.jpg)
កម្មករជួបគ្រោះថ្នាក់ចរាចរណ៍ ត្រូវបានបញ្ជូនទៅសង្គ្រោះនៅមន្ទីរពេទ្យកាលពីឆ្នាំ ២០១៨។ សហការី
ភ្នំពេញៈ កម្មករនិយោជិតជិត ២ ពាន់នាក់ ក្នុងឆ្នាំ ២០១៨ បានរងគ្រោះក្នុងឧបទ្ទវហេតុគ្រោះថ្នាក់ចរាចរណ៍ទូទាំងប្រទេស ដែលកើតឡើងចំនួន ១៦៩២ ករណី ក្នុងនោះបណ្តាលឲ្យកម្មករស្លាប់ ៤០ នាក់ របួសធ្ងន់ជាង ៣០០ នាក់ ហើយចំនួននេះបានថយចុះ ខណៈករណីដួលសន្លប់នៅតាមរោងចក្រកើតឡើងជិត ២ ពាន់នាក់ ប៉ុន្តែកើនឡើងជាង ៤៦% បើប្រៀបធៀបនឹងឆ្នាំ ២០១៧។ នេះបើតាមរបាយការណ៍ឆ្នាំ ២០១៨ ផ្សាយ ពីម្សិលមិញ។
របាយការណ៍របស់បេឡាជាតិរបបសន្តិសុខសង្គម (ប.ស.ស) នៃក្រសួងការងារ ដែលផ្សព្វផ្សាយ កាលពីថ្ងៃអង្គារបញ្ជាក់ថា គ្រោះថ្នាក់ផ្លូវគោក កើតឡើងលើកម្មករនិយោជិត នៅឆ្នាំ ២០១៨ មានចំនួន ១ ៦៩២ ករណី មានជនរងគ្រោះ ១ ៨៩៤ នាក់ ដែលបណ្តាលឲ្យស្លាប់ចំនួន ៤០ នាក់ និងរបួសធ្ងន់ ៣៤៩ នាក់ របួសស្រាល ១ ៥០៥ នាក់។
របាយការណ៍បន្តថា «ក្នុងនោះ គ្រោះថ្នាក់ដោយម៉ូតូចំនួន ១៥៦៥ ករណី គ្រោះថ្នាក់ដោយរថយន្ត ២៧ ករណី ហើយរថយន្តដឹកកម្មករចំនួន ១៨ ករណី គ្រោះថ្នាក់ដោយរ៉ឺម៉កចំនួន ១២ ករណី គ្រោះថ្នាក់ដោយកង់ចំនួន ១៩ ករណី គ្រោះថ្នាក់ថ្មើរជើងចំនួន៨៦ករណី និងគ្រោះថ្នាក់បង្កដោយរថភ្លើងចំនួន ១ ករណី»។
របាយការណ៍ដដែលថា «មូលហេតុបង្កគ្រោះថ្នាក់ចរាចរណ៍ លើកម្មករនិយោជិត ក្នុងឆ្នាំ ២០១៨ ដោយសារការបើកបរហួសល្បឿនកំណត់ ៤០% ការជែង ២៤% មិនគោរពសិទ្ធិអាទិភាព ១៧% និងបច្ចេកទេសយានយន្ត ១៨%»។
គ្រោះថ្នាក់ចរាចរណ៍លើកម្មករនេះ បើតាមលោក ហេង សុផាន់ណារិទ្ធ ប្រធានការិយាល័យគោលនយោបាយ នៃបេឡាជាតិរបបសន្តិសុខសង្គមបញ្ជាក់ថា មានការថយចុះប្រមាណជាង ៤៩% បើធៀបទៅនឹងឆ្នាំ ២០១៧។
លោក សុផាន់ណារិទ្ធ ឱ្យដឹងដែរថា កម្មករបានសន្លប់នៅតាមរោងចក្រចំនួន ១៧ រោងចក្រ និងកម្មករសន្លប់ចំនួន ២១០៩ នាក់។ ចំនួននេះត្រូវបានរកឃើញ បន្ទាប់ពីក្រុមការងារបានចុះអង្កេត និងសិក្សាស្រាវជ្រាវករណីកម្មករសន្លប់ ដើម្បីស្វែងរកមូលហេតុ និងចាត់ វិធានការកែលម្អរោងចក្រទាំងនោះ។
តាមការអះអាងរបស់លោក ហេង សុផាន់ណារិទ្ធ បញ្ហាដួលសន្លប់ បើធៀបនឹងឆ្នាំ ២០១៧ គឺមានការថយចុះចំនួន ៥ រោងចក្រ ស្មើនឹង ២៣% និងកម្មករនិយោជិតសន្លប់កើនឡើងចំនួន ៥០៦ នាក់ ស្មើនឹង ៣២%។ ភាគច្រើនកម្មករដែលរងគ្រោះ គឺផ្តើមចេញពីកម្មករសន្លប់តែម្នាក់ឬ ២ នាក់តែប៉ុណ្ណោះ ប៉ុន្តែបានឆ្លងជំងឺស្នេហ៍ហ្វូង [ឃើញស្លុតអារម្មណ៍សន្លប់តាមគ្នា] ។
លោកបញ្ជាក់ថា៖ «មូលហេតុចម្បងៗដែលបណ្តាលឱ្យមានករណីសន្លប់កើតមានឡើង រួម មានដូចជាបញ្ហាចិត្តសាស្ត្រសង្គមមានចំនួន ៣៧% បញ្ហាគីមីចំនួន ២០% បញ្ហារូបសាស្ត្រចំនួន ១៥% បញ្ហាការងារបន្ថែមម៉ោងចំនួន ១៣% បញ្ហាជីវសាស្ត្រមានចំនួន ១១% បញ្ហាវិទ្យាសាស្ត្ររៀបចំការងារមានចំនួន ២% និងបញ្ហាមេកានិចមានចំនួន ២%»។
លោក អ៊ុក សមវិទ្យា ប្រតិភូរាជរដ្ឋាភិបាលទទួលបន្ទុកនាយកបេឡាជាតិរបបសន្តិសុខសង្គម (ប.ស.ស) នៃក្រសួងការងារ និងបណ្តុះបណ្តាលវិជ្ជាជីវៈថ្លែងក្នុងពិធីប្រជុំបូកសរុបលទ្ធផល ការងារសម្រេចបានឆ្នាំ ២០១៨ កាលពីថ្ងៃអង្គារថា បច្ចុប្បន្នវិស័យសេដ្ឋកិច្ចកម្ពុជាមានការរីកចម្រើន ក្នុងនោះក៏មានវិស័យកាត់ដេរ និងផលិតស្បែកជើងផងដែរ ស្របពេលដែលវិនិយោគិនទាំងនៅក្រៅស្រុក និងនៅក្នុងស្រុកបានដាក់ទុន វិនិយោគយ៉ាងច្រើននៅកម្ពុជា ដែលបានបង្កើតការងារជូនដល់ប្រជាពលរដ្ឋទូទៅនៅក្នុងប្រទេសបានជាច្រើនផងដែរក្នុង ១ ឆ្នាំៗ។
លោកបន្តថា៖ «ស្របទៅនឹងការរីកចម្រើននេះ រាជរដ្ឋាភិបាលក៏បានគិតគូរទៅដល់សុខភាព របស់កម្មករនិយោជិត ក្នុងពេលបំពេញការងារដែលជាភាពប្រឈម នៅចំពោះ មុខថែមទៀតផង ក្នុងនោះដូចជាករណីគ្រោះថ្នាក់ការងារ ករណីសន្លប់ និងករណីគ្រោះថ្នាក់ចរាចរណ៍ជាដើម»។
លោក អាត់ ធន់ ប្រធានសហភាពការងារកម្ពុជា លើកឡើងថា តាមរយ:របាយការណ៍នេះ គឺបានបង្ហាញថា បញ្ហារបស់កម្មករនៅកម្ពុជានៅតែប្រឈម ហើយវានៅតែបន្តកើតឡើងដដែលជាដដែល ដោយមិនមានការថមថយបើទោះជាពេលខ្លះ របាយការណ៍បានបង្ហាញ បញ្ហាគ្រោះថ្នាក់ចរាចរណ៍ និងការដួលសន្លប់របស់កម្មករ មានការថយចុះក៏ដោយ តែវាស្ថិតក្នុងអត្រាមួយខ្ពស់ ដែលទាមទារឲ្យមានការយកចិត្តទុកដាក់បន្ថែមទៀត។
លោកបញ្ជាក់ថា៖ «បើទោះបីជាថយ ឬមិនថយ ចំនួននេះគឺមិនតូចទេ គឺចំនួនធំ គួរឲ្យប្រកាសអាសន្ន ចំពោះបញ្ហាដួលសន្លប់ និងស្លាប់ដោយគ្រោះថ្នាក់ចរាចរណ៍ ដែលត្រូវចាត់វិធានការយ៉ាងម៉េចឲ្យខាងតែបាន។ តែវិធានការដែលដាក់ចេញមក គឺវានៅដដែលជាដដែល និងមានប្រសិទ្ធភាពតិចតួចមែនទែន»។
របាយការណ៍ប្រចាំឆ្នាំរបស់ក្រសួងការងារកាលពីឆ្នាំ ២០១៨ បានឲ្យដឹងថា សហគ្រាស និងគ្រឹះស្ថានកាត់ដេរសរុបមានចំនួន ១១៣៩៧ ដែលប្រតិបត្តិការនៅក្នុងប្រទេសកម្ពុជាកាលពីឆ្នាំ ២០១៧ ខណៈចំនួនកម្មកររោងចក្រកាត់ដេរ មានប្រមាណ ៧៦៣ ៨២០ នាក់។
លោក ហេង សួរ អ្នកនាំពាក្យក្រសួងការងារបញ្ជាក់ថា ប.ស.ស នឹងបង្កើនការអប់រំផ្សព្វផ្សាយអំពីសុវត្ថិភាពចរាចរណ៍ ដល់អ្នកបើកបរ និងសហការជាមួយភាគីពាក់ព័ន្ធពិនិត្យលើបច្ចេកទេសយានយន្តបន្ថែមទៀត ពីព្រោះគ្រោះថ្នាក់ភាគច្រើនគឺកើតឡើងដោយសារការបើកជែងគ្នា។ ការផ្ទុះកង់ ឬក៏ខូចចង្កូត ឬខូចហ្រ្វាំងគឺកើតឡើងតិចតួចបំផុត។
ចំណែកបញ្ហាដួលសន្លប់នៅតាមរោងចក្រ លោកបន្តថា៖ «ការរក្សាចរន្តលំហូរចេញចូលនៃខ្យល់ឲ្យបានល្អ ការរក្សាទុកវត្ថុធាតុដើមដែលមានក្លិនខ្លាំងឲ្យបានត្រឹមត្រូវ ក៏ដូចជាការទុករយៈពេលសមរម្យឲ្យថ្នាំលាបស្ងួតល្អ អស់ក្លិន ក្រោយពេលមានការជួសជុលជាកត្តានាំឲ្យករណីរោងចក្រដែលមានកម្មករដួលសន្លប់មានការថយចុះ»៕
