.jpg)
លោក ឃួង ស្រេង ពេលពន្យល់កម្មករប្រមូលសំរាមពីម្សិលមិញ។ រូបថត FN
ភ្នំពេញៈ កម្មករប្រមូលសំរាមរបស់ក្រុមហ៊ុនស៊ីនទ្រី ដែលបានធ្វើកូដកម្មអស់ពេល ៦ ថ្ងៃនឹងចាប់ផ្តើមចូលការងារឡើងវិញនៅថ្ងៃព្រហស្បតិ៍នេះ បន្ទាប់ពីមានការសន្យាពីអាជ្ញាធរក្រុងភ្នំពេញ និងស្ថាប័នពាក់ព័ន្ធកាលពីថ្ងៃម្សិលមិញ ប៉ុន្តែនៅមានខ្លះមិនទាន់សម្រេចចិត្តទេ ខណៈក្រសួងការងារបានបញ្ជាក់ថា ការតវ៉ារបស់ពួកគេខុសនឹងច្បាប់ការងារទាំងស្រុង។
លោក ទេស រុក្ខាផល អគ្គលេខាធិការនៃអគ្គលេខាធិការដ្ឋាននៃគណៈកម្មការសម្រាប់ដោះស្រាយកូដកម្ម បាតុកម្មនៅតាមគ្រប់មុខសញ្ញានៃក្រសួងការងារ (គ.ក.ប) បានប្រាប់ភ្នំពេញ-ប៉ុស្តិ៍ម្សិលមិញថា អភិបាលរាជធានីភ្នំពេញបានស្នើឱ្យកម្មករទាំងអស់ត្រូវចូលធ្វើការវិញនៅល្ងាចថ្ងៃពុធ (ម្សិលមិញ)។ ប៉ុន្តែខាងកម្មករបានសុំចាប់ផ្តើមការងារនៅថ្ងៃព្រហស្បតិ៍ (ថ្ងៃនេះ) ដោយសារកម្មករមួយចំនួនហួសវេនធ្វើការ។
លោកបានថ្លែងថា៖ «កម្មករនឹងអាចវិលត្រឡប់ចូលធ្វើការវិញនៅថ្ងៃស្អែក។ ខាងក្រុមហ៊ុន និងសហជីពរបស់ពួកគាត់នឹងធ្វើការបន្តសម្របសម្រួលជាមួយកម្មករក្នុងការពន្យល់ណែនាំផ្នែកច្បាប់ និងការធានាអះអាងរបស់សាលារាជធានីភ្នំពេញ...»។
បើតាមលោក ទេស រុក្ខាផល ការតវ៉ាទាមទាររបស់កម្មករប្រមូលសំរាម មិនត្រូវតាមច្បាប់ទេ ពីព្រោះជាធម្មតាករណីវិវាទត្រូវមានការដោះស្រាយផ្ទៃក្នុងសិន។ មួយវិញទៀត ពួកគាត់តវ៉ាទាមទារលក្ខខណ្ឌផ្សេងៗខណៈពេលក្រុមហ៊ុននៅដំណើរការ តែបែរជាកម្មករមកទាមទារផ្តាច់កិច្ចសន្យា។ បើពួកគាត់ធ្វើដូចនេះ គឺមានន័យថា គាត់លាឈប់ពីការងារដោយខ្លួនឯង។
តាមកំណត់ហេតុប្រជុំស្តីពីការសម្របសម្រួលដោះស្រាយករណីកូដកម្មនេះ ដែលដឹកនាំដោយអភិបាលសាលារាជធានីភ្នំពេញលោក ឃួង ស្រេង ដោយមានការចូលរួមពីមន្ត្រីក្រសួងការងារ តំណាងក្រុមហ៊ុន និងសហជីព បានសម្រេចថា សំណើរបស់កម្មករដែលទាមទារឱ្យក្រុមហ៊ុនដោះស្រាយពេលបញ្ចប់កិច្ចសន្យាគឺក្រុមហ៊ុនទទួលដោះស្រាយតាមច្បាប់ការងារ ហើយរដ្ឋបាលរាជធានីភ្នំពេញជាអ្នកទទួលខុសត្រូវ។ រីឯការងាររបស់កម្មករនិយោជិតទៅថ្ងៃខាងមុខ រដ្ឋបាលរាជធានីភ្នំពេញធានាមិនបាត់បង់ឡើយ ទោះបីក្រុមហ៊ុនស៊ីនទ្រីដេញថ្លៃជាប់ ឬមិនជាប់ក៏ដោយ។
លោក ទេស រុក្ខាផល បានបញ្ជាក់ថា៖ «ការសន្យាទាំងនេះធ្វើឱ្យកម្មករស្ងប់ចិត្ត អាចចូលធ្វើការវិញបាន។ ខ្ញុំក៏ចង់បញ្ជាក់ដែរថា នីតិវិធីដែលគាត់ធ្វើ គឺមិនត្រឹមត្រូវហើយកូដកម្មនេះជាកូដកម្មខុសច្បាប់ ពីព្រោះអ្វីដែលទាមទារក្នុងនីតិវិធីដោះស្រាយវិវាទការងារគឺពួកគាត់ចរចាជាមួយក្រុមហ៊ុនបើមិនមានដំណោះស្រាយអាចបញ្ជូនទៅនាយកដ្ឋានវិវាទការងារ ហើយបើនៅតែមិនសះជាទៀត ត្រូវបញ្ជូនទៅក្រុមប្រឹក្សាអាជ្ញាកណ្តាល ប៉ុន្តែករណីនេះមិនមែនកើតឡើងនាពេលនេះទេ តែជាអ្វីដែលពួកគាត់គិតទៅថ្ងៃអនាគតរបស់គាត់ខណៈក្រុមហ៊ុនមិនទាន់បានបញ្ឈប់ ឬបិទក្រុមហ៊ុននៅឡើយ»។
ថ្លែងទៅកាន់ក្រុមកម្មករនៅកន្លែងតវ៉ាកាលពីម្សិលមិញ លោក ឃួង ស្រេង បានពន្យល់ថា សាលាក្រុងភ្នំពេញបានដេញថ្លៃជ្រើសរើសយកក្រុមហ៊ុនចំនួន ៣ សម្រាប់ប្រមូលសំរាមទៅថ្ងៃអនាគតក្នុងទីក្រុងភ្នំពេញដែលត្រូវបែងចែកកម្លាំងគ្នា ជាអ្វីដែលកម្មករបារម្ភពីការបាត់បង់ការងារ។
ក៏ប៉ុន្តែលោក ឃួង ស្រេង បានបញ្ជាក់ថា៖ «ក្នុងនាមរដ្ឋបាលរាជធានីភ្នំពេញឱ្យតែបងប្អូនគោរពនូវលក្ខខណ្ឌការងារនៅពេលដែលបែងចែកទៅក្រុមហ៊ុនផ្សេងៗសល់ពីក្រុមហ៊ុនស៊ីនទ្រីជ្រើសរើស រដ្ឋបាលរាជធានី-ភ្នំពេញ នឹងទទួលបងប្អូនទៅធ្វើការនៅក្រុមហ៊ុនផ្សេងទៀតដោយគោរពទៅតាមលក្ខខណ្ឌការងារដែរដោយបងប្អូន មិនបាត់បង់ការងារ មិនបាត់បង់អត្ថប្រយោជន៍ផ្សេងៗ។ ខ្ញុំស្នើសុំឱ្យបងប្អូនកម្មករទាំងអស់ត្រូវនឹងនរក្នុងចិត្តថា បងប្អូនមិនបាត់បង់ការងារមិនបាត់បង់អត្ថប្រយោជន៍ ហើយអ្វីៗត្រូវអនុវត្តទៅតាមច្បាប់»។
ប្រធានសហព័ន្ធ សហជីពកម្មករ និយោជិកវិស័យទេសចរណ៍កម្ពុជា លោក ទូច កុសល បានថ្លែងដែរថា លោកចង់ឱ្យកម្មករត្រឡប់ចូលធ្វើការវិញដោយសារក្រុមហ៊ុន និងសាលាក្រុងបានធ្វើលិខិតស្នាមលាយលក្ខណ៍អក្សរដោយមានការទទួលខុសត្រូវត្រឹមត្រូវផងដែរ។
លោកថា៖ «យើងមានកំណត់ហេតុច្បាស់លាស់ ដែលអាចធ្វើឱ្យយើងទុកចិត្តបានដែលពីកន្លងមកយើងមិនច្បាស់ថា ការងារ និងអត្ថប្រយោជន៍របស់កម្មករតើអ្នកណាទទួលខុសត្រូវ តែពេលនេះយើងដឹងហើយថាក្រុមហ៊ុនស៊ីនទ្រី និងរដ្ឋបាលក្រុងភ្នំពេញទទួលខុសត្រូវលើកម្មករ»។
លោក ម៉ី ផាន អគ្គលេខាធិការនៃសហជីពវិស័យទេសចរណ៍នៃក្រុមហ៊ុនស៊ីនទ្រី បានឱ្យដឹងពីថ្ងៃម្សិលមិញថា មានកម្មករខ្លះជាអ្នកសម្អាតបានយល់ព្រមទៅធ្វើការវិញ តែចំពោះអ្នកបើកបររថយន្ត និងអ្នកកើបសំរាមមិនទាន់សម្រេចចិត្តទេ។
លោកថា៖ «វាពិបាក ខ្ញុំមិនអាចសម្រេចចិត្តជំនួសគាត់បានទេដោយសារមានកម្មករច្រើនមិនព្រមដោយសារពួកគាត់ចង់ឱ្យក្រុមហ៊ុនផ្តល់សំណងឱ្យគាត់ទាំងអស់សិន។ ប៉ុន្តែបើតាមគំនិតរបស់ខ្ញុំ ខ្ញុំចង់ឱ្យគាត់ចូលធ្វើការសិន ដោយសារបើគាត់នៅតវ៉ាយូរគាត់នឹងបាត់បង់ប្រាក់ឈ្នួល អត្ថប្រយោជន៍ផ្សេងៗ»។
កម្មករផ្នែកបើករថយន្តដឹកសំរាមលោក សុផល បានថ្លែងថា លោកហាក់មិនទាន់ពេញចិត្តនឹងដំណោះស្រាយនេះទេ ប៉ុន្តែលោកចាំមើល ប្រសិនបើកម្មករភាគច្រើនវិលចូលធ្វើការងារវិញលោកនឹងចូលដែរ។
លោក ងួន ស៊ីផេង ប្រធានគ្រប់គ្រងហ្គារ៉ាសនៃក្រុមហ៊ុនស៊ីនទ្រីបានប្រាប់ភ្នំពេញ ប៉ុស្ដិ៍ម្សិលមិញថា កម្មករមិនបានចេញធ្វើការទេ ដោយសារពួកគាត់មិនទាន់យល់ព្រម ហើយលោកក៏មិនមានព័ត៌មានថាតើនៅថ្ងៃព្រហស្បតិ៍នេះពួកគាត់នឹងចូលធ្វើការវិញ ឬអត់ទេ?
គួរបញ្ជាក់ផងដែរថា កម្មករប្រមូលសំរាមរបស់ក្រុមហ៊ុនស៊ីនទ្រីប្រមាណជាជិត ២ ០០០ នាក់បានចាប់ផ្ដើមតវ៉ាកាលពីថ្ងៃទី ២ ខែតុលា ដោយស្នើឱ្យក្រុមហ៊ុនដោះស្រាយនូវ ៥ ចំណុចរួមមាន ប្រាក់បំណាច់អតីតភាពការងារ ប្រាក់សំណងជំងឺចិត្ត ប្រាក់ជួសការជូនដំណឹងមុនប្រាក់ខែចុងក្រោយ និងការឈប់សម្រាកប្រចាំឆ្នាំដែលនៅសេសសល់៕
