The Phnom Penh Post Search

Search form

Logo of Phnom Penh Post newspaper Phnom Penh Post - កម្មករ​ជាង​ ១០០ នាក់​នៅ​រោងចក្រ ៤ ផ្សេង​គ្នា​ដួល​សន្លប់




កម្មករ​ជាង​ ១០០ នាក់​នៅ​រោងចក្រ ៤ ផ្សេង​គ្នា​ដួល​សន្លប់

ក្រោយ​ពី​មាន​ការ​ដួល​សន្លប់​ខាង​រោងចក្រ​អនុញ្ញាត​ឲ្យ​​កម្មករ​ឈប់​សម្រាក​។
ក្រោយ​ពី​មាន​ការ​ដួល​សន្លប់​ខាង​រោងចក្រ​អនុញ្ញាត​ឲ្យ​​កម្មករ​ឈប់​សម្រាក​។ រូបថត សហការី

កម្មករ​ជាង​ ១០០ នាក់​នៅ​រោងចក្រ ៤ ផ្សេង​គ្នា​ដួល​សន្លប់

ភ្នំពេញៈ កម្មករ​រោងចក្រ​ជាង​ ១០០ ​នាក់​នៃ​រោងចក្រ​ចំនួន​ ៤ នៅ​រាជធានី​ភ្នំពេញ​ខេត្ត​កណ្តាល​ និង​តាកែវ​បាន​ដួល​សន្លប់​ជា​បន្តបន្ទាប់​នៅ​ថ្ងៃ​ទី​ ២ កក្កដា​ម្សិលមិញ​នេះ​ដោយសារ​កត្តា​អារម្មណ៍​ភិតភ័យ​អនាម័យ​អាហារ​ និង​បញ្ហា​សុខភាព​ហើយ​​ត្រូវ​បាន​បញ្ជូន​ទៅ​ព្យាបាល​នៅ​តាម​មន្ទីរពេទ្យ​រដ្ឋ​និង​គ្លីនិកឯកជន​។

តាម​កំណត់​ហេតុ​របស់​បេឡា​ជាតិ​របប​សន្តិសុខ​សង្គម​ (បសស) ​កាលពី​ម្សិលមិញ​រោងចក្រ​ដែល​កើត​ហេតុការណ៍​ដួល​សន្លប់​របស់​កម្មករ​ដែល​ភាគច្រើន​បំផុត​ជា​ស្ត្រី​មាន​រោងចក្រ​ CN Properous Garment ​(Cambodia) co, ltd ស្ថិត​នៅ​ផ្លូវជាតិ​លេខ​ ៣ ក្នុង​ភូមិ​ព្រៃកំបុត សង្កាត់​ចោមចៅ​ ខណ្ឌ​ពោធិ៍សែនជ័យ ភ្នំពេញ មាន​កម្មករ​សន្លប់​ ៤៥ ​នាក់​ថ្ងៃ​ម្សិលមិញ​។ រោងចក្រ​នេះ​មាន​អ្នក​សន្លប់​ជាង​​ ៩០ ​នាក់​រួច​មក​ហើយ​កាលពី​ថ្ងៃ​ទី​ ៣០ មិថុនា​។ មូលហេតុ​ដោយសារ​កម្មករ​ម្នាក់​បាន​ដួល​សន្លប់​ធ្វើឲ្យ​កម្មករ​ដទៃ​ផ្សេង​ទៀត​មាន​ការ​ភិតភ័យ​ក៏​ដួល​សន្លប់​តៗ​គ្នា​តែ​ម្តង។

រោងចក្រ Vonammy នៅ​ស្រុក​បាទី​ ខេត្ត​តាកែវ​មាន​កម្មការិនី​សន្លប់​ ២៩ នាក់​នៅ​ថ្ងៃ​ម្សិលមិញ។ កាលពី​ថ្ងៃ​ទី​ ១ កក្កដា មាន​កម្មការិនី​ចំនួន ៦៥ ​​នាក់​មក​ហើយ​ដែល​បាន​សន្លប់​ដោយសារ​ការ​ញ៉ាំ​ផ្អក​កំពឹស​ធ្វើ​ឲ្យ​ពួកគេ​ពុល​អាហារ​។

លោក ជាវ ប៊ុនរិទ្ធ​ ប្រធាន​ការិយាល័យ​គោល​នយោបាយ​នៃ​បេឡាជាតិ​របប​សន្តិសុខ​សង្គម និង​ជា​អ្នក​នាំ​ពាក្យ​ថ្លែង​ថា​រោងចក្រ Gristal Martin (Cambodia) Co., Ltd ស្ថិត​នៅ​ផ្លូវជាតិ​លេខ​ ៨ ភូមិ​វិហារសួគ៌ ឃុំ​វិហារសួគ៌ ស្រុក​ខ្សាច់​កណ្តាល​ ខេត្ត​កណ្តាល​ក៏​មាន​កម្មករ​ ១៤ នាក់ ដួល​សន្លប់​ដែរគឺ​ «​មូលហេតុ​បណ្តាល​មកពី​ទុស្សេ​ខ្សែភ្លើង ភាយ​ផ្សែង​ប៉ះ​នឹង​កណ្តឹង​រោទ៍​ជា​ហេតុ​ធ្វើឲ្យ​កម្មករ​ភិតភ័យ​សន្លប់​។ រោងចក្រ​ក៏​បាន​ឲ្យ​កម្មករ​ឈប់​សម្រាក​អស់​ហើយ»។

លោក​ ថា​ចាប់ពី​ថ្ងៃ​ ២៦ ​មក​មាន​កម្មករ​ ៣៦៣ ​នាក់​បាន​ដួល​សន្លប់​ក្រុម​មន្ត្រី​បាន​ណែនាំ​រោងចក្រ​ឲ្យ​យក​ចិត្ត​ទុក​ដាក់​បញ្ហា​បរិស្ថាន​ជុំវិញ​រោងចក្រ​ទាំង​នោះ។ ទាក់ទង​នឹង​រោងចក្រ CN Properous ខាង​ក្រុម​អធិការកិច្ច​បាន​សង្កេត​ឃើញ​មាន​ប្រព័ន្ធ​ផ្លិត​ទឹក កង្ហា ពន្លឺ ការ​ទុក​ដាក់​ទំនិញ​បាន​ត្រឹមត្រូវ​តាម​បច្ចេកទេស​។

លោក​ថ្លែង​ថា៖ «ក្រុម​ការងារ​ក៏​បាន​ធ្វើការ​ផ្សព្វផ្សាយ​ពី​ការ​ថែទាំ​សុខភាព អនាម័យ​ សុវត្ថិភាព​ការងារ សុវត្ថិភាព​ពេល​ធ្វើ​ដំណើរ​ដល់​កម្មករ កម្មការិនី​»។

ដោយឡែក​នៅ​រោងចក្រ​ Quint Major Industrial Co., Ltd ស្ថិត​នៅ​ឃុំ​ពើក ស្រុក​អង្គស្នួល ខេត្ត​កណ្តាល​ដែល​មាន​ករណី​កម្មករ​ដួល​សន្លប់​តាំងពី​ថ្ងៃ​ ២៩ មិថុនា​មក​នៅ​ព្រឹក​ថ្ងៃ​ទី​ ២ កក្កដា ក៏​មាន​កម្មករ​ម្នាក់ និង​កម្មការិនី ២៩ ​នាក់​ទៀត​បាន​ដួល​សន្លប់​ផង​ដែរ។ នេះ​បើ​តាម​លោក សៀង​ សុគុណ តំណាង​សហជីព​ស៊ីខៅឌូ​ប្រចាំ​រោងចក្រ​។

លោក​បាន​គូស​បញ្ជាក់​ឲ្យ​ដឹង​​បន្ថែម​​ទៀត​ថា៖ «អ្នក​សន្លប់​ខ្លះ​ចូល​ធ្វើការ​វិញ ឯ​អ្នក​ថ្មី​ចាប់ផ្តើម​សន្លប់​។ វា​ចាប់ផ្តើម​ពី​មនុស្ស​ម្នាក់​ក្តៅ​ខ្លួន​ខ្លាំង​ហើយ​សន្លប់ ឯ​អ្នក​ផ្សេង​ក៏​ឃើញ​សន្លប់​តៗ​គ្នា»។

លោក​បាន​ថ្លែង​ឲ្យ​ដឹង​ទៀត​ថា​ខាង​រោងចក្រ​នេះ «មាន​ជំហរ​មួយ​មិន​ឲ្យ​យក​កម្មករ​សន្លប់​ចេញ​ទៅ​ព្យាបាល​នៅ​ពេទ្យ​ខាង​ក្រៅ​ឡើយ​ដោយ​មិន​ចង់​ឲ្យ​លេចឮ​ព័ត៌មាន​ទៅ​ខាង​ក្រៅ​ហើយ​បាន​សង្គ្រោះ​កម្មករ​នៅក្នុង​រោងចក្រ​ដោយ​ខ្លួន​ឯង​» ប៉ុន្តែ​ដោយសារ​ខាង​សហជីព​ព្យាយាម​ជម្នះ​ដើម្បី​យក​​កម្មករ​ចេញ​។

ប៉ុន្តែ​កញ្ញា ហ៊ិន សុខលីណា ជំនួយការ​រដ្ឋបាល​រោងចក្រ QMI ថ្លែង​ថា​អ្វី​ដែល​សហជីព​ស៊ីខៅឌូ​ចោទ​ជា​ការ​មិន​ពិត​ឡើយ​ព្រោះ​រោងចក្រ​បាន​ព្យាយាម​ជួយ​សង្គ្រោះ​បន្ទាន់​ដល់​កម្មករ​ហើយ​បើ​ធ្ងន់ធ្ងរ​នឹង​បញ្ជូន​ទៅ​ពេទ្យ​ខាង​ក្រៅ​ដែល​ជា​ដៃគូ​របស់ ប ស ស។

កញ្ញា​និយាយ​ថា៖ «ថ្ងៃ​នេះ​តួលេខ​មាន ១៣ ​នាក់​ប៉ុណ្ណោះ​គាត់​មិន​ដល់​ថ្នាក់​សន្លប់​ទេ។ គាត់​គ្រាន់តែ​ថប់​ដង្ហើម​អត់​ស្រួល​ខ្លួន​ឡើង​ក្តៅ​។ ​ជាក់ស្តែង​គឺ​សមត្ថភាព​ពេទ្យ​ក្នុង​រោងចក្រ​អាច​មើល​បាន​»៕

អត្ថបទគួរចាប់អារម្មណ៍