.jpg)
កម្មកររោងចក្រចេញពីធ្វើការនៅផ្លូវវេងស្រេងកាលពីថ្ងៃទី ២៤ មីនា។ ហុង មិនា
ភ្នំពេញៈ លោកនាយករដ្ឋមន្ត្រី ហ៊ុន សែន កែប្រែការផ្តល់ប្រាក់ឧបត្ថម្ភដល់កម្មករ កម្មការិនីកាត់ដេរពីការទទួលបាន ៦០ ភាគរយ ក្នុងអំឡុងពេលព្យួរការងារមកទទួលបានប្រាក់ ៧០ ដុល្លារវិញ ព្រោះតែភាគីរោងចក្រគ្មានលទ្ធភាព ប៉ុន្តែមិនតម្រូវឲ្យកម្មករចូលរួមវគ្គបណ្តុះបណ្តាលនោះទេ ក្រោយពីមានរោងចក្រជាង ១០០ បានប្រកាសបិទទ្វារព្យួរការងារកម្មករតាំងពីថ្ងៃទី ៦ មេសា។
កាលពីអំឡុងខែកុម្ភៈ រាជរដ្ឋាភិបាលបានសម្រេចឲ្យរោងចក្រកាត់ដេរចេញ ៤០% ហើយរាជរដ្ឋាភិបាលចេញ ២០% នៃប្រាក់ខែអប្បបរមា ១៩០ ដុល្លារដែលយ៉ាងហោចណាស់កម្មករម្នាក់នឹងទទួលបាន ១១៤ ដុល្លារ ក្រោយពីរោងចក្រប្រកាសព្យួរការងារ ហើយពួកគេត្រូវបំពេញកាតព្វកិច្ចក្នុងការចូលរួមវគ្គបណ្តុះបណ្តាលដែលរៀបចំដោយក្រសួងការងារ។
ប៉ុន្តែលោក ហ៊ុន សែន ថ្លែងក្នុងសន្និសីទសារព័ត៌មាននាវិមានសន្តិភាពពីម្សិលមិញថា រដ្ឋាភិបាលបានសម្រេចនូវរបៀបថ្មីដោយបានកែប្រែឲ្យម្ចាស់រោងចក្រចេញតែ ៣០ ដុល្លារប៉ុណ្ណោះ ហើយរដ្ឋាភិបាលនឹងជួយចេញ ៤០ ដុល្លារវិញ។ លោកអះអាងថា ការធ្វើយ៉ាងដូច្នេះគឺជាទង្វើមនុស្សធម៌។
លោកបញ្ចាក់ថា៖ «ម្ចាស់រោងចក្រមិនមានលទ្ធភាពទេ។ អ៊ីចឹងឥឡូវនេះរដ្ឋចេញ ៤០ ដុល្លារ ឯម្ចាស់រោងចក្រ ៣០ ដុល្លារ។ អ៊ីចឹងកម្មករម្នាក់ទទួលបានអត្ថប្រយោជន៍ ៧០ ដុល្លារ ដែលមុននេះគិតថានឹងទទួលបាន (ជាង ១០០) ដុល្លារ ប៉ុន្តែខាងរោងចក្រគ្នារត់មិនរួច ហើយបង្ខំតទៀតក៏មិនបានដែរ»។
លោកថា នៅពេលមានការកែប្រែ ការទទួលបានប្រាក់ឧបត្ថម្ភតិចជាងមុនវិញនោះនឹងមិនតម្រូវឲ្យកម្មករទាំងអស់ត្រូវបំពេញកាតព្វកិច្ចចូលរួមវគ្គបណ្តុះបណ្តាលតាមការកំណត់នោះទេ។ លោកថ្លែងថា៖ «ដោយសារតែបញ្ហាវាកើតឡើងរបៀបនេះគឺកម្មករម្នាក់នឹងទទួលបានតែ ៧០ [ដុល្លារ] ទេ ប៉ុន្តែមិនតម្រូវឲ្យកម្មករទៅធ្វើការហ្វឹកហាត់ដូចពេលមុនទេ។
ពេលមុនថា អ្នកឯងទទួលបានគឺត្រូវទទួលការហ្វឹកហាត់ ៤ ខែ និងត្រៀម ២ ខែទៀត។ ប៉ុន្តែមិនអាចធ្វើទៅបានទៀតទេ ដោយសារតែយើងបានបិទអស់ហើយ កន្លែងបណ្តុះបណ្តាលវិជ្ជាជីវៈ»។
គិតត្រឹមថ្ងៃទី ៦ ខែមេសា ឆ្នាំ ២០២០ លោកនាយករដ្ឋមន្ត្រី ហ៊ុន សែន បានប្រកាសថា នៅទូទាំងប្រទេសមានរោងចក្រកាត់ដេរជាង ១០០ រោងចក្រហើយបានបិទទ្វារ ដោយសារតែខ្លះខ្វះវត្ថុធាតុដើម និងខ្លះទៀតមិនមានអ្នកបញ្ជាទិញ។ ប៉ុន្តែលោកថា មិនមានចំនួនកម្មករកាត់ដេរច្រើននាក់ដែលត្រូវបាត់បង់ការងារនោះទេ។
លោកបន្ថែមថា៖ «បើសិនជាសកម្មភាពអូសបន្លាយពេលវែង កម្មកររបស់យើងបាត់បង់ការងារធ្វើ ជម្រើសរបស់យើងគឺខុសប្លែកពីសហគមន៍អឺរ៉ុបដែលតាំងពីជីដូនជីតារបស់ពួកគេ គឺសុទ្ធតែជាកម្មករ។ ឯកម្មករក្នុងប្រទេសរបស់យើងគឺមិនទាន់ផ្តាច់ខ្លួនពីកសិករនៅឡើយទេ។ ដោយសារកម្មករយើងនៅផ្សាភ្ជាប់ជាមួយឪពុកម្តាយរបស់ពួកគេនៅឡើយ ហេតុដូច្នេះហើយយើងនឹងតម្រង់ទិសសម្រាប់ឲ្យអ្នកដែលបាត់បង់ការងារក្នុងវិស័យឧស្សាហកម្មត្រឡប់ទៅចូលរួមជាកម្លាំងពលកម្មក្នុងវិស័យកសិកម្មវិញ»។
ការធ្វើបែបនេះលោក ហ៊ុន សែន ថា គឺជាជម្រើសរបស់កម្ពុជាក្នុងរយៈពេលវែង ព្រោះកម្ពុជាគ្មានប្រាក់គ្រប់គ្រាន់សម្រាប់ផ្គត់ផ្គង់ដល់កម្មករជារៀងរហូតនោះទេ ហើយក្នុងពេលនេះគឺត្រូវធ្វើយ៉ាងណាឲ្យកម្មករទាំងអស់ងាកមកចាប់យករបរកសិកម្មឡើងវិញ។
លោក ម៉ៃ ចាន់ កម្មកររោងចក្រនៅតំបន់ 7NG ដែលរោងចក្រត្រូវបានប្រកាសព្យួរការងាររយៈពេល ២ ខែមកហើយប្រាប់ភ្នំពេញ-ប៉ុស្តិ៍ពីម្សិលមិញថា ក្នុងអំឡុងពេលនេះប្រាក់ឧបត្ថម្ភដែលទទួលបានប្រមាណ ៦០ ភាគរយ គ្រួសារលោកចាយវាយ និងបង់ធនាគារមិនគ្រប់ផង។ លោកបន្តថាចុះទម្រាំទទួលប្រាក់ឧបត្ថម្ភតែ ៧០ ដុល្លារ តើលោកនឹងត្រូវដោះស្រាយយ៉ាងណា។
លោក ម៉ៃ ចាន់ និយាយថា៖ «កន្លងទៅ ខ្ញុំបានស្វែងរកការងារបន្ទាប់បន្សំដើម្បីទទួលបានចំណូល បន្ថែមសម្រាប់ចាយវាយ និងដោះបំណុល ប៉ុន្តែការងារនេះមិនជាប់លាប់ទេ។ ខ្ញុំបារម្ភណាស់ តែមិនដឹងធ្វើម៉េច បើគ្រប់គ្នាជួបបញ្ហានេះទាំងអស់គ្នា។ ខ្ញុំត្រូវមានកូន ២ នាក់ក្នុងបន្ទុក ដូច្នេះខ្ញុំត្រូវតែខំរកការងារបន្ថែមទៀត ដើម្បីបានចំណូលច្រើនជាងនេះ ព្រោះពេលនេះលំបាកណាស់ ហូបមិនគ្រាន់ទេ»។
លោក ប៉ាវ ស៊ីណា ប្រធានសហជីពចលនាកម្មករ លើកឡើងថា ការសម្រេចបែបនេះគឺធ្វើឲ្យកម្មករខាតបង់ ព្រោះតាមច្បាប់ និយោជកមានភារកិច្ចខ្ពស់ក្នុងការទទួលខុសត្រូវចំពោះបញ្ហាទាំងនេះ ប៉ុន្តែបែរជារដ្ឋាភិបាលជាអ្នករ៉ាប់រងខ្ពស់ទៅវិញ។ លោកបានបន្តថា ក្នុងអំឡុងពេលដែលរោងចក្រមួយចំនួនបានទទួលផលប្រយោជន៍ដ៏ច្រើនលើសលប់ ប៉ុន្តែពួកគេបែរជាប្រើលេសមិនអាចរ៉ាប់រងបន្ទុកទាំងនេះ។
លោកចោទជាសំណួរថា៖ «បើកម្មករងាកមកធ្វើកសិកម្មដែលឲ្យគាត់ផ្តោតមកលើវិស័យនេះទាំងអស់គ្នា តើមានទីផ្សារដែរឬទេ? ដែលពិបាក បើកាលណាពលរដ្ឋងាកមកដាំកាន់តែច្រើននឹងធ្វើឲ្យផលិតផលចុះថោក។ ប៉ុន្តែបើសិនជាគាត់ដាំសម្រាប់ផ្គត់ផ្គង់ក្នុងគ្រួសារនោះមិនជាបញ្ហាចោទប៉ុន្មានទេ ប៉ុន្តែបើដាំសម្រាប់ទីផ្សារនោះអាចនឹងមិនអាចធ្វើការប្រកួតប្រជែងជាមួយទីផ្សារគេបានទេ»។
ក្រៅពីលើកឡើងបែបនេះ លោក ប៉ាវ ស៊ីណា សំណូមពរដល់រដ្ឋាភិបាលគួរចូលរួមបញ្ចុះតម្លៃទំនិញ ជាពិសេសម្ហូបអាហារនៅលើទីផ្សារ និងជួយសម្រាលបន្ទុកបំណុលដែលកម្មករកំពុងជំពាក់ធនាគារស្របពេលប្រាក់ដែលកម្មករទទួលបានមិនអាចជួយអ្វីបានច្រើននោះ។
លោក កាំង ម៉ូនីកា អគ្គលេខាធិការរងសមាគមរោងចក្រកាត់ដេរនៅកម្ពុជា (GMAC) កាលពីម្សិលមិញមិនអាចសុំអត្ថាធិប្បាយបានទេ៕
វីដេអូ៖
