The Phnom Penh Post Search

Search form

Logo of Phnom Penh Post newspaper Phnom Penh Post - កម្មករ​រាប់​ម៉ឺន​នាក់​តវ៉ា​ប្រឆាំង​នឹង​ការ​ដំឡើង​ប្រាក់​ខែ​គោល​ថ្មី




កម្មករ​រាប់​ម៉ឺន​នាក់​តវ៉ា​ប្រឆាំង​នឹង​ការ​ដំឡើង​ប្រាក់​ខែ​គោល​ថ្មី

កម្មករ​រាប់​ម៉ឺន​នាក់​ធ្វើការ​តវ៉ា​នៅ​តំបន់​សេដ្ឋកិច្ច​ពិសេស​ក្នុង​ក្រុង​បាវិត​កាលពី​ម្សិលមិញ​ឈាន​ចូល​ដល់​ថ្ងៃ​ទី​ពីរ​។
កម្មករ​រាប់​ម៉ឺន​នាក់​ធ្វើការ​តវ៉ា​នៅ​តំបន់​សេដ្ឋកិច្ច​ពិសេស​ក្នុង​ក្រុង​បាវិត​កាលពី​ម្សិលមិញ​ឈាន​ចូល​ដល់​ថ្ងៃ​ទី​ពីរ​។ រូបថត សហការី

កម្មករ​រាប់​ម៉ឺន​នាក់​តវ៉ា​ប្រឆាំង​នឹង​ការ​ដំឡើង​ប្រាក់​ខែ​គោល​ថ្មី

ស្វាយរៀងៈ កម្មករ​រាប់​ម៉ឺន​នាក់​នៅ​តំបន់​សេដ្ឋកិច្ច​ពិសេស​មេនហាតធេន និង​តាយសេង នាទី​ក្រុង​បាវិត​បាន​ធ្វើការ​តវ៉ា​រហូត​ដល់​មាន​ការ​បំផ្លាញ​ទ្រព្យ​សម្បត្តិ​របស់​រោងចក្រ​ចូល​ដល់​ថ្ងៃ​ទី​ពីរ​ហើយ​គិត​មក​ដល់​ត្រឹម​ថ្ងៃ​ម្សិលមិញ​ដោយសារ​តែ​ការ​មិន​ពេញ​ចិត្ត​នឹង​ការ​ដំឡើង​ប្រាក់​ខែ​គោល​ត្រឹម​ ១៤០ ដុល្លារ​ដែល​ចាប់​ផ្តើម​នៅ​ខែ​មករា​ឆ្នាំ​ក្រោយ​នេះ​។

ទោះ​យ៉ាង​ណា​គិត​មក​ទល់​ល្ងាច​ម្សិលមិញ​មិន​ទាន់​​មាន​ពាក្យ​បណ្តឹង​ណា​មួយ​ពី​ភាគី​រោងចក្រ​ចំពោះ​ទំហំ​នៃ​ការ​ខូចខាត​នៅ​ឡើយ​ខណៈ​ដែល​កម្លាំង​សមត្ថកិច្ច​ត្រូវ​បាន​ដាក់​ពង្រាយ​ត្រៀម​ទប់ស្កាត់​ខ្លាច​កើត​មាន​អំពើ​ហិង្សា​ធំ​ជាង​នេះ​។

ក្រុម​កម្មករ​ដែល​ភាគច្រើន​បំផុត​ជា​ស្ត្រី​ប្រមាណ ៣ ម៉ឺន​នាក់​​កាលពី​រសៀល​ថ្ងៃ​ពុធ និង​ព្រឹក​ថ្ងៃ​ព្រហស្បតិ៍​ម្សិលមិញ​បាន​ធ្វើ​កូដកម្ម​ឈាន​ដល់​ការ​ប្រើ​ហិង្សា​ប្រើ​ដុំថ្ម​គប់​បំផ្លាញ​កញ្ចក់​ទ្វារ​រោងចក្រ​ក្រោយពី​មាន​កិច្ចប្រជុំ​មួយ​កាលពី​ថ្ងៃ​ចន្ទ​ដើម្បី​ប្រកាស​ពី​ប្រាក់​ខែ​គោល​ថ្មី​ចំនួន​ ១៤០ ដុល្លារ​ដែល​ត្រូវ​ផ្តល់​ឲ្យ​នៅ​ឆ្នាំ​ ២០១៦ ។

លោក ហាស់ ប៊ុនធី ប្រធាន​មន្ទីរ​ការងារ​ខេត្ត​ស្វាយរៀង​ឲ្យ​ដឹង​ថា​កូដកម្ម​ឈាន​ទៅ​ដល់​ហិង្សា​ដែល​បាន​ចាប់​ផ្តើម​ពី​រោងចក្រ Kingmaker ផលិត​ស្បែក​ជើង​មុន​គេ​ដោយសារ​តែ​ការ​មិន​ពេញចិត្ត​នឹង​ប្រាក់​ឈ្នួល​ដោយ​ក្រុម​កម្មករ​មួយ​ចំនួន​ចាប់ផ្តើម​ដើរ​ចេញ​ពី​រោងចក្រ​នៅ​រសៀល​ថ្ងៃ​ពុធ និង​ព្រឹក​ម្សិលមិញ​ដោយ​ធ្វើការ​អុកឡុក គប់​ទ្វារ​បង្អួច និង​កញ្ចក់​រោងចក្រ​។

លោក​ថា៖ «ដោយ​ខ្លាច​មាន​បញ្ហា​ថៅ​កែ​រោងចក្រ​ខ្លះ​ក៏​ឲ្យ​កម្មករ​ចេញ​ពី​កន្លែង​ធ្វើការ​ដើម្បី​គេច​ចេញ​ពី​បញ្ហា​ហើយ​កម្មករ​ខ្លះ​ក៏​ទៅ​ផ្ទះ និង​អ្នក​ខ្លះ​ក៏​អត់​បាន​ធ្វើការ​ទៅ។ រោងចក្រ​ភាគច្រើន​ខូចខាត​នៅ​តំបន់​មេនហាតធេន»។

លោក​ថា​ មាន​រោងចក្រ​ចំនួន​ ៣៩ ដែល​បាន​ចូលរួម​ធ្វើការ​តវ៉ា​នេះ។

កម្មករ​រាប់​ម៉ឺន​នាក់​នៅ​តំបន់​សេដ្ឋកិច្ច​ពិសេស​ក្រុង​បាវិត​ធ្វើការ​តវ៉ា​កាលពី​ម្សិលមិញ​។
កម្មករ​រាប់​ម៉ឺន​នាក់​នៅ​តំបន់​សេដ្ឋកិច្ច​ពិសេស​ក្រុង​បាវិត​ធ្វើការ​តវ៉ា​កាលពី​ម្សិលមិញ​។ រូបថត ហ្វេសប៊ុក

លោក ប៉ាវ ស៊ីណា ប្រធាន​សម្ព័ន្ធ​សហជីព​ចលនា​កម្មករ​បាន​ឲ្យ​ដឹង​ថា​លោក​មិន​មាន​តំណាង​នៅក្នុង​រោងចក្រ​ Kingmaker ដែល​បង្ក​បញ្ហា​នេះ​ឡើយ។

លោក​ប្រធាន​មន្ទីរ​ការងារ​បាន​បន្ត​ថា​ក្រោយ​មាន​ការ​បង្ក​បញ្ហា​នគរបាល​កងរាជ​អាវុធហត្ថ​ខេត្ត​ក៏​ត្រូវ​គេ​ដាក់​ពង្រាយ​បន្ថែម​ទៀត​នៅ​ព្រឹក​ម្សិលមិញ​ដើម្បី​បង្ការ​កុំ​ឲ្យ​មាន​បញ្ហា​គប់​ប៉ុន្តែ​ពួកគេ​មិន​អាច​តទល់​នឹង​កំហឹង​កម្មករ​បាន​ឡើយ។

លោក​ថា៖ «តាម​ពិត​ការ​ខូចខាត​ទ្រព្យ​សម្បត្តិ​មិន​ជា​ច្រើន​ទេ​តែ​កម្មករ​យើង​នៅ​ទី​នេះ​មាន​ទម្លាប់​មិន​ល្អ​ឲ្យ​តែ​ធ្វើ​បាតុកម្ម​ដឹង​តែ​ចង់​ប្រើ​ហិង្សា។ ឯ​សមត្ថកិច្ច​ហាក់​មិន​ហ៊ាន​បង្ក្រាប​អ្វី​ទេ​ព្រោះ​ខ្លាច​មាន​ជាន់​ដាន​ចាស់ (ដូច​ករណី​បាញ់​បោះ​របស់​លោក ឈូក បណ្ឌិត) នៅ​ក្រុង​បាវិត​នេះ»។ ដោយសារ​មាន​បញ្ហា​ខូចខាត​ទ្រព្យ​សម្បត្តិ​រោងចក្រ​ក្រុម​អាជ្ញាធរ​ក៏​បាន​ធ្វើការ​ប្រជុំ​កាលពី​ម្សិលមិញ​ និង​បាន​អំពាវនាវ​ឲ្យ​និយោជក ឬ​ថៅកែ​រោងចក្រ​ដាក់​ពាក្យ​បណ្តឹង​ទៅ​តុលាការ ឬ​នគរបាល​។

កម្មករ​ម្នាក់​ដែល​សុំ​មិន​បញ្ចេញ​ឈ្មោះ​ធ្វើការ​នៅ​រោងចក្រ Best Way ឲ្យ​ដឹង​ថា​លោក​មិន​បាន​ដឹង​ពី​ការ​តវ៉ា​នេះ​ឡើយ​ប៉ុន្តែ​បាន​រង​ការ​បំភ័យ​ដោយសារ​ក្រុម​កម្មករ​ដើរ​បំផ្លាញ​រោងចក្រ។ លោក​ថ្លែង​ថា៖ «អ្នក​តវ៉ា​បាន​គប់​បំបែក​កញ្ចក់​បំផ្លាញ​ទ្រព្យ​សម្បត្តិ​រោងចក្រ​ជាច្រើន​។ ពួកគេ​ធ្វើ​ឲ្យ​យើង​ភ័យខ្លាច​អ៊ីចឹង​ក៏​ថៅកែ​ឲ្យ​យើង​ចេញ​ទៅ​ផ្ទះ​សិន​ទៅ»។

លោក សុខ ខេមរា មន្ត្រី​សម្ព័ន្ធ​សហជីព​ចលនា​កម្មករ​ប្រចាំ​ខេត្ត​ស្វាយរៀង​ថ្លែង​ថា​ដោយសារ​រោងចក្រ Kingmaker មិន​មាន​តំណាង​សហជីព​ណា​មួយ​អ៊ីចឹង​ការ​ធ្វើបាតុកម្ម​មិន​មាន​ផែនការ​ច្បាស់​លាស់​ឡើយ​គឺ​កម្មករ​ផ្ទុះ​ធ្វើការ​តវ៉ា​ដោយ​ខ្លួន​ឯង​រហូត​ឈាន​ដល់​ការ​​ប្រើ​ហិង្សា​ដែល​ជា​រឿង​មួយ​ខុស​ច្បាប់។

លោក ខេមរា បាន​ថ្លែង​ថា៖ «ការ​ធ្វើ​កូដកម្ម​មិន​ដឹង​ចេញ​ពី​ប្រភព​ណា​ពិតប្រាកដ​ឡើយ​គ្មាន​សហជីព​គ្មាន​ភាព​ច្បាស់​លាស់។ តែ​អ្នក​ដែល​ត្រូវ​បន្ទោស​ក៏​គួរ​តែ​មន្ត្រី​អាជ្ញាធរ​ខេត្ត និង​មន្ទីរ​ការងារ​ដែរ ដែល​តែងតែ​បិទ​សិទ្ធិ​សហជីព​មិន​ឲ្យ​ចូល​ជា​តំណាង​តាម​រោងចក្រ​។ អ៊ីចឹង​ហើយ​ទើប​កម្មករ​មិន​សូវ​ទទួល​បាន​ព័ត៌មាន​ពី​រឿង​ការ​ដំឡើង​ប្រាក់​ឈ្នួល​ថ្មី​ដែល​នឹង​ចាប់ផ្តើម​អនុវត្ត​នៅ​ឆ្នាំ​ ២០១៦ ​»។

មន្ត្រី​នគរបាល​ខេត្ត​ ស្វាយរៀង​ ​មិន​អាច​ទាក់ទង​បាន​ទេ​ចំណែក​លោក ហេង សួរ អ្នក​នាំ​ពាក្យ​ក្រសួង​ការងារ​បាន​បដិសេធ​​ធ្វើ​អធិប្បាយ​ដោយ​ថ្លែង​ថា​លោក​ជាប់​រវល់​បេសកកម្ម​នៅ​ប្រទេស​ថៃ៕ រាយការណ៍បន្ថែម៖ ម៉ន វណ្ណតី

អត្ថបទគួរចាប់អារម្មណ៍