ភ្នំពេញៈ កម្មករប្រមូលសំរាមរបស់ក្រុមហ៊ុនស៊ីនទ្រី ប្រមាណជាង ៥០០ នាក់កាលពីម្សិលមិញនៅតែបន្តធ្វើកូដកម្មនៅមុខក្រុមហ៊ុនស៊ីនទ្រីក្នុងសង្កាត់ដង្កោ ខណ្ឌដង្កោ រាជធានីភ្នំពេញដោយមិនព្រមចូលធ្វើការ បន្ទាប់ពីតំណាងក្រុមហ៊ុនពន្យារពេលចរចាពីសំណើទាមទារដំឡើងប្រាក់ខែ និងលក្ខខណ្ឌការងារផ្សេងទៀតដែលពួកគេបានស្នើតាំងពីខែវិច្ឆិកាមក។
លោក ទូច កុសល ប្រធានសហព័ន្ធសហជីពកម្មករនិយោជកវិស័យទេសចរណ៍កម្ពុជាដែលមានតំណាងសហជីពក្នុងកន្លែងធ្វើការបានថ្លែងថាកម្មករបានផ្ទុះការតវ៉ាកើតឡើងតាំងពីល្ងាចថ្ងៃពុធ ក្រោយពីក្រុមហ៊ុនបានពន្យារពេលចរចាសំណើសុំដំឡើងប្រាក់ខែរបស់ពួកគេដែលបានស្នើតាំងពីខែវិច្ឆិកា។ ក្រុមហ៊ុនណាត់ជួបកាលពីថ្ងៃចន្ទមុន ប៉ុន្តែលើកពេល។
លោក ទូច កុសល បានបញ្ជាក់ថា៖ «គាត់ធ្វើពីល្ងាចមិញ ម៉ោងប្រហែល ៣ ទៅ ៤ អត់ព្រមចូលទៅបើកយកសំរាម អត់ព្រមទៅកើបសំរាម និងបោសសំរាមទេកាលពីម្សិលមិញ [ថ្ងៃពុធ]»។
លោក ទូច កុសល បន្ថែមថា៖ «គាត់ទាមទារសុំដំឡើងប្រាក់ខែចំនួន ១២ ដុល្លារ ហើយសុំមានប្រាក់អតីតភាព និងគិតគូរជាប្រាក់ប្រចាំឆ្នាំពេលដែលកម្មករអត់ប្រើប្រាស់ថ្ងៃឈប់សម្រាកប្រចាំឆ្នាំ និងដោយសារកម្មករមួយចំនួនគាត់ប្រើប្រាស់អត់អស់។ ប៉ុន្តែក្រោយពីបានជួបជាមួយតំណាងក្រុមហ៊ុនម្សិលមិញ ក្រុមហ៊ុនយល់ព្រមទូទាត់ជាប្រាក់សម្រាប់ដំណាច់ឆ្នាំហើយក៏គិតប្រាក់អតីតភាពដូចក្រសួង ប៉ុន្តែសុំដំឡើងប្រាក់ខែត្រឹម ៨ ដុល្លារ»។
លោកថា៖ «យើងមានការបារម្ភខ្លាចកម្មករនៅតែបន្តតវ៉ា យើងចង់ឲ្យក្រុមហ៊ុនដោះស្រាយកុំអូសបន្លាយទៀត ហើយអាចការតវ៉ានោះ និងរាលដាលដល់ខណ្ឌផ្សេងទៀត។ កម្មករទើបតែផ្អាកធ្វើការងារម្សិលមិញពេលល្ងាចហើយយើងរង់ចាំដំណោះស្រាយ។ កម្មករប្រាប់ថាបើក្រុមហ៊ុនមិនអាចដោះស្រាយទេគឺគាត់នឹងមិនចូលធ្វើការទេ»។
លោក មី ផាន មានអាយុ ៤១ ឆ្នាំជាកម្មករបើកបរឡានដឹកសំរាមនៅក្រុមហ៊ុនស៊ីនទ្រីអស់រយៈពេល ១៤ ឆ្នាំបានឲ្យដឹងថាលោកបានប្រាក់ខែគោល ៨៧ ម៉ឺនរៀល ហើយបើបូកនឹងប្រាក់លើកទឹកចិត្ត បាន ១ លាន ៤ សែនរៀល។
លោកបានបន្ដថាក្រុមហ៊ុនយល់ព្រមគិតគូរប្រាក់អតីតភាព និងប្រាក់បំណាច់។
លោក មី ផាន បានបញ្ជាក់ថា៖ «ក្រុមហ៊ុនប្រាប់យើងថាគាត់អត់មានលទ្ធភាពដំឡើងប្រាក់ដល់ ១២ ដុលា្លរឲ្យទេ។ ខ្ញុំធ្វើការក្នុងហ្នឹង ១៤ ឆ្នាំខ្ញុំគិតថាក្រុមហ៊ុនមិនដែលគិតគូរពីពួកយើងទេខ្ញុំធ្វើការជាង ១០ ម៉ោងក្នុងមួយថ្ងៃហើយក្រសួងការងារក៏មិនដែលគិតគូរពីពួកយើងដែរមិនដែលគិតពីបញ្ហាសុខភាពពួកយើងទេ យើងធ្វើការសូម្បីស្រោមដៃក៏អត់មានពាក់ដែរ»។
លោក ជីម ស៊ីថា អធិការនគរបាលខណ្ឌដង្កោបានថ្លែងថាកម្មករដែលបានឈរតវ៉ាមានប្រមាណ ២០០ នាក់នៅចិញ្ចើមផ្លូវ ប៉ុន្តែកម្មករដែលស្នើសុំនៅមានប្រមាណ ១០៤០ នាក់។
លោក អ៊ិត ចិន្តា ប្រធានផ្នែកគ្រប់គ្រងនៅក្រុមហ៊ុនស៊ីនទ្រីបានឲ្យដឹងកាលពីម្សិលមិញថាប្រាក់ខែកម្មករប្រមូលសំរាមបច្ចុប្បន្នមានចន្លោះពី ១៦៨ ដល់ ២៤៨ ដុល្លារ ហើយពួកគាត់សុំដំឡើង ១២ ដុលារ ហើយកម្មករធ្វើការទាក់ទងសំរាមនៅភ្នំពេញទាំងអស់មានជិត ២០០០ នាក់។ រីឯការបើកប្រាក់ខែគឺបើក ១ ខែម្ដងសម្រាប់ឆ្នាំនេះ។
លោកថា៖ «យើងកំពុងចរចាជាមួយសហជីព។ កម្មករស៊ិនទ្រីទូទាំងរាជធានីភ្នំពេញមិនប្រមូលសំរាមទូទាំងរាជធានី»។
លោកបានបន្តថានៅចំពោះមុខបញ្ហាសំរាមគឺសាលារាជធានីភ្នំពេញបានប្រគល់ឲ្យអាជ្ញាធរខណ្ឌចាត់ចែងប្រមូលបណ្តោះអាសន្ន។
អាជីវករលក់ប្រេងអាយុ ៣៩ ឆ្នាំម្នាក់សុំមិនបញ្ចេញឈ្មោះនៅសង្កាត់ពោធិ៍សែនជ័យ រាជធានីភ្នំពេញបាននិយាយកាលពីថ្ងៃម្សិលមិញថា កន្លងមកការប្រមូលសំរាមនៅផ្ទះគាត់មិនទៀងទាត់ទេ ដោយពេលខ្លះ ១០ ថ្ងៃ ទើបមកប្រមូលម្ដង។
លោកថា៖ «នេះប្រហែលជាផ្ទះខ្ញុំជាលក្ខណៈគ្រួសារខុសពីក្រុមហ៊ុនដែលគេបង់សេវាផ្សេងក៏ខ្ញុំមិនដឹង។ វាជារឿងល្អបើសិនជាក្រុមហ៊ុនអាចដំឡើងឲ្យកម្មករ ព្រោះខ្ញុំបានដឹងថាប្រាក់ខែគាត់បានទាបហើយសង្ឃឹមថា ការងារប្រមូលសំរាមបានប្រសើរជាងមុន ប៉ុន្តែវាក៏អាស្រ័យលើការគ្រប់គ្រងរបស់ក្រុមហ៊ុនដែរ»។
ស្រដៀងគ្នានេះដែរអ្នកស្រី ឱក សុបាន ជាពលរដ្ឋរស់នៅខណ្ឌសែនសុខ បានថ្លែងថា សេវាប្រមូលដូចជាមិនទៀងទាត់ទេ ដោយផ្ដុំផ្ទះអ្នកស្រីកាលពីមុនប្រមូល ២ ដងនៅក្នុង ១ សប្ដាហ៍គឺថ្ងៃព្រហស្បតិ៍ និងថ្ងៃអាទិត្យ តែតាំងចូលឆ្នាំខ្មែរមកឃើញប្រមូលតែថ្ងៃអាទិត្យ។
អ្នកស្រីថា៖ «ខ្ញុំមិនដឹងថាមកពីផ្ទះខ្ញុំនៅកន្លែងច្រកចង្អៀតពេក ឬមកពីក្រុមហ៊ុនខ្វះកម្មករទេ ខ្ញុំគាំទ្របើគេជួយដល់ជីវភាពកម្មករ»។
លោក ម៉ៅកុល ម៉ារឌី នាយកទីចាត់ការគ្រប់គ្រងសំណល់ និងបរិស្ថានសាលារាជធានីភ្នំពេញបានថ្លែងថា បញ្ហានេះនៅកំពុងពិនិត្យមើលដើម្បីដោះស្រាយ។
លោកថា៖ «យើងកំពុងដោះស្រាយរឿងហ្នឹង យើងអត់អាចឲ្យបញ្ហាហ្នឹងទុកយូរបានទេ ព្រោះសំរាមវាស្អុយពេញហ្នឹង»។
លោក ហេង សួរ អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈបានថ្លែងថា មន្រី្តក្រសួង និងមន្ត្រីសាលារាជធានីភ្នំពេញបានចុះទៅមើលករណីពាក់ព័ន្ធនឹងជម្លោះការងារនេះ។
លោកបានបញ្ជាក់ថា៖ «យើងនឹងស្វែងរកដំណោះស្រាយជូនកម្មករ»៕