ភ្នំពេញៈ សហភាពការងារកម្ពុជា (CLC) បានប្រារព្ធការជួបជុំគ្នានៅថ្ងៃទិវាពលកម្មអន្តរជាតិ ១ ឧសភានៅជិតវត្តភ្នំ ក្នុងរាជធានីភ្នំពេញកាលពីព្រឹកថ្ងៃអង្គារដោយមានកម្មករជិត ១០០ នាក់ចូលរួមដើម្បីទាមទារប្រាក់ឈ្នួលអប្បបរមាខ្ពស់ជាងមុនរហូតដល់ ២០៧ ដុល្លារ និងបានសម្តែងការខកចិត្តចំពោះផលប៉ះពាល់ដែលកើតចេញពីច្បាប់ស្តីពីសហជីពដែលមានលក្ខណៈចម្រូងចម្រាស។
សមត្ថកិច្ចជាច្រើនបានទៅជួបក្រុមអ្នកជួបជុំគ្នាដោយក្នុងនោះនគរបាល និងសន្តិសុខខណ្ឌដូនពេញជាង ១០០ នាក់មានវត្តមាននៅកន្លែងប្រមូលផ្តុំរបស់សហភាពការងារកម្ពុជា (CLC)។
សហព័ន្ធការងារនេះពីដំបូងឡើយបានសុំហែក្បួនពីជិតក្រុមប្រឹក្សាអភិវឌ្ឍន៍កម្ពុជាដែលនៅជិតវត្តភ្នំទៅរដ្ឋសភា ប៉ុន្តែសាលារាជធានីភ្នំពេញបានបដិសេធមិនផ្តល់ការអនុញ្ញាតដល់ពួកគេដោយគ្រាន់តែអនុញ្ញាតឲ្យប្រមូលផ្តុំគ្នានៅតាមមាត់ទន្លេ។
កម្មករបានបង្ហាញការគាំទ្រខ្លាំងក្លានៅពេលប្រធានសហភាពការងារកម្ពុជា លោក អាត់ ធន់ បានអំពាវនាវឲ្យរដ្ឋាភិបាលធានាថាប្រាក់ឈ្នួលអប្បបរមាបើកចំហចំពោះគ្រប់វិស័យ និងអំពាវនាវឲ្យប្រាក់ឈ្នួលអប្បបរមាឈានដល់ ២០៧ ដុល្លារក្នុង ១ ខែ។ ប្រាក់ឈ្នួលអប្បបរមាបច្ចុប្បន្នសម្រាប់វិស័យកាត់ដេរគឺចំនួន ១៧០ ដុល្លារ ហើយការចរចាលើប្រាក់ឈ្នួលអប្បបរមាសកលកំពុងបន្តធ្វើឡើង។
លោកក៏បានបន្តលើកឡើងអំពីក្តីបារម្ភអំពីច្បាប់ស្តីពីសហជីពឆ្នាំ ២០១៦ ដែលត្រូវបានរិះគន់ចំពោះការរារាំងក្នុងការបង្កើតសហជីព បង្កបញ្ហាក្នុងការជ្រើសរើសកម្មករ និងសកម្មភាពផ្សេងៗ ខណៈទទួលស្គាល់ផងដែរថា រដ្ឋាភិបាលមានការយកចិត្តទុកដាក់ជាងមុនចំពោះក្តីបារម្ភរបស់កម្មករក្នុងរយៈកាល ១ ឆ្នាំចុងក្រោយនេះ។
លោកបានថ្លែងថា៖ «យើងអាចឃើញមានការយកចិត្តទុកដាក់ជាងមុនរបស់លោកនាយករដ្ឋមន្ត្រីអំពីកម្មករនាឆ្នាំមុន បន្ទាប់ពីការធ្វើការងារ ១០ ឆ្នាំនៅក្នុងវិស័យនេះ»។
សុន្ទរកថារបស់លោក ធន់ ត្រូវបានកាត់ផ្តាច់ដោយសារការដួលសន្លប់របស់កម្មករម្នាក់ ដោយសារកម្តៅថ្ងៃដោយបានធ្វើឲ្យការប្រមូលផ្តុំផ្លាស់ទៅរកទីតាំងដែលម្លប់ជាងមុន។
តំណាងរាស្ត្រ ៤ រូបដែលម្នាក់មកពីគណបក្សកាន់អំណាច និង ៣ នាក់ទៀតមកពីគណបក្សហ៊្វុនស៊ិនប៉ិចបានជួបជាមួយកម្មករ និងទទួលយកញត្តិពីសហភាពការងារកម្ពុជាដែលក្នុងចំណោមការទាមទារទាំង ១៩ ចំណុចមានការសុំឲ្យមានច្បាប់ស្តីពីសុវត្ថិភាពការងារនៅក្នុងទូទាំងវិស័យនានា ការបង្កើតតុលាការការងារ និងធានាថារោងចក្រមិនប្រើប្រាស់កិច្ចសន្យាការងាររយៈពេលខ្លីច្រើនជ្រុល។ ដោយទទួលយកញត្តិនេះតំណាងរាស្ត្រគណបក្សប្រជាជនលោកស្រី ឡោក ខេង បានថ្លែងថាលោកស្រីបានទទួលញត្តិស្រដៀងគ្នាមួយកាលពីឆ្នាំមុន ហើយថារដ្ឋាភិបាលបានពិនិត្យទៅលើសំណើមួយចំនួនក្នុងចំណោមសំណើទាំងនោះ។
លោកស្រីបន្តថា៖ «ខ្ញុំសន្យានាំយកចំណុចទាំង ១៩ នៅក្នុងញត្តិនេះទៅពិភាក្សានៅក្នុងគណៈកម្មាធិការទី ១ នៃរដ្ឋសភា ហើយដាក់ទៅរដ្ឋាភិបាលដើម្បីជម្រាបពួកគេអំពីក្តីបារម្ភ និង ការទាមទាររបស់កម្មករ»។
អ្នកនាង គា សុផល ដែលជាកម្មករកាត់ដេរម្នាក់មកពីខណ្ឌឫស្សីកែវបានថ្លែងថារោងចក្ររបស់អ្នកនាងបន្តប្រើកិច្ចសន្យាការងាររយៈពេល ៣ ខែសម្រាប់អ្នកនាងដោយធ្វើឲ្យប៉ះពាល់ដល់សន្តិសុខការងារ និងអាចប៉ះពាល់ដល់អត្ថប្រយោជន៍ដទៃៗរបស់អ្នកនាង។
អ្នកនាង សុផល បានថ្លែងថា៖ «យើងធុញទ្រាន់ខ្លាំងណាស់ បន្ទាប់ពីធ្វើការងារអស់រយៈពេល ១០ ឆ្នាំ ដូច្នេះយើងកំពុងពិចារណាធ្វើអ្វីផ្សេង»។
លោកនាយករដ្ឋមន្ត្រី ហ៊ុន សែន បានចុះជួបកម្មកររោងចក្រកាត់ដេរជារៀងរាល់សប្តាហ៍ និងផ្តល់អត្ថប្រយោជន៍ដល់កម្មករដូចជា «ប្រាក់ឧបត្ថម្ភពេលឆ្លងទន្លេ» និងការគាំពារសុខភាពប្រសើរជាងមុន។ ជាការបន្តចុះជួបជាមួយកម្មករលោកនាយករដ្ឋមន្ត្រីកាលពីម្សិលមិញបានជួបជាមួយកម្មករប្រមាណ ៥០០០ នាក់នៅតំបន់សេដ្ឋកិច្ចពិសេសដោយប្រកាសថាលោកលោកមកទីនេះគ្រាន់តែដើម្បីប្រារព្ធពិធីជាមួយកម្មករ មិនមែនមកធ្វើសុន្ទរកថាទេ។ កម្មករម្នាក់ៗបានទទួលប្រាក់ប្រមាណ ៥០០០០ រៀល អាហារ និងភេសជ្ជៈ និងបានរាំដើម្បីអបអរពិធីនេះផងដែរ។
សន្តិសុខមានលក្ខណៈតឹងរ៉ឹងនៅតាមផ្លូវឆ្ពោះទៅរដ្ឋសភាដែលក្រុមសហជីពដទៃទៀតក៏បានដាក់ញត្តិទៅរដ្ឋសភាផងដែរ។ មេដឹកនាំសហជីពដទៃទៀតរួមមាន លោក អ៊ូ ទេពផល្លីន និងលោកស្រី យ៉ាង សុភ័ណ្ឌ ត្រូវបានអនុញ្ញាតឲ្យដាក់ញត្តិ ខណៈ លោក អ៊ូ ទេពផល្លីន ក៏បានចោទសួរផងដែរចំពោះបញ្ហារឹតបន្តឹងសន្តិសុខ។
លោកស្រី សុភ័ណ្ឌ បានថ្លែងថា៖ «វាពិបាកនិយាយថាមូលហេតុអ្វី? ពួកគេគ្រាន់តែនិយាយថានេះគឺជាបញ្ជាមកពីថ្នាក់លើរបស់ពួកគេ»៕ PS