ភ្នំពេញ៖ ក្រសួងការងារ និងបណ្តុះបណ្តាលវិជ្ជាជីវៈ បានបិទបញ្ចប់ការត្រួតពិនិត្យសុខភាពកម្មករ ដោយក្នុងរយៈពេល ៥ ថ្ងៃកន្លងមកនេះ មានកម្មករជាង ៥ ពាន់នាក់ បានមកទទួលការត្រួតពិនិត្យ ហើយក្នុងនោះសំណាកកម្មករចំនួន ១២៥ នាក់ ត្រូវបានយកទៅពិនិត្យបន្ត ប៉ុន្តែលទ្ធផលអវិជ្ជមានពីជំងឺកូវីដ ១៩។
សេចក្តីប្រកាសរបស់ក្រសួងការងារចុះថ្ងៃទី ២៤ ខែមេសា ឱ្យដឹងថា ការត្រួតពិនិត្យសុខភាពដែលមានរយៈពេល ៥ ថ្ងៃ ចាប់ពីថ្ងៃទី ២០ ដល់ ថ្ងៃទី ២៤ ខែមេសា ត្រូវបានបិទបញ្ចប់ហើយ។
សេចក្តីប្រកាសដដែលបញ្ជាក់ថា ក្រសួង និងភាគីពាក់ព័ន្ធបានពិនិត្យសុខភាពកម្មករចំនួន ៥ ០៤៥ នាក់ ដោយដាក់ឱ្យធ្វើចត្តាឡីស័កនៅផ្ទះ ១៤ ថ្ងៃ ចំនួន ៤ ៨២៣ នាក់ និងដាក់ឱ្យស្នាក់នៅមណ្ឌលចត្តាឡីស័កកម្រិត ១ ចំនួន ៩៧ នាក់ ព្រមទាំងដាក់ឱ្យស្នាក់នៅមណ្ឌលចត្តាឡីស័កកម្រិត ២ ចំនួន ១២៥ នាក់។
ក្រសួងបញ្ជាក់ថា៖ «គិតចាប់ពីយប់ថ្ងៃទី ៩ ខែមេសា ដល់ថ្ងៃទី ២៤ ខែមេសា គឺមានរយៈពេលលើស ១៤ ថ្ងៃហើយ ក្នុងអំឡុងពេលនេះក្រសួងសុខាភិបាលក៏ពុំបានរកឃើញករណីវិជ្ជមានកូវីដ ១៩ ថ្មី និងយោងលទ្ធផលអវិជ្ជមាននៃការធ្វើតេស្តសំណាកទាំង ១២៥ ករណី។
ក្រសួងសម្រេចបញ្ចប់ការត្រួតពិនិត្យសុខភាព ដោយរក្សាទុកតែមណ្ឌលចត្តាឡីស័កកម្រិត ២ ក្នុងវិទ្យាល័យជម្ពូវន្ត ដើម្បីបន្តតាមដានស្ថានភាពសុខភាពកម្មករចំនួន ២០ នាក់តទៀត រហូតដល់ស្ថានភាពសុខភាពអ្នកទាំងនេះអាចទៅធ្វើចត្តាឡីស័កនៅតាមផ្ទះបាន»។
ក្រៅពីនេះ ក្រសួងការងារបានប្រកាសដល់កម្មករ កម្មការិនី អាចទាក់ទងទៅក្រសួងសុខាភិបាលតាមរយៈលេខ ១១៥ ឬទូរស័ព្ទលេខ ០១២ ៨២៥ ៤២៤ ក្នុងករណីដែលមានអាការសង្ស័យណាមួយ បើទោះមានការបិទបញ្ចប់មណ្ឌលត្រួតពិនិត្យសុខភាពកម្មកររោងចក្រទាំង ១០ កន្លែងនេះក៏ដោយ។
លោក ហេង សួរ អ្នកនាំពាក្យក្រសួងការងារថ្លែងថា គិតត្រឹមរសៀលថ្ងៃអាទិត្យ នៅមានបងប្អូនកម្មករចំនួន ៦ រូបប៉ុណ្ណោះ ដែលបន្តស្នាក់នៅក្នុងមណ្ឌលចត្តាឡីស័កកម្រិត ២ ដើម្បីតាមដានសុខភាពបន្ត។
លោកថា៖ «យើងបានផ្សព្វផ្សាយជាសាធារណ: និងចំហ ចំពោះការពិនិត្យសុខភាពនេះ ដូច្នេះបងប្អូនគួរសហការចេញមកពិនិត្យសុខភាព។ ទោះយ៉ាងណាគិតត្រឹមថ្ងៃ (អាទិត្យ) នេះកម្រិតហានិភ័យរបស់បងប្អូនកម្មកររោងចក្រនៅភ្នំពេញ គឺបានវិលមកភាពប្រក្រតីវិញហើយ...»៕