ភ្នំពេញៈ កម្មករជាងភ្លើងនៃក្រុមហ៊ុនយូកុងដេគ័រជាង ២០ នាក់បានចូលធ្វើការងារវិញកាលពីម្សិលមិញក្រោយពី ក្រុមហ៊ុនបានយល់ព្រមតាមការទាមទាររបស់ពួកគេ។
លោក យួន ភារម្យ តំណាងកម្មករដែលបានចូលរួមការតវ៉ាបានឱ្យដឹងថា កម្មករជាង ២០ នាក់ដែលធ្វើការផ្នែកជាងភ្លើងក្នុងក្រុមហ៊ុនយូកុងដេគ័របានផ្ទុះការតវ៉ា បន្ទាប់ពីរូបលោកត្រូវបានក្រុមហ៊ុនព្យូរការងាររយៈពេល ៥ ថ្ងៃ ក្រោយពីការតវ៉ាទាមទារឱ្យក្រុមហ៊ុនគោរពច្បាប់ការងារ។
លោក ភារម្យ បានថ្លែងថា៖ «តាមការទាមទារនេះក្រុមហ៊ុន គេព្រមបន្ថែមប្រាក់ថែមម៉ោងក្នុង ១ ម៉ោង ឱ្យយើង ២ ពាន់ រៀលបន្ថែមទៀតគឺសរុបបានមួយម៉ោង ១ ម៉ឺនរៀល ហើយយើងក៏សម្រេចចូលធ្វើការនៅថ្ងៃព្រហស្បតិ៍ (ម្សិលមិញ)»។
លោក សុខ គីន ប្រធានសហព័ន្ធសហជីពកម្មករសំណង់ និងព្រៃឈើកម្ពុជា បានថ្លែងថាកម្មករក្នុងវិស័យសំណង់ស្ទើរគ្រប់កន្លែង គឺតែងជួបបញ្ហាប្រឈម ពាក់ព័ន្ធនឹងការកេងប្រវ័ញ្ចកម្លាំងពលកម្ម និងប្រាក់ឈ្នួលហើយវិស័យនេះ គឺនៅតែមានការរំលោភបំពាន ខណៈដែលបទដ្ឋានគត្តិយុត្តមួយចំនួន បើទោះជាមានហើយ ក៏មិនបានអនុវត្តត្រឹមត្រូវដែរ។
លោក គីន ថ្លែងដោយរំពឹងថា ស្របពេលវិស័យសំណង់មានការរីកចម្រើន រដ្ឋាភិបាល ជាពិសេសក្រសួងពាក់ព័ន្ធគួរតែកំណត់ប្រាក់ឈ្នួលគោលក្នុងវិស័យសំណង់ និង ស្នើឱ្យចេញប្រកាសស្តីពីសុខសុវត្ថិភាពរបស់កម្មករសំណង់ ព្រមទាំងស្នើឱ្យក្រសួងកំណត់ឱ្យកម្មករក្នុងវិស័យនេះទទួលបានសេវាថែទាំសុខភាព (បសស) ដូចកម្មករដទៃ។
លោក ហេង សួរ អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ ថ្លែងថា បើសិនជាកម្មករពេលមានបញ្ហា ដែលមិនសុខចិត្ត ឬ ទទួលរងនូវការរំលោភបំពានណាមួយអាចប្តឹងមកអធិការការងារនៃក្រសួងការងារបាន៕