.jpg)
កម្មករនៅរោងចក្រ Benoh Apparel តវ៉ាកន្លងមក។ ផា លីណា
ភ្នំពេញៈ កម្មកររោងចក្រ Benoh Apparel ប្រមាណជាង ២០០ នាក់ កាលពីម្សិលមិញបានតវ៉ាទាមទារប្រាក់បន្ថែម ដោយសារប្រាក់សំណងដែលពួកគេទទួលបានពីក្រសួងការងារមានចំនួនតិចពេក ខណៈកម្មកររោងចក្រ Yu Fa Garment Industry ប្រមាណជាង ១០០ នាក់ទាមទារប្រាក់ដំណាច់ឆ្នាំ បន្ទាប់ពីថៅកែរោងចក្រទាំង ២ បានបិទទ្វាររត់ចោលមិនព្រមទូទាត់ប្រាក់សំណងជូនកម្មករ។
រោងចក្រ ប៊ីណូ អឹបភែវិល ខេមបូឌា (Benoh Apparel) ស្ថិតនៅភូមិដំណាក់ធំ សង្កាត់ស្ទឹងមានជ័យ ខណ្ឌមានជ័យដែលមានកម្មករប្រមាណជាង ២០០ នាក់តវ៉ាក្នុងចំណោមកម្មករជាង ៣០០។ ចំណែករោងចក្រ Yu Fa Garment Industry តំបន់ព្រៃទាក្នុងខណ្ឌពោធិ៍សែនជ័យមានកម្មករប្រមាណជាង ១០០ នាក់នាំគ្នាតវ៉ាក្នុងចំណោមកម្មករជាង ៥០០ នាក់។
លោក អន សុខលៃ តំណាងកម្មកររោងចក្រ Benoh Apparel បានឲ្យដឹងថា ពួកគេបាននាំគ្នាតវ៉ាទាមទារប្រាក់ខែ ប្រាក់ដំណាច់ឆ្នាំ និងប្រាក់អត្ថប្រយោជន៍ផ្សេងៗទៀតទៅតាមច្បាប់អស់រយៈពេល ៣ ខែមកហើយ បន្ទាប់ពីថៅកែរត់ចោល ប៉ុន្ដែមិនមានការដោះស្រាយពីមន្ត្រីពាក់ព័ន្ធនោះទេទើបរហូតមកដល់ពេលនេះក្រសួងការងារបែរជាបើកប្រាក់ប្រមាណជាង ៤០ ទៅ ១០០ ដុល្លារសម្រាប់កម្មករម្នាក់ទៅវិញ។
លោកថាកម្មករទាំងអស់សូមទាមទារប្រាក់ខែ ប្រាក់ដំណាច់ឆ្នាំ និងប្រាក់អត្ថប្រយោជន៍ផ្សេងៗដែលជាញើសឈាមរបស់ពួកគេបន្ថែមទៀត ព្រោះប្រាក់ទាំងនេះមានចំនួនតិចតួចបំផុតមិនស្របទៅតាមច្បាប់ការងារឡើយ។
លោកបន្តថា៖ «យើងខកចិត្តចំពោះអ្វីដែលយើងបានឮពីការសន្យារបស់នាយករដ្ឋមន្ត្រីដែលថាយើងនឹងទទួលបានសំណងទាំងអស់ទៅតាមច្បាប់»។
កិច្ចសន្យារយៈពេលខ្លីគឺជាបញ្ហាមួយដែលបន្តយាយីវិស័យនេះ ខណៈក្រុមអ្នកតស៊ូមតិសិទ្ធិការងារថ្លែងថាវាបំពានបទប្បញ្ញត្តិនៃច្បាប់ស្តីពីការងារ ដែលកម្មករគួរតែទទួលបានកិច្ចសន្យាមានថិរវេលាមិនកំណត់ បន្ទាប់ពីធ្វើការបាន ២ ឆ្នាំ។
រោងចក្រ Benoh Apparel បានឈប់ប្រតិបត្តិការកាលពីខែវិច្ឆិកា និងផ្តល់ឲ្យកម្មករចំនួន ៦០ ដុល្លារសម្រាប់ការព្យួរការងាររយៈពេល ២ ខែដោយសន្យាថា នឹងបើកដំណើរការវិញនៅខែមករា ប៉ុន្តែថៅកែរោងចក្របានរត់គេចខ្លួនបាត់។
អ្នកស្រី ហោ ឆេង តំណាងកម្មកររោងចក្រ Yu Fa Garment Industry ដែលតវ៉ាបានថ្លែងថា កម្មកររោងចក្រ Yu Fa ទាំងមូលបានទទួលប្រាក់ឈ្នួលប្រចាំខែ ពីក្រសួងការងាររួចរាល់ហើយ ប៉ុន្ដែមិនទាន់បានប្រាក់ដំណាច់ឆ្នាំនៅឡើយទេ។ ដូច្នេះកម្មករទាំងអស់នៅបន្តស្វែងរកដំណោះស្រាយ ចំពោះប្រាក់ដំណាច់ឆ្នាំនេះ។
អ្នកស្រីបញ្ជាក់ថា៖ «ពេលពួកខ្ញុំតវ៉ា មន្ត្រីក្រសួងការងារបានចុះមកសម្របសម្រួលហើយគេសន្យាថា នឹងជួយដោះស្រាយបញ្ហានេះបន្តទៀត តែពួកគាត់ សុំឲ្យកម្មករកុំនាំគ្នាតវ៉ាបែបនេះទៀត»។
ក្រសួងការងារបានចាប់ផ្តើមបើកប្រាក់ដល់កម្មករនិយោជិតដែលម្ចាស់រោងចក្ររត់ចោលចំនួន ៤ ដែលមានកម្មករនិយោជិតសរុប ២៥៤២ នាក់ដោយធ្វើឡើងក្នុងរយៈពេល ៤ ថ្ងៃចាប់ពីថ្ងៃចន្ទ ទី ៩ ខែមេសារហូតដល់ថ្ងៃព្រហស្បតិ៍ ទី ១២ ខែមេសា ឆ្នាំ ២០១៨។
លោក ហេង សួរ អ្នកនាំពាក្យក្រសួងការងារបានឲ្យដឹងកាលពីម្សិលមិញថា នៅទីនោះមិនមានវិវាទការងារទេ។ នេះគឺជាប្រាក់ដែលរាជរដ្ឋាភិបាលបង់ជំនួសឲ្យកម្មករនិយោជកដែលបានបិទទ្វារដោយថៅកែរត់ចោលកម្មករនិយោជិត។ អ្វីដែលកម្មករនិយោជិតទទួលបានគឺប្រសើរជាងការអនុវត្តតាមច្បាប់ក្ស័យធន។ «រាជរដ្ឋាភិបាលនឹងបន្តតាមនីតិវិធីជាមួយនិយោជកដែលបានរត់ចោលកម្មករនោះជាបន្តទៀត»។
លោក ហេង សួរ បន្ថែមថាប្រាក់ដែលលក់ឡាយឡុងសម្ភារក្នុងរោងចក្រគឺមានតិចតួចប្រហែល ២៥% នៃប្រាក់ដែលពួកគាត់កំពុងទទួលបាននេះហើយប្រាក់លក់សម្ភារនឹងត្រូវបង់ចូលថវិកាជាតិវិញ។
លោក អាត់ ធន់ ប្រធានសហភាពការងារកម្ពុជាបានថ្លែងថា ការផ្ដល់សំណងនេះប្រហែលជាក្រសួងការងារទទួលយកឯកសារពីក្រុមហ៊ុន និងសហជីពដែលត្រូវគ្នាជាមួយរោងចក្រ ទើបគណៈកម្មាធិការទទួលបន្ទុកការគណនា មិនបានទទួលឯកសារសុក្រឹត សម្រាប់កម្មករទាំងអស់។ ជាពិសេសក្រុមហ៊ុនតម្រូវឲ្យកម្មករប្រើប្រាស់កិច្ចសន្យារយៈពេលខ្លី។ «ខ្ញុំយល់ថា វាមិនប្រក្រតី ព្រោះពួកគាត់បានបំបាត់អតីតភាពការងាររបស់កម្មករ អ៊ីចឹងខ្ញុំមិនដឹងថា ភាគីសហជីពនោះ ឬថៅកែទេដែលជាអ្នកបំបាត់។ កម្មករអាចមានសិទ្ធិទាមទារឲ្យមន្ត្រីពាក់ព័ន្ធ សើរើឯកសារទាក់ទងនឹងភាពមិនប្រក្រតីនេះ»។
តំណាងរោងចក្រ Benoh Apparel និងរោងចក្រ Yu Fa Garment Industry មិនអាចទាក់ទងបានទេ៕
