.jpg)
កម្មករប្រមូលសំរាមរីករាយ ក្រោយឯកភាពគ្នាកាលពីម្សិលមិញ។ ហេង ជីវ័ន
ភ្នំពេញៈ កម្មករប្រមូលសំរាមរបស់ក្រុមហ៊ុនស៊ីនទ្រីដែលបានធ្វើកូដកម្មអស់រយៈពេល ១៣ ថ្ងៃកន្លងមក បានយល់ព្រមត្រឡប់ទៅធ្វើការងារវិញចាប់ពីល្ងាចថ្ងៃពុធម្សិលមិញ បន្ទាប់ពីក្រុមហ៊ុនបានឯកភាព និងបញ្ចប់កិច្ចសន្យាការងារជាមួយកម្មករនៅចុងខែមករា ឆ្នាំក្រោយ និងសម្រេចបើកប្រាក់បំណាច់ទូទាត់ និងអត្ថប្រយោជន៍ផ្សេងៗនៅពាក់កណ្តាល ខែកុម្ភៈ ឆ្នាំ ២០២១។
បន្ទាប់ពីកិច្ចប្រជុំដែលមានការចូលរួមដឹកនាំដោយលោក កើត ឆែ អភិបាលរងរាជធានីភ្នំពេញតំណាងក្រុមហ៊ុន និងសហជីពពីថ្ងៃម្សិលមិញ ឯកភាពយកសំណើរបស់កម្មករនិយោជិតទៅដោះស្រាយដោយក្រុមហ៊ុនស៊ិនទ្រី ឯកភាព និងបញ្ចប់កិច្ចសន្យាការងារជាមួយកម្មករនៅថ្ងៃទី ៣១ ខែ មករា ឆ្នាំ ២០២១ ហើយទទួលដោះស្រាយបើកប្រាក់អត្ថប្រយោជន៍ផ្សេងៗជូនកម្មករនិយោជិតស្របតាមច្បាប់ស្តីពីការងារ។ នេះបើតាមការប្រកាសពីលោក កៅ សុវ៉ាត ប្រធានសហជីពវិស័យទេសចរណ៍នៃក្រុមហ៊ុនស៊ីនទ្រីប្រាប់កម្មករនៅខាងមុខក្រុមហ៊ុន ស៊ីនទ្រី ដែលពួកគាត់កំពុងរង់ចាំលទ្ធផល។
លោកថ្លែងថា៖ «ប្រាក់បំណាច់ទូទាត់ និងអត្ថប្រយោជន៍ផ្សេងៗដែលបានបញ្ចប់កិច្ចសន្យាការងារនេះនឹងត្រូវបើកជូនកម្មករនិយោជិតយ៉ាងយូរនៅសប្តាហ៍ទី ២ នៃខែកុម្ភៈ ឆ្នាំ ២០២១ ដោយរដ្ឋបាលសាលារាជធានីភ្នំពេញជាអ្នកធានាចំនួនទឹកប្រាក់ដែលត្រូវទូទាត់នេះ ដោយកាត់យកពីកញ្ចប់ប្រាក់សំណងសម្រាប់រម្លត់កិច្ចព្រមព្រៀងជាមួយក្រុមហ៊ុន ស៊ីនទ្រី»។
ប្រធានសហជីពរូបនេះបានប្រាប់កម្មករថា ចំពោះថ្ងៃធ្វើកូដកម្មពីថ្ងៃទី ២ ដល់ទី ៧ ខែតុលា ក្រុមហ៊ុនរក្សាប្រាក់ឈ្នួលឱ្យនៅដដែល។ ដោយឡែកកូដកម្មចាប់ពីថ្ងៃទី ៨ ដល់ទី ១៤ ខែតុលា ក្រុមហ៊ុនមិនផ្តល់ប្រាក់ឈ្នួលដោយអនុវត្តទៅតាមច្បាប់ស្តីពីការងារ។
លោកថា៖ «ចាប់ពីថ្ងៃនេះតទៅ កម្មករធ្វើកូដកម្ម ឬបាតុកម្ម ក្រុមហ៊ុនពុំផ្តល់ប្រាក់ឈ្នួលទេ ដោយអនុវត្តតាមច្បាប់ស្តីពីការងារហើយ បងប្អូនទាំងអស់នាំគ្នាចូលធ្វើការងារជាធម្មតាវិញចាប់ពីថ្ងៃនេះតាមវេនតាមក្រុមរបស់ខ្លួន»។
លោក កើត ឆែ អភិបាលរងក្រុងភ្នំពេញប្រាប់ ភ្នំពេញ ប៉ុស្តិ៍ បន្ទាប់ពីបញ្ចប់កិច្ចប្រជុំថា ក្រុមការងារបានឯកភាពគ្នារួចរាល់អស់ហើយ។ ក្រុមហ៊ុនព្រមអនុវត្ត ការបញ្ឈប់កិច្ចសន្យាតាមច្បាប់ការងារទាំងអស់ជាមួយបុគ្គលិកទាំងអស់គឺយកថ្ងៃទី ៣១ ខែ មករា ឆ្នាំ ២០២១ ហើយនឹងធ្វើការធានាទូទាត់សំណងអតីតភាពការងារ និងប្រាក់អត្ថប្រយោជន៍ផ្សេងៗតាមច្បាប់ការងារទាំងអស់។
លោកអះអាងថា៖ «ប្រាក់សំណងនេះ រដ្ឋបាលរាជធានីភ្នំពេញនឹងធានាថានឹងមានលុយសងដោយកាត់យកពីកញ្ចប់ថវិកាដែលបានរម្លត់កិច្ចសន្យារវាងក្រុមហ៊ុន ស៊ីនទ្រី ជាមួយសាលាក្រុងភ្នំពេញយកមកទូទាត់ជូនបងប្អូនកម្មករមុនគេ។ ក្រុមហ៊ុនបញ្ចប់កិច្ចសន្យាជាមុនសិនរួចនឹងធ្វើការទូទាត់ប្រាក់អតីតភាពការងារ និងអត្ថប្រយោជន៍ផ្សេងៗយ៉ាងយូរសប្តាហ៍ទី ២ នៃខែកុម្ភៈ ឆ្នាំ ២០២១។ អ្វីៗទាំងអស់ គឺយើងត្រូវដោះស្រាយតាមច្បាប់ការងារ»។
លោក កើត ឆែ មិនទាន់អាចបញ្ជាក់ពីចំនួនទឹកប្រាក់ដែលនឹងយកមកទូទាត់ជូនកម្មករនៅឡើយទេ ដោយក្រសួងការងារ និងស្ថាប័នពាក់ព័ន្ធនឹងធ្វើការងារនេះបន្តទៀត។
ប្រធានសហព័ន្ធសហជីពកម្មករ និយោជិកវិស័យទេសចរណ៍កម្ពុជាលោក ទូច កុសល បានលើកឡើងថា ដំណោះស្រាយនេះអាចទទួលយកបាន ដោយសារភាគីក្រុមហ៊ុនបានព្រមព្រៀងដោះស្រាយដោយមានកាលកំណត់ពេលវេលាច្បាស់លាស់សម្រាប់កម្មករ ដែលធ្វើឱ្យពួកគាត់មានទំនុកចិត្ត និងព្រមចូលធ្វើការវិញ។
លោក កុសល ប្រាប់ ភ្នំពេញ ប៉ុស្តិ៍ បន្ទាប់ពីប្រជុំថា៖ «ចាប់ពីចុងខែមករា ឆ្នាំ ២០២១ គឺនៅពេលដែលក្រុមហ៊ុនបញ្ចប់កិច្ចសន្យាគឺកម្មករទាំងនេះលែងជាបុគ្គលិករបស់ក្រុមហ៊ុនស៊ីនទ្រីទៀតហើយ។ ប៉ុន្តែប្រសិនបើក្រុមហ៊ុនអាចទទួលយកពួកគាត់ធ្វើការវិញ នោះកិច្ចសន្យាការងាររបស់ពួកគាត់នឹងចាប់ផ្តើមសាជាថ្មី»។
បន្ទាប់ពីស្តាប់លទ្ធផលនៃកិច្ចប្រជុំចរចារួចមក លោក សឹង សុភក្រ អាយុ ៤៣ ឆ្នាំ ជាអ្នកបើកបររថយន្តដឹកសំរាមរបស់ក្រុមហ៊ុនស៊ីនទ្រីជិត ២០ ឆ្នាំបានប្រាប់ ភ្នំពេញ ប៉ុស្តិ៍ ថា លោកសប្បាយចិត្តក្នុងការត្រឡប់ចូលបម្រើការងារវិញ បន្ទាប់ពីគាត់យល់ព្រមតាមដំណោះស្រាយរបស់សាលាក្រុងជូនកម្មករដោយជោគជ័យ។
លោកបានប្រាប់ថា៖ «ខ្ញុំនឹងចាប់ផ្តើមការងារខ្ញុំវិញចាប់ពីយប់នេះតទៅ។ ពួកយើងនឹងខិតខំធ្វើការប្រមូលសំរាមឱ្យអស់ពីក្នុងទីក្រុងឱ្យឆាប់អស់ទៅតាមលទ្ធភាពដែលយើងអាចធ្វើទៅបាន។ ខ្ញុំមិនទាន់អាចនិយាយបានទេ ថាតើ យើងនឹងចំណាយពេលប៉ុន្មានថ្ងៃក្នុងការប្រមូលឱ្យអស់ ដោយសារតែសំរាមមានច្រើនពាន់តោនក្នុងរយៈពេលជាង ១០ ថ្ងៃកន្លងមកនេះ»។
កម្មករដដែលនេះក៏បានថ្លែងអំណរគុណចំពោះកម្លាំងរបស់សាលាក្រុងដែលបានជួយប្រមូល និងដឹកសំរាមក្នុងអំឡុងពេលដែលកម្មករទាំងអស់មិនបានចូលបម្រើការងារ។
គួរបញ្ជាក់ផងដែរថា កម្មករប្រមូលសំរាមក្រុមហ៊ុន ស៊ីនទ្រីជាង ២ ៥០០ នាក់ បានធ្វើកូដកម្មតាំងពីរសៀលថ្ងៃទី ២ ខែតុលា រហូតដល់រសៀលថ្ងៃទី ១៤ ខែ តុលា ឆ្នាំ ២០២០៕
វីដេអូ៖
