The Phnom Penh Post Search

Search form




Logo of Phnom Penh Post newspaper Phnom Penh Post - កម្មករ​ជាង​៤០០​នាក់​តវ៉ា ឈាន​ដល់​ការ​គប់​ដុំថ្មចូល​រោងចក្រ

កម្មករ​ជាង​៤០០​នាក់​តវ៉ា ឈាន​ដល់​ការ​គប់​ដុំថ្មចូល​រោងចក្រ

Content image - Phnom Penh Post

កម្មករ​ជាង​៤០០​នាក់​តវ៉ា ឈាន​ដល់​ការ​គប់​ដុំថ្មចូល​រោងចក្រ

ស្វាយរៀង៖ ​កម្មករ​ជាង​ ៤០០ ​នាក់​​នៅ​រោង​ចក្រ​ Beautiful Windows ​ក្នុង​ខេត្ត​ស្វាយ​រៀង​​ក្នុង​តំបន់​សេដ្ឋកិច្ច​ពិសេស​​សាន​តុង​ ​ក្រុង​បាវិត​ ​បាន​ធ្វើ​បាតុកម្ម​និង​ប្រើ​ហិង្សា​​ដោយ​​គប់​ដុំ​ថ្ម​ចូល​ទៅ​ក្នុង​រោង​ចក្រ​​ កាល​ព្រឹក​ម្សិល​មិញ​​ បន្ទាប់​ពី​ពួកគេ​បាន​តវ៉ា​ចាប់​តាំង​ពី​ថ្ងៃ​ពុធ​សប្តាហ៍​មុន​​ដើម្បី​ទាម​ទារ​លក្ខខណ្ឌ​ការងារ​មួយ​ចំនួន។

លោក ជឿន ​ស៊ីនឿន (Choeun Sinoeun) តំណាង​កម្មករ​រោងចក្រ Beautiful Windows បាន​ថ្លែង​កាល​ម្សិល​មិញ​ថា កម្មករ​បាន​តវ៉ា​ចាប់​តាំង​ពី​ថ្ងៃ​ទី​ ១២ សីហា ​ដើម្បី​ទាម​ទារ​លក្ខខណ្ឌ​ការ​ងារ ១១ ​ចំណុច​ដូច​ជា​ កម្មករ​ត្រូវ​ផ្តល់​សំណង​ទូទាត់​សម្រាប់​កម្មករ​​ដែល​ខិត​ខំ​​ធ្វើការ​ងារ​​ ​មិន​ត្រូវ​ផ្ទេរ​តំណែង​កម្មករ​ពី​ក្រុម​​មួយ​ទៅ​ក្រុម​មួយ​ទៀត ត្រូវ​ធ្វើ​ឲ្យ​មាន​ខ្យល់​អាកាស​ប្រសើរ​ជាង​មុន​​នៅ​ក្នុង​កន្លែង​​ធ្វើ​ការ​ ​​​រក្សា​ប្រាក់​​ឈ្នួល​​និង​​​ប្រាក់​​អត្ថប្រយោជន៍​នៅ​ពេល​កម្មករ​មិនមាន​លិខិត​បញ្ជាក់​ពី​គ្រូ​ពេទ្យ និង​ចំណុច​ទាមទារ​ជា​ច្រើន​ទៀត។

លោក​បាន​បន្ថែម​ថា៖ «កម្មករ​ប៉ុនប៉ង​គប់​ដុំ​ថ្មី​ចូលទៅ​ក្នុង​រោងចក្រ​តាំង​ពី​ម្សិលមិញ ប៉ុន្តែ​យើង​ព្យាយាម​អង្វរពួក​គេ​​មិនឲ្យ​ប្រើ​ហិង្សា។ ​កាល​ព្រឹក​ថ្ងៃ​នេះ​​នៅ​វេលាម៉ោង​ប្រហែល​ ៧ ​ព្រឹក កម្មករ​មាន​ការ​ខឹង​យ៉ាង​ខ្លាំង​ ​ហើយ​បាន​គប់ដុំ​ថ្ម​​ចូល​ទៅ​​ក្នុង​រោងចក្រ​អស់​រយៈពេល​ប្រហែល​ ៣០ នាទី»។

លោក​បាន​បន្ត​ថា មន្រ្តីនគរបាល​ប្រហែល​ ២០ ​នាក់​បាន​​មក​ដល់​កន្លែង​កើត​ហេតុ បន្ទាប់​ពី​កម្មករ​ឈប់​គប់​ដុំ​ថ្មី ប៉ុន្តែ​​មិន​មាន​កម្មករ​ណា​ត្រូវ​បាន​ចាប់​ខ្លួន​នោះ​ទេ។

លោក ជឿន ​ស៊ីនឿន ​បាន​ថ្លែង​បន្ត​ថា មាន​កម្មករ​ពីរ​នាក់​រង​របួស​ដោយសារ​មាន​កម្មករ​កំពុង​ធ្វើ​ការ​នៅ​ក្នុង​រោងចក្រ​ក្នុង​នោះ​ប្រុស​ម្នាក់​និង​ស្រី​ម្នាក់​រង​របួស​ត្រង់​ដៃ​និង​ក្បាល។

លោកបន្ត​ថា កម្មករ​បាន​ផ្ញើ​លិខិត​ជម្រាប​ទៅ​រោងចក្រ ៧ ថ្ងៃ​មុន​​អំពី​ការ​ធ្វើ​កូដកម្ម​ប្រសិន​បើ​ក្រុម​ហ៊ុន​​មិន​ឆ្លើយ​តប​នឹង​ការ​ទាម​ទារ​របស់​ពួក​គេ។

លោក ជឿន ស៊ីនឿន បាន​ថ្លែង​បន្ត​ថា៖ «កម្មករ​នឹង​ជួប​ជុំ​គ្នា​នៅ​មុខ​រោងចក្រ​​ម្តង​ទៀត​នៅ​ថ្ងៃ​ស្អែក​​ប្រសិន​បើ​យើង​នៅមិន​ទាន់​មាន​ដំណោះ​ស្រាយ»។

លោក តួន​ សារ៉េន (Toun Saren) ប្រធាន​​សម្ព័ន្ធ​​សហជីព​ចលនាកម្មករ បាន​ថ្លែង​កា​ល​ម្សិល​មិញ​ថា កម្មករ​បាន​ផ្ញើ​លិខិត​ទៅ​លោក​ដើម្បី​សុំ​ការ​ជួយ​សម្រាប់​ការ​ទាម​ទារ​របស់​ពួកគេ ហើយ​កាល​ម្សិល​មិញ លោក​​បាន​ប្រាប់​​កម្មករ​មិន​ឲ្យ​ប្រើ​ហិង្សា។

លោក​បន្ត​ថា​៖ «​​កាល​ម្សិល​មិញ​ ​ខ្ញុំ​បាន​ប្រកាស​​តាម​មីក្រូហ្វូន​​ប្រាប់​ពួក​គេ​​ម្តង​ហើយ​ម្តង​ទៀត​​​មិន​ឲ្យ​ប្រើ​ហិង្សា​ ​ហើយ​ខ្ញុំ​ក៏​បាន​រាយការណ៍​ទៅ​មន្រ្តីខេត្ត​​​ផង​ដែរ​ថា​ ប្រសិន​បើ​ពួក​គេ​​មិន​មាន​ដំណោះ​ស្រាយ​ ​ហើយ​កម្មករ​ប្រើ​ហិង្សា​ សហជីព​របស់​យើង​មិន​ទទួល​ខុស​ត្រូវ​ចំពោះ​ហិង្សា​នោះ​ទេ​​»។

លោក តួន​ សារ៉េន ​បាន​ថ្លែង​ថា​ ​កម្មករ​មិន​​អាច​គ្រប់​គ្រង​​​កំហឹង​​របស់​ខ្លួន​បាន​ចំពោះ​ការ​តវ៉ា​​ជា​ច្រើន​ថ្ងៃ​​ដោយ​មិន​មាន​ដំណោះ​ស្រាយ​​ណា​មួយ​​ ​ដូច្នេះ​​ពួក​គេ​​​សម្រេច​​គប់​ដុំ​ថ្ម​​ចូល​ទៅ​ក្នុង​រោង​ចក្រ​​​ដើម្បី​ធ្វើ​ឲ្យ​ខូច​ខាត​ទ្រព្យ​សម្បត្តិ​រោង​ចក្រ​។

លោក តួន​ សារ៉េន ​បាន​ថ្លែង​បន្ត​ថា​៖ «​​មន្រ្តីសម្ព័ន្ធ​​សហជីព​​ចលនា​​កម្មករ​​​មិន​បាននៅ​ក្នុង​អំឡុង​ពេល​ហិង្សា​​កាល​ព្រឹក​​នេះ​ទេ ​ពី​ព្រោះ​​ខ្ញុំ​បាន​ប្រាប់​​ពួក​គេ​​ថា យើង​នឹង​មិន​គាំ​ទ្រ​​ពួក​គេ​និង​ចូល​រួម​ជា​មួយ​ពួក​គេ​​​​ដោយ​ប្រើ​ហិង្សា​ទេ​»។ «​កម្មករ​ម្នាក់​បាន​ទូរស័ព្ទ​​មក​ខ្ញុំ​​​ជម្រាប​​​​អំពី​ហិង្សា​នៅ​រោង​ចក្រ​​»។

លោក តួន​ សារ៉េន ​បាន​ថ្លែង​បន្ត​​ថា​​ ក្រុម​ហ៊ុន​នឹង​ប្តឹង​​លោក​​និង​សហជីព​របស់​លោក​​​​​ពាក់​ព័ន្ធ​នឹង​ការ​ប្រើ​ហិង្សា​នេះ​​​បើ​ទោះ បី​ជា​លោក​មិន​បាន​ចូល​រួម​នៅ​ក្នុង​ហិង្សា​នេះ​ក៏​ដោយ​។

លោក​បន្ត​ថា​៖ «​ខ្ញុំ​ឃើញ​ថា​ ​ជា​ទូទៅ​ កម្មករ​កាត់​ដេរ​ក្នុង​ខេត្ត​ស្វាយ​រៀង​​គឺ​ខុស​ពី​ខេត្ត​ដទៃ​ៗ​ ​ពីព្រោះ​នៅពេលពួក​គេ​តវ៉ា​ ​ពួក​គេ​តែង​តែ​ធ្វើ​ឲ្យ​ខូច​ខាត​​​ទ្រព្យ​សម្បត្តិ​រោង​ចក្រ​​ ប៉ុន្តែ​​ចាប់​តាំងពី​សហជីព​របស់​យើង​បង្កើត​ឡើង​នៅក្នុង​ខេត្ត​នេះ​ ​អំពើ​ហិង្សា​បំផ្លាញ​ទ្រព្យ​សម្បត្តិ​រោង​ចក្រ​​​បាន​ថយ​ចុះ​»។

លោក​បន្ត​ទៀត​ថា​ ​​កម្មករ​មិន​គួរ​​ប្រើ​ហិង្សា​​បំផ្លាញ​​ទ្រព្យ​សម្បត្តិ​​​រោង​ចក្រ​ទេ​ ពួក​គេ​គួរ​តែ​ព្យាយាម​ឲ្យ​អស់​ពី​សមត្ថ​ភាព​ក្នុង​ការ​​ស្វែង​រកដំណោះ​ស្រាយ​។

មន្រ្តី​រោង​ចក្រ Beautiful Windows ​មិន​អាច​ទាក់​ទង​សុំ​អត្ថា​ធិប្បាយ​បាន​កាល​ម្សិល​មិញ​​។

​លោក កឹង ឃន (Koeng Khorn) ​ស្នង​ការ​នគរ​បាល​ខេត្ត​ស្វាយ​រៀង​ បាន​ថ្លែង​កាល​ម្សិល​មិញ​ថា ​លោក​នឹង​សហការ​ជា​មួយ​ពួកគេ​​​មិន​ឲ្យ​មានការ​ប្រើ​ហិង្សា​ទៀត​ ​ហើយ​លោក​នឹង​ស៊ើប​​អង្កេត​លើ​​អំពើ​ហិង្សា​នេះ​។

លោក​បន្ត​ថា​៖ «​​យើង​កំពុង​ធ្វើ​ការ​ស៊ើប​អង្កេត​លើ​​​អំពើ​ហិង្សា​នេះ​ ​ហើយ​​យើង​នឹង​ចាត់​ការ​ទៅ​តាម​ច្បាប់​ ​ប្រសិន​បើ​យើង​រក​ឃើញ​ថា ពួក​គេ​ពិត​ជា​​​បំផ្លាញ​ទ្រព្យ​សម្បត្តិ​​​រោង​ចក្រ​មែន​»។

លោក​បន្ថែម​ថា​ មិន​មាន​ការ​ចាប់​ខ្លួននរណា​ម្នាក់​ទេ​នៅ​ក្នុង​អំពើ​ហិង្សា​នេះ​។ PS

អត្ថបទគួរចាប់អារម្មណ៍