The Phnom Penh Post Search

Search form




Logo of Phnom Penh Post newspaper Phnom Penh Post - កម្មករ​ប្រមាណ ១ ពាន់​នាក់​ប្រារព្ធ​ទិវា​ពលកម្ម ទោះ​នគរបាល​រារាំង

កម្មករ​ប្រមាណ ១ ពាន់​នាក់​ប្រារព្ធ​ទិវា​ពលកម្ម ទោះ​នគរបាល​រារាំង

Content image - Phnom Penh Post
កម្មការិនី​ម្នាក់​មាន​អារម្មណ៍​ក្ដុកក្ដួល​នៅ​​ថ្ងៃ​ប្រារព្ធ​ទិវា​ពលកម្ម​អន្តរជាតិ ១ ឧសភា ខណៈ​ដែល​ក្រុម​ប៉ូលិស​មាន​ដំបង និង​អាវុធ​គ្រប់​ដៃ។ ហុង មិនា

កម្មករ​ប្រមាណ ១ ពាន់​នាក់​ប្រារព្ធ​ទិវា​ពលកម្ម ទោះ​នគរបាល​រារាំង

ភ្នំពេញ: កម្មករ និង​តំណាង​សហជីព​ប្រមាណ​ជាង​ ១ ០០០ នាក់​បាន​ប្រមូល​ផ្ដុំ​គ្នា​ប្រារព្ធ​ទិវា​ពលកម្ម​អន្តរជាតិ ១ ឧសភា​កាល​ពី​ម្សិលមិញ​ បើ​ទោះ​បី​ជា​មាន​ការ​ពង្រាយ​កម្លាំង​នគរបាល​ប្រឆាំង​កុបកម្ម​ប្រមាណ​ជា​រយនាក់​​ប្រដាប់​ដោយ​​ខែល ដំបង កាំភ្លើង បាញ់​ឧស្ម័ន​និង​បាន​ដាក់​របាំង​ដែក​យ៉ាង​រឹងមាំ ដើម្បី​រា​រាំង​ដល់​អ្នក​ចូល​រួម​ប្រារព្ធ​ពិធី​នេះ មិន​ឲ្យ​ដង្ហែ​ក្បួន​មក​ប្រមូល​ផ្ដុំ​គ្នា​នៅ​មុខ​រដ្ឋសភា ដែល​តំណាង​ឲ្យ​រាស្ត្រ​ខ្មែរ​ដែល​កើត​ចេញ​ពី​ការ​បោះ​ឆ្នោត​ទេ។

ក្រុម​កម្មករ​ និង​សហជីព​បាន​ធ្វើ​ដំណើរ​មក​ដល់​ផ្លូវ​ជាប់​ស្ថានទូត​រុស្ស៊ី បំណង​ហែ​ក្បួន​ទៅ​កាន់​រដ្ឋសភា​ ដើម្បី​ដាក់​ញត្តិ​ទាមទារ​សិទ្ធិ និង​លក្ខខណ្ឌ​ការងារ តែ​ត្រូវ​បាន​រារាំង​មិន​ឲ្យ​ក្រុម​កម្មករ​ធ្វើ​ការ​ដង្ហែ​ក្បួន​ ដែល​ជា​រូបភាព​បង្ហាញ​ឲ្យ​ឃើញ​ថា សិទ្ធិ​និង​​សេរីភាព​មិន​ត្រូវ​បាន​ប្រគល់​ដល់​កម្មករ​ឲ្យ​ពេញ​សម្បូរ​បែប​នោះ​ទេ។

មាន​ភាព​ប្រទាំងប្រទើស​គ្នា​រវាង​កម្ម​ករ និង​នគរបាល​បាន​កើត​ឡើង​អស់​រយៈពេល​ជាច្រើន​​ម៉ោង​បើ​ទោះ​បី​គ្មាន​អំពើ​ហិង្សា​ណា​​មួយ​ក៏​ដោយ ​ក្រោយ​ពី​​មាន​ការ​ចរចា​សម្រុះសម្រួល​គ្នា ​អាជ្ញាធរ​ព្រម​បើក​របាំង​ដែក​ឲ្យ​ក្រុម​កម្មករ​ដើរ​ត្រឹមតែ​ប្រមាណ ៣០០ ម៉ែត្រ​ពី​ផ្លូវ​ជាប់​ស្ថានទូត​រុស្សី ឆ្ពោះ​មក​ក្បែរ​រដ្ឋសភា​ ដើម្បី​ធ្វើ​ការ​ជួបជុំ និង​ដាក់​ញត្តិ។

បន្ទាប់​ពី​ក្រុម​កម្មករ និង​សហជីព​មាន​មតិ​នៅ​ក្បែរ​រដ្ឋសភា​នឹង​​ឧឃោសនស័ព្ទ ក្រោយ​មក​ទើប​លោកស្រី ឡោក ខេង តំណាង​រាស្រ្ត​មក​ពី​គណបក្ស​ប្រជាជន​កម្ពុជា និង​ជា​សមាជិក​គណៈកម្មការ​សិទ្ធិ​មនុស្ស​ទទួល​ពាក្យ​​បណ្តឹង​នៃ​រដ្ឋសភា​បាន​ចេញ​មុខ​មក​ទទួល​ញត្តិ​ពី​ក្រុម​តំណាង​សហជីព និង​កម្មករ។

យោងតាម​ញត្តិ​របស់​តំណាង​កម្មករ និង​សហជីព​ដាក់​ជូន​សមាជិក​រដ្ឋសភា​បាន​ឲ្យ​ដឹង​ពួក​គេ​ទាមទារ​ ១៦ ចំណុច​ដែល​ក្នុង​នោះ​ចំណុច​សំខាន់​របស់​ពួកគេ គឺ​ស្នើ​ដល់​រាជរដ្ឋាភិបាល​កំណត់​ប្រាក់​ឈ្នួល​អប្បបរមា​ ២០៧ ​ដុល្លារ​ក្នុង​មួយ​ខែ​ជូន​កម្មករ​និយោជិត​វិស័យ​កាត់ដេរ​និង​ដេរ​ស្បែក​ជើង​ និង​ ២៥០ ​ដុល្លារ​សម្រាប់​មន្រ្តី​រាជការ ស្នើ​សុំ​កុំ​ឲ្យ​មាន​ការ​បំភិតបំភ័យ​គំរាម​កំហែង​ផ្សេងៗ​ដល់​សហជីព និង​កម្មករ និង​ស្នើ​រាជ​រដ្ឋាភិបាល​ចាត់​វិធាន​ការ​តឹងរ៉ឹង​ចំពោះ​ក្រុមហ៊ុន​ និង​មន្រ្តី​ខិល​ខូច​ឃុបឃិត​គ្នា​បិទ​រោងចក្រ​ដោយ​មិន​បាន​ផ្តល់​សំណង​ឲ្យ​កម្មករ​ត្រឹម​ត្រូវ​តាម​ច្បាប់​ជាដើម។

Content image - Phnom Penh Post
នគរបាល​ប្រឆាំង​កុបកម្ម​រារាំង​ការ​ហែក្បួន​ប្រារព្ធ​ទិវា​ពលកម្ម​អន្តរជាតិ​ កាលពី​ម្សិលមិញ។ ផា លីណា

លោក​ស្រី​ យ៉ាង ​សោភ័ណ ប្រធាន​សម្ព័ន្ធ​សហជីព​កម្ពុជា​បាន​ថ្លែង​អះ​អាង​ថា ទង្វើ​របស់​អាជ្ញាធរ​បាន​បង្ហាញ​ឲ្យ​ឃើញ​រូបភាព​មិន​ល្អ​ដល់​ការ​គោរព​សិទ្ធិ​របស់​កម្មករ និង​សហជីព​មាន​ន័យ​ថា​សិទ្ធិ​ និង​សេរីភាព​របស់​ពួកគេ​ដែល​ធានា​ដោយ​ច្បាប់​ជាតិ​និង​អន្តរជាតិ​ត្រូវ​បាន​បង្រួម​ឲ្យ​នៅ​ចង្អៀត​បំផុត។

លោក​ស្រី​ សោភ័ណ​ ថ្លែង​ទៅ​កាន់​អ្នក​ចូល​រួម​ថា៖ «បង​ប្អូន​កម្មករ​កុំ​ខ្លាច​ឆ្នាំ​ក្រោយៗ​ត្រូវ​មក​ចូល​រួម​ទៀត​បើ​គ្មាន​ការ​តវ៉ា​គ្មាន​នរណា​ម្នាក់​ដឹង​ឭ​ពី​បញ្ហា​របស់​យើង​នោះ​ទេ​ហើយ​ពួក​យើង​ចង់​បង្ហាញ​ពី​ភាព​សប្បាយ​ចិត្ត​របស់​យើង​គឺ​ច្បាប់​សហជីព​តែ​រឹត​ត្បិត​មែន​ទែន។ កម្មករ​មក​ពឹង​ពាក់​សហជីព​គេ​ថា សហជីព​គ្មាន​ភាព​តំណាង​ទេ អ៊ីចឹង​បង្កើត​ច្បាប់​មក​ធ្វើ​អី​ បើ​ជួយ​កម្មករ​មិន​បាន»។

លោក អាត់ ធន់ ប្រធាន​សហភាពការងារ​កម្ពុជា​បាន​ថ្លែង​ក្នុង​ឱកាស​នោះ​ថា អាជ្ញាធរ​មិន​គួរ​រារាំង​កម្មករ និង​សហជីព​នោះ​ទេ​ ហើយ​សង្ឃឹម​ថា​ ការ​ប្រារព្ធ​ឆ្នាំៗ​ ក្រោយ​នឹង​ប្រព្រឹត្ត​ទៅ​ដោយ​មិន​មាន​​ការ​រារាំង​ និង​រឹត​បន្តឹង​ដល់​សិទ្ធិ​សេរីភាព។

លោកអំ​ សំ​អាត ​មន្រ្តី​អង្គការ​សិទ្ធិ​​មនុស្ស​ លីកាដូ បាន​យល់​ឃើញ​ការ​រារាំង​នេះ​បាន​បង្ហាញ​ថា ជា​ទង្វើ​របស់​អាជ្ញាធរ​ដែល​មាន​ខែល​និង​ដំបង គឺ​រឹតត្បិត​សេរីភាព​បញ្ចេញមតិ។

លោកថ្លែង​ថា៖ «តាម​ពិត​ទិវា​​នេះ​គឺ​គ្រប់​បណ្តា​ប្រទេស​គេ​ធ្វើ​គ្រប់​តែ​គ្នា​គឺ​ថ្ងៃ​ពិសេស​ដល់​កម្មករ​ ដើម្បី​សម្តែង​មតិ​និង​លើក​ឡើង​ពី​ការ​ព្រួយ​បារម្ភ​ផ្សេងៗ»។

ខណៈកម្មការិនី​ឈ្មោះ​ ស៊ី ណាត និយាយ​ថា៖ «យើង​មក​ទី​នេះ​មិន​មែន​មក​ធ្វើ​បាតុកម្ម​ទេ​ គឺ​យើង​គ្រាន់​តែ​មក​ ដើម្បី​ទាម​ទារ​សិទ្ធិ​ដែល​ពួកយើង​ត្រូវ​ទទួល​បាន»។

លោកស្រី ឡោក​ ខេង​ បាន​ចេញ​មក​​ជួប​កម្មករ ​និង​ថ្លែង​ទៅ​កាន់​អ្នក​ចូល​រួម​ដោយ​បញ្ជាក់​ថា បាន​ទទួល​ញត្តិ​ពី​តំណាង​កម្មករ​ហើយ​នឺង​ជម្រាប​ជូន​ទៅ​ប្រធាន​រដ្ឋសភា​ និង​រាជរដ្ឋាភិបាល។

សមាជិក​រដ្ឋសភា​រូប​នេះ​ថ្លែង​ថា​៖«នាង​ខ្ញុំ​បាន​ទទួល​ញត្តិ​ហើយ ដើម្បី​ជម្រាប​ជូន​​ទៅ​ប្រធាន​រដ្ឋសភា និង​រាជ​រដ្ឋាភិបាល​ ដើម្បី​ទទួល​យក​ការ​ទាមទារ​របស់​បង​ប្អូន»។

លោក​ជួន សុវណ្ណ ស្នងការ​នគរបាល​រាជធានី​ភ្នំពេញ​មិន​អាច​ទាក់​ទង​សុំ​អត្ថាធិប្បាយ​បាន​ទេ​​កាល​ពី​ម្សិលមិញ។

លោក​ម៉េត ​មាសភក្តី ​អ្នក​នាំពាក្យ​សាលា​ក្រុង​​ភ្នំពេញ​ថា ការ​ដាក់​កម្លាំង​នគរបាល​ព្រោះ​កម្មករ​មិន​គោរព​ការ​ណែនាំ​របស់​សាលា​ក្រុង៕

អត្ថបទគួរចាប់អារម្មណ៍