.jpg)
ភ្លុកដំរីទម្ងន់ជាង ៣ តោនដែលឈ្មួញលាក់ទុកក្នុងទូកុងតឺន័រ។ BAN CHORK/AFP
ភ្នំពេញៈ រដ្ឋាករកំពង់ផែស្វយ័តភ្នំពេញសហការជាមួយស្ថានទូតអាមេរិកបានរកឃើញភ្លុកដំរីទម្ងន់ជាង ៣ តោនដែលឈ្មួញលាក់ទុកក្នុងទូកុងតឺន័រ។ នេះបើតាមហ្វេសប៊ុកស្ថានទូតអាមេរិកប្រចាំនៅកម្ពុជា។
យោងតាមហ្វេសប៊ុកស្ថានទូតអាមេរិកកាលពីថ្ងៃសៅរ៍បានឲ្យដឹងថា ការស៊ើបអង្កេតរបស់ផ្នែកជលផល និងសត្វព្រៃអាមេរិកបានផ្តល់ព័ត៌មានដល់នាយកដ្ឋានគយ និងរដ្ឋាករកម្ពុជា ទើបឈានដល់ការរកឃើញភ្លុកដំរីជាង ១ ពាន់ដុំទម្ងន់ជិត ៣៥០០ គីឡូទុកចោលក្នុងទូកុងតឺន័រនៅកំពង់ផែស្វយ័តភ្នំពេញ។
លោក ស៊ុន ឆាយ ប្រធានសាខាគយកំពង់ផែស្វយ័តភ្នំពេញអះអាងប្រាប់កាសែតក្នុងស្រុកកាលពីថ្ងៃសៅរ៍ថា ភ្លុកដំរីនោះមាន ១ ០២៦ ដុំ ត្រូវបានឈ្មួញនាំពីកំពង់ផែឈ្មោះ «ម៉ាឡាកា» នៅប្រទេសមូហ្សំប៊ិកតាំងពីខែកក្កដា ឆ្នាំនេះ ហើយថាបច្ចុប្បន្នភ្លុកដំរីទាំងនោះត្រូវបានរក្សាទុកនៅកំពង់ផែស្វយ័តភ្នំពេញ ដើម្បីចាត់ការបន្ត។
កែវ អូម៉ាលីស្ស អ្នកនាំពាក្យរដ្ឋបាលព្រៃឈើបានថ្លែងថាកម្ពុជាមានផែនការទប់ស្កាត់ការនាំចូលភ្លុកដំរីដោយមាននាយកដ្ឋានគយ និងមន្ត្រីនគរបាលសហការជាមួយប្រទេសនៅអាហ្វ្រិក និងអង្គការដៃគូអន្តរជាតិទើបធ្វើឲ្យងាយស្រួលទប់ស្កាត់ និងបង្ក្រាបភ្លុកដំរី។
កាលពីថ្ងៃទី ១៥ ខែធ្នូ ឆ្នាំ ២០១៦ សមត្ថកិច្ចកម្ពុជាក៏ធ្លាប់បានរកឃើញ ភ្លុកដំរី កន្ទុយ ឆ្អឹងខ្លា និងស្រកាពង្រូលនៅក្នុងទីតាំងផែស្ងួតភ្នំពេញផងដែរ ដែលបង្កប់ជាមួយឈើក្នុងកុងតឺន័រចំនួន ២ ដឹកពីក្រុងព្រះសីហនុ។ ក្នុងប្រតិបត្តិការនេះសមត្ថកិច្ចបានរកឃើញភ្លុកដំរី ៦៤០ ដុំទម្ងន់ ១,៣ តោន ស្រកាពង្រូលជាង ១៣៧,៦ គីឡូក្រាម ឆ្អឹងខ្លា ជាង ៨២ គីឡូក្រាម និងកន្ទុយដំរី ទម្ងន់ជិត ៥ គីឡូក្រាម៕
