.jpg)
ពលករខ្មែរតវ៉ាប្រឆាំងថៅកែរោងចក្រនៅថៃកាលពីយប់ថ្ងៃទី ៧ មីនា។ រូបថត អង្គការសង់ត្រាល់
ភ្នំពេញៈ ពលករខ្មែរជាង ៣០០ នាក់ ក្នុងចំណោមជាង ៣ ០០០ នាក់ ដែលបម្រើការងារនៅរោងចក្រ GFN ដែលកែច្នៃអាហារស្ថិតនៅតំបន់ណងយ៉ៃ ក្នុងស្រុកណងយ៉ៃ ខេត្តឈុនប៊ុរី ប្រទេសថៃបានផ្ទុះការតវ៉ាកាលពីយប់ថ្ងៃទី ៧ មីនា បន្ទាប់ពីរោងចក្រនេះបានបញ្ឈប់ពលករខ្មែរជាង ៣០ នាក់ដោយសារតែពួកគេទាមទារលក្ខខណ្ឌការងាររួមជូនកម្មករខ្មែរ។
លោក យ៉ែម យ៉ត ជាពលករខ្មែរម្នាក់បម្រើការផ្នែកបកប្រែនៅក្នុងរោងចក្រ GFN និងត្រូវបានរោងចក្របញ្ឈប់ដោយរោងចក្រមិនស្នើសុំទៅអាជ្ញាធរថៃឱ្យបន្តទិដ្ឋាការឱ្យប្រាប់ភ្នំពេញប៉ុស្តិ៍ពីម្សិលមិញថា កាលពីពេលថ្មីៗនេះមានពលករជាង ៣០០ នាក់ ក្នុងនោះមានពួកលោកដែរ ដែលត្រូវដល់ពេលបន្តទិដ្ឋាការ ដើម្បីបានបន្តការងារក្នុងរោងចក្រនេះបន្តទៀត។
លោកថា នៅពេលដំណើរការផ្តល់ទិដ្ឋាការ បែរជាឈ្មោះរបស់លោក និងកម្មករចំនួន ៣១ នាក់ទៀត មិនត្រូវបានរោងចក្រស្នើសុំទៅអាជ្ញាធរថៃឱ្យបន្តទិដ្ឋាការឱ្យនោះទេ។
ការប្រកាសមិនស្នើសុំបន្តទិដ្ឋាការឱ្យពួកលោកនេះត្រូវបានរោងចក្រអះអាងថា ដោយសារតែពួកលោកទាំង ៣២ នាក់ ជាអ្នកញុះញង់ឱ្យកម្មករបះបោរ និងតវ៉ាជាមួយថៅកែ ហើយធ្វើការមិនបានល្អ។ លោកបញ្ជាក់ថា៖ «នៅពេលដែលមានរឿងយ៉ាងដូច្នេះ ពលករដទៃទៀត គាត់ផ្ទុះការតវ៉ាទាំងយប់ ដើម្បីទាមទារឱ្យថៅកែផ្តល់ភាពត្រឹមត្រូវជូនពលករទាំង ៣២ នាក់វិញ។ យើងបានតវ៉ាគ្រាន់តែមានអ្នកសម្របសម្រួលនៅយប់នោះ ប៉ុន្តែមកទល់ពេលនេះ មិនទាន់មានដំណោះស្រាយណានោះទេ»។
លោក យ៉ែម យ៉ត ស្នើឱ្យអាជ្ញាធរខ្មែរ ឬរដ្ឋាភិបាលខ្មែរជួយអន្តរាគមន៍ទៅកាន់រោងចក្រនេះ ដើម្បីផ្តល់យុត្តិធម៌ជូនពួកលោកវិញ ដោយលោករំពឹងថា ការជួយអន្តរាគមន៍ពីសំណាក់អាជ្ញាធរខ្មែរនឹងជួយដល់ពលរដ្ឋខ្មែរដែលកំពុងត្រូវបានកេងប្រវ័ញ្ចសិទ្ធិ និងកម្លាំងពលកម្មនៅក្នុងប្រទេសថៃ។
លោកបញ្ជាក់ថា៖ «ពួកខ្ញុំចង់ទាមទារសំណងទៅតាមច្បាប់ ប្រសិនបើក្រុមហ៊ុន បញ្ឈប់ពួកខ្ញុំ។ ឬមួយទៀត ចង់ឱ្យក្រុមហ៊ុនចេញជាលិខិតលាឈប់របស់ខ្ញុំ ឱ្យបានត្រឹមត្រូវ ដើម្បីឱ្យខ្ញុំស្វែងរកការងារធ្វើកន្លែងផ្សេង។ ខ្ញុំគិតថា បើខ្ញុំតវ៉ាចូលធ្វើកន្លែងដដែលវិញ ពួកគេក៏នៅមានលេសបញ្ឈប់ខ្ញុំទៀត»។
បើតាមលោក យ៉ែម យ៉ត ពលករខ្មែរដែលកំពុងធ្វើការនៅរោងចក្រ GFN ទាំងអស់មានជាង ៣ ០០០ នាក់ ធ្លាប់ធ្វើការតវ៉ាជាច្រើនលើកមកហើយ តាំងពីខែតុលា ឆ្នាំ ២០២០ រហូតមកទល់នឹងបច្ចុប្បន្ន ដោយសារតែរោងចក្រនេះបានកេងប្រវ័ញ្ចសិទ្ធិ និងកម្លាំងពលកម្មកម្មករខ្មែរជាបន្តបន្ទាប់។
ពលករខ្មែរម្នាក់ សុំមិនបញ្ចេញឈ្មោះដែលបានចូលរួមតវ៉ាលើកឡើងថា កន្លងមកក្រុមហ៊ុនតែងតែគាបសង្កត់ និងកេងប្រវ័ញ្ចសិទ្ធិ និងអត្ថប្រយោជន៍ពលករខ្មែរ។ ប៉ុន្តែដោយសារមានការសម្របសម្រួលពីពលករទាំង ៣២ នាក់នេះបានធ្វើឱ្យពលករទាំងអស់ទទួលបានអត្ថប្រយោជន៍ជាច្រើនមកវិញ។
លោកយល់ថា ការបញ្ឈប់ពលករទាំងនេះជារឿងអយុត្តិធម៌បំផុត ខណៈលោកក៏មានការភ័យខ្លាចចំពោះការបញ្ឈប់ និងការគាបសង្កត់នៅពេលខាងមុខផងដែរ។
លោកថា៖ «ខ្ញុំបារម្ភដែរ ដោយសារតែ ៣២ នាក់ត្រូវបានមិនស្នើបន្តទិដ្ឋាការ ឬវីសាការងារឱ្យ។ ខ្លាចថ្ងៃក្រោយទៅ វាដល់វេនយើង ឬមានការមិនបន្តទិដ្ឋាការដល់ពលករដទៃទៀត»។ ពលករដែលគេបញ្ឈប់នេះ គឺពួកគាត់បានទាមទារថ្លៃលាបថ្នាំបន្ទប់របស់ពលករពីរោងចក្រ និងតម្លៃជួលបន្ទប់នៅក្នុងរោងចក្រ ហើយនៅពេលមានការតវ៉ា ខាងរោងចក្របានដោះស្រាយជូនកម្មករ។
ភ្នំពេញប៉ុស្តិ៍មិនអាចស្វែងរកប្រភពទាក់ទងម្ចាស់រោងចក្រ GFN នៅថៃបានទេកាលពីម្សិលមិញ។ យ៉ាងណាក្តី មន្ត្រីស្ថានទូតកម្ពុជាប្រចាំទីក្រុងបាងកក ដែលស្នើសុំមិនបញ្ចេញឈ្មោះបានប្រាប់ភ្នំពេញប៉ុស្តិ៍តាមទូរស័ព្ទយ៉ាងខ្លីថា ស្ថានទូតកំពុងពិនិត្យ និងសម្របសម្រួលជុំវិញករណីនេះ។
លោក លឹង សុផុន ក្រុមការងារនៃអង្គការសង់ត្រាល់ប្រចាំប្រទេសថៃដែលបានចុះទៅដល់ទីតាំងកើតហេតុផ្ទាល់ថ្លែងពីម្សិលមិញថា រោងចក្របានចោទប្រកាន់ពលករទាំង ៣២ នាក់នេះថា បានដឹកនាំឱ្យពលករតវ៉ា។ ប៉ុន្តែធាតុពិត គឺពលករទាំងអស់ចូលរួមដើម្បីទាមទារសិទ្ធិ និងអត្ថប្រយោជន៍ដែលពួកគាត់ត្រូវទទួលបានប៉ុណ្ណោះ។
លោករំពឹងថា ពួកគេទាំង ៣២ នាក់នឹងទទួលបានយុត្តិធម៌ និងភាពត្រឹមត្រូវឡើងវិញ។ «រោងចក្រនៅពេលបញ្ឈប់គាត់ គួរតែផ្តល់ដំណឹងជូនពួកគាត់តាមច្បាប់ការងារ ព្រោះបើបញ្ឈប់គាត់បែបនេះ គឺខុសច្បាប់ហើយ។ តាមច្បាប់ ការបញ្ឈប់គាត់ គួរតែប្រាប់គាត់ ៣ ទៅ ៤ ខែមុនព្រោះពួកគាត់ខ្លះ មិនទាន់អស់ទិដ្ឋាការផង ដូច្នេះខាងរោងចក្រក៏មានភាពមិនច្បាស់លាស់ដល់ពលរកខ្មែរ»៕
វីដេអូ៖
