ភ្នំពេញៈ កម្មកររោងចក្រកាត់ដេរ សិនតៃ ហ្គាមេន (ខេមបូឌា) អិល ធី ឌី ទាមទារឲ្យថៅកែរោងចក្រផ្តល់ប្រាក់ខែខ្លះ និងផ្តល់ប្រាក់ថ្ងៃឈប់សម្រាកចូលឆ្នាំ ក្នុងអំឡុងពេលនៃការបិទខ្ទប់ភូមិសាស្ត្ររាជធានីភ្នំពេញ និងក្រុងតាខ្មៅនៃខេត្តកណ្តាល ដោយពួកគេបានអះអាងថា ប្រាក់ខែលើកទី ១ ក្នុងខែមេសា ពួកគេទទួលបានមិនគ្រប់ ៥០ ភាគរយនៃប្រាក់ខែសរុបនោះទេ។
រោងចក្រសិនតៃ ហ្គាមេន (ខេមបូឌា) អិល ធី ឌី ZHEN TAI Garment (Cambodia) Co.,Ltd មានកម្មករប្រមាណ ១ ៧០០ នាក់ ដែលមានអាសយដ្ឋានស្ថិតនៅភូមិដំណាក់ សង្កាត់គោកឃ្លាង ខណ្ឌសែនសុខ រាជធានីភ្នំពេញ ត្រូវបានផ្អាកការងារប្រមាណកន្លះខែ ដើម្បីទប់ស្កាត់ការឆ្លងរាលដាលនៃជំងឺកូវីដ១៩ ។
បន្ទាប់ពីចូលធ្វើការវិញ កម្មករ និងសហជីពបានដាក់លិខិតទៅរោងចក្រ កាលពីថ្ងៃទី ១១ ឧសភា ដើម្បីស្នើដល់រោងចក្រនេះឲ្យទូទាត់ប្រាក់ឈ្នួលដែលត្រូវបើកផ្តល់ដល់កម្មករឲ្យបានគ្រប់ចំនួនចន្លោះពីថ្ងៃទី ១ ដល់ថ្ងៃទី ១៣ មេសា និងផ្តល់ប្រាក់ថ្ងៃឈប់សម្រាក រួមទាំងផ្តល់ប្រាក់ឧបត្ថម្ភខ្លះដល់កម្មករ ក្នុងអំឡុងពេលបិទខ្ទប់ចន្លោះពីថ្ងៃទី ១៥ ដល់ថ្ងៃទី ៣០ មេសា។
លោក កឹម សុខឃេន ប្រធានសហជីពស្មារតីកម្មករខ្មែរ ដែល ជាតំណាងឲ្យកម្មករ ប្រាប់ភ្នំពេញប៉ុស្តិ៍ នៅថ្ងៃនេះថា អំឡុងពេលពាក់កណ្តាលខែមេសា កម្មករទាំងអស់ក្នុងរោងចក្រ គឺមិនទទួល បានប្រាក់ឈ្នួលគ្រប់ ៥០ ភាគរយនៃប្រាក់ខែសរុបដែលពួកគេត្រូវទទួល បានពេញ ១ ខែនោះទេ ខណៈកម្មករទទួលបានប្រាក់ខែ ចន្លោះពីជាង ២០០ ដុល្លារ ទៅ ជាង ៣០០ ដុល្លារក្នុង ១ ខែ។
លោកអះអាងបែបនេះ ក៏ព្រោះតែក្រុមហ៊ុន បានបើកប្រាក់ឈ្នួលលើកទី ១ ដល់កម្មករចំនួនតែ ១០០ ដុល្លារប៉ុណ្ណោះ ។
កម្មករទាំងអស់មិនទាន់ទទួលបានការទូទាត់ក្នុងការបើកប្រាក់ខែជាលើកទី ២ សម្រាប់ខែមេសានោះទេ។ ក្រុមហ៊ុនបានប្រកាសថា ប្រាក់នេះនឹងធ្វើការទូទាត់បើកជូនកម្មករនៅថ្ងៃទី ១៣ ខែឧសភា ស្របពេលមានកម្មករជាច្រើន នឹងមិនទទួលបានប្រាក់ខែលើកទី ២ នោះទេ។
លោកបញ្ជាក់ថា៖ «ក្រសួង គាត់ចេញឲ្យរោងចក្រផ្តល់ប្រាក់សម្បទានណាមួយអាចមានលទ្ធភាពឲ្យបាន គឺឲ្យប៉ុណ្ណឹងទៅ។ តែក្នុងពេលបិទខ្ទប់នេះ បងប្អូនកម្មករយើងពិបាកណាស់ ហើយនៅពេលចេញបុងបើកប្រាក់លើកទី ២ នេះ កម្មករខ្លះ គាត់មិនបាន ១ រៀលផង ហើយអ្នកខ្លះបាន ៤០០ លុយខ្មែរ»។
ជាមួយនឹងការទាមទារនេះ កម្មករបានព្រមានធ្វើការតវ៉ា ឬធ្វើសកម្មភាពណាមួយ ក្នុងករណីដែលការបើកប្រាក់ឈ្នួលលើកទី ២ សម្រាប់ខែមេសា មិនអាចផ្គត់ផ្គង់ជីវភាពបាន។ ខណៈនេះ កម្មករទាំងអស់បានធ្វើពហិកាមិនធ្វើការថែមម៉ោងជូនក្រុមហ៊ុននោះទេ។
លោក សា ប៊ុង មន្ត្រីផ្នែកច្បាប់នៃរោងចក្រ សិនតៃ ហ្គាមេន បានប្រាប់ភ្នំពេញប៉ុស្តិ៍ថា រោងចក្រអនុវត្តទៅតាមច្បាប់ និងសេចក្តីសម្រេចនានាដែលចេញដោយក្រសួងការងារ។
លោកបន្តថា ចំពោះការបើកប្រាក់ឈ្នួលនេះគឺក្រុមហ៊ុនធ្វើទៅតាមគោលការណ៍ ហើយចំនួនកម្មករដែលនឹងទទួលបានក្នុងពេលបើកប្រាក់ឈ្នួលលើកទី ២នៃខែមេសា គឺអាស្រ័យទៅតាមកម្មករនីមួយ។
ទោះយ៉ាងណា លោកមិនអាចបញ្ជាក់បានទេ ថា ក្រុមហ៊ុននឹងសម្រេចទៅលើសំណើរបស់កម្មករតាមការទាមទារឬយ៉ាងណានោះទេ។
លោកបញ្ជាក់ថា៖ «ជាទូទៅ រោងចក្រតែងអនុវត្តតាមការណែនាំរបស់ក្រសួង។ ចំពោះសំណើរបស់កម្មករនេះ គឺសម្រាប់ខ្ញុំផ្ទាល់ គឺមិនអាចឆ្លើយបានទេ។ ចាំមើលការងារជាក់ស្តែង ដែលរោងចក្រ បានធ្វើនៅថ្ងៃស្អែក»។
កាលពីអំឡុងខែមេសា ក្រសួងការងារបានណែនាំដល់ម្ចាស់រោងចក្រ សហគ្រាស សិប្បកម្ម និងក្រុមហ៊ុន ឲ្យបើកប្រាក់ឈ្នួលដើមខែមេសា និងប្រាក់ឧបត្ថម្ភបន្ថែមដល់កម្មករនិយោជិតក្នុងអំឡុងពេលនៃការបិទខ្ទប់។ ក្នុងនោះការបើកផ្ដល់ប្រាក់ឈ្នួលដើមខែមេសាត្រូវគិតពីថ្ងៃទី ១ ដល់ថ្ងៃទី ១៤ ខែមេសា ដោយត្រូវផ្ដល់ជូនកម្មករនិយោជិតរបស់ខ្លួន ប្រសិនបើមិនទាន់បើកផ្ដល់នាពេលកន្លងមក។
បន្ថែមពីនេះ ម្ចាស់រោងចក្រ សហគ្រាស សិប្បកម្ម និងក្រុមហ៊ុនក៏អាចផ្តល់ប្រាក់ឧបត្ថម្ភបន្ថែមជូនដល់កម្មករនិយោជិតរបស់ខ្លួនតាមលទ្ធភាព ដោយផ្អែកលើស្មារតីមនុស្សធម៌ សាមគ្គីភាព និងទំនួលខុសត្រូវសង្គមក្នុងគ្រាលំបាករួមនេះផងដែរ។
អ្នកស្រី សេង គន្ធា កម្មកររោងចក្រ សិនតៃ ហ្គាមេន រំពឹងថា ខាងក្រុមហ៊ុន នឹងផ្តល់ប្រាក់តាមការទាមទាររបស់កម្មករ ដើម្បីឲ្យកម្មករអាចមានលទ្ធភាពជាងមុនក្នុងការផ្គត់ផ្គង់ជីវភាព ស្របពេលប្រាក់ខែដែលទទួលបានក្នុងខែមេសានោះ គឺមិនគ្រប់គ្រាន់នោះទេ៕