.jpg)
កម្មករតវ៉ាទាមទារប្រាក់ខែ ៥០ ភាគរយ អំឡុងពេលពួកគេធ្វើចត្តាឡីស័កនៅស្រុកជើងព្រៃ ពីថ្ងៃទី ២៩ ឧសភា។ រួបថត មន្ទីរព័ត៌មានខេត្តកំពង់ចាម
កំពង់ចាមៈ កម្មករនៅរោងចក្រជាង ២ ០០០ នាក់ ស្ថិតក្នុងភូមិសាស្ត្រស្រុកជើងព្រៃ ខេត្តកំពង់ចាម ត្រូវបានក្រុមគ្រូពេទ្យយកសំណាកជាបន្តបន្ទាប់ ដើម្បីឲ្យប្រាកដថា ពួកគេមាន ឬគ្មានជំងឺកូវីដ ១៩ បន្ទាប់កម្មករទាំងនោះ បានប្រមូលផ្តុំគ្នាបិទផ្លូវជាតិលេខ ៦ មិនឲ្យធ្វើចរាចរកាលពីថ្ងៃទី ២៩ ខែ ឧសភា ឆ្នាំ ២០២១។
ការដែលកម្មករផ្ទុះការតវ៉ាបិទផ្លូវនេះ បន្ទាប់ពីពួកគេបានទទួលព័ត៌មានថា មានកម្មករ-កម្មការិនីចំនួន ៥ ទៅ ៦ នាក់ បម្រើការងារនៅរោងចក្រវ៉ាឡុងត្រូវបានរកឃើញវិជ្ជមានកូវីដ ១៩ ហើយត្រូវបាននាំមកព្យាបាលនៅមន្ទីរពេទ្យកូវីដក្នុងក្រុងកំពង់ចាម។
ក្នុងពេលនោះ ក៏មានកម្មករជាង ៣០០ នាក់ បានផ្ទុះការតវ៉ានេះ ដើម្បីទាមទារឲ្យរោងចក្រធ្វើសំណាកកម្មកររោងចក្រទាំងអស់ បន្ទាប់ពីពួកគេបារម្ភពីបញ្ហាឆ្លងកូវីដ ១៩ ចូលក្នុងរោងចក្រ និងទាមទារឲ្យរោងចក្រនេះ ផ្តល់ប្រាក់ឈ្នួល៥០ ភាគរយ ក្នុងពេលដែលកម្មករធ្វើចត្តាឡីស័កចំនួន ១៤ ថ្ងៃ។ នេះបើតាមលោក ចេង ហ៊ាង ប្រធានមន្ទីរការងារ និងបណ្ដុះបណ្ដាលវិជ្ជាជីវៈខេត្តកំពង់ចាម ប្រាប់ ភ្នំពេញ ប៉ុស្តិ៍ នៅថ្ងៃទី ៣១ ឧសភា។
លោក ចេង ហ៊ាង អះអាងថា បន្ទាប់ពីមានការសម្របសម្រួលពីអាជ្ញាធរ គឺកម្មករទាំងអស់ បានយល់ព្រមចូលធ្វើការវិញ ក្រោយពីថៅកែរោងចក្របានយល់ព្រមតាមសំណើ របស់កម្មករ ដោយតម្រូវឲ្យកម្មករទាំងអស់ធ្វើតេស្តគ្រប់គ្នា។កម្មករទាំងនោះនឹងទទួលបានប្រាក់ឈ្នួល ៥០ ភាគរយ ក្នុងអំឡុងពេលធ្វើចត្តាឡីស័ករយៈពេល ១៤ ថ្ងៃ បន្ទាប់ពីទទួលបានលទ្ធផលនៃការធ្វើតេស្តនេះផងដែរ។
លោកបញ្ជាក់ថា៖ «កម្មករបានធ្វើតេស្តអស់ហើយ ចាប់តាំងពីថ្ងៃតវ៉ា រហូតមកដល់ថ្ងៃទី ៣០ ឧសភា គឺយកសំណាកអស់ហើយ។ ប៉ុន្តែរហូតមកដល់ពេលនេះ ក្រសួងសុខាភិបាល មិនទាន់បានផ្តល់ព័ត៌មានឲ្យខ្ញុំទេថា លទ្ធផលរបស់កម្មករយ៉ាងណា»។
បើតាមលោក ចេង ហ៊ាង កម្មករជាង ២ ០០០ នាក់នេះ គឺកំពុងធ្វើការក្នុងរោងចក្រវ៉ាឡុងខេមបូឌា អៅសូលអិនដាសស្ទ្រី អិលធីឌី រោងចក្រម៉ាន់ឡុងស៊ូ ឯ.ក និងរោងចក្រឡុងឈឹងស៊ូផាត ឯ.ក ស្ថិតនៅភូមិឈើទាល ឃុំផ្ដៅជុំ ស្រុកជើងព្រៃ ខេត្តកំពង់ចាម។
លោក អាត់ ធន់ ប្រធានសហភាពការងារកម្ពុជា បានលើកឡើងថា ករណីដែលកម្មករទាមទារក្នុងពេលនេះ គឺជាសិទ្ធិរបស់កម្មករ ស្របពេលដែលក្រសួងការងារ និងបណ្តុះបណ្តាលវិជ្ជាជីវៈ ចេញលិខិតផ្លូវការជាបន្តបន្ទាប់ ឲ្យរោចក្រ ត្រូវទទួលខុសត្រូវចំពោះប្រាក់ឈ្នួលកម្មករក្នុងអំឡុងពេលកម្មករណាម្នាក់ ធ្វើចត្តាឡីស័ក។
បន្ថែមពីនេះ លោកថា ការដែលកម្មករទាមទារឲ្យធ្វើសំណាករកជំងឺកូវីដ ១៩ ក៏ជារឿងមួយដែលត្រឹមត្រូវផងដែរ ព្រោះកម្មករ បារម្ភពីសុវត្ថិភាពខ្លួន ហើយបើមានការធ្វើតេស្តឲ្យប្រាកដប្រជានោះ ពួកគាត់ អាចនឹងលែងមានការព្រួយបារម្ភ។
លោកថ្លែងថា៖«ក្រសួងការងារ និងក្រសួងសុខាភិបាល បានចេញ [លិខិត] ជាបន្តបន្ទាប់ ហើយក្រុមហ៊ុនគួរតែអនុវត្តតាមហ្នឹង។ តែតាមខ្ញុំដឹង គឺមានក្រុមហ៊ុនមួយចំនួន មិនបានអនុវត្តនោះទេ ដែលហេតុនាំឲ្យកម្មករតវ៉ា។ ដូច្នេះដើម្បីចៀសវាងមានការប្រមូលផ្តុំតវ៉ាពីកម្មករ បើក្រុមហ៊ុនណាអនុវត្តមិនបានទេក្រសួងគួរតែចុះទៅត្រួតពិនិត្យក្រុមហ៊ុនដោយការផាកពិន័យ និងផ្អាករោងចក្រទាំងនោះ»។
នៅក្នុងសន្និសីទសារព័ត៌មានស្តីពីការបន្តបិទខ្ទប់ភូមិសាស្ត្ររាជធានីភ្នំពេញ និងក្រុងតាខ្មៅ នៃខេត្តកណ្តាល កាលពីខែមេសា លោកហេង សួរ អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ បានឲ្យដឹងថា រោងចក្រជាង ២០០ កន្លែង បានបិទទ្វារជាបណ្តោះអាសន្ន បន្ទាប់ពីរកឃើញ មានការឆ្លងរីករាលដាលជំងឺកូវីដ ដោយក្នុងនោះ មានកម្មករ ១ ៦៧៣ នាក់ មានផ្ទុកជំងឺ និងកម្មករជាង ១ ម៉ឺននាក់ បានធ្វើចត្តាឡីស័ក៕
