បន្ទាយមានជ័យៈ មន្ត្រីនៃមន្ទីរការងារខេត្តបន្ទាយមានជ័យបានឲ្យដឹងថា កម្មករបម្រើការនៅរោងចក្រស៊ីសុផុន ហុងសេង ស្ព័តវ៉ែរ ឯ.ក ដែលផ្ទុះការតវ៉ាកាលចុងសប្តាហ៍មុនបានយល់ព្រមចូលធ្វើការវិញហើយក្រោយពីក្រុមហ៊ុនយល់ព្រមតាមសំណើរបស់ពួកគេស្ទើរតែ ១០០ ភាគរយ។
កាលពីថ្ងៃ ៧ ខែកុម្ភៈ ឆ្នាំនេះកម្មករនៅរោងចក្រខាងលើដែលស្ថិតនៅភូមិដីឡូត៍ សង្កាត់ទឹកថ្លា ក្រុងសិរីសោភ័ណ ខេត្តបន្ទាយមានជ័យជាង ១ ពាន់នាក់បានតវ៉ាទាមទារឲ្យក្រុមហ៊ុននេះគោរពច្បាប់ការងារ និងបញ្ឈប់ការគាបសង្កត់លើពួកគាត់។
លោក រស់ សារុំ ប្រធានមន្ទីរការងារខេត្តបន្ទាយមានជ័យបានប្រាប់ភ្នំពេញប៉ុស្តិ៍ពីម្សិលមិញថា ក្រោយផ្ទុះការតវ៉ានៅថ្ងៃដដែលនោះក៏មានការសម្របសម្រួលពីអាជ្ញាធរ និងភាគីពាក់ព័ន្ធដោយមានរូបលោកជាប្រធានដឹកនាំកិច្ចប្រជុំដើម្បីរកដំណោះស្រាយ។
លោកបន្តថា ចំណុចដែលកម្មករទាមទារមានជាង ១០ គឺស្នើឲ្យក្រុមហ៊ុនបើកប្រាក់ឈប់សម្រាកដែលសល់ពីឆ្នាំចាស់ បន្ថែមម៉ាស៊ីនស្គែនក្រយៅដៃ បន្ថែមធុងទឹក និងបង្គន់អនាម័យសម្រាប់កម្មករ បញ្ឈប់ការកាត់ម៉ោងពេលកម្មករសម្រាកអំឡុងពេលដាច់ភ្លើង មានឡានពេទ្យសម្រាប់ដឹកកម្មករនៅពេលមានឧប្បទ្ទវហេតុ កុំបង្ខំឲ្យកម្មករថែមម៉ោងនៅថ្ងៃសៅរ៍ និងថ្ងៃអាទិត្យដែលការទាមទារទាំងនេះក្រុមហ៊ុនបានឯកភាព។
លោក សារុំ បន្ថែមថា ចំណែកការទាមទាររបស់កម្មករឲ្យដកអ្នកគ្រប់គ្រងជាជនជាតិថៃ និងប្រធានរដ្ឋបាលជាជនជាតិខ្មែរ ២ នាក់ គឺភាគីក្រុមហ៊ុនបានស្នើសុំពេល ២ ខែដើម្បីឲ្យបុគ្គលទាំង ២ នាក់នេះកែខ្លួន បើមិនកែទេនឹងមានវិធានការទៅតុលាការ ប៉ុន្តែចំពោះការទាមទារសុំដំឡើងប្រាក់ខែកម្មករដែលបានឡើងតំណែងនោះ ភាគីក្រុមហ៊ុនសុំពិចារណាសិន។
លោកថា៖ «រាល់ការពិភាក្សាភាគីទាំងអស់បានឯកភាពរៀងៗខ្លួនដោយបានបំពេញឯកសារ និងចុះជាហត្ថលេខាពីតំណាងនីមួយៗ។ ខ្ញុំសប្បាយចិត្ត ព្រោះអ្វីៗនៅសម័យនេះទៅហើយ គប្បីបំពេញការងារដោយគោរពទៅតាមច្បាប់ »។
ថៅកែរោងចក្រ ស៊ីសុផុន ហុងសេង ស្ព័តវ៉ែរ ឯ.ក កាលពីម្សិលមិញមិនអាចសុំការអត្ថាធិប្បាយបានទេ ព្រោះមិនអាចរកប្រភពទាក់ទងបាន។
លោក សិរី លីម៉េង កម្មកររោងចក្រម្នាក់បានប្រាប់ភ្នំពេញ-ប៉ុស្តិ៍ពីម្សិលមិញថា ក្រោយការសម្របសម្រួល គឺកម្មករទាំងអស់បានចូលធ្វើការធម្មតាវិញ ដោយភាគីរោងចក្រក៏បានគោរពតាមការសន្យាបណ្តើរៗដែរ។
លោកថា៖ «ពីមុនគាបសង្កត់ខ្លាំង ប៉ុន្តែការតវ៉ាឃើញថា ធូរស្រាលច្រើន ហើយក្រុមហ៊ុនក៏បានគោរពទៅតាមសន្យាដែរ ដូចជាមិនមានអ្វីទេ។ បើមានអ្វីមិនប្រក្រតីនោះយើងបន្តតវ៉ា និងប្តឹងទៅមន្ទីរការងារទៀត»។
លោក ប៊ុន សុធី មន្ត្រីសម្របសម្រួលសហព័ន្ធសហជីពចលនាកម្មករប្រចាំខេត្តបន្ទាយមានជ័យបានថ្លែងថា បើករណីនេះពិតជាមានដំណោះស្រាយមែននោះគឺជារឿងល្អបំផុតសម្រាប់កម្មករ ប៉ុន្តែកន្លងមកពេលមានការតវ៉ាតែងមានការគំរាមកំហែងដល់កម្មករ។ លោកថា រោងចក្រតែងតែព្យាយាមធ្វើទុក្ខបុកម្នេញដល់កម្មករណាដែលហ៊ានចេញមុខតវ៉ា បន្ទាប់ពីស្ថានភាពតវ៉ាស្ងប់ស្ងាត់ទៅវិញ។ ដូច្នេះលោកនឹងបន្តឃ្លាំមើលករណីនេះ ខណៈរោងចក្រនេះនៅមិនទាន់មានសហជីពការពារប្រយោជន៍កម្មករនោះ។
លោកបន្ថែមថា៖ «សម្រាប់ខ្ញុំផ្ទាល់កន្លងទៅប្រហែលវាអាក្រក់ហ្នឹងហើយ ដែលមានការគាបសង្កត់ជ្រុលហួសហេតុពេក រហូតដល់ទ្រាំលែងបានទើបដល់ថ្នាក់កម្មករផ្ទុះការតវ៉ា ព្រោះជាទូទៅកម្មករយើង មានការអត់ធ្មត់ខ្លាំងណាស់ បើមិនមានការគាបសង្កាត់ខ្លាំងក៏មិនហ៊ានធ្វើការតវ៉ាដែរ ដោយសារតែខ្លាចបាត់បង់ការងារ។ យើងរំពឹងថា កម្មករនឹងទទួលបានដំណោះស្រាយពិតប្រាកដ»។
រោងចក្រ ស៊ីសុផុន ហុងសេង ស្ព័តវ៉ែរ ឯ.ក បានបើកដំណើរការកាលពីឧសភា ឆ្នាំ ២០១៨ ដែលមានកម្មករបម្រើការនៅទីនោះប្រមាណ ១ ០០០ នាក់ ដោយមានថៅកែជាជនជាតិថៃ ហើយរោងចក្រនេះកាត់ដេរសម្លៀកបំពាក់ដើម្បីនាំចេញទៅទីផ្សារអន្តរជាតិ។ នេះបើតាមប្រធានមន្ទីរការងារខេត្ត៕