ភ្នំពេញៈ រដ្ឋាភិបាលនៃព្រះរាជាណាចក្រកម្ពុជា និងសាធារណរដ្ឋប្រជាធិបតេយ្យប្រជាមានិតឡាវបានពិភាក្សាគ្នា និងបានវាយតម្លៃខ្ពស់អំពីទំនាក់ទំនងល្អរវាងប្រទេសទាំង ២ ហើយបានជំរុញទំនាក់ទំនងល្អនេះឲ្យកាន់តែស៊ីជម្រៅក្នុងនាមជាដៃគូយុទ្ធសាស្ត្រគ្រប់ជ្រុងជ្រោយ ទាំងអាជ្ញាធរដែនដី កងទ័ព និងប្រជាពលរដ្ឋនៃប្រទេសទាំង ២ រស់នៅតាមបន្ទាត់ព្រំដែនបង្កើនភាពស្និទ្ធស្នាលដើម្បីកសាងព្រំដែនសន្តិភាព និងការអភិវឌ្ឍ។
លោក ប៊ុនញ៉ាំង វរជីត អគ្គលេខាបក្ស និងជាប្រធានរដ្ឋនៃសាធារណរដ្ឋប្រជាធិបតេយ្យ-ប្រជាមានិតឡាវបានមកដល់រាជធានីភ្នំពេញកាលពីថ្ងៃទី ៩ កុម្ភៈបានជួបពិភាក្សាដាច់ដោយឡែកពីគ្នាជាមួយសមភាគីកម្ពុជាជាច្រើនថ្នាក់ ហើយបានចាកចេញពីរាជធានីភ្នំពេញវិញកាលពីម្សិលមិញ។
លោក វរជីត បានចូលគាល់ព្រះមហាក្សត្រលោក សាយ ឈុំ ប្រធានព្រឹទ្ធសភា លោក ហេង សំរិន ប្រធានរដ្ឋសភា និងលោកនាយករដ្ឋមន្ត្រី ហ៊ុន សែន។
យោងតាមសេចក្ដីប្រកាសព័ត៌មានរួមកម្ពុជា-ឡាវបានឲ្យដឹងថា៖ «ការលើកកម្ពស់ (ជំនួបទ្វេភាគី) នេះនឹងពង្រឹង និងលើកស្ទួយបន្ថែមទៀតនូវចំណងមិត្តភាព ស្មារតីសាមគ្គីភាពជាភាតរៈ និងកិច្ចសហប្រតិបត្តិការក្នុងវិស័យ សន្តិសុខ នយោបាយ សេដ្ឋកិច្ច សង្គមវប្បធម៌នៃប្រទេសទាំង ២»។
លោក ប៊ុនញ៉ាំង វរជីត បានពិភាក្សាទ្វេភាគីជាមួយលោក ហេង សំរិន ប្រធានរដ្ឋសភាកាលពីរសៀលថ្ងៃទី ៩ ខែ កុម្ភៈ ឆ្នាំ ២០២០ នៅវិមានរដ្ឋសភា ហើយបានផ្សព្វផ្សាយតាមគេហទំព័ររដ្ឋសភាបានឲ្យដឹងថា សមភាគីឡាវបានសម្តែងការកោតសរសើរចំពោះការរីកចម្រើនយ៉ាងខ្លាំងរបស់កម្ពុជានៅក្នុងរយៈពេលចុងក្រោយនេះធ្វើឲ្យកម្រិតជីវភាពរបស់ពលរដ្ឋកាន់តែល្អប្រសើរ ហើយក៏បានវាយតម្លៃខ្ពស់ចំពោះទំនាក់ទំនង និងកិច្ចសហប្រតិបត្តិការដ៏ល្អរវាងប្រទេសទាំង ២ ទាំងស្ថាប័ននីតិប្បញ្ញត្តិ និងនីតិប្រតិបត្តិ។
គេហទំព័រដដែលនេះបានឲ្យដឹងថា ដើម្បីឱ្យទំនាក់ទំនងដ៏ល្អជាប្រពៃនេះកាន់តែរឹងមាំឡើងពីថ្នាក់លើដល់ថ្នាក់ក្រោមលោក ប៊ុនញ៉ាំង វរជីត បានស្នើទៅកាន់សមភាគីកម្ពុជាឲ្យជួយជំរុញទំនាក់ទំនងប្រជាពលរដ្ឋប្រទេសទាំង ២ ពិសេសពលរដ្ឋរស់នៅតាមបន្ទាត់ព្រំដែនឲ្យកាន់តែមានភាពជិតស្និទ្ធគ្នាឡើង ក្នុងការកសាងបន្ទាត់ព្រំដែនកម្ពុជា និងឡាវជាព្រំដែនសុខសន្តិភាព និងអភិវឌ្ឍន៍។
លោក ហេង សំរិន បានថ្លែងទៅកាន់សមភាគីឡាវវិញដោយអបអរសាទរចំពោះសមិទ្ធផលដ៏ធំធេងដែលថ្នាក់ដឹកនាំ និងប្រជាជនឡាវសម្រេចបានក្នុងការកសាង អភិវឌ្ឍ សេដ្ឋកិច្ចសង្គម រីកចម្រើនយ៉ាងឆាប់រហ័ស ហើយជីវភាពរស់នៅរបស់ប្រជាជនឡាវ លោកក៏បានបង្ហាញជំនឿមុតមាំថា ក្រោមការដឹកនាំដ៏ភ្លឺស្វាងរបស់បក្សប្រជាជនបដិវត្តន៍ឡាវនឹងបន្តទទួលជោគជ័យថ្មីៗថែមទៀតក្នុងដំណើរការអភិវឌ្ឍន៍ប្រទេសជាតិរបស់ខ្លួនកាន់តែរីកចម្រើនរុងរឿង។
លោក ហេង សំរិន បានថ្លែងថា៖ «ទំនាក់ទំនងមិត្តភាពជាប្រពៃណី និងកិច្ចសហប្រតិបត្តិការគ្រប់ជ្រុងជ្រោយរវាងបក្សរដ្ឋាភិបាល និងប្រជាជននៃប្រទេសទាំង ២ កម្ពុជា-ឡាវដែលមានការរីកចម្រើនឥតឈប់ឈរបាននាំមកនូវផលប្រយោជន៍ដ៏ឧត្តុង្គឧត្តមសម្រាប់ប្រជាជាតិទាំងសងខាង»។
ដោយឡែកលោកនាយករដ្ឋមន្ត្រី ហ៊ុន សែន កាលពីថ្ងៃអាទិត្យក៏បានទទួលជួបជាមួយលោក ប៊ុនញ៉ាំង វរជីត ដែរដោយភាគីទាំង ២ បានរៀបរាប់ថា ជារៀងដរាបមកកម្ពុជា និងឡាវជាមិត្តជិតស្និទ្ធជាទីបំផុត ហើយក៏ជាមិត្តដែលបានជួយគ្នាទៅវិញទៅមកក្នុងន័យនេះគឺបានបង្កនូវលក្ខណៈឲ្យប្រទេសទាំង ២ ជាប្រទេសភូមិផងរបងតែមួយ ជាប្រទេសជិតខាងដ៏ល្អ ហើយក៏ជាប្រទេសដែលមានកំណើនពាណិជ្ជកម្មទៅវិញទៅមកកាន់តែកើនឡើងល្អជាងនេះទៀតក៏មានសុវត្ថិភាពល្អផងដែរនៅតាមព្រំដែន។
ហ្វេសប៊ុករបស់លោក ហ៊ុន សែន បានបន្តថា លោក ប៊ុនញ៉ាំង វរជីត ក៏បានឲ្យដឹងថា កន្លងមកភាគីឡាវមានសេចក្តីរីករាយយ៉ាងខ្លាំងដែលនាយករដ្ឋមន្ត្រីទាំង ២ បានលើកកម្ពស់លើទំនាក់ទំនងប្រទេសទាំង ២ ឲ្យទៅជាទំនាក់ទំនងជាដៃគូយុទ្ធសាស្ត្រគ្រប់ជ្រុងជ្រោយ។
យោងតាមហ្វេសប៊ុកដដែលនេះបានឲ្យដឹងថា៖ «សម្ដេចតេជោនាយករដ្ឋមន្ត្រីបានសង្កត់ធ្ងន់ថា មិនត្រឹមតែអាជ្ញាធរដែនដីទេ កងទ័ពនៃប្រទេសយើងទាំង ២ ក៏គប្បីជំរុញទំនាក់ទំនងឲ្យបានកាន់តែជិតស្និទ្ធផងដែរ ព្រោះកាលណាមានភាពជិតស្និទ្ធហើយទោះបីមានរឿងអ្វីក៏អាចដោះស្រាយ និងពិភាក្សាគ្នាបានដែរ។ គប្បីណាតាមព្រំដែនអាជ្ញាធរដែនដីទាំងសងខាងដែលបានដើរតួ យ៉ាងសំខាន់ជំរុញទំនាក់ទំនងឲ្យបានយ៉ាងជិតស្និទ្ធ ហើយអាចបង្កើតឲ្យមានកម្មវិធីកីឡារួមគ្នាផងដែលធ្វើយ៉ាងណាឲ្យទំនាក់ទំនងល្អនេះឈានដល់ការដោះស្រាយរាល់បញ្ហាផ្សេងៗដែលកើតមានឡើងនៅតាមព្រំដែន»។
យោងតាមសេចក្ដីប្រកាសព័ត៌មានរួមកម្ពុជា-ឡាវបានឲ្យដឹងថា ភាគីទាំង ២ នឹងបន្តការចរចាដើម្បីដោះស្រាយតំបន់ព្រំដែនដែលនៅសេសសល់មិនទាន់ខណ្ឌសីមាដើម្បីកសាងនូវព្រំដែនមួយប្រកបដោយសន្តិភាព មិត្តភាព និងកិច្ចសហប្រតិបត្តិការ។
សេចក្ដីប្រកាសព័ត៌មានដដែលនេះបានឲ្យដឹងទៀតថា ប្រទេសទាំង ២ បានបញ្ចប់ការងារខណ្ឌសីមាចំនួន ៨៦ ភាគរយនៃខ្សែបន្ទាត់ព្រំដែនរួម។
លោក គិន ភា ប្រធានវិទ្យាស្ថានទំនាក់ទំនងអន្តរជាតិកម្ពុជានៃរាជបណ្ឌិត្យសភាកម្ពុជាបានថ្លែងថា ជាទូទៅបញ្ហាព្រំដែនជាចំណុចរសើប ពីព្រោះមានចំណុចមួយចំនួនមិនទាន់ឯកភាពគ្នាទៅលើទិដ្ឋភាពផែនទី និងទិដ្ឋភាពបច្ចេកទេស។
លោកបានបញ្ជាក់ថា៖ «ទស្សនកិច្ចនេះលើកកម្ពស់ និងធ្វើឲ្យទំនាក់ទំនងកាន់តែល្អប្រសើរឡើងបន្ថែមទៀត។
ទំនាក់ទំនងរវាងប្រទេស កម្ពុជា និងឡាវ គឺជាបងប្អូន និងជាអ្នកជិតខាងដ៏ល្អដែលភ្ជាប់ទៅដោយទំនាក់ទំនងប្រវត្តិសាស្ត្រយូរអង្វែង ចំណងភូមិសាស្ត្រ វប្បធម៌ប្រពៃណី ទំនៀមទម្លាប់»។
លោក អ៊ូ ច័ន្ទរ័ត្ន អតីតតំណាងរាស្ត្រអតីតគណបក្សសង្គ្រោះជាតិថ្លែងថាដំណើរទស្សនកិច្ចខាងលើនេះគឺជាកិច្ចខិតខំប្រឹងប្រែងរបស់រាជរដ្ឋាភិបាលកម្ពុជា និងសាធារណរដ្ឋប្រជាមានិតឡាវក្នុងការពង្រឹងទំនាក់ទំនងហើយនិងដើម្បីជួយដោះស្រាយបញ្ហាព្រំដែនរវាងប្រទេសទាំង ២៕