ភ្នំពេញៈ តំណាងកម្មករប្រមូលសំរាមក្រុមហ៊ុន ស៊ីនទ្រី បានដាក់ញត្តិទៅសាលារាជធានីភ្នំពេញពីម្សិលមិញ ដើម្បីស្នើសុំធ្វើការចរចាជាថ្មីម្តងទៀត នៅថ្ងៃពុធនេះ ដោយពួកគាត់អាចនឹងវិលចូលធ្វើការវិញ ប្រសិនបើខាងសាលាក្រុងកំណត់ថ្ងៃជាក់លាក់ក្នុងការផ្តល់សំណងដល់ពួកគាត់។
លោក ម៉ី ផាន អគ្គលេខាធិការនៃសហជីពវិស័យទេសចរណ៍នៃក្រុមហ៊ុនស៊ីនទ្រី ប្រាប់ ភ្នំពេញ ប៉ុស្តិ៍ ម្សិលមិញថា កម្មករបានផ្តិតមេដៃដាក់ញត្តិទៅសាលាក្រុងដើម្បីសុំចរចា និងចុះមកដោះស្រាយម្តងទៀត។ ខ្លឹមសារនៃញត្តិ គឺកម្មករនៅតែស្នើសុំ ៥ ចំណុចដដែលដូចដែលអភិបាលក្រុងលោក ឃួង ស្រេង សន្យាថានឹងទូទាត់ឱ្យនៅពេលថ្ងៃបញ្ចប់នៃកិច្ចសន្យាជាមួយក្រុមហ៊ុន ដែលពីមុនកម្មករទាមទារឱ្យមានការទូទាត់ឱ្យកម្មករភ្លាមៗ។ ប៉ុន្តែដោយសារតែស្ថានភាពហាក់ដូចជាពិបាកក៏កម្មករទាំងនេះយល់ព្រមតាមកំណត់ហេតុរបស់អភិបាលក្រុងវិញ។
លោក ម៉ី ផាន ថ្លែងថា៖ «ដោយសារតែកម្មករយល់ឃើញថា ស្ថានភាពមិនអាចដូចអ្វីដែលពួកគាត់ចង់បានភ្លាមៗដែលធ្វើឱ្យពួកគាត់សម្រេចដាក់លិខិតទៅសាលាក្រុងស្នើសុំចរចាដោះស្រាយវិវាទនេះម្តងទៀត។ កម្មករអាចនឹងយល់ព្រមតាមកំណត់ហេតុកាលពីថ្ងៃទី ៧ កន្លងមកនេះ។ ប៉ុន្តែគ្រាន់តែយើងចង់បានភាពជាក់លាក់ដោយសាលាក្រុងកំណត់ថ្ងៃខែឆ្នាំពិតប្រាកដ»។ ប៉ុន្តែលោក ម៉ី ផាន បដិសេធសុំមិនផ្តល់ញត្តិដែលបានដាក់ទៅសាលាក្រុងមកភ្នំពេញប៉ុស្តិ៍នោះទេ។
យោងតាមកំណត់ហេតុស្តីពីការសម្របសម្រួលដោះស្រាយករណីកូដកម្មរបស់កម្មករក្រុមហ៊ុន ស៊ីនទ្រី បានសម្រេចជាលទ្ធផលថា ចំពោះសំណើរបស់កម្មករនិយោជិតទាមទារឱ្យក្រុមហ៊ុនដោះស្រាយពេលបញ្ចប់កិច្ចសន្យា ក្រុមហ៊ុនទទួលដោះស្រាយតាមច្បាប់ស្តីពីការងារ ហើយរដ្ឋបាលរាជធានីភ្នំពេញជាអ្នកទទួលខុសត្រូវ។ ចំពោះការងាររបស់កម្មករនិយោជិតទៅថ្ងៃខាងមុខ រដ្ឋបាលរាជធានីភ្នំពេញធានាមិនបាត់បង់ឡើយ ទោះបីក្រុមហ៊ុនស៊ីនទ្រីដេញថ្លៃជាប់ ឬមិនជាប់ក៏ដោយ។
លោក ម៉ី ផាន បញ្ជាក់ថា៖ «ការចរចាលើកមុនមិនមានការបញ្ជាក់ ច្បាស់លាស់ពីថ្ងៃកំណត់នៃការផ្តល់ជូនកម្មករ ប៉ុន្តែលើកនេះប្រហែលជាមានការបញ្ជាក់ច្បាស់លាស់ដោយសារមានការនិយាយគ្នាក្រៅផ្លូវការរវាងតំណាងសហជីព និងមន្ត្រីសាលាក្រុងខ្លះដែរ តែខ្ញុំមិនអាចនិយាយបានទេ។ ហេតុនេះហើយបានជាយើងដាក់លិខិតទៅសាលាក្រុងសុំចរចាម្តងទៀតនេះ»។
លោក ពៅ សុភក្រ អ្នកបើកបររថយន្តដឹកសំរាមរបស់ក្រុមហ៊ុនស៊ីនទ្រីតាំងពីឆ្នាំ ២០០២ បានប្រាប់ផងដែរថា លោកនឹងទៅធ្វើការវិញ នៅពេលណាដែលមានការដាក់កំណត់ថ្ងៃច្បាស់លាស់ថា ផ្តល់សំណងឱ្យកម្មករថ្ងៃ ឬខែណាពិតប្រាកដ។
លោកនិយាយថា៖ «យើងទាមទារ ៥ ចំណុច តែបើគេឱ្យ ៣ ឬ ២ ចំណុចក៏ខ្ញុំព្រមដែរឱ្យតែគេកំណត់ ថា ពួកយើងទទួលបាននៅខែណាមួយ។ ឧទាហរណ៍ថា កម្មករនឹងត្រូវបានផ្តល់សំណងតាមការទាមទារនៅខែ ១១ ឬខែ ១២ ដូចនេះ ខ្ញុំយល់ព្រមដោយសារមានកំណត់ពេលវេលាច្បាស់លាស់»។
អ្នកបើកបររូបនេះក៏បានរំឭកពីសម្តីរបស់អភិបាលក្រុង ដែលបានមកដោះស្រាយ ហើយគ្រាន់តែនិយាយដោយមិនមានកំណត់ហេតុកំណត់ពេលវេលាច្បាស់ ដែលលោកថាហេតុផលនេះហើយ ទើបកម្មករមិនព្រមចូលធ្វើការ។
លោក ឃួង ស្រេង អភិបាលរាជធានីភ្នំពេញកាលពីថ្ងៃចន្ទបាននិយាយបន្ទាប់ពីប្រជុំជាមួយថ្នាក់ដឹកនាំខណ្ឌទាំង ១៤ ថា កម្លាំងប្រមូលសំរាមរបស់ខណ្ឌទាំងអស់បានខិតខំប្រមូលសំរាមរហូតជិតបានសម្រេចហើយ។ ពួកគាត់ប្រមូលបានប្រមាណជាជាង ២ ៥០០ តោន ក្នុង ១ ថ្ងៃលើសំរាមសរុបជាង ២ ៨០០ តោន។
លោកថ្លែងថា៖ «ខ្ញុំក៏សុំជម្រាបជូនផងដែរថា យើងមិនបដិសេធក្នុងការចូលធ្វើការរបស់ពួកគាត់ (កម្មករប្រមូលសំរាមក្រុមហ៊ុនស៊ីនទ្រី) វិញដែរ ប៉ុន្តែអ្វីក៏ដោយគឺត្រូវតែធ្វើទៅតាមច្បាប់។ ខ្ញុំមិនអាចទៅរកលុយឯណាបានសម្រាប់បំពេញបន្ថែមឱ្យគាត់ដែលគាត់ថាគាត់មិនធ្វើការហើយត្រូវបានប្រាក់បៀវត្សរ៍ដដែលនោះទេ។ ខ្ញុំអត់មានប្រាក់ខែឱ្យទេ។ មិនមែនបដិសេធថា មិនទទួលគាត់ទេ ត្រូវតែទទួល តែក៏ត្រូវអនុវត្តទៅតាមច្បាប់ផងដែរ»។
លោកបញ្ជាក់ថា ច្បាប់ឱ្យគាត់ធ្វើយ៉ាងណាគាត់ត្រូវធ្វើយ៉ាងហ្នឹង ប៉ុន្តែទោះជាយ៉ាងណាក៏ដោយក្នុងនាមរដ្ឋបាលរាជធានីភ្នំពេញដែលជាអាណាព្យាបាលរបស់កម្មករ-កម្មការិនីគ្រប់ប្រភេទទាំងអស់នៅតែសណ្តោសប្រណីលើពួកគាត់ ហើយសុំឱ្យគាត់ចូលធ្វើការវិញ ហើយបន្តធ្វើការចរចាបន្តទៀតទៅតាមច្បាប់ ឬភាពអនុគ្រោះណាមួយដែលមិនផ្ទុយនឹងច្បាប់៕