ភ្នំពេញៈ កម្ពុជា និងអ៊ីតាលី ឯកភាពគ្នាបន្តរក្សាចំនួនទីភ្នាក់ងារស្មុំកូនអន្តរប្រទេសចំនួន ៨ ឲ្យនៅដដែលដោយស្វ័យប្រវត្តិ សម្រាប់រយៈពេល ៣ ឆ្នាំបន្តទៀត បន្ទាប់ពីព្រមព្រៀងគ្នាកាលពីឆ្នាំមុន ដើម្បីជ្រើសរើសភ្នាក់ងារដែលអាចមានសិទ្ធិផ្តល់សេវាលើការស្មុំកូនរវាងប្រទេសទាំង ២ ក្រោយផ្អាកអស់រយៈពេលជាច្រើនឆ្នាំ។
ក្នុងកំណត់ហេតុកិច្ចប្រជុំកាលពីថ្ងៃអង្គារ ដែលមានលោក នឹម ថូត រដ្ឋលេខាធិការក្រសួងសង្គមកិច្ច និងលោក Gianni Bardini សមាជិកអាជ្ញាធរកណ្តាល នៃប្រទេស អីុតាលី បានឲ្យដឹងថា ផ្អែកតាមគោលការណ៍ទូទៅនៃការស្មុំកូនអន្តរប្រទេស គឺសំដៅទប់ស្កាត់ការជួញដូរកុមារ និងដើម្បីលើកកម្ពស់កិច្ចការពារកុមារ។ ជាពិសេសកុមារដែលគ្មានសាច់ញាតិ កុមារត្រូវគេបោះបង់ ដោយឆ្លើយតបនូវអនាគតល្អ ប្រកបដោយក្តី ស្រឡាញ់ និងមានគ្រួសារល្អជាអចិន្រៃ្តយ៍ ភាគីទាំង ២ ត្រូវតែពិភាក្សាគ្នា ដើម្បីកំណត់ចំនួនទីភ្នាក់ងារស្មុំកូនអន្តរប្រទេស។
ក្រោយបញ្ចប់កិច្ចពិភាក្សា ភាគីទាំង ២ បានសម្រេចឯកភាពគ្នា បន្តសកម្មភាពមួយចំនួន ដូចជា ភាគីកម្ពុជា បានស្នើសុំចែកចំនួនទីភ្នាក់ងារទាំង ៨ ឲ្យនៅដដែល ដោយគ្រាន់តែចែកជា ២ ក្រុម មួយក្រុមមានចំនួន ៤ ទីភ្នាក់ងារ ដែលត្រូវបានបែងចែកដោយអាជ្ញាធរកណ្តាលស្មុំកូនអន្តរប្រទេសនៃកម្ពុជា។ ទីភ្នាក់ងារនីមួយៗមានសិទ្ធិ និងកាតព្វកិច្ចដូចគ្នា ក្នុងការទទួលខុសត្រូវ ចំពោះមុខច្បាប់ពាក់ព័ន្ធនឹងការស្មុំកូនអន្តរប្រទេសរបស់ប្រទេសកម្ពុជា និងអ៊ីតាលី។
កំណត់ហេតុដដែលបន្តថា ក្រៅពីនេះ ភាគីទាំង ២ បានឯកភាព នឹងត្រូវរាយការណ៍ជូនអាជ្ញាធរកណ្តាលស្មុំកូនអន្តរប្រទេសនៃប្រទេសទាំង ២ អំពីលទ្ធផលនៃការពិភាក្សា និងចាប់ផ្តើមរៀបចំឯកសារពាក់ព័ន្ធ ជាពិសេសគោលការណ៍ណែនាំខ្លី សម្រាប់ណែនាំដល់ទីភ្នាក់ងារ ដែលត្រូវបានទទួលស្គាល់ ដើម្បីដំណើរការនីតិវិធីស្មុំកូនអន្តរប្រទេស ស្របតាមច្បាប់ស្មុំកូនអន្តរប្រទេសនៃប្រទេសកម្ពុជា។ បន្ថែមពីនេះ ភាគីទាំង ២ ចាំបាច់កំណត់ពេលវេលា ទីកន្លែងដើម្បីជួបពិភាក្សាវាយតម្លៃលទ្ធផលបណ្តាឆ្នាំកន្លងមក នៃកិច្ច សហ ប្រតិបត្តិការ និងលើកទិសដៅសម្រាប់៣ឆ្នាំបន្តទៀត។
កាលពីខែកញ្ញា ឆ្នាំ ២០១៨ កម្ពុជា និងអីុតាលី បានចុះកិច្ចព្រមព្រៀងមួយ ស្តីពីការកំណត់ចំនួនទីភ្នាក់ងារស្មុំកូនអន្តរប្រទេស ដែលមានសមាសភាពទីភ្នាក់ងារចំនួន ៨ ដើម្បីទទួលបានសិទ្ធិអនុញ្ញាតឲ្យផ្តល់សេវានៅកម្ពុជា តែរហូតមកបច្ចុប្បន្ន ទីភ្នាក់ងារនេះ នៅមិនទាន់ជ្រើសរើសបាននៅឡើយទេ។ នេះបើតាមលោកស្រី ឡេវ សុភាវី ប្រធានរដ្ឋបាលស្មុំកូនអន្តរប្រទេសនៃក្រសួងសង្គមកិច្ច។
លោកស្រី ប្រាប់ភ្នំពេញប៉ុស្តិ៍ពីម្សិលមិញថា ចាប់តាំងពីរដ្ឋាភិបាលបានផ្អាកការស្មុំកូនជាអន្តរប្រទេសកាលពីឆ្នាំ ២០១១ ការស្មុំកូននៅកម្ពុជា មិនទាន់បានអនុវត្តឡើងវិញនោះទេ បូករួមទាំងប្រទេសអីុតាលី ជាដើម។ ព្រោះប្រទេសទាំងនោះស្ថិតក្នុងដំណាក់កាលជជែកពិភាក្សាជុំវិញច្បាប់ជាតិ អន្តរជាតិ ដែលកម្ពុជា បានធ្វើការកែប្រែកន្លងមក ដើម្បីឲ្យការគ្រប់គ្រងការស្មុំកូនជាអន្តរប្រទេសនេះមានប្រសិទ្ធភាព។
លោកស្រីបានបញ្ជាក់ថា៖ «យើងមិនទាន់មានករណីនោះទេ ជុំវិញការស្មុំកូននេះ ដោយសារតែច្បាប់យើងថ្មី ហើយកន្លងមកដោយសារតែមានបញ្ហាភាពមិនប្រក្រតីហ្នឹង។ អ៊ីចឹងយើងមិនទាន់ធ្វើអ្វីទេ ដោយត្រូវសិក្សាបន្តិចម្តងៗ អំពីច្បាប់ អំពីនីតិវិធី ស្របពេលមន្ត្រីរបស់យើងក៏ថ្មី ដែលយើងនឹងព្យាយាមធ្វើការងារនេះឲ្យលឿន តាមប្រព័ន្ធច្បាប់ថ្មី»។
លោកស្រីបន្តថា៖ «ហើយម្យ៉ាងទៀត យើងមិនទាន់ទទួលស្គាល់ ទីភ្នាក់ងារណាដែលធ្វើការងារហ្នឹង ហើយទាំងនេះ គឺគ្រាន់តែជាយន្តការ ស្ថិតនៅក្នុងការពិភាក្សា និងសិក្សានៅឡើយ មិនថាតែប្រទេសអីុតាលី សូម្បីតែប្រទេសដទៃទៀត ក៏មិនទាន់ដែរ ដូចជាយើងកំពុងសិក្សាជាមួយប្រទេសអេស្ប៉ាញ»។
ទោះយ៉ាងណា លោកស្រី ឡេវ សុភាវី ជឿជាក់ថា នៅពេលទីភ្នាក់ងារស្មុំកូនអន្តរប្រទេស ត្រូវបានបង្កើតឡើង នោះនឹងបានចូលរួមជួយកុមារកំព្រាកម្ពុជា ឲ្យទទួលបានគ្រួសារដ៏កក់ក្តៅ និងទទួលបានសិទ្ធិ រួមទាំងអត្ថប្រយោជន៍ផ្សេង ព្រោះទីភ្នាក់ងារនេះ គឺនឹងអនុវត្តទៅតាមច្បាប់ និងទទួលខុសត្រូវចំពោះមុខច្បាប់ជាតិ និងអន្តរជាតិ។
កម្ពុជា បានផ្អាកសកម្មភាពស្មុំកូនជាមួយប្រទេសដទៃ កាលពីឆ្នាំ ២០១១ បន្ទាប់ពីកម្ពុជា ទទួលរងនូវរឿងអាស្រូវ និងរកឃើញថា កុមារដែលត្រូវបានបញ្ជូនចេញពីប្រទេសកម្ពុជាតាមរយៈការស្មុំកូននេះ ទទួលរងនូវការជួញដូរ ការក្លែងបន្លំ និងអំពើដែលត្រូវបានគេអះអាងថា ជាអំពើពុករលួយនៅក្នុងប្រព័ន្ធស្មុំកូនអន្តរប្រទេស។ នេះបើតាមរបាយការណ៍ដែលបានបង្ហោះលើគេហទំព័ររបស់អង្គការលីកាដូ កាលឆ្នាំ ២០១៨។
លោក អំ សំអាត មន្ត្រីការពារសិទ្ធិមនុស្សរបស់អង្គការលីកាដូ ប្រាប់ភ្នំពេញប៉ុស្តិ៍ កាលពីម្សិលមិញថា ជាទូទៅបណ្តាប្រទេសលើពិភពលោកគឺមានការស្មុំកូនតែដោយសារតែកម្ពុជា មានភាពចម្រូងចម្រាស ហើយពេលនេះកម្ពុជាចាប់ផ្តើមអនុវត្តការស្មុំកូនឡើងវិញ ជាពិសេសជាមួយនឹងប្រទេសអីុតាលីហ្នឹង។ ដូច្នេះ លោកថ្លែងថា កម្ពុជាគួរតែមានកិច្ចព្រមព្រៀងដែលមានលក្ខខណ្ឌធ្វើយ៉ាងណាឲ្យការស្មុំកូនអន្តរប្រទេសនេះមានការធានានូវច្បាប់អន្តរជាតិ និងច្បាប់កម្ពុជា កុំឲ្យកុមារក្លាយជាជនរងគ្រោះ។
លោកបញ្ជាក់ថា៖ «ត្រូវធានាថា ការស្មុំកូននេះ ធ្វើឡើងដោយស្របច្បាប់តាមប្រទេសនីមួយៗ ទាំងប្រទេសដែលស្នើ និងប្រទេសដែលទទួល។ ខ្ញុំគិតថា ប្រទេសកម្ពុជាយើង គួរតែពង្រឹងអំពីនីតិវិធី ឬក៏ច្បាប់ ក្នុងការបន្តទៅលើការស្មុំកូន ពីព្រោះពេលកន្លងមកយើងមានបញ្ហាច្រើន រហូតមានការប្តឹង ការទាមទារជាបន្តបន្ទាប់ពីក្រុមគ្រួសាររបស់ក្មេងដែលត្រូវបានគេស្មុំហ្នឹង ដោយសារតែនីតិវិធីរបស់យើងខ្លះ ធ្វើមិនត្រូវតាមនីតិវិធីទេ»៕