កណ្ដាលៈ ក្រសួងការងារ បណ្តុះបណ្តាលវិជ្ជាជីវៈព្រមានចាត់វិធានការដល់បណ្តារោងចក្រណា ដែលឆ្លៀតឱកាសព្យួរការងារកម្មករក្នុងគោលបំណងផ្សេងដែលមិនមែនមកពីមូលហេតុខ្វះវត្ថុធាតុដើម ខណៈមន្ត្រីចុះស៊ើបអង្កេតករណីរោងចក្រមួយស្ថិតនៅខេត្តកណ្តាល ដែលបានស្នើព្យួរការងារកម្មករប្រមាណជិត ៨០០ នាក់។
រោងចក្រ គ្រីស្តាល់ ម៉ាទិន ដែលមានទីតាំងស្ថិតក្នុងភូមិវិហារសួគ៌ ស្រុកខ្សាច់កណ្តាល ខេត្តកណ្តាលកាលពីថ្មីៗនេះបានស្នើទៅក្រសួងការងារ ដើម្បីព្យួរការងារកម្មករក្នុងផ្នែកខ្លះដោយលើកមូលហេតុថាខ្វះវត្ថុធាតុដើមដែលធ្វើឲ្យកម្មករប្រមាណជិត ៨០០ នាក់ អាចនឹងត្រូវបាត់បង់ការងារក្នុងចំណោមកម្មករសរុបជាង ៤ ០០០ នាក់ ក្នុងរោងចក្រ។
លោក ហេង សួរ អ្នកនាំពាក្យក្រសួងការងារបានប្រាប់ភ្នំពេញប៉ុស្តិ៍ពីម្សិលមិញថា ក្រុមមន្ត្រីត្រូវបានចាត់តាំងឲ្យចុះទៅស្រាវជ្រាវ ជុំវិញការស្នើព្យួរការងាររបស់រោងចក្រ។
លោក ហេង សួរ បានថ្លែងថា៖ «ការចាត់ឲ្យមានការចុះស៊ើបអង្កេតនេះគឺដើម្បីបង្ការកុំឲ្យមានបុគ្គលមួយចំនួនឆ្លៀតយកចំណេញ ដោយយកលេសខ្វះវត្ថុធាតុដើមមកធ្វើជាដើមហេតុនៃការព្យួរការងាររបស់កម្មករ តែតាមពិត ដើម្បីគេចចេញពីការទទួលខុសត្រូវផ្សេងពីនេះ»។
លោកបញ្ជាក់ថា៖ «យើងសុំឲ្យអនុវត្តទៅតាមស្មារតីនៃសេចក្តីណែនាំក្រសួង។ យើងកំពុងចាត់វិធានការទប់ស្កាត់ជនខិលខូច ដែលចង់ប្រែក្លាយករណីព្យួរទៅជាករណីផ្សេង»។
លោក ធុល នាង ប្រធានមន្ទីរការងារខេត្តកណ្ដាលដែលបានចុះទៅដល់រោងចក្រគ្រីស្តាល់នោះបានប្រាប់ភ្នំពេញ-ប៉ុស្តិ៍ពីម្សិលមិញថា រោងចក្រ គ្រីស្តាល់ ម៉ាទិន មានកម្មករ សរុប ជាង ៤ ០០០ នាក់ ក្នុងអគារចំនួន ៣ ដោយក្នុងការស្នើសុំនោះគឺរោងចក្របានស្នើព្យូរ ១ អគារដែលមានកម្មករប្រមាណ ៧ ទៅ ៨ រយនាក់។
លោក នាង បានអះអាងបន្តថា តាមរយៈចុះទៅដល់ទីតាំងរោងចក្រគឺពិតជាបានរកឃើញថា មូលហេតុដែលរោងចក្រស្នើព្យួរផ្នែកខ្លះនេះ ក៏ព្រោះតែការខ្វះវត្ថុធាតុដើមក្នុងការផលិត ទើបឈានឲ្យម្ចាស់រោងចក្រនេះសម្រេចចិត្តយ៉ាងដូច្នេះ ដោយបច្ចុប្បន្នមិនទាន់មានកម្មករណាម្នាក់តវ៉ានោះទេ។
លោក នាង ថ្លែងថា៖ «យើងកំពុងចុះអប់រំបងប្អូនកម្មករឲ្យពួកគាត់បានយល់អំពីនីតិវិធីជុំវិញការព្យួរការងាររបស់រោងចក្រនេះ។ មកដល់ពេលនេះមិនទាន់មានកម្មករណាតវ៉ានោះទេ ហើយយើងក៏កំពុងចុះអប់រំគាត់ ពីរឿងទទួលវគ្គបណ្តុះបណ្តាលនៅក្នុងអំឡុងពេលព្យួរការងារដែរ ដើម្បីអាចទទួលបានប្រាក់ឧបត្ថម្ភ ២០ ភាគរយ ពីរដ្ឋាភិបាលផងដែរ»។
លោក អាត់ ធន់ ប្រធានសហភាពការងារកម្ពុជាបានឲ្យដឹងថា ការដែលក្រសួងចាត់ឲ្យមន្ត្រីចុះទៅស៊ើបអង្កេតចំពោះរោងចក្រ គ្រីស្តាល់ ដែលបានស្នើសុំព្យួរការងារនេះគឺជារឿងមួយដែលប្រសើរ ព្រោះថារោងចក្រនេះមានកម្មករច្រើន ដូច្នេះអាចនឹងមានហេតុផលផ្សេងពីនេះ ខណៈដែលព័ត៌មានដែលលោកទទួលបានគឺក្នុងអំឡុងពេលព្យួរការងារនេះ រោងចក្រ គ្រីស្តាល់នេះក៏បានប្រកាសដល់កម្មកររបស់ខ្លួនដោយអនុញ្ញាតឲ្យកម្មករទាំងអស់ អាចដាក់ពាក្យសុំឈប់បានក្នុងករណីដែលមិនអាចរង់ចាំក្នុងអំឡុងពេលព្យួរការងារនេះ។
លោក ធន់ ថ្លែងថា៖ «ឥឡូវនេះកម្មករគ្រីស្តាល់កំពុងតែជជែកគ្នា កម្មករខ្លះក៏ព្យួរ ហើយកម្មករខ្លះ ក៏សម្រេចចិត្តឈប់អ៊ីចឹងទៅ។ យើងកំពុងតាមដានរឿងនេះដែរ ដែលហេតុអ្វីបានមានការព្យួរការងារ ហើយហេតុអ្វីបានក្រុមហ៊ុននេះចង់បើកលុយឲ្យកម្មករ បញ្ឈប់? តើនៅពីក្រោយហ្នឹងមានការងារហើយ នៅតែបន្តព្យួរការងារឬក៏យ៉ាងម៉េច? យើងមិនទាន់ដឹងទេ»។
លោក ធន់ ថ្លែងដោយបង្ហាញក្ដីរំពឹងថា ក្នុងពេលខាងមុខក្រសួងនឹងចុះស៊ើបអង្កេតរាល់គ្រប់រោងចក្រ ដើម្បីឲ្យប្រាកដថា រោងចក្រទាំងនោះពិតស្នើសុំព្យួរការងារកម្មករដោយកត្តាខ្វះវត្ថុធាតុដើម ដោយមិនមែនមកពីកត្តាផ្សេង ខណៈលោកបានទទួលព័ត៌មានថា មានរោងចក្រប្រមាណ ៦ ទៅ ៧ រោងចក្រហើយដែលកំពុងរៀបចំនីតិវិធីនៃការព្យួរការងារនេះ។
លោក ហេងសួរ អ្នកនាំពាក្យក្រសួងការងារបណ្តុះបណ្តាលវិជ្ជាជីវៈបានឲ្យដឹងថាក្នុងខែមីនានេះមានរោងចក្រយ៉ាងហោចណាស់ជិត ២០០ អាចនឹងត្រូវប្រកាសព្យួរការងារដោយកត្តាខ្វះវត្ថុធាតុដើម ដែលនឹងធ្វើឲ្យប៉ះពាល់ដល់កម្មករប្រមាណ ១៦ ម៉ឺននាក់។ តែមកដល់បច្ចុប្បន្នមិនទាន់មានផលប៉ះពាល់ទាំងស្រុងណាមួយទេ គឺមានតែរោងចក្រចំនួន ១០ ប៉ុណ្ណោះដែលបានស្នើព្យួរផ្នែកខ្លះនៃការងារ៕
វីដេអូ៖