ភ្នំពេញៈ កម្មករប្រមូលសំរាមក្រុមហ៊ុនស៊ីនទ្រីរាប់រយនាក់បានប្រកាសបន្តការធ្វើកូដកម្មដដែល ក្រោយពីគ្មានដំណោះស្រាយសម្រាប់ការទាមទាររបស់ពួកគេ ខណៈដែលរដ្ឋបាលរាជធានីភ្នំពេញបានប្រកាសជ្រើសរើសកម្មករថ្មីសម្រាប់ប្រមូល និងដឹកជញ្ជូនសំរាមសំណល់រឹងនៅរាជធានីភ្នំពេញ។
អ្នកស្រី សៀម ណន អាយុ ៣០ ឆ្នាំ ដែលជាកម្មករផ្នែកបោសនៃក្រុមហ៊ុនស៊ីនទ្រីដែលកំពុងឈរផ្តុំគ្នាធ្វើកូដកម្មនៅខាងមុខក្រុមហ៊ុនកាលពីថ្ងៃម្សិលមិញ និយាយថាអ្នកស្រី និងកម្មករផ្សេងទៀតមិនព្រមចូលធ្វើការវិញទេបើខាងក្រុមហ៊ុនមិនយល់ព្រមផ្តល់សំណងតាមការទាមទាររបស់ពួកគាត់។
អ្នកស្រីថា៖ «យើងព្រមចូលកាន់ការងាររៀងៗខ្លួនវិញ លុះត្រាមានកិច្ចសន្យារវាងក្រុមហ៊ុន និងតំណាងកម្មករពួកយើងពីការផ្តល់ជូនតាមអ្វីដែលយើងបានទាមទារ។ ទោះបីជាការយល់ព្រម ២ ឬ ៣ ចំណុចក៏ដោយ គឺយើងត្រូវការមានកិច្ចសន្យាច្បាស់លាស់»។
កម្មករ ១ រូបទៀត ដែលកំពុងអង្គុយធ្វើការតវ៉ាទាមទារជាមួយនឹងកម្មករជាច្រើននាក់ អ្នកស្រី ជុំ ម៉ាលី អាយុ ៥៦ ឆ្នាំ ដែលបានធ្វើការងារនៅក្នុងក្រុមហ៊ុនស៊ីនទ្រីនេះប្រមាណជា ២០ ឆ្នាំមកហើយនោះនៅតែអះអាងថា ទាល់តែអ្នកស្រីទទួលបានដំណោះស្រាយទៅតាមការទាមទាររបស់គាត់ទើបគាត់ព្រមចូលធ្វើការវិញ។
អ្នកស្រីនិយាយថា៖ «ខ្ញុំបារម្ភ និងដឹងពីការប៉ះពាល់មុខមាត់របស់ទីក្រុងយើងពីគំនរសំរាមនៅពាសពេញគ្រប់ទីកន្លែង ប៉ុន្តែក្រពះរបស់ខ្ញុំ ការងារខ្ញុំក៏សំខាន់ដែរ។ ដូច្នេះហើយបានជាខ្ញុំមកធ្វើការទាមទារនេះ»។
កម្មកររាប់រយនាក់បានប្រមូលផ្តុំគ្នានៅខាងមុខក្រុមហ៊ុនស៊ីនទ្រីក្នុងសង្កាត់ដង្កោ ខណ្ឌដង្កោ ចូលដល់ថ្ងៃទី ៥ ដែលពួកគេបានធ្វើកូដកម្មទាមទារឱ្យក្រុមហ៊ុនដោះស្រាយនូវ ៥ ចំណុចរួមមាន ប្រាក់បំណាច់អតីតភាពការងារ ប្រាក់សំណងជំងឺចិត្ត ប្រាក់ជួសការជូនដំណឹងមុន ប្រាក់ខែចុងក្រោយ និងការឈប់សម្រាកប្រចាំឆ្នាំដែលនៅសេសសល់។
លោក ទូច កុសល ប្រធានសហព័ន្ធសហជីពកម្មករនិយោជិតវិស័យទេសចរណ៍កម្ពុជាដែលជាតំណាងរបស់កម្មករប្រមូលសំរាម និងបានចូលរួមធ្វើការប្រជុំរកដំណោះស្រាយជាមួយនឹងអាជ្ញាធរខណ្ឌ សាលារាជធានីភ្នំពេញ និងក្រុមហ៊ុនស៊ីនទ្រីបានប្រាប់ភ្នំពេញ-ប៉ុស្តិ៍ បន្ទាប់ពីបញ្ចប់កិច្ចប្រជុំថា ការចរចាមិនមានលទ្ធផលអ្វីដែលកម្មករអាចទទួលយកបានទេដោយសារក្រុមហ៊ុនប្រាប់ថា មិនព្រមទូទាត់តាមសំណើរបស់កម្មករឡើយ ពីព្រោះក្រុមហ៊ុនគ្មានលុយ។
លោក ទូច កុសល បានបន្តថា លោកចង់ជួយសម្របសម្រួលឱ្យបញ្ហានេះដោះស្រាយបានរលូន និងឆាប់រហ័សដើម្បីកម្មករចូលបំពេញការងារវិញយ៉ាងឆាប់រហ័ស ប៉ុន្តែនៅតែមិនមានដំណោះស្រាយដដែល។
លោកបានថ្លែងថា៖ «ការទាមទារ ៥ ចំណុចនេះមិនទាន់មានការសះជាទេតែខ្ញុំស្នើសុំឱ្យកម្មករទាំងអស់បន្តកិច្ចការងាររៀងៗខ្លួនវិញសិន ប៉ុន្តែវាជាសិទ្ធិរបស់ពួកគាត់ក្នុងការសម្រេចចិត្តចូល ឬមិនចូល ខ្ញុំគ្មានសិទ្ធិអំណាចក្នុងការបង្ខំពួកគាត់ទេ។ ខ្ញុំចង់ពន្យល់ប្រាប់កម្មករទាំងអស់ថា វាមិនទាន់ដល់ដំណាក់កាលក្នុងការទាមទារពីក្រុមហ៊ុនទេ ដោយសារក្រុមហ៊ុននេះនៅបន្តធ្វើអាជីវកម្មនៅឡើយ ហើយក៏មិនទាន់មានការដេញថ្លៃ ឬផ្ទេរទៅក្រុមហ៊ុនផ្សេងនៅឡើយដែរ»។
លោក ជិន ប៊ុនធឿន នាយករងរដ្ឋបាលរាជធានីភ្នំពេញបាននិយាយទៅកាន់កម្មករដែលកំពុងប្រមូលផ្តុំគ្នាធ្វើកូដកម្មនេះថា អ្នកណាក៏ភ័យបារម្ភដែរ ទាក់ទងនឹងការបាត់បង់ការងារ មុខរបរចិញ្ចឹមជីវិតប៉ុន្តែវាមិនទាន់ដល់ដំណាក់កាលដែលបងប្អូនកម្មករត្រូវធ្វើការទាមទារទេ ដោយសារក្រុមហ៊ុនមិនទាន់បានបញ្ឈប់កម្មករណាម្នាក់ឡើយ។ លោកថា៖ «នៅពេលក្រុមហ៊ុនបញ្ឈប់បងប្អូននោះក្រុមហ៊ុននឹងដោះស្រាយផ្តល់នូវអ្វីដែលបងប្អូនកម្មករត្រូវការហើយ»។
លោកបន្ថែមថា ការស្នើសុំរបស់កម្មករជារឿងត្រឹមត្រូវ ប៉ុន្តែវាមិនទាន់ត្រូវពេលវេលា។
តំណាងក្រុមហ៊ុនស៊ីនទ្រី លោក ងួន ស៊ីផេង មិនអាចទាក់ទងសុំការអធិប្បាយបានទេ។
ទោះបីជាមានការពន្យល់ណែនាំយ៉ាងណាក៏ដោយ ក៏កម្មករទាំងអស់មិនយល់ព្រមចូលធ្វើការងារវិញឡើយ។
នៅថ្ងៃម្សិលមិញដែរ បន្ទាប់ពីការចរចាមិនមានលទ្ធផលព្រមព្រៀងគ្នាហើយកម្មករនៅតែបដិសេធចូលធ្វើការវិញនោះ រដ្ឋបាលរាជធានីភ្នំពេញបានចេញសេចក្តីជូនដំណឹងជ្រើសរើសកម្មករប្រមូល និងដឹកជញ្ជូនសំរាមសំណល់រឹងដោយបានលើកឡើងថា ក្នុងដំណាក់កាលអន្តរកាលនេះ រដ្ឋបាលរាជធានី-ភ្នំពេញត្រូវការជ្រើសរើសបុគ្គលិកជាច្រើននាក់ ដើម្បីបំពេញការងារជាអ្នកប្រមូល និងដឹកជញ្ជូនសំរាម សំណល់រឹង។
ទាក់ទងនឹងការប្រកាសជ្រើសរើសកម្មករថ្មីនេះលោក ទូច កុសល លើកឡើងថា ទាំងសាលាក្រុង និងទាំងភាគីពាក់ព័ន្ធគួរព្យាយាមជជែកគ្នាដើម្បីរកដំណោះស្រាយហើយលោកមិនចង់ឱ្យមានការជ្រើសរើសកម្មករថ្មីមកជំនួសកម្មករចាស់ទេ តែគួរតែមានដំណោះស្រាយដល់ពួកគាត់វិញទើបជាការប្រសើរ៕
វីដេអូ៖