសហការផ្លាស់ប្ដូរព័ត៌មាន និងបទពិសោធទៅវិញទៅមកពាក់ព័ន្ធនឹងបទល្មើសគ្រឿងញៀន។ ជាពិសេសជំរុញបង្កើតភូមិ-ឃុំ និងសាលារៀន គ្មានគ្រឿងញៀននៅតាមព្រំដែន។ បន្តជំរុញចាត់វិធានការ តឹងរ៉ឹង ដើម្បីទប់ស្កាត់ និងបង្ក្រាបការលួចឆ្លងដែនខុសច្បាប់ ព្រមទាំងបន្តកិច្ចសហប្រតិបត្តិការគ្រប់គ្រងតាមខ្សែបន្ទាត់ព្រំដែន និងសហការដោះស្រាយបញ្ហាផ្សេងៗដោយសន្តិវិធីឈរលើគោលការណ៍គោរពឯករាជ្យ និងអធិបតេយ្យគ្នាទៅវិញទៅមក៕
