.jpg)
លោក ឃួង ស្រេង ពេលជួបកម្មករពីថ្ងៃ ១០ តុលា។ រូបថត លោក ឃួង ស្រេង
ភ្នំពេញ៖ មន្រ្តីសាលារាជធានីភ្នំពេញបានឱ្យដឹងថា កម្មករប្រមូលសំរាមនៃក្រុមហ៊ុន ស៊ីនទ្រី ប្រមាណជាង ៣០០ នាក់ បានវិលមកធ្វើវិញ តាំងពីថ្ងៃ ១០ តុលា មក ប៉ុន្តែមានកម្មករខ្លះនៅបន្តទាមទារនូវលក្ខខណ្ឌចំនួន ២ ចំណុចពីក្រុមហ៊ុន គឺប្រាក់អតីតភាពការងារ និងប្រាក់បំណាច់ឆ្នាំ ខណៈអាជ្ញាធរ និងក្រុមហ៊ុនក៏កំពុងបន្តសម្របសម្រួលនៅឡើយ។
ការចាប់ផ្ដើមចូលធ្វើការវិញនេះ ធ្វើឡើងស្របពេលដែលនៅថ្ងៃទី ១០ ខែតុលា នោះ ក្រុមប្រឹក្សាអាជ្ញាកណ្តាលក៏បានចេញលិខិតបញ្ជាឲ្យក្រុមកម្មករត្រូវត្រឡប់ចូលធ្វើការវិញ ជាមួយនឹងការបង្ហាញជំហរថាអាចឈប់យកករណីនេះមកពិចារណាប្រសិនបើកម្មករមិនអនុវត្តតាម។
លោក ម៉េត មាសភក្តី អ្នកនាំពាក្យសាលារាជធានីភ្នំពេញ បានប្រាប់ ភ្នំពេញ ប៉ុស្តិ៍ ពីម្សិលមិញថា រហូតមកទល់ពេលនេះមានកម្មករប្រមូលសំរាមជាង ៣០០ នាក់ ក្នុងចំណោមអ្នកធ្វើកូដកម្មបានភ្ញាក់រឭកវិលត្រឡប់ចូលបម្រើការងារវិញ។
លោកបានបញ្ជាក់ថា៖ «ចំពោះកម្មករដែលនៅបន្តធ្វើការតវ៉ា សាលាក្រុង និងក្រុមហ៊ុននឹងបន្តធ្វើការសម្របសម្រួលជាមួយនឹងកម្មករទាំងនោះទៀត»។
អគ្គលេខាធិការនៃអគ្គលេខាធិការដ្ឋានគណៈកម្មការសម្រាប់ដោះស្រាយកូដកម្ម បាតុកម្មនៅតាមគ្រប់មុខសញ្ញានៃក្រសួងការងារ (គ.ក.ប) លោក ទេស រុក្ខាផល បានប្រាប់ ភ្នំពេញ ប៉ុស្តិ៍ ម្សិលមិញដែរថា ប្រសិនបើកម្មករនៅតែមិនចូលធ្វើការតាមការបង្គាប់ទេ ក្រុមប្រឹក្សាអាជ្ញាកណ្តាលអាចទម្លាក់ចោលករណីនេះ ដោយមិនយកមកធ្វើការពិចារណាទៀតទេ ហើយវិធានការបន្ត គឺនិយោជកខ្លួនឯងថា តើត្រូវចាត់ចែងយ៉ាងម៉េច? ឯភាគីក្រសួងការងារគ្រាន់តែជួយសម្របសម្រួលប៉ុណ្ណោះ។
លោកថា៖ «ជម្រើសដែលល្អគឺ ពួកគាត់ត្រូវតែបញ្ឈប់ការធ្វើកូដកម្មនេះ...យកល្អវិធីដែលដំណើរការដោយសន្តិវិធី គឺពួកគាត់អាចរកមេធាវី មកជជែកគ្នាហើយបន្តចូលធ្វើការវិញទៅ»។ ដោយឡែក ចំពោះការប្រកាសជ្រើសរើសកម្មករថ្មីរបស់សាលាក្រុងវិញ លោក ទេស រុក្ខាផល បានបញ្ជាក់ថា គឺមិនខុសទេ បើគិតតាមច្បាប់ការងារទាក់ទងនឹងសេវាប្រមូលសំរាម សេវាមន្ទីរពេទ្យ ឬសេវានៅព្រលានយន្តហោះ ដោយសារវាជាសេវាសាធារណៈ។
លោកបានពន្យល់ថា៖ «តាមនីតិវិធី ពួកគាត់ត្រូវដាក់ការជូនដំណឹងធ្វើកូដកម្មទៅនិយោជករួចចរចាផ្ទៃក្នុង រហូតដល់ឆ្លងអាជ្ញាកណ្តាលរួចស្រេចហើយ ទើបពួកគាត់មានសិទិ្ធធ្វើកូដកម្ម ដោយសារតែទាំងនេះជាសេវាសាធារណៈ។ ពេលខ្លះសហជីពក៏បំពានច្បាប់ដែរ គាត់ដឹងច្បាប់ ប៉ុន្តែគាត់នាំកម្មករខុស។ កូដកម្មៗទៅ ប៉ុន្តែមិនត្រូវឱ្យស្ទះសេវាជាសារវន្តពាក់ព័ន្ធនឹងសេវាសាធារណៈទេ ទោះបីជាមិនទាន់មានប្រកាសបញ្ជាក់ក៏ដោយ ប៉ុន្តែនៅក្នុងច្បាប់ការងារ គឺមាននិយាយ»។
លោកបានលើកជាឧទាហរណ៍ថា ក្នុងមន្ទីរពេទ្យឯកជនមួយ បើពេទ្យចង់ធ្វើកូដកម្ម ខណៈមានអ្នកជំងឺស្នាក់នៅនោះ គឺពួកគាត់មិនអាចរត់ចោលអ្នកជំងឺមកធ្វើកូដកម្មទេ។ វាដូចគ្នានឹងសេវាប្រមូលសំរាមនេះដែរ។
ស្រដៀងគ្នានេះ លោកមេធាវី លី ច័ន្ទតុលា ក៏ធ្លាប់បានពន្យល់ប្រាប់ ភ្នំពេញ ប៉ុស្តិ៍ ដែរថា ក្រុមហ៊ុនផ្តល់សេវាជាសារវន្ត គឺច្បាប់អនុញ្ញាតឱ្យនិយោជកមានសិទ្ធិក្នុងការជ្រើសរើសកម្មករថ្មីមកជំនួសកម្មករដែលជាកូដករនេះ។ ករណីដែលផ្អាកការផ្គត់ផ្គង់សេវាមានការប៉ះពាល់ទៅដល់សណ្តាប់ធ្នាប់ ឬសុខភាពសាធារណៈនោះ គឺគេអាចជ្រើសរើសបុគ្គលិកជំនួសបាន។
យ៉ាងណាក្ដី លោក ម៉ី ផាន អគ្គលេខាធិការនៃសហជីពវិស័យទេសចរណ៍នៃក្រុមហ៊ុន ស៊ីនទ្រី បានឱ្យដឹងដែរថា កម្មករភាគច្រើនមិនទាន់បានចូលធ្វើការវិញទេ ដោយសារពួកគាត់នៅទាមទារឱ្យបានយ៉ាងហោចណាស់ ២ ចំណុច គឺប្រាក់អតីតភាព និងប្រាក់បំណាច់ឆ្នាំ។ ប្រសិនបើក្រុមហ៊ុនយល់ព្រមកម្មករនឹងវិលចូលធ្វើការងារវិញ។
លោកថា៖ «អ្នកដែលចូលទៅធ្វើការវិញ គឺក្រុមកម្មករផ្នែកបោស ប៉ុន្តែផ្នែកប្រមូល និងអ្នកបើកបររថយន្តដឹកសំរាម គឺមិនព្រមចូលទេ។ ពួកគាត់បារម្ភពីការបាត់បង់ការងារ ប៉ុន្តែអ្វីដែលគាត់បារម្ភបំផុត គឺការបាត់បង់អតីតភាពការងារដែលខំតស៊ូជាមួយក្រុមហ៊ុនយូរហើយ។គាត់ទាមទារឱ្យដោះស្រាយប្រាក់អតីតភាពការងារពីឆ្នាំ ២០០៨ ដល់ក្រោយឆ្នាំ ២០១៩»។
គួររំឭកផងដែរថា កម្មករប្រមូលសំរាមក្រុមហ៊ុន ស៊ីនទ្រី បានចាប់ផ្ដើមធ្វើកូដកម្មថ្ងៃទី ២ ខែតុលា រហូតមកទល់ពេលនេះ ដោយស្នើឱ្យក្រុមហ៊ុនដោះស្រាយនូវ ៥ ចំណុច រួមមានប្រាក់បំណាច់អតីតភាពការងារ ប្រាក់សំណងជំងឺចិត្ត ប្រាក់ជួសការជូនដំណឹងមុន ប្រាក់ខែចុងក្រោយ និងការឈប់សម្រាកប្រចាំឆ្នាំដែលនៅសេសសល់។
ជុំវិញករណីកូដកម្មនេះ កាលពីសប្តាហ៍មុននាយកដ្ឋានវិវាទការងារនៃក្រសួងការងារបានព្រមានប្រធានសហព័ន្ធសហជីពកម្មករនិយោជិតវិស័យទេសចរណ៍កម្ពុជា (CTWUF) លោក ទូច កុសល ឲ្យបញ្ឈប់ញុះញង់កម្មករធ្វើកូដកម្មខុសច្បាប់ ដែលជាការធ្វើសកម្មភាពផ្ទុយពីលក្ខន្តិកៈរបស់សហព័ន្ធ ប៉ុន្តែត្រូវបាន លោក ទូច កុសល បដិសេធ និងទាមទារឱ្យក្រសួងបង្ហាញភ័ស្តុតាងពីការចោទប្រកាន់លោកនេះ។
ក៏ប៉ុន្តែ លោក ទេស រុក្ខាផល បានបញ្ជាក់ថា សិទ្ធិទាមទារមិនខុសទេ ប៉ុន្តែនីតិវិធីនៃការដឹកនាំឱ្យពួកគាត់អនុវត្តគឺខុស។
លោកបានថ្លែងថា៖ «កម្មករមិនចេះច្បាប់ទេ ប៉ុន្តែអ្នកផ្សេងបានដឹកនាំធ្វើឱ្យមានការគណនាចេញតួលេខផ្សេង។ មុននឹងមានការព្រមានមួយៗគេមានទឡ្ហីករណ៍ច្បាស់មិនបំពានច្បាប់ និងមានភ័ស្តុតាងទើបគេហ៊ានធ្វើការព្រមាន។ ពួកខ្ញុំបានចូលទៅជួបកម្មករ ហើយពួកគាត់ថា គេគិតឱ្យពួកគាត់ហើយ ម្នាក់ៗបានសុទ្ធតែ ១ ម៉ឺនឯណោះ។ គេនោះមិនមានអ្នកណាក្រៅពីសហជីព»។
លោកថា ក្រុមហ៊ុនមិនទាន់ផ្តាច់កិច្ចសន្យាពួកគាត់ទេ ហើយបើពួកគាត់ទាមទារផ្តាច់កិច្ចសន្យា គឺមានន័យថា ពួកគាត់រំលាយកិច្ចសន្យាដោយខ្លួនឯង។ បើដូចនេះ គឺពួកគាត់ទទួលបានតែប្រាក់ខែចុងក្រោយ និងលុយជួសការឈប់សម្រាកប្រចាំឆ្នាំដែលនៅសល់ប៉ុណ្ណោះ។
យ៉ាងណាក្ដី កាលពីថ្ងៃសៅរ៍ចុងសប្ដាហ៍មុន CTWUF បានចេញសេចក្តីថ្លែងការណ៍មួយបញ្ជាក់ពីជំហរថា ខ្លួនចង់រកដំណោះស្រាយឱ្យបានឆាប់ ដើម្បីឱ្យកម្មករនិយោជិតបានចូលបម្រើការងារវិញ។
សហព័ន្ធនេះ បានបញ្ជាក់ថា៖ «CTWUF គ្មានគោលបំណងធ្វើឱ្យប្រជាពលរដ្ឋរស់នៅក្នុងរាជធានីភ្នំពេញមានការលំបាកណាមួយឬក៏ធ្វើឱ្យរាជធានីភ្នំពេញធុំក្លិន និងស្ទះសំរាមនោះទេ។ យើងបានព្យាយាមចូលរួមអស់ពីលទ្ធភាព ដើម្បីដោះស្រាយវិវាទនេះ»៕
វីដេអូ៖
