The Phnom Penh Post Search

Search form




Logo of Phnom Penh Post newspaper Phnom Penh Post - កម្ពុជា-ឡាវ រឹត​ចំណង​កិច្ច​សហ​ប្រតិបត្តិ​ការ​និង​ពន្លឿន​ការ​បោះ​បង្គោល​ព្រំដែន

កម្ពុជា-ឡាវ រឹត​ចំណង​កិច្ច​សហ​ប្រតិបត្តិ​ការ​និង​ពន្លឿន​ការ​បោះ​បង្គោល​ព្រំដែន

រដ្ឋមន្ត្រី​ក្រសួង​ការពារ​ជាតិ​កម្ពុជា និង​ឡាវ ក្នុង​ជំនួប​ពិភាក្សា​រឹត​ចំណង​ទ្វេ​ភាគី។
រដ្ឋមន្ត្រី​ក្រសួង​ការពារ​ជាតិ​កម្ពុជា និង​ឡាវ ក្នុង​ជំនួប​ពិភាក្សា​រឹត​ចំណង​ទ្វេ​ភាគី។ ហេង ជីវ័ន

កម្ពុជា-ឡាវ រឹត​ចំណង​កិច្ច​សហ​ប្រតិបត្តិ​ការ​និង​ពន្លឿន​ការ​បោះ​បង្គោល​ព្រំដែន

ភ្នំពេញៈ ភាគី​កម្ពុជា​និង​ឡាវ បាន​សន្យា​បន្ត​បង្កើន​កិច្ច​សហ​ប្រតិបត្តិការ​ល្អ និង​ការ​យោគ​យល់​គ្នា ដោយ​សន្តិវិធី និង​អនុលោម​តាម​ច្បាប់ ជាមួយ​នឹង​ការ​ពន្លឿន​ការ​រៀបចំ​បង្គោល​ព្រំដែន និង​សំណង់​នានា​តាម​ព្រំដែន​ផង​ដែរ។

ក្រោយ​ជំនួប​ចុះ​ហត្ថលេខា​លើ​អនុស្សរណ​យោគយល់​នៃ​កិច្ច​សហ​ប្រតិបត្តិការ​ទ្វេ​ភាគី ជាមួយ​នឹង​រដ្ឋ​មន្ត្រី​ក្រសួង​ការពារ​ជាតិ​ឡាវ លោក Sengnouane Xayalath អស់​ពេល​ជាង ១ ម៉ោង​រួច​មក រដ្ឋ​មន្ត្រី​ក្រសួង​ការពារ​ជាតិ​កម្ពុជា លោក ទៀ បាញ់ បាន​ថ្លែង​ថា កិច្ច​ពិភាក្សា​នេះ​បាន​ផ្តោត​ទៅ​លើ​ទំនាក់​ទំនង​នៃ​ប្រទេស​ទាំង​ពីរ ក្នុង​នាម​ជា​ប្រទេស​ជិត​ខាង​និង​បាន​ជជែក​គ្នា​ពី​បញ្ហា​ព្រំដែន ជំរុញ​ការ​បោះ​បង្គោល​ព្រំដែន និង​សំណង់​នានា​ឲ្យ​ស្រប​តាម​ច្បាប់​ដើម្បី​ការពារ​ផល​ប្រយោជន៍ និង​បង្កើន​ទំនាក់​ទំនង​ល្អ​ផ្នែក​សេដ្ឋកិច្ច រវាង​គ្នា​ទៅ​វិញ​ទៅ​មក។

លោក ទៀ បាញ់ ថ្លែង​បន្ត​ថា៖ «សមត្ថកិច្ច​គ្រប់​លំដាប់​ថ្នាក់​នៃ​ប្រទេស​ទាំង​ពីរ ត្រូវ​សហការ​ការពារ​ពលរដ្ឋ ដែល​ធ្វើ​ដំណើរ​ទៅ​វិញ​ទៅ​មក។ យើង​ក៏​បាន​ឈាន​ដល់​ការ​ឯកភាព​ឲ្យ​មាន​ការ​ផ្លាស់​ប្តូរ​ប្រតិភូ​គ្នា​ទៅ​វិញ​ទៅ​មក ដើម្បី​សិក្សា​រៀនសូត្រ​ពី​គ្នា និង​ផ្លាស់​ប្តូរ​ព័ត៌មាន ទាក់ទង​គ្នា​ទៅ​វិញ​ទៅ​មក»។

បើ​តាម​មន្ត្រី​ក្រសួង​ការពារ​ជាតិ ដែល​បាន​ចូល​រួម​ក្នុង​កិច្ច​ជំនួប​ប្រជុំ​នេះ បាន​ឲ្យ​ដឹង​ថា ភាគី​ប្រទេស​ទាំង​ពីរ ក៏​បាន​សន្យា​ពង្រឹង​កិច្ច​សហការ​ទ្វេភាគី តាម​រយៈ​ការ​ទប់​ស្កាត់​បទ​ឧក្រិដ្ឋ​នានា នៅ​តាម​បណ្តោយ​ព្រំដែន មាន​ដូច​ជា បញ្ហា​ការ​ជួញ​ដូរ​មនុស្ស ការ​ជួញ​ដូរ​គ្រឿង​ញៀន ការ​កាប់​ឈើ​ខុស​ច្បាប់ ជាដើម។ ដោយ​ឡែក ខាង​កម្ពុជា​វិញ ក៏​បាន​ស្នើ​ទៅ​កាន់​កង​កម្លាំង​យោធា​ឡាវ​ឲ្យ​ដោះស្រាយ​បញ្ហា​ពលរដ្ឋ​កម្ពុជា​ដែល​ធ្វើ​សកម្មភាព​ខុស​ច្បាប់ ទៅ​តាម​ការ​អនុវត្ត​ច្បាប់ ដោយ​សន្តិវិធី៕

អត្ថបទគួរចាប់អារម្មណ៍