.jpg)
ពលរដ្ឋដែលរងរបួសក្នុងរឿងវិវាទដីធ្លីនៅខេត្តព្រះសីហនុ។ ហុង មិនា
ព្រះសីហនុៈ បុរស ៨ នាក់ ដែលជាកម្មករស៊ីឈ្នួលឱ្យក្រុមហ៊ុន ភឺនផល្លា ត្រូវបានតុលាការខេត្តព្រះសីហនុសម្រេចឃុំខ្លួនជាបណ្ដោះអាសន្ននៅពន្ធនាគារខេត្តព្រះសីហនុ ដោយចោទពីបទ «ហិង្សាដោយចេតនា» ប្រព្រឹត្តទៅលើប្រជាពលរដ្ឋក្នុងភូមិ អូរឧកញ៉ាហេងក្នុងស្រុកព្រៃនប់ក្នុងរឿងវិវាទដីធ្លីកាលពីថ្ងៃទី ២០ ខែ ធ្នូ ឆ្នាំ ២០២០។
លោក កុល ផាលី ស្នងការរងខេត្តព្រះសីហនុទទួលបន្ទុកផ្នែកព្រហ្មទណ្ឌ ប្រាប់ ភ្នំពេញ ប៉ុស្តិ៍ ថា ជនសង្ស័យមានឈ្មោះ សាំង កូ អាយុ ១៩ ឆ្នាំ,សុខ ភារម្យ អាយុ ៣១ ឆ្នាំ, សៀ រដ្ឋា អាយុ ៣៦ ឆ្នាំ, ឡៅ តឹកយូ អាយុ ៥៧ ឆ្នាំ, ចក់ សុគន្ធ អាយុ ៥៦ ឆ្នាំ, សុង ចិន អាយុ ៣០ ឆ្នាំ, ផាន សាពេជ្រ អាយុ ៣៧ ឆ្នាំ និងឈ្មោះ គង់ រក្សា អាយុ ៣៦ ឆ្នាំត្រូវបានកម្លាំង អធិការដ្ឋាននគរបាលស្រុកព្រៃនប់ចាប់ខ្លួននៅល្ងាចថ្ងៃទី ២០ ធ្នូ ឆ្នាំ ២០២០។ ការចាប់ខ្លួនជនទាំងនេះធ្វើឡើង ២ ម៉ោងក្រោយពីមានការផ្ទុះអំពើហិង្សាជាមួយអ្នកភូមិអូរឧកញ៉ាហេងក្នុងស្រុកព្រៃនប់។
លោកបន្តថា ពួកគេត្រូវបានមន្ត្រីនគរបាលព្រហ្មទណ្ឌស្រុកព្រៃនប់ កសាងសំណុំរឿង និងបញ្ជូនទៅកាន់ស្នងការដ្ឋាននគរបាលខេត្តព្រះសីហនុនៅព្រឹកថ្ងៃទី ២១ ខែធ្នូ ឆ្នាំ ២០២០។ ក្រោយបញ្ចប់ការសួរចម្លើយ នៅថ្ងៃទី ២៣ ខែ ធ្នូ ឆ្នាំ ២០២០ ត្រូវបានមន្ត្រីជំនាញនៃស្នងការដ្ឋាននគរបាលខេត្តព្រះសីហនុ បញ្ជូនពួកគេទៅតុលាការ។
លោក ផាលី ថ្លែងថានៅល្ងាចថ្ងៃទី ២៤ ខែ ធ្នូ ឆ្នាំ ២០២០ តុលាការខេត្តព្រះសីហនុបានសម្រេចចោទប្រកាន់ពួកគេទាំង ៨ នាក់ ពីបទ «ហិង្សាដោយចេតនា» នឹងបានបង្គាប់ឱ្យសមត្ថកិច្ចនគរបាលយុត្តិធម៌នាំយកពួកគេទៅឃុំខ្លួនជាបណ្ដោះអាសន្ននៅពន្ធនាគារខេត្តព្រះសីហនុ ដើម្បីរង់ចាំការជំនុំជម្រះនៅពេលក្រោយ។
យោងតាមរបាយការណ៍របស់នគរបាលស្រុកព្រៃនប់ ករណីហិង្សារវាងកម្មករក្រុមហ៊ុន ភឺន ផល្លា និងអ្នកភូមិអូរឧកញ៉ាហេងកាលពីថ្ងៃទី ២០ ខែធ្នូ ផ្ដើមចេញពីជម្លោះដីធ្លីដោយភាគីខាងក្រុមហ៊ុនបានរារាំងអ្នកភូមិមិនឱ្យសង់ផ្ទះ ដោយអះអាងថា ដីដែលអ្នកភូមិកំពុងសង់ផ្ទះនោះជាដីរបស់ក្រុមហ៊ុន។ ប៉ុន្តែអ្នកភូមិអះអាងថា ជាដីរបស់ពួកគេដែលបានរស់នៅកាន់កាប់ និងអាស្រ័យផលតាំងពីឆ្នាំ ១៩៩៣ មក។
របាយការណ៍បានបន្តថា ក្នុងវិវាទនោះភាគីកម្មករក្រុមហ៊ុន ក្រៅពីប្រើដំបង ចម្ពាមបាញ់គ្រាប់ដែកថ្នាំងអំពៅនៅមានផ្ទុះអាវុធជាច្រើនគ្រាប់ទៅលើក្រុមអ្នកភូមិផងដែរ។ ចំណែកខាងភាគីប្រជាពលរដ្ឋបាននាំគ្នាប្រើដុំថ្ម និងដំបង គប់ និងវាយតបតទៅលើភាគីកម្មករក្រុមហ៊ុនវិញផងដែរ។
លោក ហួ យ៉ៃ អធិការនគរបាលស្រុកព្រៃនប់បានប្រាប់ ភ្នំពេញ ប៉ុស្តិ៍ នៅថ្ងៃម្សិលមិញថា យ៉ាងហោចណាស់មានមនុស្ស ៥ នាក់ក្នុងនោះ ២ នាក់ជាកម្មកររបស់ភាគីក្រុមហ៊ុន ភឺនផល្លា និង ៣ នាក់ទៀត ជាប្រជាពលរដ្ឋក្នុងភូមិអូរឧកញ៉ាហេងបានរងរបួសនៅក្នុងអំពើហិង្សានោះ និង ខូចខាតរថយន្ត ១ គ្រឿង ដែលជាកម្មសិទ្ធិរបស់ក្រុមហ៊ុន ភឺន ផល្លា។
លោកបញ្ជាក់ថា៖ «យ៉ាងណាក៏ដោយអំពើហិង្សានេះបង្កឡើងពីភាគីកម្មកររបស់ក្រុមហ៊ុន ភឺនផល្លា។ ហេតុនេះទើបសមត្ថកិច្ចយើងសម្រេចចាប់ឃាត់ខ្លួនពួកគេ ដើម្បីប្រគល់ជូនតុលាការចាត់វិធានការទៅលើពួកគេ»។
លោក លឹម ប៊ុនហេង អ្នកនាំពាក្យអយ្យការអមសាលាដំបូង ខេត្តព្រះសីហនុ ប្រាប់ ភ្នំពេញ ប៉ុស្តិ៍ តាមសារអេឡិចត្រូនិកពីម្សិលមិញថា ជនសង្ស័យទាំង ៨ នាក់ ត្រូវបានតំណាងអយ្យការចោទប្រកាន់ពីបទហិង្សាដោយចេតនាមានស្ថានទម្ងន់ទោស តាមមាត្រា ២១៨ នៃក្រមព្រហ្មទណ្ឌ និងបទធ្វើឱ្យខូចខាតដោយចេតនាមានស្ថានទម្ងន់ទោសតាមមាត្រា ៤១១ នៃក្រមព្រហ្មទណ្ឌ។
ម្ចាស់ក្រុមហ៊ុន ភឺនផល្លា គឺ លោក ភឺន ផល្លា មិនអាចទាក់ទងស្នើសុំការអធិប្បាយបានទេកាលពីម្សិលមិញ៕
