កណ្ដាលៈ កម្មកររោងចក្រ នូវ ខប ដែលមានទីតាំងស្ថិតនៅភូមិជើងអក ឃុំលំហាច ស្រុកអង្គស្នួល ខេត្តកណ្តាល ប្រមាណជាង ៤០០ នាក់ អះអាងថា នឹងប្រមូលផ្តុំគ្នា នៅថ្ងៃចន្ទនេះបន្តទៀត ដើម្បីតវ៉ាទាមទារឲ្យថៅកែរោងចក្រទូទាត់ប្រាក់អត្ថប្រយោជន៍នានាឲ្យបានត្រឹមត្រូវ ក្រោយពីរោងចក្រនេះ មិនមានលទ្ធភាពបន្តកិច្ចសន្យាការងារជាមួយកម្មករ។
ជាមួយនឹងបន្តការតវ៉ានេះ មន្ទីរការងារ និងភាគីពាក់ព័ន្ធនឹងជួបពិភាក្សាគ្នាបន្តទៀតនៅថ្ងៃចន្ទនេះដែរ ដើម្បីស្វែងរកដំណោះស្រាយ ជូនកម្មករ ដែលនៅសេសសល់ បន្ទាប់ពីមានការចុះសម្របសម្រួលម្តងរួចមកហើយ តែមិនទាន់មានដំណោះស្រាយកាលពី ថ្ងៃព្រហស្បតិ៍។
លោក ខែន សុភ័ណ្ឌ វ័យ ៣១ ឆ្នាំ ជាកម្មករផ្នែកម៉ាស៊ីនក្នុងរោងចក្រនេះតាំងពីឆ្នាំ ២០០៨ ក្នុងចំណោមកម្មករដទៃទៀតដែលមិនព្រមទទួលសំណងឲ្យដឹងថា កន្លងមករោងចក្រ នូវ ខប ពុំមានការងារឲ្យកម្មករកម្មការិនីធ្វើនោះទេ ដោយតម្រូវឲ្យកម្មករមួយចំនួនយកកម្រៃ ៥០% រយៈពេល ១ ខែកន្លះ។
លោកបន្តថា ក្រោយមកក៏បានប្រកាសព្យួរការងាររយៈពេល ២ ខែ និងបានជូនដំណឹងដល់កម្មករឲ្យចូលធ្វើការងារវិញ នៅថ្ងៃទី ២៦ ខែ មិថុនា ឆ្នាំ ២០១៩។ លុះដល់ថ្ងៃកំណត់ចូលធ្វើការងារវិញ ខាងក្រុមហ៊ុនមិនបានជូនដំណឹងដល់កម្មករកម្មការិនីថា បិទរោងចក្រ ឬក៏បើករោងចក្រនោះទេ បែរជាឲ្យពួកគាត់ជាកម្មករ ទទួលយកអត្ថប្រយោជន៍តិចតួច ដោយគិតទូទាត់លុយឲ្យកម្មករចន្លោះពី ៣២០$ ទៅ ៤៥០$ ក្នុងម្នាក់ៗ មិនថាកម្មករថ្មី ឬចាស់នោះទេ។
លោកបញ្ជាក់ថា៖ «ក្រោយការប្រកាសនេះ ក៏មានកម្មករមួយចំនួន បានទទួលយកសំណង ដែលរោងចក្របានផ្តល់ឲ្យ ជាថ្នូរនឹងការបញ្ចប់កិច្ចសន្យា។ ប៉ុន្តែពួកខ្ញុំមិនព្រមទេ ព្រោះអតីតភាពការងាររបស់ពួកខ្ញុំមានច្រើនណាស់។ ខ្ញុំមិនយកទេ ទោះលើច្បាប់ក៏ខ្ញុំមិនយក ក្រោមច្បាប់ ក៏ខ្ញុំមិនយកដែរ ធ្វើម៉េចគិតគូរឲ្យបានត្រឹមត្រូវតាមច្បាប់ទៅ»។
លោក មុំ សៀក ប្រធានសហព័ន្ធសហជីពស្មារតីកម្មករខ្មែរ ដែលត្រូវបានកម្មករមួយចំនួន បោះឆ្នោតឲ្យជួយទាមទារលក្ខខណ្ឌការងារជូនខ្លួននៅក្នុងរោងចក្រនេះ បានអះអាងថា វាជារឿងមិនសមហេតុផលនោះទេ នៅពេលដែលរោងចក្រ គ្មានលទ្ធភាពផ្តល់ការងារឲ្យកម្មករ ហើយបែរជាតម្រូវឲ្យកម្មករទទួលសំណងមួយដែលមិនអាចទទួលយកបាន ជាថ្នូរនឹងការបញ្ចប់កិច្ចសន្យានោះ។
លោកបញ្ជាក់ថា៖ «ជារួមបើគិតតាមច្បាប់ ពួកគាត់ អាចទទួលបានប្រាក់បញ្ចប់កិច្ចសន្យាច្រើនជាងនេះ»។
ម្ចាស់រោងចក្រ ដែលកម្មករអះអាងថា ជាជនជាតិកូរ៉េនោះមិនអាចទាក់ទងបានទេ កាលពីម្សិលមិញ។ ប៉ុន្តែបើតាមការអះអាង របស់ប្រធានសហព័ន្ធសហជីពមិត្តភាពកម្មករ លោក សៀង សម្បត្តិ ដែលជាតំណាងសហជីពនៅក្នុងរោងចក្រ នូវ ខបនេះ បានអះអាងប្រាប់ភ្នំពេញប៉ុស្តិ៍ថា ការប្រកាសឲ្យកម្មករទទួលសំណងក្នុងការបញ្ចប់កិច្ចសន្យានេះ ព្រោះតែរោងចក្រមិនមានការបញ្ជាទិញ ដែលជាហេតុធ្វើឲ្យចង្វាក់ផលិតកម្ម ជួបបញ្ហា ដែលមិនអាចបន្តបាន។
យ៉ាងណា ក្នុងនាមលោក ជាសហជីព បានព្យាយាមដោយធ្វើយ៉ាងណា ឲ្យថៅកែរោងចក្រ ព្រមទទួលខុសត្រូវចំពោះកម្មករ ខណៈមានកម្មករប្រមាណ ១ ០០០ នាក់ ហើយ ដែលព្រមទទួលយកដំណោះស្រាយនេះ។
លោកបញ្ជាក់ថា៖ «ពួកខ្ញុំបានព្យាយាមចរចាយ៉ាងណាឲ្យកម្មករទទួលបានអត្ថប្រយោជន៍ច្រើន ព្រោះបើភាគីរោងចក្រមិនចេញមុខមកទទួលខុសត្រូវនោះទេ វានឹងពិបាកដល់កម្មករ ព្រោះយើងមិនចង់ឲ្យថៅកែរត់ចោលរោងចក្រនោះទេ»។
លោក ថុន នាង ប្រធានមន្ទីរការងារខេត្តកណ្តាល បានឲ្យដឹងថា ក្រោយការសម្របសម្រួល ភាគីទាំងសងខាង បានយល់ព្រមបន្តការចរចាបន្តទៀតនៅថ្ងៃចន្ទនេះ។
លោក បញ្ជាក់ថា នៅមានជាង ៤០០ នាក់ នៅមិនទាន់សុខចិត្ត ដែលត្រូវបន្តដោះស្រាយទៀត។
លោក ថុន នាង មិនបានបញ្ជាក់ទេថា សំណងដែលភាគីរោងចក្រ សម្រេចផ្តល់ឲ្យកម្មករចន្លោះពី ៣២០ ដុល្លារ ដល់ ៤៥០ ដុល្លារនោះ ត្រឹមត្រូវឬយ៉ាងណា លុះត្រាតែបានជួបជាមួយនឹងថៅកែរោងចក្រនិងពិនិត្យលើឯកសាររបស់កម្មករនីមួយៗ ទើបអាចគណនាបាន។
តាមការអះអាងរបស់កម្មករ និងសហជីព បានឲ្យដឹងថា រោងចក្រ នូវ ខប បានបើកដំណើរការតាំងពីឆ្នាំ ២០០៦ ដែលមានកម្មករប្រមាណ ១ ៤០០ នាក់ ហើយសម្លៀកបំពាក់ដែលផលិតបាន គឺធ្វើការនាំចេញទៅសហរដ្ឋអាមេរិក ប៉ុន្តែមួយរយៈចុងក្រោយនេះ ដោយសារតែគ្មានការបញ្ជាទិញ ទើបបណ្តាលឲ្យថៅកែប្រកាសព្យួរការងារ៕