ស្វាយរៀងៈ កម្មករចំនួន ១៤០០ នាក់នៅរោងចក្រមួយដែលផលិតអំពូលភ្លើងនាំចេញទៅសហរដ្ឋអាមេរិកក្នុងឃុំកណ្តៀងរាយ ស្រុកស្វាយទាប បាននាំគ្នាធ្វើការតវ៉ាតាំងពីថ្ងៃអង្គារ បន្ទាប់ពីកម្មករកិច្ចសន្យាដឹងថា ការឈប់សម្រាក ២ ថ្ងៃទៅបោះឆ្នោតត្រូវបានរោងចក្រកាត់ប្រាក់ខែ។
កម្មករម្នាក់អាយុ ២២ ឆ្នាំដែលបានបដិសេធបង្ហាញឈ្មោះ និងបានធ្វើការនៅរោងចក្រនេះអស់រយៈពេល ៣ ខែជាបុគ្គលិកកិច្ចសន្យាបានថ្លែងថា៖ «ខ្ញុំមិនដឹងថា តើពួកគេកាត់ប្រាក់ខែយើងប៉ុន្មាននោះទេ ពីព្រោះនៅថ្ងៃនោះពួកគេបានឲ្យបង្កាន់ដៃបើកប្រាក់មកយើង បន្ទាប់មកយើងដឹងថា ប្រាក់ខែរបស់យើងត្រូវបានកាត់ នោះហើយជាមូលហេតុដែលយើងនាំគ្នាតវ៉ា»។
លោកបានថ្លែងបន្តថា៖ «យើងនឹងបើកប្រាក់ខែនៅថ្ងៃទី ១០ ខែសីហា ដូច្នេះយើងនឹងដឹង។ ប៉ុន្តែ ឥឡូវនេះខ្ញុំដឹងថាចំណុចនេះត្រូវបានយល់ព្រមដោយថៅកែ ប៉ុន្តែនៅចំណុចដទៃៗទៀត»។
លោក វីន ហេង អាយុ ២៥ ឆ្នាំដែលជាកម្មករកាត់ដេរ និងជាតំណាងកម្មករបានថ្លែងថា ការកាត់ប្រាក់ខែរបស់កម្មករដែលទៅបោះឆ្នោតរយៈពេល ២ ថ្ងៃ គឺជាមូលហេតុចម្បងដែលកម្មករនាំគ្នាតវ៉ា។
លោក ហេង បានធ្វើការនៅរោងចក្រនេះអស់រយៈពេលជាង ២ ឆ្នាំហើយ។
លោកបានថ្លែងបន្តថា៖ «ចំពោះខ្ញុំ បុគ្គលិកធម្មតា យើងមិនត្រូវបានកាត់ទេ ប៉ុន្តែសម្រាប់បុគ្គលិកកិច្ចសន្យាប្រាក់ខែរបស់ពួកគេត្រូវបានកាត់ ២ ថ្ងៃ។ ហេតុដូច្នេះបុគ្គលិកកិច្ចសន្យាបានធ្វើការតវ៉ា ដូច្នេះយើងចូលរួមជាមួយពួកគេ។ ពួកគេឲ្យបង្កាន់ដៃប្រាក់ខែធ្វើការនៅថ្ងៃចន្ទ ដូច្នេះយើងដឹង។ វាពិតប្រាកដណាស់ យើងនឹងទទួលបានប្រាក់ខែដូចអ្វីដែលបង្ហាញនៅក្នុងបង្កាន់ដៃបើកប្រាក់ខែ»។
លោក ហេង បានថ្លែងថានៅក្នុងក្រុមរបស់លោកមានបុគ្គលិកកិច្ចសន្យាប្រមាណ ២០ នាក់។ «ខ្ញុំមិនដឹងថាតើពួកគេនឹងត្រូវកាត់ចំនួនប៉ុន្មានទេក្នុងមួយថ្ងៃ»។
ទោះយ៉ាងណាមន្ត្រីម្នាក់បានបដិសេធថា មិនមានការកាត់ប្រាក់ខែកម្មករសម្រាប់ការទៅបោះឆ្នោត ២ ថ្ងៃនោះទេ ដោយលោកថ្លែងថាវាជាអ្វីដែលកម្មករបានឮជាពាក្យចចាមអារ៉ាម។
លោក ហាស់ ប៊ុនធី ប្រធានមន្ទីរការងារខេត្តបានថ្លែងថា កម្មករបានតវ៉ានៅមុខរោងចក្រ Sheng Yao Enterprise co. LTD ដោយសារពួកគេឮពីមាត់មួយទៅមាត់មួយថា ថៅកែរោងចក្រនឹងកាត់ប្រាក់ខែពួកគេចំពោះការឈប់សម្រាក ២ ថ្ងៃសម្រាប់ការទៅបោះឆ្នោត។
លោកថ្លែងថា៖ «ការកាត់ប្រាក់ខែមិនទាន់កើតឡើងនៅឡើយទេ។ វាគ្រាន់តែជាពាក្យនិយាយ ប៉ុន្តែក្រសួងបានណែនាំរោងចក្រឲ្យគោរពច្បាប់។ ការណែនាំរបស់ក្រសួងគឺដូចច្បាប់សម្រាប់ការឈប់សម្រាក ២ ថ្ងៃនោះ»។
លោក ប៊ុនធី បន្តថាកម្មករបានសុំឲ្យរោងចក្រប្រើគោលការណ៍ស្ម័គ្រចិត្ត ចំពោះការធ្វើការងារថែមម៉ោង មិនឲ្យមានការបង្ខំ។ «ចំណុចនេះត្រូវបានដោះស្រាយរួចហើយកម្មករសុំឲ្យរោងចក្រកុំបង្ខំពួកគេឲ្យធ្វើការងារថែមម៉ោងវាត្រូវផ្អែកលើគោលការណ៍ស្ម័គ្រចិត្ត ហើយឥឡូវនេះរោងចក្រយល់ព្រម»។
លោក ប៊ុនធី បានថ្លែងថារឿងមួយទៀតដែលត្រូវបានដោះស្រាយរួចហើយនោះគឺរោងចក្រត្រូវជូនដំណឹងព្រមានពីមុនពេលការបណ្តេញកម្មករ។
រោងចក្រយល់ព្រមផ្តល់បន្ទប់ទឹកស្អាតដោយមានសាប៊ូគ្រប់គ្រាន់ និងមានថ្នាំពេទ្យគ្រប់គ្រាន់នៅក្នុងគិលានដ្ឋាន។ នេះបើយោងតាមការថ្លែងរបស់លោក ប៊ុនធី។
លោក ប៊ុនធី បានថ្លែងថាកម្មករបានសុំមិនឲ្យមានការគំរាមកំហែងកម្មករដែលមិនបំពេញតាមការទាមទារ និងមិនតឹងរ៉ឹងចំពោះកម្មករ នៅពេលសុំច្បាប់ដោយមានហេតុផល។ រោងចក្រនឹងទទួលយកកម្មករក្នុងអំឡុងពេលសាកល្បង ២ ខែឲ្យក្លាយជាបុគ្គលិកពេញសិទ្ធិ។
ទោះយ៉ាងណាក្តីមានចំណុចមួយចំនួនដែលត្រូវបានដោះស្រាយដោយថៅកែរោងចក្រ ហើយនឹងត្រូវពិភាក្សានៅថ្ងៃសុក្រនេះ។ កម្មករទាមទារឲ្យបើកប្រាក់ឈ្នួលដល់កម្មករដែលមានផ្ទៃពោះ នៅពេលពួកគេទៅពិនិត្យពោះ។
លោកបន្តថា៖ «រោងចក្រមិនយល់ស្របជាមួយកម្មករ កម្មករស្នើសុំរោងចក្រផ្តល់ប្រាក់ឈ្នួលដល់កម្មករមានផ្ទៃពោះនៅពេលពួកគេសុំច្បាប់ទៅជួបពេទ្យពិនិត្យពោះ។ យើងនឹងពិភាក្សាអំពីបញ្ហានេះនៅថ្ងៃសុក្រ»។
លោក វិន ហេង បានថ្លែងថា៖ «ពួកគេនិយាយថា ប្រសិនបើយើងត្រឡប់ទៅធ្វើការនៅថ្ងៃស្អែក ពួកគេនឹងយល់ព្រមជាមួយចំណុចនេះ។ យើងនឹងជួបគ្នាជជែក និងស្តាប់គ្នា ពីព្រោះវាក៏មិនល្អផងដែរសម្រាប់កម្មករ និងរោងចក្រ»។
លោក ប៊ុនធី ថ្លែងថា៖ «ហើយកម្មករទាមទារប្រាក់ឈ្នួលក្នុងអំឡុងពេលធ្វើកូដកម្ម។ ខ្ញុំមិនដឹងថា តើក្រុមហ៊ុននឹងយល់ព្រមឬអត់នោះទេ។ យើងកំពុងសហការជាមួយទាំងកម្មករ និងថៅកែរោងចក្រដើម្បីដោះស្រាយបញ្ហានេះ»។
លោក វិន ហេង ថ្លែងថា៖ «យើងចង់ឲ្យរោងចក្រមិនកាត់ប្រាក់ឈ្នួលរបស់យើងក្នុងអំឡុងការតវ៉ារយៈពេល ៣ ថ្ងៃ»។
តំណាងរោងចក្រ Sheng Yao Enterprise co. LTD មិនអាចទាក់ទងសុំអត្ថាធិប្បាយបានទេកាលពីថ្ងៃម្សិលមិញ៕ PS